Mateo 10

Jesús twin'ijxy twinway nimajkmäjtsk y'apostol

(Mr 3.13-19; Lc 6.12-16)

1Nits Jesús tyaajxjaay nimajkmäjtsk y'ixpëjkpëttëjjk jäts tmooy mëjk'ajjt nits tyëkpitsë'mtë't tukkë'yë mëjjku'ujy tyumpë jäts mëët tyëktso'oktë't nitukkë'yë jaa'y pëntij pa'am yyëk'ayoojjëtë'p. 2Ya'at nimajkmäjtsk ixpëjkpë yyëkkuxëëw'eetyë apóstoles: Simón, mati' y'ijjty mëët txëëw Pedro, mëët y'ütsy Andrés; Santiago mëët y'ütsy Juan, Zebedeo myajjnktëjjk; 3Felipe, Bartolomé, Tomás, Mateo mati' y'ijjty yëkmeenymyujkp, Santiago, Alfeo myajjnk, Tadeo, 4Simón Canankë'tjaa'y, jäts Judas Iscariote mati' oojknë'm Jesús tkë'yajjk.

Jesús tpakkexy y'apóstoles jäts twaajnë ntsoj tyu'ntë't

(Mr 6.7-13; Lc 9.1-6)

5Nits Jesús tpakkejjxy nimajkmäjtsk y'apostolstëjjk nits tnëëjmjaay: »Katij mnëjkxtë kattëyjyaaw'eetyë'p jaa'y y'itjotm, jäts kä' mtëkkëtë't Samaria y'itjotm; 6Israelë'tjaa'y miits m'anëjkxëtë'p pënjäty takkoo'nyjötypy. 7Nnëjkxtë nits waajnëtë jaa'y jäts winkonnë'p Yës Teety kyuttujjkë'n. 8Yyëktso'oktë pa'amjaa'y, yyëkjükypyëktë oo'kpëttëjjk, yyëkwa'atstë jaa'y pën pu'utspa'am pëjjkëtë'p, yyëkpitsëmtë mëjjku'ujy tyumpë. Najjyë miits tëj myëkmo'oy yë' mataajkë'n, ninyajjts katij xnippëktë ku tij xtu'ntë't.

9Nittij meeny xkapako'ontë't ok pëntij këjx'am tsowatp 10kä' mnittuu'yo'ojyë'k xpatsë'mtë't. Katij wit, kë'ëk, tajjk aweky xpatsëmtë, jä'ku yëkmoypy tumpëttëjjk kyääky jyee'kxy.

11»Ku mja'at'të't tu'uk mëjjkajjpjoojty ok mutsk kajjpjoojty, ijxta'atë jaa'y pën oyjyaa'y, jäjpts mkuttëjjkëtë't kunë'm jä' kajjp mtsoo'nëtë't. 12Ku jä' tëjjk mja'ata'aktë't kajpxpoo'kxtë nitukkë'yë nii'xyë'n jäjp jaa'y kyuttëjjkëtë. 13Pën oyjyaa'yts jä' jaa'ytyë kuytyunë'pts jä', jaa'jë'p jotkujjk'ajjt jä' jëën tëjjk, pën kä'äts jä' y'oyjaa'yë'të kä'äts jä' tyunë't. 14Pënts mkakuppëjjkëtë'p, mkamatoojjëtë'p, tsoo'nëtë jä' tëjjk ok jä' kajjp nits yëkwanaktë naxjok m'ijxmotstekyëjxm. 15Ixyam ëjts nnikkäjpxy jäts jawäänë mëjk jä' jëën tëjjk ok jä' kajjp y'ayoo'npaat'të't ku Yës Teety jaa'y ttëytyu'nt, kä' jä' nii'xyë'n jä'yë y'ayo'otë't naa'xkë'n y'ayootë Sodoma mëët Gomorrë'tjaa'y.

Jesús twaajnë y'ixpëjkpëttëjjk ntsoj y'ayo'otë't

16Ixyam ëjts miits nwaajnëtë, najj ëjts miits nkexy naa'xkë'n worrekë mëy'uk akujkm. Jäts yëkxon mna'y'ijxy'ittëtë't najj naa'xkë'n tsaa'ny jakkäm wyittity, jäts najj tuta'aky'ajjt xjakyäptë't naa'xkë'n pak. 17Na'y'ijxy'ittëtë jä'ku myëkmunëjkxtë'p kumuun jäts myëkwoptë't myëkkoxtë't pënmaj miits wyä'në ka'amaa'yë'n xjatayo'ymyuktë. 18Jäts ëjts këjxm mëët myëkmunëjkxtë't mëjj yëkkuttujkpë wyinkujkm; najjts miits mataajkë'n xmëëtëtë't jäts ëjts xnikkajpxtë't xnimatya'aktë't jäjp yëkkuttujkpë mëët kattëyjyaa'w'eepyëttëjjk wyinküjkypy. 19Kuts najj myëkmunëjkxtë't yëkkuttujkpë wyinkujkm katij kyoojyë xwinmaytyë ntsoj mnakyu'atsowëtë't, jä'ku ku miits mpaattëtë't jäts mkajpxtë't Yës Teety miits mmo'jëtë'p winmaa'ny nits miits oy tsuj mnakyu'atsowëtë't. 20Kä' miits mkajpxt, Yës Teety Jyaa'wë'n miits mkukkajpxëtë'p.

21Nanyimatya'akëtë'p jaa'y tu'kmuku'uktë, nitteety y'uu'nktëjjk tnimatya'aktë't, nits una'ajnktëjjk tyeety tnimatya'aktë't nits kuttunktëjjk yëk'ookkëtë't. 22Nitukkë'yë jaa'y tu'knaxwiin ooky ke'eky m'ijxëtë't mjaw'attëtë't ëjts këjxm; pënts tukkë'yë tpanajxkëjxp nits ëjts xtëyjaa'wë'y'atë'ëtst, jä'äts nitsoojkë'n tpaatp. 23Ku maj kajjp myëkmutsippëtë't, nnëjkxtë jatu'kkajjp; ixyam ëjts nnikkäjpxy jäts kä'änë'm wyä'në Israelë't it xyo'y'apitsëmtë ku naxwiinë'tjaa'y y'Uu'nk jatu'kyaajjë myi'nt.

24»Nippën ixpëjkpë yyëk'ixpëjkpë tkawinäxy, jäts nippën muttumpë wyintsën tkawinäxy. 25Jyämjawë'p jä' ixpëjkpë pën nii'xyë'n yyëk'ixpëjkpë tya'awa'anyë, ninyajjts muttumpë wyintsën twintsë'ëkë't. Mnijaa'w'eetyë'p miits jäts mëjjku'ujy niwintsën yyëkkuxëëwë kuttëjjk, ntsots y'uu'nktëjjk kyayëkkuxëëwë't.

Pën yyëktsë'ëkkë'p

(Lc 12.2-7)

26»Katij jaa'y xtsë'ëkëtë. Jä'ku nittij yu'utsy kya'ijt'ity mati' junë kayëkpaatp, ninyaj yëknijaa'w'eepy jä' mati' amää'tsk yëktump. 27Mati' ëjts miits nwaajnjääpy akoots'attuujy, kajpxnaxtë miits jä' xëëjny'attuujy, jäts mati' ëjts miits nwaajnjäätyë'p amää'tsk toknijaa'wëkyëxtë jä' nitukkë'yë. 28Katij xtsë'ëkkëtë mati' jä'yë nikkëjjx tyëk'oo'kp, kä'äts jä' myayë jaa'wë'n tyëk'ookt; jä' miits mtsë'ëkëtë'p pën nikkëjjx mëët jaa'wë'n tyëkkutakkoypy ayootaajkjötypy.

29»¿Tëj miits x'ijxtë ku mäjtsk joon ttatsotüky tu'uk pujjxmeeny? Kä'äts jä' jaktu'uk y'ooky pën kä' jä' mTeety'ajjt tyëkjäty. 30Jäts miitstë, matsyoy yë' mTeety'ajjt mwaay tyëk'ity. 31Jakëjxts ëjts nwa'any katij mtsë'ëkëtë: Këjx'am miits oy mtsowaat'të.

Katij Jesús xkutso'oyjawëtë jaa'y akujjky

(Lc 12.8-9)

32Pënpën ëjts xkakkutso'oy'eepy jäts ëjts xnikkäjpxy xnimatya'aky jaa'y akujjky, ninyajjts ëjts jä' nnikkajpxt nnimatya'akt ëjts nTeety wyinkujkm jäm tsajpjotm. 33Pënts ëjts xkanikkajpxp xkanimatyakp jaa'y akujjky, ninyajjts ëjts jä' nkanikkajpxt nkanimatya'akt nTeety wyinkujkm jäm tsajpjotm.

Jesús tsip tyëktëkkë tu'kjëën tu'ktëjjk

(Lc 12.51-53; 14.26-27)

34»Katij miits mwinmaytyë jäts jotkujjk'ajjt ëjts nyëkmimpy yaj naxwiiny, tsip ëjts oo'ktëy nyëkmimpy. 35Ejts këjxm yaa'ytyëjjk tyeety ttsiptu'nt, kiixy una'ajnk tyaak tmutsippë't jäts xä'kxy'uu'nk xyä'kxytyaak tmu'ampëkt; 36najjts jääyë tum'amuku'uk nyamyu'ampëkkëtë't.

37Pënpën tyeety tyaak tmëjj'ijxp tmëjjkäjxp jäts kä' ëjts jawäänë xmëjj'ijxy xmëjjkexy kä' ëjts jä' njaa'yë, ok pën tmëjj'ijxp tmëjjkäjxp myajjnk ok nyëëx jäts kä' ëjts jawäänë mëjk xmëjj'ijxy xmëjkexy kä' ëjts jä' njaa'yë; 38pënpën tka'ijxkajpp tyakkoo'ny jäts jawom jawom tkatajottakkoy jäts kya'okpökytyunë't, kä' ëjts jä' xmuppeky. 39Pën jyüky'ajjt ttajottakkoypy jäts oy tsuj jyükyëwya'antë, takkoykyunaxpts jä' jyüky'ajjt, pënts ëjts këjxm yëk'ayoopë'm jüky'eepy, jükyë'pts jä' xëmëkkunäxy.

Tij pyat'të'p pën ëjts xmuttuntë'p

(Mr 9.41)

40Pënpën miits mtsojjkëtë'p mkuppëjjkëtë'p ëjts jä' na'it xkuppëjkp, pënts ëjts xkuppëjkp, jä' jä' na'it kyuppejkypy pën ëjts xpakkäjjxp. 41Pënpën tkuppëjkp yëk'ayuujknajxpë jakëjx ku Yës Teety tmuttüny ninyajjts jä' mëët jyuu'ny pyaatë't naa'xkë'n yëk'ayuujknajxpë; pënpënts tkuppëjkp jaa'y mati' tëy wa'ats jüky'eetyë'p jakëjx ku najj jyükyëtë ninyajjts jä' jyuu'ny yëkmo'ot naa'xkë'n jä' jaa'y. 42Pënts tmoypy jaktu'ktsim xüxynyëëj ëjts npattuu'yo'ypyë, ixyam ëjts nnikkäjpxy jäts yyëkmo'op jä' jyuu'ny.»

Currently Selected:

Mateo 10: YTYA

Highlight

Copy