Éxodo 36
36
1E paaty jëtu'un yë Besalel, yë Oholiab ets nitëkokyë yë ja'ayëty jënu'un ja wijyajtën tmëët'atën, wi'ix winë oy t'oytyuntëtyën; pënjaty ja Dios ja wijyajtën të myo'ojëtë ets t'oytyuntëty mëti'ipë jap tunaanpën ma ja tsajptëjkën, yë'ë ja tuunk yajtu'uye'eytyëp mëti'ipë yë Dios të tni'ënä'ämën.
Ja ja'ayëty ni'ikyë ja ayajk ako'onën tmëmiin'ëtë'ëtstë
2Ënet ja Moisés ojts tyaxtsoy ja Besalel, ja Oholiab ets nitëkokyë ja ja'ayëty, jënu'un ënety tukjatën winë oy tyaj'oyëtëtyën, mëti'ipë ja Dios të myo'ojëtën ja wijyajtën kujk'ajtën ets ixpëkyajtën; ma ënety kë'ëm të nyäy'ëwaanëtën ko pyutëkëja'antë ma ya'atë tuunk tyu'uye'eyën. 3Ënet ojts jä'ä ja Moisés myooytya'ajëtë ja ayajk ako'onën mëti'ipë ja Israel ja'ayëty të tmëmintën ets tyajtso'onta'aktëty ja tuunk ma ja tsajptëjk kyoja'anyën.
E ja Israel ja'ayëty ni'ikyë tmëmiin'ëtë'ëtstë ja ayajk ako'onën winjëpom. 4Ja tuunpëtëjkëty mëti'ipë yaj'o'oyëtëpën tiijaty jam tunaanpën ma tsajptëjkën ojts ja tyuunk t'ëxmatstë ets ojts tninëjkxtë ja Moisés, 5ets t'ënëmaaytyë: Yë ja'ayëty ni'ikyë tmëmiin'ëtë'ëtstë yë ayajk ako'onën ets tëë y'anajxnë ja kyijpxyajtën mëti'ipë ja Wintsën të tni'ënä'ämën ets ja tuunk tyu'uye'eyëty.
6Ënet ja Moisés ojts ja aaw ayuk tkäjxwä'kxy ets ja ja'ayëty ka'ap ja ayajk ako'onën t'ëkmëmiinëtëty mëti'ipë tunaanpën ma ja tsajptëjk kyoja'anyën, jëtu'un'äämpy ojts yaj'akajpxtujknë ets ja ja'ayëty ka'ap tii t'ëkmëmiinëtëty. 7Jä'ä ko ja mëti'ipë tunaanpën tam ënety myäyjyajtënë ets ni'ikyë nyatëjkënë.
Jëtu'un ja tsajptëjk ojts yajkojy
8Ja ja'ayëty mëti'ipë ni'ik tyukjajtëpën wi'ix winë oy tyajkojtëtyën, këtiinëm jëtu'un ja myëku'ukëty mëti'ipë mëët tyuunmuktën, yë'ë ojts ja Dios ja jyëën tyëjk tkojtë. Majk ja wit'atëëytyuk tyaj'o'oyëtyë mëti'ipë ja y'ujkënën taxkpëky, ojts tyajtuntë ja linë wit awiity tsu'unkpë, ukpyë ets tsaptspë ets ojts jam tyajkëxkojtë mäjtsk ja tsajpjotmëtë kukäjpxy. 9Tu'ukjatypë ja wit'atëëytyuk jä'ä y'ayenyëty tuktujk xajpk ja tu'kkë'ënux ets jä'ä myëjwiinëty tu'kxajpk ja tu'kkë'ënux, aak tu'knax kyijpxyëty. 10Mäjtsk ojts yë wit'atëëytyuk mëjpë tyaj'oyëtë, mëkoxk t'axuuymyujktë ja mutskjatypë. 11Ma mëët tu'ukpën ja wit axuuymyuky ojts jam pë'am tkëxuytyë ëtsi'itjut mëët yë ukypyiity ets näjyëtu'un ma ja mëmäjtskpë ja wit axuuymyukyën. 12Ma mëët tu'ukpë ja wit axuuymyukyën ets ma ja mëmäjtskpën, wëxtyikxy myajkjaty ojts tpëjktakëtë ja nyi'ëtsi'itjut, ma yaj'ajë'pmukëtyën. 13Ojts näjyëtu'un tyajkojtë yë jo'kn, aakyë'ë mëti'ipë pu'ts pujxn mëët y'oytyunyëtyën, wëxtyikxy majk ojts tyajkojtë ets jä'ä mëët ja Dios ja jyëën tyëjk tu'ukyë tukpëjktë.
14Besalel ojts näjyëtu'un majktu'uk yë wit atëëytyuk tyajkojy, aakyë'ë yajtuun yë tsajppax po'o ets ojts yë'ë tuknikemy ja Dios ja jyëën tyëjk. 15Tu'ukjaty ja wit'atëëytyuk jä'ä y'ayenyëty taxtujk xajpk ets myëjwiinëty tu'kxajpk ja tu'kkë'ënux, tu'knax kyijpxy'atë. 16Tääts ojts mäjtsk t'axuuymyuky ja wit'atëëytyuk mëti'ipë mëjjatyëtyën, tu'uk t'axuuymyujky mëkoxk ja wit'atëëytyuk ets tu'uk atëtujk. 17Tu'k'it tukpa'axu'uyëy wëxtyikxy majk ja atsi'it jut ma ja wit'atëëytyuk ja mëtu'ukpë y'axuuymyukyëtyën. Näyjyëtu'un ojts tukpa'axuyë ja atsi'it jut ma ja mëmäjtskpë ja wit'atëëytyuk, mëti'ipë të yaj'axuuymyukyën. 18Ojts t'oytyuny wëxtyikxy majk yë jo'kn, mëti'ipë oytyunyën mëët yë tsuxkpujxn ets jä'ä mëët yajtuk'ajo'kmukëty ja wit tëjk.
19Yë Besalel ojts tu'uk yë nyiwit'atëëytyuk tyajkojë ya'atë wit tëjk, yë'ë ojts t'ajo'kmuky yë kupixyny ayääkë ak, mëti'ipë ënety tëë wyatsnën tsapts ets jap nëkëjxy tpëjktäky yë po'o oyjyätyëtypë. 20Ojts näjyëtu'un kanaak t'oytyuny yë acacië kepyjyiity mëti'ipë tunaanpën ma ja Dios ja jyëën tyëjkën, aak kujkyë tpëjktäky. 21Tu'ukjatypë ja kepyjyiity jä'ä y'ayenyëty tëkëëk xajpk ets jä'ä myëjwiinëty tu'kkë'ënux ja kujkm. 22Mäjtskjaty tmëëtëty, mëti'ipë mëët ja myëku'uk nyämyajts'ityën. Tu'kë'ëyë ja kepyjyiity mëti'ipë jap yajtuunën tsajptëkoty, aakjëtu'un ojts t'oytyuunta'ay aakmëët ja nyikepy ajë'tk. 23I'px tpëjktäky ja kepyjyiity ëpa'tkë'ëy'äämpy, 24wëxtyikxy ojts ja nyi'ëjx tpëjktakë, aakyë'ë poop pujxn. Tu'ukjaty ja kepyjyiity mäjtsk ojts ja y'ëjx tpëky ets ja nyikepy ajë'tk yajxon ojts yajtukni'oytyunë. 25Ojts näjyëtu'un i'px tpëjktä'äky yë kepyjyiity anëkëjxy'äämpy ma ja Dios ja jyëën tyëjkën. 26Ets ja nyi'ëjx ojts tpëjktakë näjyëtu'un wëxtyikxy, tu'ukjaty ja kepyjyiity mäjtsk ojts ja y'ëjx tpëky. 27Ma ja a'oytsyowpë wyi'imyën, jä'ä tpëjktäky ja kepyjyiity tëtujk, 28mäjtsk ojts tyajni'ikë, mëti'ipë pyëjktakën ma ja tyatskën. 29Mäjtsk ya'atë kepyjyiity awojpmuky y'itë jam anëkëjxmtsow ma mëët tu'ukpë ja jo'knën, ya'atë ojts mäjtsk ja kepy jyiitsy tyaj'oyë mëti'ipë tuunën ma ja mäjtskpë ja tyäkën. 30Paaty ja kepyjyiity jä'ä ënety ëmukë nyäpyata'ayë tuktujk, mëët majkmokx tu'uk ja nyi'ëjx aakyë'ë poop pujxn ets tu'ukjaty ja kepyjyiity mäjtsk ojts ja y'ëjx tpëky.
31Yë Besalel ojts näjyëtu'un t'oytyuny mëkoxk yë witsë mëti'ipë mëët tyunëtyën ja acacië kepyjyiity yaatsowpë pë'aay wyi'imyën ma ja tsajptëjkën. 32Mëkoxk ojts wiinkpë t'oytyuny ja witsë mëti'ipë mëët tyunëtyën ja kepyjyiity, jamtsowpë wyi'imyën ma ja tsajptëjkën ets ëpëky ja wiinkpë nän mëkoxk mëti'ipë mëët ja kepy jyiitsy tyunëtyën anëkëjxytsyowpë ma tsajptëjkën mëti'ipë xëëwkëtä'äkytsyow wë'ëmpën. 33Ya'atë witsë yenyëty ojts t'oytyuny ets tjëkyäpëty wi'ix yajxon yajkëëyë'ëkëtyën, najxp jam yeny jëjp'am ma ja kepyjyiityën. 34Yë kepyjyiity ojts tuknikooytyä'äy yë pu'ts pujxn ets ojts t'oytyuunë yë nyitëëyë'ëk aak pu'ts pujxn ma yajjëëpëtyën ja witsë, mëti'ipë näjyëtu'un ënety tëë yajnikoyën.
35Ënet ojts t'oytyuny näjyëtu'un ja mëjwit, mëti'ipë ja tëkot yajtuk'atëëytyujkpën, yë'ë ojts txuuymyuky yë wit mëti'ipë yë y'ujkën tsu'unk, uky, tsapts ets ja linë wit awiity ets ma ya'atë witën jam ojts tyajkëxkojy mäjtsk yë tsajpjotmëtë kukäjpxy. 36Tääts jam tkëxtëëy yë pu'ts pujxnjo'kn ma ja taxkpë ja acacië kepy xyenyën, mëti'ipë nikoyën mëët yë pu'ts pujxn ets yë'ë y'ëjx'ajtyp yë poop pujxn, aakjëtu'un taxkëty.
37Ma ja wit tëjk yajnitëkën ma ja Dios jam kyëtä'äkyën, ojts t'oytyuny yë nyi'atëëytyuk, yë'ë mëët t'oytyuuny ja wit, tsu'unkpë, ukpyë, tsaptspë ets ja linë wit awiity, jëtu'un tjo'ktë tä oy yaj'ixëtyën. 38Mëkoxk ojts t'oytyuuntë ja nyixeny mëët yë nyijo'kn ets tpëjktäky mëkoxk yë nyi'ëjx aakyë'ë tsuxkpujxn yajtuun, ja xeny ojts tukniwijtsta'ay ja pu'ts pujxn mëët tëkokyë ja nyijo'kn.
Currently Selected:
Éxodo 36: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
