Deuteronomio 2
2
Wi'ix jyëtijtën jam të'ëts'itjotm
1Ënet ojts nëjkxtës të'ëts'itjotm ets npanëjkxtës ja në'ë tu'u mëti'ipë nëjkxpën jam ma Tsaptsmëjmejyën. E jä'ä ko Wintsën ënety jëtu'un të xytyuk'ëne'emyës, jeky ojts ëëts jam njëtitë të'ëts'itjotm ets na'ëwtijtës tëkokyë ja Seir kopkjot. 2Ënätës ojts yë Wintsën xy'ënëëmë: 3Tëë jyäjknë ma tääpë tun kopk xynya'ëwtitën, tyam nëjkxtë ënät anëkëjxmtsow. 4Jëtu'un xy'ënëëmëty ja naax kajpn: Tyam yë'ë ënät mtuknaxtëp yë nyaaxjotëty yë Esaú yë y'u'unk y'ok, jampë tsyëënëtën Seir, miits yë mjëëky mëku'ukëty. Yë'ëjëty nyija'awëtyëp wa'ats, ko miitsëty mjotmëkjatyëty ets myajtsë'këtyëp. Jä'ä tëy këtii nëkoo xymyëmayëtëty ets miits kë'ëm näkyëwent'atëtë. 5Ets këtii nëkoo xykyë'ënitontëty, jä'ä ko yë'ëjëty ka'apës nitu'knu'unën yë nyaax nkë'ëyakanëtë. Tääpë Seir kopk, yë'ë jyä'ä'ajtëp yë Esaú yë y'u'unk y'ok. Ëjts yë kë'ëm të nmo'otë. 6Nëjkxëp xyjyuytyë yë mkääky m'uukyëty ma yë'ëjëtyën mëti'ipë ënety myajmëyajtëpën ets ja nëë mëti'ipë m'uuktëpën nëjkxëp xykyujuytyë. 7Yë'ë ja'awëy'itë ko Dios mëj këjää xykyënu'kxëmë, oy tii ntimtyu'unëmë. Ix jënu'un wëxtyikxy jyëmëjt të nyäxy ets yë'ë të tyimyajpaaty xëmë mëët ëëts'ajtëmë, ko të jyëtu'un'aty nitii të nkayajmëyajtëmë.
8Ënet ëëts jam najxtë ma txëëwatyën Arabá, Elád ets Esión-guéber, tääts ojts ntukja'tës ja nyaax kyamëty ja njëëky nmëku'ukëtyës, jä'ä jëtu'un ja y'u'unk y'ok ja Esaú mëti'ipë ënety jam tsënaaytyëpën Seir. Jam ojts n'ëwtitës ets n'apatës ja tu'u mëti'ipë najxpën jam Moab. 9Ënet ja Wintsën xy'ënëmaayës: Këtii nëkoo xymyëmayëty ets xynyipëtë'ëkëty yë Moab ja'ayëty. Jä'ä ko yë'ë y'u'unk y'ok yë Lot, yë nyaax kyam mëti'ipë nyitënaaytyëpën nitii xykyajëjp'ixëty. Ëjts kë'ëm të nmo'otë ets tjä'ä'atëty tääpë it naaxwiinyëtë mëti'ipë xyëëwajtypyën Ar. 10Tëëyëp yë'ë ojts jam tsyëënëtë yë ja'ayëty mëti'ipë yajtijtëpën emitas. Tääpë ja'ay nimay ijty jam yajpaatë, jëtu'un myëjjaty'atë ets kyëjxm'atë tä yë y'u'unk y'okën yë ja'aypyajkyeny Anac. 11Yë ja'ayëty jëtu'un ënety tyijëtë refaita ja'ayëty, e yë Moab ja'ayëty jä'ä ënety tyijëtë emitas. 12Ma ya'atë Seir itjotmën, yë'ë ijty yaa tsënaaytyëp yë Hor ja'ayëty. E ko yë Esaú yë y'u'unk y'ëna'k jam jyajtë, ojts ja ja'ay tyajkutëkooytya'atë mëti'ipë jam ijty tsënaaytyëpën ets jä'ä ja naax tniwa'ktë, jëtu'un tä ënety ja Israel ja'ayëty may ja naax të tniwa'aktën mëti'ipë ja Wintsën mooyëtën. 13Ënet ja Wintsën y'ënäny: tyam tsoontë jam ma myajpaatën ets xytyuknaxtëty ja Zéred wok. Jëtu'un'äämpy ntuknajxtës ja nëë wok.
14Jä'ä xëëw maas ntso'ontën jam Cades-barnea ets koos ntuknajxtë ja Zéred nëë wok, jä'ä ënety ja xëëw jëmëjt të nyanajxnë i'px majkmokx tëkëëk jëmëjt. Ja jotmëkja'aytyëjkëty ets ja tsip'ixyëtypë tëë ënety y'o'ktaaynyëtë, jëtu'un tä ja Wintsën ënety të tnikäjpxyën mëët ja aaw ayuk kutujkënmëëtpë. 15Yë'ë ojts tyukëta'akëtë yë ëyo'on ets ja tëytyu'unën, mëti'ipë ja Wintsën kyäjxën, jëtu'un'äämpy y'o'ktaaytyë.
16Ma ojts ka'ap nitu'uk y'ëkyajpatnën ja ja'ay mëti'ipë tsip'ixyën, 17ënätës yë Dios ojts xymyëkäjpxy etsës xy'ënëmaay: 18Ya'atë xëëw mijts xytyuknaxëty yë Moab yë tsyëpa'an ets mnëjkxëty jam Ar. 19E ko mnäpyaatëtëty mëët yë Amón ja'ayëty mëti'ipë yë Lot y'u'unk'ajtyp y'ëna'k'ajtypyën, këtii nëkoo xymyëmayëty ets xyajjotkëxëty. Jä'ä ko yë nyaax kyamëty ka'ap nmo'oja'any nitu'kjënu'un. Tääpë it naaxwiinyëtë ma yë'ëjëty tsyëënëtën, yë'ëjës të nmo'otë ets yë'ë tjä'ä'atëty. 20Ya'atë naax kajpn yë'ë ijty tëëyëp yajtukjä'ä'ajtëp yë Refa ja'ay, yë'ë jam tsënaaytyë, mëti'ipë yë Amón ja'ayëty tyijtëpën zamzumitas. 21Mëj kajpn ënety jam yajpatëp ets nimayjyä'äy jam tsënaaytyëp. Yë ja'ayëty jampë yajpaatën janty këjxmëty ijty tyänëtë ets mëkëty, jëtu'un tä yë ja'aypyajkyeny Anac yë y'u'unk y'okën, e yë Wintsën ojts tyajkutëkoy tääpë naax kajpn, ma ojts yë Amón ja'ayëty myëta'aktën ets jam tsyënaaytyaknpëjktë. 22Yaa näjyëtu'un ojts jyäty kyëpety tä yë Esaú yë y'u'unk y'ëna'k tyajkutëkooytyën ja Hor ja'ayëty, jampë ijty tsyëënëtën Seir ets ko tyajkutëkooytyääytyë tääts ojts ja nyaax tniwa'këtë. 23Timjëtu'un ojts jyatë kyëpätë yë Heve ja'ayëty jampë tsyëënëtën winkon ma Gaza kajpnën, ma yajkutëkooyëtën yë filistejë ja'ayëty ets ojts ja nyaaxëty niwa'kta'ayëtë mëti'ipë ënety të tsyoontën jam Creta ets jam myiintaaytyë tsënääpyë. 24Ënet ja Dios y'ënäny: Tsoontë ets xytyuknaxtëty yë Arnón mëjnëë. Ëjts miits ntukë'ëtëkëjantëp yë Sihón mëti'ipë Amor ja'ayën, jampë yajkutukyën Hesbón, mëët tëkokyë yë nyaax kyajpn. Tëkëtë jam ma nyaax kyajpnëtyën ets tsiptuntë mëët yë'ëjëty. 25Ëjts yam jëtu'un ntuknipëjktakëp ets tëkokyë yë naax kajpn mtsë'ëkëtëty. Ko tmëtoy'atëty mwinkontë, jëtu'un tsyëyuuypyëjkta'atëty ets ka'ap jyotkujk'atëty mëët ja tsë'ëkë.
Ma ja Israel ka'ap tyajmëtä'äkyën ja yajkutujkpë jampë y'ëne'emyën Sihón
26Jamës ënety nyajpaatë të'ëts'itjotm, ma txëëwatyën Cademot, koos ojts nkexy yë kukäjpxy jam ma yajkutujkpën Sihónkën mëti'ipë ënä'ämpën jam Hesbón, etsës nja''amëtooy mëët ja oyjyot oywyinma'any ja najxtakn ma nyaaxjotmën, etsës ojts n'ënëëmë: 27Ëjts jëtu'unës nmay ntajy koos jam njanaxa'any ma mnaaxjotmën, tëyës naxa'any. Yi'iyës yë mëjtu'u npaye'eyäämpy ets ka'apës nëkoo mnaax mkajpn nmëwa'ana'any. 28Ja ka'ayën ukën mëti'ipë ënety ëëts jam npatëpën ma miitsëtyën ets ja nëë mëti'ipës n'uktëpën, ja kë'ëm meeny mëët nkujuytyëtyës. Yi'iyë yam mijts n'amëtoopy npëjktsoopy etsës xyajnaxëty. 29Jëtu'un tä ëëts të xyajnaxtën yë Esaú yë y'u'unk y'ëna'k jampë tsyëënëtën Seir ets tä yë moapja'ayëtyën jampë tsyëënëtën Ar ets koonëm ntuknaxtëtyës ja Jordán mëjnëë ets nja'tëtyës jam ma ja naax kamën mëti'ipë ja Wintsën ëëts xymyo'ojantëpën, mëti'ipës nTios'ajtëpën.
30E ja yajkutujkpë Sihón ka'ap t'a'ijxëy etsës jam naxtëty ma ja nyaax itjotmën. Jä'ä ko ja Wintsën, mëti'ipë miits mTiosajtëpën yë'ë ënety të tuknipëjktaakë ets ka'ap t'a'ixëty jam pën nyaxëty ets tjëkyäpëty wi'ix tkë'ëyakëtyën ma miitsëtyën, jëtu'un tä xy'ixtën tyampaat.
31Ënätës yë Wintsën xy'ënëmaay: Ya'atë xëëw ya'atë po'o yam mijts ntukë'ëtëkë yë Sihón mëët tëkokyë yë nyaax kyajpn. Tëkë akujk jotkujk ma nyaaxjotmën ets niwa'ktaayë yë y'itjot.
32Ja Sihón ojts näjyëtu'un jam tsyo'ompë ma ënety yajpaatyën mëët ja myäytsyiptuunpë ets xynyimiintës jam maas ënety nyajpaatën ets tsyiptuna'any mëët ëëtsëty jam Jahas. 33E yë nWintsën'ajtëm Dios, yë'ë ënety të tkë'ëyäky ma ëëtsëtyën. Paaty ko ja tsip mëët ntuuntës ka'apës nyajmëtaktë. Wa'ats nyaj'o'ktaaytyës mëët ja tsyiptuunpëtëjkëty ets ja y'u'unk y'ëna'këty. 34Tëkokyë yë nyaax kyajpn ojts nyajkutëkooytya'atës, wa'ats nyaj'o'ktaaytyës, ye'etyëjk to'oxytyëjkëty, mëjja'ay mutskja'ay. Ni pën ojts juuky nkayajwë'ëmtës. 35Yi'iyë tëy yë jëyujk tsajpkaa ets winëjaty mëti'ipë tsoowpaatyën ojts njä'äpëktës, mëti'ipë ijty jyä'ä'ajtëpën ja ja'ayëty tëëpë nyajkutëkoytyënës. 36Ja Aroer kajpn wiinkonpë yajpaatyën ma ja Arnón mëjnëëjën ets ja kajpn jampë joyjyotmën ets jampaat Galaad. Nitu'uk ja naax kajpn ojts nkayajmëta'aktës. Yë Wintsën mëti'ipës nTios'ajtëpën, yë'ë ojts jëtu'un tuknipëjktaakë ets tääpë naax kajpn kya'ata'atëty ma ëëtsëtyën. 37E ja naax kajpn mëti'ipës ka'ap nyajkutëkooytyën yë'ë ya'atëty: ja kajpn ma ja Amón ja'ay tsyëënëtën ets ja it naaxwiinyëtë mëti'ipë jam yajpatëpën ma ja Jaboc mëjnëëjën; ja naax kajpnëty mëti'ipë jam yajpatëpën ets tu'kë'ëyë wiinkëtypë ja naax kajpn, mëti'ipë ënety ja Dios të tnikäjpxyën ets ka'ap nitëkëtëtyës.
Currently Selected:
Deuteronomio 2: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
Deuteronomio 2
2
Wi'ix jyëtijtën jam të'ëts'itjotm
1Ënet ojts nëjkxtës të'ëts'itjotm ets npanëjkxtës ja në'ë tu'u mëti'ipë nëjkxpën jam ma Tsaptsmëjmejyën. E jä'ä ko Wintsën ënety jëtu'un të xytyuk'ëne'emyës, jeky ojts ëëts jam njëtitë të'ëts'itjotm ets na'ëwtijtës tëkokyë ja Seir kopkjot. 2Ënätës ojts yë Wintsën xy'ënëëmë: 3Tëë jyäjknë ma tääpë tun kopk xynya'ëwtitën, tyam nëjkxtë ënät anëkëjxmtsow. 4Jëtu'un xy'ënëëmëty ja naax kajpn: Tyam yë'ë ënät mtuknaxtëp yë nyaaxjotëty yë Esaú yë y'u'unk y'ok, jampë tsyëënëtën Seir, miits yë mjëëky mëku'ukëty. Yë'ëjëty nyija'awëtyëp wa'ats, ko miitsëty mjotmëkjatyëty ets myajtsë'këtyëp. Jä'ä tëy këtii nëkoo xymyëmayëtëty ets miits kë'ëm näkyëwent'atëtë. 5Ets këtii nëkoo xykyë'ënitontëty, jä'ä ko yë'ëjëty ka'apës nitu'knu'unën yë nyaax nkë'ëyakanëtë. Tääpë Seir kopk, yë'ë jyä'ä'ajtëp yë Esaú yë y'u'unk y'ok. Ëjts yë kë'ëm të nmo'otë. 6Nëjkxëp xyjyuytyë yë mkääky m'uukyëty ma yë'ëjëtyën mëti'ipë ënety myajmëyajtëpën ets ja nëë mëti'ipë m'uuktëpën nëjkxëp xykyujuytyë. 7Yë'ë ja'awëy'itë ko Dios mëj këjää xykyënu'kxëmë, oy tii ntimtyu'unëmë. Ix jënu'un wëxtyikxy jyëmëjt të nyäxy ets yë'ë të tyimyajpaaty xëmë mëët ëëts'ajtëmë, ko të jyëtu'un'aty nitii të nkayajmëyajtëmë.
8Ënet ëëts jam najxtë ma txëëwatyën Arabá, Elád ets Esión-guéber, tääts ojts ntukja'tës ja nyaax kyamëty ja njëëky nmëku'ukëtyës, jä'ä jëtu'un ja y'u'unk y'ok ja Esaú mëti'ipë ënety jam tsënaaytyëpën Seir. Jam ojts n'ëwtitës ets n'apatës ja tu'u mëti'ipë najxpën jam Moab. 9Ënet ja Wintsën xy'ënëmaayës: Këtii nëkoo xymyëmayëty ets xynyipëtë'ëkëty yë Moab ja'ayëty. Jä'ä ko yë'ë y'u'unk y'ok yë Lot, yë nyaax kyam mëti'ipë nyitënaaytyëpën nitii xykyajëjp'ixëty. Ëjts kë'ëm të nmo'otë ets tjä'ä'atëty tääpë it naaxwiinyëtë mëti'ipë xyëëwajtypyën Ar. 10Tëëyëp yë'ë ojts jam tsyëënëtë yë ja'ayëty mëti'ipë yajtijtëpën emitas. Tääpë ja'ay nimay ijty jam yajpaatë, jëtu'un myëjjaty'atë ets kyëjxm'atë tä yë y'u'unk y'okën yë ja'aypyajkyeny Anac. 11Yë ja'ayëty jëtu'un ënety tyijëtë refaita ja'ayëty, e yë Moab ja'ayëty jä'ä ënety tyijëtë emitas. 12Ma ya'atë Seir itjotmën, yë'ë ijty yaa tsënaaytyëp yë Hor ja'ayëty. E ko yë Esaú yë y'u'unk y'ëna'k jam jyajtë, ojts ja ja'ay tyajkutëkooytya'atë mëti'ipë jam ijty tsënaaytyëpën ets jä'ä ja naax tniwa'ktë, jëtu'un tä ënety ja Israel ja'ayëty may ja naax të tniwa'aktën mëti'ipë ja Wintsën mooyëtën. 13Ënet ja Wintsën y'ënäny: tyam tsoontë jam ma myajpaatën ets xytyuknaxtëty ja Zéred wok. Jëtu'un'äämpy ntuknajxtës ja nëë wok.
14Jä'ä xëëw maas ntso'ontën jam Cades-barnea ets koos ntuknajxtë ja Zéred nëë wok, jä'ä ënety ja xëëw jëmëjt të nyanajxnë i'px majkmokx tëkëëk jëmëjt. Ja jotmëkja'aytyëjkëty ets ja tsip'ixyëtypë tëë ënety y'o'ktaaynyëtë, jëtu'un tä ja Wintsën ënety të tnikäjpxyën mëët ja aaw ayuk kutujkënmëëtpë. 15Yë'ë ojts tyukëta'akëtë yë ëyo'on ets ja tëytyu'unën, mëti'ipë ja Wintsën kyäjxën, jëtu'un'äämpy y'o'ktaaytyë.
16Ma ojts ka'ap nitu'uk y'ëkyajpatnën ja ja'ay mëti'ipë tsip'ixyën, 17ënätës yë Dios ojts xymyëkäjpxy etsës xy'ënëmaay: 18Ya'atë xëëw mijts xytyuknaxëty yë Moab yë tsyëpa'an ets mnëjkxëty jam Ar. 19E ko mnäpyaatëtëty mëët yë Amón ja'ayëty mëti'ipë yë Lot y'u'unk'ajtyp y'ëna'k'ajtypyën, këtii nëkoo xymyëmayëty ets xyajjotkëxëty. Jä'ä ko yë nyaax kyamëty ka'ap nmo'oja'any nitu'kjënu'un. Tääpë it naaxwiinyëtë ma yë'ëjëty tsyëënëtën, yë'ëjës të nmo'otë ets yë'ë tjä'ä'atëty. 20Ya'atë naax kajpn yë'ë ijty tëëyëp yajtukjä'ä'ajtëp yë Refa ja'ay, yë'ë jam tsënaaytyë, mëti'ipë yë Amón ja'ayëty tyijtëpën zamzumitas. 21Mëj kajpn ënety jam yajpatëp ets nimayjyä'äy jam tsënaaytyëp. Yë ja'ayëty jampë yajpaatën janty këjxmëty ijty tyänëtë ets mëkëty, jëtu'un tä yë ja'aypyajkyeny Anac yë y'u'unk y'okën, e yë Wintsën ojts tyajkutëkoy tääpë naax kajpn, ma ojts yë Amón ja'ayëty myëta'aktën ets jam tsyënaaytyaknpëjktë. 22Yaa näjyëtu'un ojts jyäty kyëpety tä yë Esaú yë y'u'unk y'ëna'k tyajkutëkooytyën ja Hor ja'ayëty, jampë ijty tsyëënëtën Seir ets ko tyajkutëkooytyääytyë tääts ojts ja nyaax tniwa'këtë. 23Timjëtu'un ojts jyatë kyëpätë yë Heve ja'ayëty jampë tsyëënëtën winkon ma Gaza kajpnën, ma yajkutëkooyëtën yë filistejë ja'ayëty ets ojts ja nyaaxëty niwa'kta'ayëtë mëti'ipë ënety të tsyoontën jam Creta ets jam myiintaaytyë tsënääpyë. 24Ënet ja Dios y'ënäny: Tsoontë ets xytyuknaxtëty yë Arnón mëjnëë. Ëjts miits ntukë'ëtëkëjantëp yë Sihón mëti'ipë Amor ja'ayën, jampë yajkutukyën Hesbón, mëët tëkokyë yë nyaax kyajpn. Tëkëtë jam ma nyaax kyajpnëtyën ets tsiptuntë mëët yë'ëjëty. 25Ëjts yam jëtu'un ntuknipëjktakëp ets tëkokyë yë naax kajpn mtsë'ëkëtëty. Ko tmëtoy'atëty mwinkontë, jëtu'un tsyëyuuypyëjkta'atëty ets ka'ap jyotkujk'atëty mëët ja tsë'ëkë.
Ma ja Israel ka'ap tyajmëtä'äkyën ja yajkutujkpë jampë y'ëne'emyën Sihón
26Jamës ënety nyajpaatë të'ëts'itjotm, ma txëëwatyën Cademot, koos ojts nkexy yë kukäjpxy jam ma yajkutujkpën Sihónkën mëti'ipë ënä'ämpën jam Hesbón, etsës nja''amëtooy mëët ja oyjyot oywyinma'any ja najxtakn ma nyaaxjotmën, etsës ojts n'ënëëmë: 27Ëjts jëtu'unës nmay ntajy koos jam njanaxa'any ma mnaaxjotmën, tëyës naxa'any. Yi'iyës yë mëjtu'u npaye'eyäämpy ets ka'apës nëkoo mnaax mkajpn nmëwa'ana'any. 28Ja ka'ayën ukën mëti'ipë ënety ëëts jam npatëpën ma miitsëtyën ets ja nëë mëti'ipës n'uktëpën, ja kë'ëm meeny mëët nkujuytyëtyës. Yi'iyë yam mijts n'amëtoopy npëjktsoopy etsës xyajnaxëty. 29Jëtu'un tä ëëts të xyajnaxtën yë Esaú yë y'u'unk y'ëna'k jampë tsyëënëtën Seir ets tä yë moapja'ayëtyën jampë tsyëënëtën Ar ets koonëm ntuknaxtëtyës ja Jordán mëjnëë ets nja'tëtyës jam ma ja naax kamën mëti'ipë ja Wintsën ëëts xymyo'ojantëpën, mëti'ipës nTios'ajtëpën.
30E ja yajkutujkpë Sihón ka'ap t'a'ijxëy etsës jam naxtëty ma ja nyaax itjotmën. Jä'ä ko ja Wintsën, mëti'ipë miits mTiosajtëpën yë'ë ënety të tuknipëjktaakë ets ka'ap t'a'ixëty jam pën nyaxëty ets tjëkyäpëty wi'ix tkë'ëyakëtyën ma miitsëtyën, jëtu'un tä xy'ixtën tyampaat.
31Ënätës yë Wintsën xy'ënëmaay: Ya'atë xëëw ya'atë po'o yam mijts ntukë'ëtëkë yë Sihón mëët tëkokyë yë nyaax kyajpn. Tëkë akujk jotkujk ma nyaaxjotmën ets niwa'ktaayë yë y'itjot.
32Ja Sihón ojts näjyëtu'un jam tsyo'ompë ma ënety yajpaatyën mëët ja myäytsyiptuunpë ets xynyimiintës jam maas ënety nyajpaatën ets tsyiptuna'any mëët ëëtsëty jam Jahas. 33E yë nWintsën'ajtëm Dios, yë'ë ënety të tkë'ëyäky ma ëëtsëtyën. Paaty ko ja tsip mëët ntuuntës ka'apës nyajmëtaktë. Wa'ats nyaj'o'ktaaytyës mëët ja tsyiptuunpëtëjkëty ets ja y'u'unk y'ëna'këty. 34Tëkokyë yë nyaax kyajpn ojts nyajkutëkooytya'atës, wa'ats nyaj'o'ktaaytyës, ye'etyëjk to'oxytyëjkëty, mëjja'ay mutskja'ay. Ni pën ojts juuky nkayajwë'ëmtës. 35Yi'iyë tëy yë jëyujk tsajpkaa ets winëjaty mëti'ipë tsoowpaatyën ojts njä'äpëktës, mëti'ipë ijty jyä'ä'ajtëpën ja ja'ayëty tëëpë nyajkutëkoytyënës. 36Ja Aroer kajpn wiinkonpë yajpaatyën ma ja Arnón mëjnëëjën ets ja kajpn jampë joyjyotmën ets jampaat Galaad. Nitu'uk ja naax kajpn ojts nkayajmëta'aktës. Yë Wintsën mëti'ipës nTios'ajtëpën, yë'ë ojts jëtu'un tuknipëjktaakë ets tääpë naax kajpn kya'ata'atëty ma ëëtsëtyën. 37E ja naax kajpn mëti'ipës ka'ap nyajkutëkooytyën yë'ë ya'atëty: ja kajpn ma ja Amón ja'ay tsyëënëtën ets ja it naaxwiinyëtë mëti'ipë jam yajpatëpën ma ja Jaboc mëjnëëjën; ja naax kajpnëty mëti'ipë jam yajpatëpën ets tu'kë'ëyë wiinkëtypë ja naax kajpn, mëti'ipë ënety ja Dios të tnikäjpxyën ets ka'ap nitëkëtëtyës.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.