Éxodo 10
10
Ja maymyu'u mëti'ipë näjyëtu'un ëyo'on'ajtën.
1Ënet yë Dios t'ënëmaay yë Moisés:
Nëjkx xy'ixy yë yajkutujkpë, ëjts tëëjës ntuknipëjktaakë ets ka'ap jyä'äkyukëty, näjyëtu'un yë wyintsëntëjk, jëtu'un'äämpyts tjëkyäpëty ets ntuk'ixëtyës ja nmëj'ajtënës mëti'ipës ntunäämpy nkajpxäämpyën. 2Ets nëjkx jëna'a xytyukmëmëtyä'äky yë m'u'unk m'ok ets m'ok'u'unk m'ok'ëna'k, wi'ixës ënety të ntukxi'iky të ntuk'ëwë'ëkyën yë Egiptë ja'ayëty ets näjyëtu'un wi'ixës mëj këjää të nyaj'ixyën ja nmëj'ajtënës ma yë'ëjëtyën, jëtu'un'äämpy xynyijawëtëty, ko ëjts Wintsën.
3Moisés ets ja Aarón ojts jam nyëjkxtë ma ja yajkutujkpën ets t'ënëmaaytyë:
Jëtu'un y'ënä'äny ja Wintsën mëti'ipë yë hebreo ja'ayëty Tyios'ajtëpën ¿jëna'a jëtää miitsëty yu'unk naxym m'ëk näpyëjkta'akëtëty maas ëjtsën? Ëxmajtskës yë nnaax nkajpn wä'änës min xy'ëwtaty. 4Jä'ä ko pën mijts je'eyëmën xy'ëtuky yë nyë'ë'aaw tyu'u'aawëty yë nnaax nkajpnës, tim jëpomës nkäxëty yë maymyu'u ets myäyjya'tëty yaa ma mnaax mkajpnën. 5Yajxon nëjkx yë naaxwiinyëtë tyajwintuktë ets nimaa winwa'ats yë naax kyakëxë'ëkëty. Yë'ë nëjkx tjaakyajkutëkooytya'atë ja aay ujts mëti'ipë ënety jää yiin wään të jyaakwë'ëmyën, ko ja tëtsn tuu nyäjxy ets nëjkx twinkä'pta'atë ja aay kepy, mëti'ipë jam tunkëjxm kopkkëjxm yajpatëpën. 6Nëjkxëp tyajtuktujkta'atë yë mkutujktakn ets mjëën mtëjk, näjyëtu'un yë mwintsëntëjk yë jyä'äjëty mëti'ipë mëët mtuunmukyën ets tu'kë'ëyë yë jyëën tyëjkëty yë Egiptë ja'ayëty. Ya'atë jëtu'unpë tyuna'any jyata'anyën ka'ap yë mteety m'ap t'ijxtë, ko jyuuky'ajtë ets jëtu'un tyampaat.
Ko ojts kyajpxta'ay, ënät ja Moisés wya'akwinpijty ets ojts tsyo'onë ma ja mëj'ënä'ämpë yajkutukyën. 7Ënet ja wintsëntëjkëty y'ënantë:
¿Tyaapë ja'ay jëna'a jëtääjën kyu'uxa'anyë je'eyëpë amay jotmay nëkoo tyajminyën? Wintsën nikë ëxmatstë wä'än tnëjkxtë, wä'än nëjkx yë Tyiosëty t'ëwtatë mëti'ipë yë'ëjëty wyintsën'ajtëpën. ¿Tii këtiitën xytyim'ixy mijts wintsën wi'ix yë Egiptë kajpn o'ktëy jyajnë kyëpäjnë?
8Ënet ja mëj'ënä'ämpë ojts jatëkok tmëkäjpxy ja Moisés ets ja Aarón, tä t'ënëmaay:
Nëjkx ëwtatë yë mWintsënëty mëti'ipë mTiosajtëpën. Je'eyëp ko tuk'ëwa'anëkës pënjaty nëjkxaanp.
9Tä ja Moisés y'ëtsooy:
Nëjkxta'ajantëp ëëtsëty ni'ëmukë, mëjja'aytyëjkëty, pi'k'ëna'ktëjkëty, njëyujk ntsajpkaajëtyës, ntsajppaxëty nkupixynyëtyës, jä'ä ko ëëtsëty mëj xëëw tu'uk nyaj'apaatëjantëpës maas nmëjjawëja'antën ja nWintsënëtyës ja xyëëw.
10E ja mëj'ënä'ämpë tyaa y'ënäny: Wa'ats tyimyajmëtoowkojy ko miitsëty wiink winma'any mëët'ajtëp. ¿E miitsëty jä'äjëtën m'ënantëpë ko Dios yë'ë mjämyëët'atanëtëp, ëkë m'ënantëpën jëtu'unë, ko n'ëxmatstëp ënät yam mëët yë m'u'unk m'ëna'këtyë? 11Ka'ap ma jëtu'unpë. Aak miitsëty nëjkxkojtë aak ye'etyëjktëjk ets mëj'ëna'ktëjkëty, nëjkx ëwtatë yë mTiosëty, yë'ëxëtën mtsojktëp.
Tä ja mëj'ënä'ämpë ni'ënä'ämëy ets jap yajmëpëtsëmtëty ma ënety japëtyën. 12E ja Dios ojts t'ënëëmë yë Moisés:
Xajtëw yë mkë'ë ets myintëty yë maymyu'u, wä'än tyajkutëkooytya'atë yë aay ujts mëti'ipë yajpatëpën naaxjoty kajpnjoty ets ja mëti'ipë ojts näjyëtu'un jyaakwë'ëmyën, ko ja tëtsn tuu nyäjxy.
13Moisés ojts ja kyë'ë txajtëy ets ja Dios tyajmiiny yë mëkjëënpoj ma ja naax kajpnën, ko xyiinytyäky jyajtäky, ënät yaj'ijxpaty, ko tëëtëm ënety ja mu'u myäyjya'të mëët ja jëënpoj. 14Tä tukye'eyëtyääytyë tëkokyë ja naax kajpn. Nijëna'a ënety jëtu'un kyayaj'ixynyëm ja maymyu'u tä jam kyëxë'ëkyën ets näy ka'ap nëjkx jëtu'un nijëna'a y'ëkyaj'ijxnë jëtu'un tä ojts kyëxë'ëkyën jä'ä xëëw. 15Yajxon tjantyajwintujktaaytyë ja naaxwiinyëtë, nimaa ojts kyayaj'ixy winwa'ats, yë'ë ojts tjaakyajkëjxta'atë ja aay ujts ets ja aaytyëëm ujtstëëm mëti'ipë ënety të jyaakwë'ëmyën ko ja tëtsn tuu nyäjxy. Nimaa ja aay ujts ojts tsuxk kyawë'ëmy jap Egiptë, ni jam kamjotm tu'ujotm ets ni jam kepykyëjxm.
16Ja mëj'ënä'ämpë ënätyë tnikäjxëy yë Moisés ets Aarón, tä t'ënëmaay:
Pokyës jëtu'un të njanty tyuny ma mTiosëtyën ets ma miitsëtyën. 17Tyam miitsëty n'amëtow npëjktsowtë ets yä'ätyë jëtu'unë etsës xypyokymyä'kxtëty ets xymyënu'kxta'aktëty yë mWintsënëty, wä'än tjëpëky ya'atë ëyo'on jotmay ma ëëtsëtyën.
18Ko ja Moisés jap tsyo'ony ma ja mëj'ënä'ämpë jap yajkutukyën, ënät ja Dios ojts tmënu'kxtä'äky. 19Tä ja Dios tyajtëkajty ja jëënpoj ets tyajmiiny tu'uk yë tëtykpyoj, mëti'ipë ojts tyajnëëkupojta'ayën ja maymyu'u ma ja Tsaptsmejyën. Jap Egiptë ka'ap ojts jap nitu'uk wyi'imy yë mu'u. 20Yë Dios yë'ë ojts kë'ëm tuknipëjktaakë ets ja mëj'ënä'ämpë ëxëëk kujuun nyäpyëjkta'akëtëty ets ka'ap tsojk'ëxmatsëty ja Israel kajpn.
Ja kootsajtën mëti'ipë ojts y'ëyo'on'atyën
21Ënet ja Dios ojts t'ënëëmë ja Moisés:
Xajë'ëk yë mkë'ë ets yujkxaj tsajpkëjxm ets kyootsëtya'ajëty ma tëkokyë Egiptë kyajpnën, yajxon jëtu'un kyootsëtyëkoyëty, jëtu'un yaj'ixëty mëpaatëp yowë yajtoonë.
22Ënet ja Moisés ojts ja kyë'ë tjanty xyajjë'ëky, ko jëtu'un txajë'ky ënät kyootsëtyëkooy jap Egiptë. 23Tëkëëk xëëw jëtu'un y'ijty koots, yajxonëtën kyootsëty, ni pën ojts ma kyanëjkxy jä'ä xëëw. E jam ma ja Israel ja'ayëty tsyëënëtën të'kxp jajp ja jampë.
24Tä ja yajkutujkpë ojts tmëkäjpxy ja Moisés ets t'ënëmaay:
Nëjkx ëwtatë yë mWintsënëty, mënëjkxtë näjyëtu'un yë m'u'unk m'ëna'këty; e yë'ë tëy yë mjëyujk mtsajpkaajëty, mtsajppax mkupixynyëty yaa xyajwë'ëmtëty.
25Tä ja Moisés y'ëtsooy:
Ni'ikyë mëpaat xymyo'otë ja mjëyujk mtsajpkaa, mëti'ipës ja Dios ntukwintsë'ëkëtëpën, mëti'ipës nwintsën'ajtëpën. 26E yë njëyujk ntsajpkaajëtyës, nyajnëjkxta'ajantëpës yë'ëjëty. Nitu'uk mëpaat yaa kyawë'ëmy ëjts yë njëyujk ntsajpkaajëty, jä'ä ko nwin'ixantëp ëëtsëty mëti'ipë mëpaat yë Wintsën yajtukwintsë'ëkën. Tyam maas ka'ap jam nja'tënëm ka'apës nijawëtë tiijaty mëyataanp.
27E yë Dios nän yë'ë kë'ëm tyajkutuky ets ja mëj'ënä'ämpë ka'ap ninu'un jyä'äkyukëty ets ka'ap tsojk'ëxmatsëty ja Israel ja'ayëty. 28Ja mëj'ënä'ämpë tyaa ojts ja Moisés t'ënëëmë:
Nëjkx, winwa'ktutkës yaa ets ijxkëm ko jatëkok yaa miny, pën jääjës jatëkok yaa xynyiminy, ka'ap m'ëk näjyëjp'ijxënëty juuky mwinpitëty.
29Tääts ja Moisés y'ëtsooy:
Oy ko jëtu'un m'ëna'any, ka'apës yaa n'ëkwinpijnëty.
Currently Selected:
Éxodo 10: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
