Éxodo 18
18
Jetro tninëjkxy yë Moisés ets tku'ixëja'any
1Yë Jetro mëti'ipë jam teety'ajtpën Madián, yë Moisés yë myë't, ojts tnijawë, wi'ix ënety yë Dios mëj këjää winë të tuktunyën yë Moisés ma ja nyaax kyajpnën, ja Israel kajpn. Ojts näjyëtu'un tnijawë ko tëë ënety ja Dios jap jyuutëtë Egiptë. 2Yë Moisés tëë ënety mëët nyäjyëkajpxënë ja tyo'oxytyëjk mëti'ipë xyëëwajtypyën Séfora, jam ojts tkexy ma ja tyeetyën, e ja tyeety oy ojts y'ëxajëty. 3Ojts twoowminy nimäjtsk ja myaank, tu'uk jä'ä xyëëwajtyp Guersón, jä'ä ko tyaa ojts yë Moisés y'ënä'äny: Ëjts jaaypyaat jaaypyo'kxyës nyajpaaty wiink kë'ëy wiink kajpn. 4Ja wiinkpë ja myaank jä'ä xyëëwajtyp Eliézer, jä'ä ko tyaa ojts y'ënä'äny: Ja Dios mëti'ipës ja nteety Tyiosajtën, yë'ëjës të xynyiminy etsës të xypyutëkë. Paatyës ojts xyajtso'oky ma ja yajkutujkpë xyjyayaj'okanyësën.
5Yë Moisés jam ënety ja wyittëjk të tkojy ma ja të'ëts'itjotmën, winkon ma ja kopkën mëti'ipë ja Dios kyopk'ajtypyën. E jam ojts ja Jetró nyinëjkxyë mëët ja Moisés ja tyo'oxytyëjk ets nimäjtsk ja y'u'unk. 6Tä ja Jetro t'ënëmaay ja Moisés:
Ëjts Jetro, mëti'ipë mijts më't'ajtypyën, tyaajës të nminy etsës mijts mpaata'any n'ixa'any; tëëjës näjyëtu'un nwoowminy yë mto'oxytyëjk ets nimäjtsk yë myaank.
7Ënet ja Moisés jap pyëtsiimy tyëkoty ets ojts tjëjpye'eyi'iky ja myë't. Tä nyaaxkooy tyajnikëxë'ëky jëtu'un ja näwyinkutsë'ëkë ets ojts tsu'kxy. Ko nyäkyajpxpo'kxtaayëtë, ënät jap tyëjkëtyë tëkoty ma ja wit tëjkën. 8Tä ja Moisés jap ja myë't tukmëmëtyaktaay, wi'ix ënety ja Wintsën të tunyën ja Egiptë mëj'ënä'ämpë, näjyëtu'un tëkokyë ja Egiptë ja'ayëty ets wi'ix ënety të yajputëkëtën ja Israel ja'ayëty, ma ja y'amay jyotmayëtyën kanaakpë ets wi'ix ja Dios të yajtso'okëtën.
9Yë Jetró mëk tukxoontäky, wi'ix ënety ja Dios ja y'oyjyot y'oywyinma'any të tyajnikëxë'ëkyën ma ja Israel ja'ayëtyën, ko ënety jap të yajpëtsëmëtë ma ja Egiptë ja'ayëty të kyë'ë'ampëkëtën, 10ets y'ënäny:
Kënu'kxy mëjjawë yë Dios y'ity, mëti'ipë miitsëty të myaj'ëwaatsëpëtsëmëtën, mëti'ipë jyä'äy'äjtypyën yë Israel, ma ënety ëxëëk tyunëtën yë Egiptë mëj'ënä'ämpë ets ja Egiptë ja'ayëty. Ko të mjëwowëtë ma jam ëyo'onjëjp'am të myajpaatën, 11ma ënety o'ktëy mjatën mkëpätën. Tyamës ënät yajxon njanty nyijawë ko yë Dios mëj yë ni'ik, këtiinëm jyëtu'unëty yë wiinkëtypë tiosëty tääpë myäjyatëtën.
12Ënet ja Jetro ojts tu'uk tyaj'ooky yë jëyujk ets tnino'oka'any jam Dios wyintum, tmëjjawëja'any ets tkënu'kxyjyawëja'any ja Dios, ëpëky ojts tkë'ëyäky yë näyoxë. Ënet yë Aarón ets ja mëjja'aytyëjkëty, mëti'ipë nyimëjja'ay'ajtëpën ja naax kajpn ojts jam nyëjkxtë kääpyë ukpë mëët ja Moisés ja myë't Dios wintum.
Moisés tnikajpxpety wiinkëtypë ja'ay mëti'ipë ënä'ämtëpën
13Komjëpom tä ja Moisés nyaaxwe'tsy ets tpaye'eyä'äny, mëti'ipëjaty ja naax kajpn y'amay'äjtyp jyotmayäjtypyën, ja ja'ayëty mëti'ipë jam ja jyotmayëtyën tu'kxëëw jam yajxon tsyënaaytyë. 14Ko ja Jetro jëtu'un t'ijxy wi'ix ënety ja Moisés winë tunyën, ënät y'ënëmaayë ja myë't:
¿Wi'ix ko mijts nätyu'uk mnäyajtunyë? Tsojk ja'ay myiinkojtë ma mijtsën ets jëtu'un xyëënaxtë. ¿Wi'ix ko ya'atë jotmay atu'uk xywyinkuwa'akë? ¿Yë'ëjëty ëyoowtëp mëk ko tu'kxëëwpaaty tyänëtë?
15Tä ja Moisés y'ëtsooy:
Jä'ä ko yë naax kajpn ëjts xynyimiinp ko tii tnijawëja'antë ma Tiosën. 16N'ëkpëjktakmëty, ko tiitsip tiikäjpxy tmëët'atë ëjts pojën xynyimiintëp etsës nipaye'ey pën ja poky myëët'ajtypyën, ëkë pën mëtëy winë tyuunpy kyäjpxypën ets jëtu'un ntuknijawëtës ja Dios ja y'ënä'ämën tyiyajtën ets ja y'aaw y'ayuk.
17Ënet ja myë't Jetro y'ënëmaayë:
Tä ya'atë yam xytyunyën ka'ap niwi'ixtsow y'oyëty. 18Jä'ä ko mijts nëkoo je'eyë mnäyaj'ënu'kxëty ets ja'ayëty mëti'ipë jam tu'kxëëwpaaty mnatënaayëpën. Ya'atë tuunk mëti'ipë mtuunpyën mëk oynyë ets mijts atu'uk xytyuunk'aty, ko jëtu'un tyu'uye'eyëty ka'ap mëta'akëty. 19Paaty mëtoow'it yajxon wi'ix yam ja ëëwijën kajpxwijën nmo'oja'anyën ets Dios yë'ë mputëkëtëp. Mijts yë'ë mpatëp ets xykyutänëty yë naax kajpn ma Tiosën, jëtu'un ijxtëm jeexyë yë'ë kë'ëm tyimmintën Dios wyintuuy. E mijts yë'ë mpatëp ets ja Dios xytyuk'ëwaanëty mëti'ipë yë'ëj jyotmay'ajtëpën. 20Tääpë ja'ayëty jëyëjp xytyuk'ixpëkëty wi'ix ja tëyajtën myinyën ets ja ënä'ämën kuttujkën xytyuknijawëty; wi'ix mëpaat jyuuky'atën ets tii mëpaat tuntën. 21Mëti'ipë tëy mijts mtunëp, win'ix kanaak yë ja'ay mëti'ipë m'a'ijxëpën oy winë tuntë ets tsyë'këtyëp yë Dios ets mëtëy winë tkajpxtë tmëtya'aktë, ijxtëm yë ja'ayëtyën mëti'ipë ka'ap tii yë myëku'uk awin'ëënë tpëjkën ets jëtu'un xytyuknipëkëty ya'atë tuunk, mëti'ipë wyintänëtëpën ja ja'ayëty nitu'kmiljaty, nitu'kmëko'pxjaty, niwëxtyikxymyajkjaty ets nimajkjaty. 22Yë'ë nëjkx winë tnipaye'eytyë oy tyimjëna'ajëty ma ja naax kajpnën; e ja jotmay mëti'ipë timkëjääjën yë'ë mtukniminëtëp, e mëti'ipë nayiin nawäänën yë'ë kë'ëm yajwintu'upëktëp. Ko jëtu'un xytyunëty mëj këjää ënety ja tuunk mnätyuknipëjktu'utyë. Tääpë ja'ayëty yë'ë nëjkx mputëkëty ets oy ja mtuunk wyimpëtsëm jyëjpëtsëmëty. 23Ko ya'atë jëtu'un xytyunëty ets pën Dios yë'ë ënaanp, jyëkyäpëp wi'ix xymyëmëta'akëtyën. E yë ja'ayëty nän akujk jotkujk nëjkx wyimpijnëtë, ma ja jyëën tyëjkëtyën.
24Moisés ojts tkäjpxymyëmëtoy ja myë't ets jëtu'un tuuny, tä ënety të y'ënë'ëmxëtyën: 25Ojts twin'ixy ja ja'ayëty mëti'ipë winë oy tyuuntëpën jam ma ja Israel kajpnën ets tmooy ja ënä'ämën kuttujkën ma ja ja'ayëtyën tu'kmiljatypë, nimëko'pxjatypë, niwëxtyikxymyajkjatypë ets ma ja nimajkjatypyën. 26Yë'ë ijty winë pyaye'eytyëp oy tyimjëna'ajëty ma ja naax kajpnën. E ja amay jotmay mëti'ipë mëj këjääjën yë'ë tyukninëjkxtëp ja Moisés; e ja mëti'ipë nawäänën yë'ë kë'ëm yaj'o'oyëtëp. 27Jëtu'un nyäjxy ja xëëw po'o ets ja Moisés ojts mëët ja myë't nyäjyëkajpxënë. Ja myë't ojts jatëkok wyimpijnë ma ja nyaax kyajpnën.
Currently Selected:
Éxodo 18: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
