Éxodo 30
30
Ja poom ja nyiwintsë'këntyakn
1Oytyun tu'uk yë wintsë'këntyakn, yë'ë myajtunëp yë acacië kepy ets jam tyoyëty yë poom. 2Taxktatsk xy'oytyunëty, tu'kkë'ënux xyaj'ayeny'atëty ets xyajmëjjwiin'atëty tu'kkë'ënux ets xyajkëjxm'atëty mäjtsk kë'ënux, ja nyiwaj tu'ukyë mëët nyämyatsëtëty ja wintsë'këntyakn. 3Ets xynyikooytya'ajëty mëët yë pu'ts pujxn mëti'ipë nëkëjxy ijtpën ets majktaxkëty ja pya'a ets ja wyajëty ets näjyëtu'un ëpëky yë pu'ts pujxn xytyukpa'awitsëty. 4Pëjkta'ak yë nyitëëyë'ëk aak pu'ts pujxn ma y'awits pa'tkën, mäjtsk xypyëjkta'akëty ma jam mäjtsk ja tyatskën tu'kpa'apë ets nän mäjtsk ma ja wiinkpën ets jap ja kepy yajtijnaxëty mëti'ipë yajtukëëyë'ëkëpën. 5Ya'atë kepy yajtijyën witsë, yë'ë ajë kepy myajtunëp ets ënät xytyukniwitsëty yë pu'ts pujxn. 6Ja potsy ma ja wintsë'kën yajyäkyën jam xypyëjkta'akëty ma yajpaatyën yë wit'atëëytyuk, mëti'ipë jam winkon yajpatpën ma kaaxën mëti'ipë myë'ijtypyën yë käjpxytyu'unën, jëyëjp wyë'ëmëty, maas ëjts näpyaata'anyën mëët mijts. 7Xëmë winjopy yë Aarón tpëjkta'akëty yë poom ets yë'ë jap pa'akxuukëp, jää xëëw tpëjkta'akëty ma ja kutë'kxn tyaj'oyëtën. 8Näyjyëtu'un ko jyënäkyxyëëwajnëty yajtoyëp jää ko näjyëtu'un ja kutë'kxën tjëjpkonëty. Ya'atë jëtu'unpë xëmë yaj'oytyuntëty Wintsën wyintum, tyim itëty jëtu'un kë'ëyxyëëw kë'ëyjyëmëjt. 9Këtii oymyëti'ipë poom xypyëjkta'akëty ma ya'atë wintsë'këntyaknën ets ni yë'ë tsajpmok jam xykyapëjkta'akëty ets ni yë'ë tsatym nyëë jam xykyaxijkxjëtitëty. 10Ya'atë wintsë'këntyakn wa'ats mëpaat y'ity mëti'ipë yë Dios yë'ë të yajtuknipëjktaakën, winjëmëjt yë Aarón tukuutsëty yë kupixyny nye'pny, mëti'ipë yajyajkpën ma ja nëë poky yajtukunaxyën, winjëmëjt xykyë'ëyaktëty tu'uk yë wintsë'kën mëti'ipë mnatyukunaxëtëpën mëëtkyëjxm ja mpokyëty ets jëtu'un myajpokywyinmä'kxtëty.
Wi'ix mëpaat ja juukyajtën këtii tyëkoyën
11Ënet ja Dios ojts tninëjkx ja Moisés ets t'ënëmaay:
12Ko xyajpëtë'ëkëty tu'uk yë jaaymyujkën, ma tu'ukjaty ja Israel ja'ay yajkëxja'ayën ja xyëëw, yakëp wäänë oytyiijëty ets yë'ë ja jyuukyajtën tukuyakëty, mëti'ipë ja Dios jä'ä myo'ojëpën, këtiipë tii ëyo'on kyëta'akëty ma jyuuky'ajtënën mëët ko ënety ja jaaymyujkën myuky. 13Tëkokyë mëti'ipë yajkëxjaaytyën ma ja jaaymyujkën y'ijtyën, ya'atë nëjkx tyaktë ma ja Tiosën: mëkoxk nikonë yë poop pujxn, ya'atë kijpxën yë'ë mëti'ipë jap ijtpën ma tsajptëjkën. 14Tëkokyë mëti'ipë ënety yajkëxjaaytyëpën ma ja jaaymyujkën y'ityën, yë'ë mëti'ipë i'px ja jyëmëjnën ets jëtu'un tyimnëjkxy, aakjëtu'un nëjkx tmo'otë ja Dios ja ayajk ako'onën. 15Ko xyaktëty ya'atë m'ayajk m'ako'onënëty ma Tiosën, mëët ko ënety ja mjuukyajtën jä'ä xytyukniyajktu'utë, ka'ap yë kumeenyjyä'äy ni'ik jyä'ä tyakëty ets ni'ëyoopëja'ay wäänë tkayakëty, aak këëk mëkoxk nikonë ja poop pujxn xyaktëty. 16Paaty mijts myajmukëp ya'atë poop pujxn, mëti'ipë ënety yë Israel ja'ayëty nätyukuyajkëtëpën ets jap xykyë'ëyakëty ma ja wit tëjkën ma ja näpyaatë y'ityën mëët ja Dios. Yë'ë ya'atë Dios tyukja'amyätsëp yë Israel ja'ayëty, mëët ko ënety ja jyuuky'ajtën tëë tnikëpäjtu'utë.
Ja pujxn kë'ëpujtakn
17Ënet ja Dios ojts tmëkäjpxy ja Moisés ets t'ënëmaay:
18Oytyun tu'uk yë kë'ëpujtakn, yë'ë pujxn mtuk'oytyunëp mëti'ipë yajtijpën tsuxkpujxn, ma y'ëjxën y'ita'anyën nän pujxn jap mpëjkta'akëp, yë'ëts wa'anëp kë'ëpujtakn, jap nëjkx xypyëjktä'äky itkujky ma ja wit tëjkën ma ja näpyaatë y'ityën mëët ja wintsë'këntyakn ets xyaj'utsëty mëët yë nëë. 19Yë Aarón mëët ja myaankëty jap yë nëë tjuutëty ets kyë'ëpuj tyekpyujtëty. 20Jëtu'un nyäpyuj nyäjyä'ätsëtëty, ko koo jap tyëkëtëty ma ja wit tëjkën ma ja näpyaatë y'ityën mëët ja Dios, näjyëtu'un ko jam yajpaatëty ma wintsë'këntyaknën ets ja wintsë'kën tnino'oka'antëty Dios wintum, jëtu'un'äämpy ka'ap nëjkx y'ooktë. 21Këtiipë y'ooktëty, kopkpëky ko tpujtëty tjä'ätstëty yë kyë'ë tyekyëty. Ya'atë ënä'ämën xëmëkyëjxm y'itëty ma Aaronkën ets ma y'u'unk y'okën.
Ja on mëti'ipë yajtukkënu'kxpën winë
22Ënet ojts ja Dios tmëkäjpxy ja Moisés ets t'ënëmaay:
23Ëxta'a mijts kë'ëm yë aay ujts mëti'ipë pa'akxu'kpën, tëtujk tsim mëti'ipë ni'ik pa'akxu'kpën, tëkëëk tsim yë canelë, tëkëëk tsim yë waxk mëti'ipë pa'akxu'kpën, 24tëtujk tsim yë casië ets tëkëëk tsim jakujkmën yë olivë on, yë'ë kijpxën myajtunëp mëti'ipë jap ijtpën ma tsajptëjkën. 25Tëkokyë ya'atë aay ujts xy'apëjkmujkta'ajëty ets xy'oytyunëty tu'uk yë on, mëti'ipë mtukënu'kxëpën oy tii, jëtu'un nëjkx xytyuunk'aty tä tu'uk yë pa'akxu'kpë oytyuunpë tyaj'oyën yë pa'akxu'kpë. Ya'atë jëtu'un on'atëp wa'atspë, mëti'ipë tunëpën ets yajtukkënu'kxëty oytyiijëty. 26Nëjkxëp xytyuknixijkxy yë wit tëjk ma ja näpyaatë y'ityën ets näjyëtu'un ma ja kaaxën mëti'ipë myë'ijtypyën ja käjpxytyu'unën, 27ja kaaypyäjn mëët tëkokyë ja y'apëjk y'atu'unën, ja mëj jëëntooytyakn ets tëkokyë jënu'un mëët tyunyën ets ja poom wintsë'këntyakn, 28ja wintsë'këntyakn ma ja jëyujk yajno'oktën ets tëkokyë jënu'un mëët tyunyën ets näjyëtu'un ma ja pujxn kë'ëpujtaknën mëët ja y'ëjx. 29Jëtu'un nëjkx xykyënu'kxta'ay ets wa'ats wyë'ëmta'atëty, oy tyimtiijëty pën tii ënety jam najxp, wa'ats nëjkx wyi'imy. 30Näy yë'ë ya'atë nëjkx xytyuknixijkxy yë Aarón ets y'u'unk y'ëna'k, jëtu'un nëjkx xykyënu'kxy ets yë'ë tyeety'atëty etsës xymyëtuntëtyës, 31jëtu'un xy'ënëëmëty yë Israel ja'ayëty: Ya'atë on xëmë y'itëty, yë'ë tu'uk yë on wa'atspë, mëti'ipë mëët oy tyimtiijëty yajkënu'kxyën. 32Këtii oypyënëty xytyukkuja'axtëty ets ni xykyayajkojtëty jëtu'unpë muum ëpëky tä tyaapën. Wa'ats yë'ë, wa'ats yajëkyäpëty oy tyimjëna'ajëty. 33Pën muum kë'ëmwinma'any yajkojpy yë on jëtu'unpë tä tyaapë y'ixëtyën, ëkë muum oypyënëty tukuja'axnëtëty; pën ënety jëtu'un ëtëtspën, kopkpëky ko nëjkx yajjo'otsy ma ja myëkunaax myëkukajpnën.
Yë poom
34Ënet yë Dios t'ënëmaay yë Moisés:
Ijxta'a mëti'ipë pa'akxu'kpën ets tu'knax myäy'atëty: kepy'u'pky, nëë jëyujk pajk oypyë xyuuky jyokyën, poomway ets ja gálbano kepy oypyë xyuuky jyokyën, 35yë'ë mëët xy'oytyunëty yë poom mëti'ipë oyën ets wa'atspë, yajxon xyëpiinta'ajëty jëtu'un tä tu'uk yë pa'akxu'kpë oytyuunpë tyaj'oyën yë tsooy. 36Tääts wäänë xymyä'äjëty ooky yajxon ets jam xypyëjkta'akëty winkon ma kaaxë y'ityën, jap ma ja wit tëjkën ma ja näpyaatë y'ityën mëët ja Dios, jap n'antijyës maas jap näpyaata'anyën mëët mijts. Ya'atë on wa'ats y'ita'any ma miitsëtyën. 37Ni pën mëpaat jëtu'unpë pa'akxu'kpë tkayajkojy ets kë'ëm tyajtunaanpëty. Yë Dios yë jëtu'unpë jyä'ä'ajtyp, paatykyëjxm mëpaat wa'ats xymyëët'aty. 38Pën jëtu'unpë yë on yajkojpy tä tyaapën ets tyajxuuka'any tyajjoka'any kë'ëm, kopkpëky ko nëjkx yajjo'otsy ma ja myëkunaax myëkukajpnën.
Currently Selected:
Éxodo 30: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
