Éxodo 26
26
Ja tsajptëjk
1Oytyun tu'uk yë tsajptëjk, majkwitsy xyajtunëty yë linë wit awiity, ukywyit, tsu'unk wit ets tsaptswit; jam xykyëxjo'okëty yë tsajpjotmëtë kukäjpxy y'awinax. 2Tëkokyë ya'atë wit atëëytyuk tu'knax mëpaat kyijpxy'atë tuktujk xajpk ja tu'kkë'ënux y'ayeny'atëty ets tu'kxajpk ja tu'kkë'ënux myëjwiin'atëty. 3Mëkoxk nëjkx xy'axuuymyuky, yajxon xyajnäynyiwitsëtëty ets jatu'kpëky mëkoxk näjyëtu'un xy'axuuymyukëty, 4ets xytyukpa'ajo'okëty yë ëtsi'itjut mëët yë ukypyiity, ma ja mëti'ipë jëyëjp të xy'axuuymyukyën ets näjyëtu'un ma ja wiinkpën. 5Jëtu'un tä ja wit'atëëytyuk ënety të xy'axuuymyukyën ja mëjëyëjpë ets ja okpë, wëxtyikxy majk yë ëtsi'itjut xyajkojëty ets tu'knax yaj'awijtsmukëty. 6Oytyun näjyëtu'un wëxtyikxy majk yë nyijo'kn aakyë'ë pu'ts pujxn, mëti'ipë mëët yajtuk'ajo'kmuktëty ja wit'atëëytyuk mëti'ipë të yaj'axuuymyukyën ets jëtu'un ja tsajptëjk tu'ukyë ja ijxën tpëkëty.
7Oytyun näjyëtu'un majktu'uk yë po'o'atëëytyuk, aakyë'ë tsajppax nyipo'o myajtuunëp ets yë'ë xytyuknitëyëty ja tsajptëjk. 8Tu'kë'ëyë ya'atë po'o'atëëytyuk aak tu'knax mëpaat kyijpxy'atë; taxtujk xajpk y'ayeny'atëty ets tu'kxajpk ja tu'kkë'ënux myëjwiin'atëty. 9Axuuymyuk tu'kpëky yë wit'atëëytyuk ets näjyëtu'un xy'axuuymyukëty yë wiinkpë e ja mëtëtujkpë ja wit'atëëytyuk yë'ë mnä'äkwinpitëp ets yë'ë wyë'ëmëty wintuuytsyow ma ja wit tëjk ja nyitëjkëtyaknën. 10Oytyun näjyëtu'un wëxtyikxy majk yë nyijäänë'ëk, mëti'ipë jam mpëjkta'akëpën ma ja wit'atëëytyuk yaj'ajë'pmukëtyën ets wëxtyikxy majk xy'oytyunëty mëti'ipë jam tunëpën ma ja wiinkpë ja wit'atëëytyukën. 11Wëxytyikxy myajk näjyëtu'un xy'oytyunëty yë nyi'ajo'kn aakyë'ë tsuxkpujxn ets jëtu'un xyjyo'kmukëty ma ja jäänë'ëkën ets ja wit tëjk jëtu'un tu'ukyë nyämyatsëtëty. 12E jä'ä ko yë tëjk atëëytyuk yë nyiwit yenyëty, paaty kujkwä'kxy jap xyajkutëëynyaxëty jëxkë'p'äämpy ma ja Dios ja jyëën tyëjkën. 13Jëtu'un'äämpy nëjkx ja mëjtsajptëjk wyi'imy nituky mëët ja wit mëti'ipë ënety natëjkëpën, mëti'ipë kutëëynyajxpën pë'aay, jä'ä y'itëty tu'kë'ëtsom tu'kpa'ajatyëty ets näjyëtu'un ja tu'kpa'a.
14Oytyuunë näjyëtu'un ya'atë wit tëjk yë nyikäm, aakyë'ë kupixyny ayääkë'ak mtuknikkämëp, mëti'ipë tëë wyatsnën tsapts, ëpëky näjyëtu'un xytyuknikkämëty yë oyjyätypë po'o.
15Nipëjktaakë näjyëtu'un kanaak yë kepyjyiity, acacië kepy mëti'ipë jap tunëpën ma tsajptëjkën ets kujkyëty xypyëjktakta'ajëty ets tëywyijtsnëty. 16Tu'ukjatypë ja kepyjyiity ya'atë kijpxën myëët'atëp. Jä'ä y'ayeny'atëty tëkëëk xajpk ets tu'kkë'ënux ja kujkm myëjwiin'atëty. 17Jam ma kepyjyiity yë pya'ajën mtuktsäjtstu'utëp jam ets jëtu'un yajxon nyätyukjänëtëty, aakjëtu'un xytyuunta'ajëty yë kepyjyiity mëti'ipë tunaanpën ma tsajptëjkën. 18Ko ënety jam xy'oytyuny, i'px ja kepyjyiity xyajkojëty, mëti'ipë mpëjkta'akëpën ëpa'tkë'ëy'äämpy. 19Näyjyëtu'un xypyëjkta'akëty yë nyi'ëjx, wëxtyikxy xynyipëjktaakëty, aakyë'ë mtuk'oytyunëp yë poop pujxn ma jam yajxon xyajkëxwa'akëtyën ja kepyjyiity. Tu'ukjaty ja kepyjyiity mäjtskpëky ja y'ëjx yajmo'ojëty ets jëtu'un yajxon ja kepy ta'tspëky nyätyukjänëtëty.
20Ja anëkëjxytsyowpë yajpaatyën ma tsajptëjkën, nän i'px näjyëtu'un ja nyikepyjyiity xyajkojëty. 21Näyjyëtu'un ja nyi'ëjx wëxtyikxy aak poop pujxn mtuk'oytyunëp, jëtu'un ja kepyjyiity tpëktëty ja y'ëjx mäjtskjatyëty. 22E ja mëti'ipë jap a'oytsyow yajpatpën, jä'ä ja nyikepyjyiity xy'oytyuunëty tëtujk. 23Majkjaty ja kepyjyiity xytyuknipëjktaakëty, mëti'ipë ma tyäkën tunëpën. 24Ya'atë kepyjyiity yë'ë mëët yë myëku'uk nyäpyaatëtëty jampë këjxm y'ityën. Näyjyëtu'un yaj'oytyunëty ja mäjtskpë ja kepyjyiity ma ja mäjtskpë ja tyäkën 25Jä'ä tëkokyë nyäpyata'ayë ja kepyjyiity tuktujk ets ja y'ëjx majkmokx tu'uk. Aakyë'ë mëët y'oytyuny'atëty yë poop pujxn, mäjtskjatyëty ja kepyjyiity ja y'ëjx yajmo'ojëty tu'ukjatypë.
26Oytyun näjyëtu'un mëkoxk yë kepy yë pëkixëtypë, mëti'ipë yajtukmajts'itëpën ja kepyjyiity tu'kpa'a ma tsajptëjkën, aakyë'ë acacië kepy. 27Mëkoxk ja nyikepy mëti'ipë ja kepyjyiity yajtukjë'pnaxëpën mëti'ipë tunaanpën matsow ja tsajptëjk ja pya'ajën, mëkoxk näjyëtu'un mëti'ipë yajtukjëëpëpën ja kepyjyiity mëti'ipë a'oytsyow tunaanpën. 28Ja nyikepy mëti'ipë yajtukëëyë'ëkëpën itkujky nyaxëty ma ja kepyjyiityën. 29Tääts ja kepyjyiity xytyukniwitsëty yë pu'ts pujxn ets xy'oytyuunëty näjyëtu'un yë nyijäänë'ëk ma yajtijnaxëtyën ja nyikepy, mëti'ipë yajtijpën nyipa'tkapë. Tëë ënety jëyëjp yajwinkooytyä'äy mëët yë pu'ts pujxn. 30Tääts ënät xyajkojëty ja tsajptëjk, tä të nmo'oyën ja nyi''ijxpät ma ya'atë tun kopkën.
31M'oytyunëp näjyëtu'un tu'uk yë wit mëjpë mëti'ipë y'atëëytyukëpën, kanaak yë y'ujkën tmëët'atëty: ukywyit, tsu'unk wit, tsaptswit ets linë wit awiity; jam xyajkëxkojëty mäjtsk yë awinax jëtu'unpë kyëxë'ëkyën, tä yë tsajpjotmëtë kukäjpxyëty y'awinax käkn mëëtpë. 32Ënet xy'oytyuunëty näjyëtu'un yë nyijo'kn, jam xykyëxtëyëty ma ja nyixeny ënety të yajpëjktä'äkyën taxk, aakyë'ë ajë kepy, tä näjyëtu'un xytyukniwitsëty yë pu'ts pujxn ets y'ëjx xy'oytyuunëty oy majktaxkën yë poop pujxn. 33Tääts ënät jam xykyëxtëyëty ja atëëytyuk ma ja nyijo'knën, jap jëxkë'ptsow xypyëjkta'akëty ja kaaxë, mëti'ipë myë'ijtypyën ja käjpxytyu'unën; ya'atë wit'atëëytyuk yë'ë yaj'ëwä'kxy'itëp ja wa'atspë ja tëkot mëët ja mëti'ipë ni'ikwa'atsën 34Tääts ënät xy'akë'ëjëty ja kaaxë, mëti'ipë ënety jap të xypyëjktä'äkyën ma tëkotën, mëti'ipë yajtijpën tëkot kënu'kxypyë. 35Pëjkta'ak näjyëtu'un ja kaaypyäjn tëja'ptsow ma wyi'imyën ja wit'atëëytyuk, anëkëjxy'äämpy xypyëjkta'akëty, e yë mëj jëëntooytyakn ëpa'tkë'ëy'äämpy xypyëjkta'akëty, jëtu'un mëët yajxon nyäwyinku'ixëtëty ja kaaypyäjn.
36Oytyun näjyëtu'un tu'uk yë wit'atëëytyuk mëti'ipë mtuk'atëëytyukëpën, ma jam yajnitëkën yë tsajptëjk. Jä'ä y'ixë'atëty yë nyi'ujkën: uky, tsu'unk, tsapts ets linë wit awiity. Yajxon oy tsuj jyo'oky'atëty. 37Ets xy'oytyuunëty mëkoxk yë nyikupë aakyë'ë acacië kepy ets xytyukniwitsëty yë wa'ats pu'ts pujxn, mëët yë nyipu'ts pujxnjo'kn ets y'ëjx xy'oytyuunëty oy mëkoxkën, aakyë'ë tsuxkpujxn.
Currently Selected:
Éxodo 26: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
