Éxodo 28
28
Ja wyit tyujkxyëty ja teetytyëjkëty
Ex 39:1-31
1Ma Israel ja'ayëtyën, yë m'ajty Aarón yë'ë xëmë winkon myaj'itëp mëët yë y'u'unk y'ëna'k mëti'ipë xyëëwajtëpën; Nadab, Abihú, Eleazar ets Itamar, yë'ëtsës xëmë xymyëtuntëp ma tsajptëjkën. 2Oytyun yë wyit tyujkxy yë m'ajty Aarón mëti'ipë oy tsuj yajkëxë'ëkëtëpën. 3Mëëtmëtya'ak yë ja'ay mëti'ipë tyukjajtëpën wi'ix oy yë wit tujkxy tyajkojtëtyën, yë'ë yajtukni'oytyunëty yë Aarón mëti'ipë yam yajkënu'kxaanpën ets yë'ë jap tyunëty jëënjoty tsajptëkoty. 4Ya'atë wit y'oytyuntëp: katsyjyän, kejky yä'äp, nijän, tëyxyuywyit mëti'ipë nëjkx tjo'oktën, kupit ets ja wëën. 5Mëti'ipë ya'atë wit yaj'oyëjantëpën nëjkxëp tyajtuntë yë pu'ts pujxn ets wit mëti'ipë koyën tsu'unk, mëti'ipë ukyën, mëti'ipë tsaptsën ets mëti'ipë yajtijpën oywyitne'eky.
6Yë kejky yä'äp aak pu'ts pujxn mëët yaj'oytyunëty, ukywyit, tsu'unk wit, tsaptswit ets linë wit awiity ets oy jyo'oky'atëty. 7Mäjtsk yë nyitëëyë'ëk mäjtsk'atu'umëty. 8Ja nyiwëën mëti'ipë itëpën ëpa'tkë'ëy ma ja kejky yä'äpën, tu'ukyë mëët nyämyatsëtëty, yë'ë mëët yaj'oytyunëty yë pu'ts pujxn ets ja witëty mëti'ipë koyëtyën tsu'unk, uky, tsapts ets ja linë wit awiity.
9Jam xypyëjkta'akëty mäjtsk yë tsaa oypyë, jamts xykyëxjaaytya'ajëty tëkokyë ja xyëëwëty yë Israel ja y'u'unk y'ëna'k. 10Jëtu'un ojts yajkëxja'atë ijxtëm nyäpyamiinëtën naaxwiiny, tu'kpëky tëtujk yajkëxjaaytyë ets näjyëtu'un jatu'kpëky. 11Mëti'ipë ya'atë jëtu'unpë tyuunk'atëpën, yë'ë mëti'ipë yajxon nyija'awëtëpën wi'ix winë yajtsa'ayën. Jam xyajkëxmëta'akëty ja tsaa ma të yajni'oytyunën aak pu'ts pujxn, 12ets jam xykyëxpëjkta'ajëty ma ja kejky yä'äp ja nyitëëyë'ëkën yë'ë ya'atë tsaa jyä'ämyätstëp yë Israel ja'ayëty. Yë Aarón xëmë tmënëjkxëty yë Israel yë xyëëw, ko jam nyäwya'këxë'ëkëtëty ma Tiosën ets jëtu'un jyä'ämyätsëtëty. 13Ja kyëxmëtakpäjn yë'ë mëët xy'oytyuny'atëty yë pu'ts pujxn. 14M'oytyunëp näjyëtu'un tu'uk yë pujxntä'äky mëët mäjtsk yë nyitejpxy aak pu'ts pujxnëpë, jam xypyëjkta'akëty ma pya'ajën ja këxmëtakpäjn.
15Ja katsyjyän mëët ja mëti'ipë tuunpën ko winë yajnipaye'ey, jëtu'un xy'oytyunëty tä ja kejky yä'äpën, oyëty jyo'oky'atëty, yë'ë mëët xy'oytyunëty yë pu'ts pujxn ets ja wit mëti'ipë koyëtyën: tsu'unk, uky, tsapts ets ja linë wit awiity. 16Amäjtskwitsy y'itëty ets taxktatsk, jä'ä ja pya'a myëjwiin'atëty i'px mëkoxk kë'ë'u'unk. 17Ets jam xykyëxpëkëty yë tsaa oyëtypë, majktaxk waats xypyëjkta'akëty, ma mëtu'kwaatspën yë'ë myëët'atëp: tu'uk yë tsapts tsaa, tu'uk yë të'kxy tsyaa ets tu'uk yë tsuxktsaa. 18Ma ja mëmäjtsk waatspën yë'ë myëët'atëp: tu'uk yë uky tsyaa, tu'uk yë tsuxk'uky tsyaa ets yëktsuxk tsaa. 19Ma ja mëtëkëëk waatspën yë'ë myëët'atëp: tu'uk monytsyapts tsaa, tu'uk yë yëktsapts tsaa ets tu'uk yë niiypyu'ts tsaa. 20Ma ja mëmajktaxk waatspën yë'ë myëët'atëp: tu'uk yë pu'ts tsaa, tu'uk yë uky tyapts tsaa ets tu'uk yë tsu'unk tsaa. Ya'atë tsaa aakjam kyëxmëta'akëty ma ja kyëxmëtakpäjnën aak pu'ts pujxnpë. 21Jä'ä ja tsaa xypyëjkta'aktëty majkmäjtsk, jä'ä ko yë Jacob yë y'u'unk y'ëna'k nyimajk mäjtsk'atë. Ma tu'ukjatypë ja tsaajën jam yajkëxtsa'ajëty ja ja'ayxyëëw, jëtu'un tä tii yajkëxtsa'ayën.
22Oytyun tu'uk yë piity jyo'oky aak pu'ts pujxn myajtunëp, mëti'ipë jam mpëjkta'akëpën ma kyätyjyänën, jëtu'un y'ixë'atëty tä yë tejpxyën axaatsypë. 23Oytyun näjyëtu'un mäjtsk yë jäänë'ëk aak pu'ts pujxnpë ets mäjtskpa'ajëty xytyukwiintëty ja kyätyjyän. 24Mäjtsk yë piity jyo'oky xytyuktëëyë'ëkëty mäjtsk'atu'um yë katsyjyän, jam ma ja nyijäänë'ëk ënety të xypyëjktakën; ja piity jyo'oky aak pu'ts pujxn mëët y'oytyuny'atëty. 25Ets xypyëjkta'akëty mäjtsk yë jyëjp yë piity jyo'oky, ma mäjtsk ja kyëxmëtakpäjnën ets xytyuumta'atsëty mëët yë kejky yä'äp yë nyitëëyë'ëk jam jëjp'am. 26Oytyun näjyëtu'un mäjtsk yë jäänë'ëk aak pu'ts pujxnpë ets xypyëjkta'akëty mäjtsk'it ma katsyjyänën, ja mëti'ipë mtukutsumëpën mëët yë kejky yä'äp. 27Oytyun wiinkpë jäänë'ëk, nän ja mäjtsk, aak pu'ts pujxn ets xypyëjkta'akëty jam jëjp'am ma kejky yä'äp yë nyitëëyë'ëk jyä'tyën; pa'tkë'ptsow xyajnaxëty, jää ma xyuyajtën nyäxyën, jää xykyijpxtsoonëty ma ja kejky yä'äp ja nyitëëyë'ëk y'ityën. 28Ets yaj'atsuumukëty yë nyijäänë'ëk yë katsyjyän mëët yë kejky yä'äp yë nyijäänë'ëk, mëët yë piity xyäätsy mëti'ipë koyën uky ets katsyjyän nëkëjxy wyë'ëmëty ma ja nyiwëënën ja kejky yä'äp ets jëtu'un ka'ap ëwä'kxyjyäty y'itëty. 29E paaty ko ënety yë Aarón jap tyëkë ma mëjtsajptëjkën mëët yë katsyjyän ets mëti'ipë winë mëët tuknipaye'eytyën, jam tnijän'atëty ets tmënëjkxëty ja xyëëw ja Israel ja y'u'unk y'ëna'k jam Wintsën wyintum ets yë'ë xëmë yajtukja'amyätstëp. 30Ënet xypyëjkta'akëty ma katsyjyänën ja tsaa'u'unk mëti'ipë mëët winë yajnijawën mëti'ipë yajtijpën Urim ets Tumim. Ja tsaa'u'unk mëti'ipë mëët winë yajnijawën yë'ë ijty winë tyuknipaye'eytyëp. Ets Aarón jam tmënëjkxëty kyejkyijxy, ko nyäwya'këxë'ëkëtëty jam Dios wyintum. Yë Aarón xëmë tmënëjkxëty mëti'ipë winë tyuknipaye'eyëpën, ko nyëjkxëty jap ma Wintsënën.
31Yë kejky yä'äp yë'ë mtuknixuyëp yë ukywyit. 32Yajxon xytyuknixuyëty yë nyi'aaw ma këpajk nyaxëtyën. Ma nyi'aawën jëjpnä'äkwinpity jam y'itëty jëtu'un ijxtëm y'oytyunyëtyën yë po'onijän këtiipë kyëëtsëty. 33Yajxon ya'atë nijän oy xy'oytyuunëtëty, yë nyi''ijxën yë'ë mtuk'oytyuntëp yë piity mëti'ipë koyën tsu'unk ets mëti'ipë ukyën ets mëti'ipë tsaptsën ets yë'ë mëët xykyëxuyëty yë pujxn u'unk aak pu'ts pujxnpë tëkokyë ma wit pa'ajën. 34Jä'ä n'antijyës, ko tu'uk yë pujxn u'unk jëyëjp xypyëjkta'akëty ets ok ja piity tyä'äky pikjatypë. Jëtu'un xypyëjktakta'ajëty tëkokyë ma ja pya'ajën. 35Yë Aarón xëmë tmënëjkxëty ya'atë nijän ko jap tyëkëty ma tsajptëjkën Wintsën wintum. Jëtu'un ko ënety tyëkë, ëkë ko ënety pyëtsimy yë'ë yajmëtowëp ja pujxn u'unk ko y'ëna'antëty ets jëtu'un yajtuknijawëty ko yë'ëjëty ets ka'ap y'ookëty.
36Oytyun tu'uk yë tsya'a aakyë'ë wa'ats pu'ts pujxnpë ets jam xyajkëxkojëty tä tu'uk yë tsa'a'ajtënën, jä'ä jam xyaj'ëna'anëty: Dios ya'atë të yajmo'oy. 37Jam xypyëjkta'akëty ya'atë tsya'a ma kyupitën, wintuuytsyow, yë'ë mtukutsumëp yë ukypyiity xyäätsy ets ta'tspëky wyë'ëmëty. 38Yë'ë Aarón ya'atë tsyëëm'itëp ets yë'ë tukëtakpäjta'ajëtëp ja Israel ja'ayëty ja nyëë pyokyëty, näjyëtu'un ko ja yojxën tkë'ëyakëty ma ja Tiosën, yë Dios ko t'ixëty ya'atë tsya'a, ënätnëm t'ëxajëty tkupëkëty ja yojxën mëti'ipë ënety yajmoopyën.
39Ma ya'atë nijän xy'oytyuna'anyën, yë'ë myajtunëp yë oywyit ets mnijo'okëp näjyëtu'un, yë nijän oywyit mtuk'oytyunëp, yë nyiwëën yajxon mëpaat yajjo'oky ijxtëm mëpaat oy kyëxë'ëkyën. 40Näyjyëtu'un mëti'ipë pyëjkta'aktëpën yë Aarón yë y'u'unk y'ëna'k, oytyun kanaak yë nijän ets näjyëtu'un yë wëën ets kupit mëti'ipë oy yajkëxë'ëkëtëpën.
41Jëtu'un xyoxëty ja m'ajty Aarón ets ja y'u'unk y'ëna'k ets xytyukkujaaxëty ja waaytsyooy ma kyëpajkën ets xymyëtuntëtyës jëtu'un tä teetytyëjkëtyën. 42Oytyuunë näjyëtu'un yë pya'tk'ëxmotsëty mëti'ipë tyuk'ëtuktëpën yë ye'etyëjk'ajtënëty, yë'ë m'oytyunëp yë oywyit. 43Yë'ë ya'atë wit pyëjkta'aktëp yë Aarón mëët yë y'u'unk y'ëna'këty ko jap tyëkëtëty ma wit tëjkën ma näpyaatë y'ityën ets näjyëtu'un ko twinkuwa'akëtëty yë wintsë'këntyakn, ëkë ko ënety jap yë tyuunk tyajtu'uye'eytyë mëët ko tyeety'atë, këtiipë nëjkx tii tëkatsy tuntë ets y'ëk'o'knëtëty. Ya'atë ënä'ämën tëyajtën yë'ë xëmë itëp ma yë'ëjëtyën ets ma ja y'u'unk y'okëtyën.
Currently Selected:
Éxodo 28: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
