Éxodo 40
40
Yajkënu'kxy ja tsajptëjk
1Ënet yë Dios ojts tmëkäjpxy yë Moisés ets t'ënëmaay:
2Ma tyu'uk anyën mëtu'kpo'opë jää nëjkx xymyä'kxy ja wit tëjk ma ja näpyaatë y'itëtyën mëët ja Dios. 3Jap xypyëjkta'akëty ja kaaxë, mëti'ipë myë'ijtypyën ja käjpxytyu'unën ets ënät xy'atëëytyukëty mëët ja wit'atëëytyuk. 4Jap xypyëjkta'akëty tëkoty ja kaaypyäjn ets ja mëj jëëntooytyakn, yajxon oy xynyipëjktaakëty ma kaaypyäjn y'itëtyën ets ja mëj jëëntooytyakn pëjktaktaayë ja nyikutë'kxn. 5Pëjkta'ak näjyëtu'un ja poom ja wyintsë'këntyakn, pu'ts pujxn myajtunëp, winkon xypyëjkta'akëty mëët ja kaaxë mëti'ipë ja käjpxytyu'unën myë'ijtypyën ets xykyëxtëyëty ja wit'atëëytyuk ma yajnitëkën yë Dios yë jyëën tyëjk. 6Tä ënät näjyëtu'un xykyiiytya'akëty ja wintsë'këntyakn ma jëyujk nyitoytyëtyën, winkon xypyëjkta'akëty ma ja tsajptëjk yajnitëkën, jä'ä ja wit tëjk ma ja näpyaatë y'ityën. 7Pëjkta'ak ja kë'ëpujtakn, itkujky xypyëjkta'akëty ma yajpaatyën ja wit tëjk ma ja näpyaatë y'ityën mëët ja wintsë'këntyakn ets xy'atääm'utsëty mëët yë nëë. 8Tä ënät näjyëtu'un xyaj'oyëty ja nyitëja'aw ets xypyëjkta'akëty ja nyiwit'atëëytyuk jam ma yajnitëkën.
9Tääts ja on, mëti'ipë winë mëët yajkënu'kxyën xytyuknixijkxta'ajëty ja Dios ja jyëën tyëjk ets jënu'un jap winë y'ityën, aakjëtu'un xykyënu'kxta'ajëty ja apëjk atu'unën jënu'un jap tyuna'anyën ma ja Dios ja jyëën tyëjkën, jëtu'un'äämpy tääpë ja it naaxwiinyëtë wyë'ëmëty kënu'kxy ets wa'ats. 10Tuknijaax yë kënu'kxy on yë wintsë'këntyakn ma jëyujk yajnino'oktën ets tëkokyë yë apëjk atu'unën jënu'un mëët tyunyën, jëtu'un xykyënu'kxëty ets wa'ats wyë'ëmëty yë wintsë'këntyakn. 11Tuknixijkx näjyëtu'un yë pujxn akë'ëpujën ets nyi'ëjx ets jëtu'un'äämpy kënu'kxy wyë'ëmëty.
12Woownëjkx ënät yë Aarón mëët yë y'u'unk y'ëna'k jam ma yajnitëkën ja tsajptëjk ets jam xy'ënëëmëty ets tsyi'iwtëty. 13Ko tsyiiwta'atëty tääts ja Aarón ja wyit tpëjkta'akëty mëti'ipë të yajtuknixuyën ets ja on xytyukkujaaxëty ets xykyënu'kxëty, jëtu'un'äämpy tpa'atwa'akëty ja teety'ajtën ma ëjts xymyëtunëtyën. 14Mëjwoowëp näjyëtu'un ja y'u'unk y'ëna'k ets xytyuknijänëty ja wit mëti'ipë myëteety'atëpën. 15Ets xytyukkuja'axta'ajëty ja on mëti'ipë yajtukkënu'kxpën winë, jëtu'un ijxtëm ja Aarón të xytyukkujaaxyën ets jëtu'un'äämpy tpa'atwa'akëtëty ja teety'ajtën etsës xymyëtuntëty.
16Moisés ojts tuunta'ay winë tä ënety ja Dios të tyuk'ëne'emyën. 17Paaty ko mäjtsk jëmëjt y'apejty, ma ënety të tsyoontën jap Egiptë, ma tyu'uk'anyën ja mëët tu'ukpë ja po'opë, jää ojts ja Dios ja jyëën tyëjk ëka'any yajpëjktä'äky. 18Moisés ojts tpëjktä'äky ja Dios ja jyëën tyëjk ets tpëjktaktaay ja nyi'ëjx, ojts tmä'kxta'ay ja kepyjyiity ets tmooytyääy ja witsë ets tyajwa'akë'ktaay ja xeny. 19Ojts twijtstëëwta'ay ja wit ma ja Dios ja jyëën tyëjkën ets ojts tpëjktä'äky ja nyiwits nyijuux jëtu'un tä ënety ja Wintsën të tni'ënä'ämën.
20-21Ojts ja Moisés t'apëkë ja tsaatsetsy ma myinyën ja ënä'ämën tëyajtën jap kaaxëjoty mëti'ipë myë'ijtypyën ja käjpxytyu'unën ets ja kaaxë ojts ja nyiwitsë tpëjktäky, näjyëtu'un ja nyi'akë'ë mëti'ipë yajtuk'ajupëpën ets tmënëjkxy jap ma ja Dios ja jyëën tyëjkën, ojts tkutëëytyä'äy ja wit'atëëytyuk ets t'atëëytyujky ja kaaxë, jëtu'un ijxtëm ënety ja Wintsën të tni'ënä'ämën.
22Ojts ja kaaypyäjn näjyëtu'un tkëëytyä'äky jap ma ja wit tëjkën ma näpyaatë y'ityën mëët ja Dios, tëja'ptsow tpëjktäky ma ja wit'atëëytyukën, anëkëjxy'äämpy ma ja tsajptëjkën. 23Ets tpëjktäky näjyëtu'un ja tsajpkääky ma ja nyikaaypyäjnën, jam ma ja Dios jam kyëtä'äkyën, jëtu'un ijxtëm ënety ja Dios të tni'ënä'ämën.
24Ojts tpëjktä'äky ja jëëntooytyakn jap ma ja wit tëjkën ma ja näpyaatë y'ityën mëët ja Dios, jëtu'un mëët nyäwyinku'ixëty ja kaaypyäjn, ëpa'tkë'ëy'äämpy ma ja tsajptëjkën. 25Ets tyajmëjëtyääy ja kutë'kxn jam ma ja Dios ijty kyëtä'äkyën, ijxtëm ënety ja Dios të tni'ënä'ämën.
26Ja pu'ts pujxn wintsë'këntyakn ojts tpëjktä'äky jap ma ja wit tëjkën ma ja näpyaatë y'ityën mëët ja Dios, wiintuuytsyow ojts tpëjktä'äky ma ja wit'atëëytyukën. 27Ojts tyajtoopyiky ja mëti'ipë oy xu'kp jojkpën, jëtu'un ijxtëm ënety ja Dios të tyuk'ëne'emyën.
28Ënet ja Moisés ojts tkëxtëy ja wit'atëëytyuk, jam ma ja Dios ja jyëën tyëjk yajnitëkën. 29Ets ja wintsë'këntyakn tkëëytyäky ma ja jëyujk yajnino'oktëtyën, jam winkon tpëjktäky ma ja wit tëjk yajnitëkën ma ja näpyaatë y'ityën, ojts ja jëyujk kanaak tjantyajnitoy ets näjyëtu'un ja aaytyëëm ujtstëëm tkë'ëyäjky jam ma Tiosën, tä tu'uk yë ayajk ako'onën, jëtu'un tä ënety ja Dios të tyuk'ëne'emyën.
30Ja kë'ëpujtakn itkujky ojts tpëjktä'äky ma ja wit tëjkën ma ja näpyaatë y'ityën ets ja wintsë'këntyakn, tääts tyaj'ujtsy mëët yë nëë ets jëtu'un jap ja teetytyëjkëty kyë'ëpujtëty. 31Yë Moisés ets Aarón mëët yë y'u'unk y'ëna'k, jap ijty ja nëë tjuutë mëti'ipë kyë'ëpuj'ajtëpën ets mëti'ipë tyekpyuj'ajtëpën. 32Näpyujëtëp ijtyëty ko jap tyëkëtë ma ja wit tëjkën ma ja näpyaatë y'ityën ets ko twinkuwa'akëtë ja potsy ma ja wintsë'këntyaknën, jä'ä ko jëtu'un ënety ja Wintsën të tuk'ëne'emy ja Moisés.
33Ko ojts jyëjpkëjxtaaynyë, tä ja Moisés yi'iyë tjaakyaj'o'oyëtyääy ja nyitëkja'aw ja wit tëjk ma ja näpyaatë y'ityën ets ja wintsë'këntyakn, ojts ja wit'atëëytyuk tkëxtëy jam ma yajnitëkën ja tëja'aw.
Ja yoots nëma'a mëti'ipë këtakën ma ja tsajptëjkën
Ko ja Moisés tkojtaay ja wit tëjk, 34ënät ja yoots nëma'a ojts tyajnituky ja wit tëjk ma ja näpyaatë y'ityën mëët ja Dios ets tyajtuktujktaay mëët ja myëj'ajt y'oyajtën. 35Jëtu'un'äämpy ojts ka'ap t'ëkjëkyäjpnë ja Moisés jap tyëkëty ma ja wit tëjkën ma ja näpyaatë y'ityën, jä'ä ko ja yoots nëma'a jä'ä ënety jam të nyäkyo'ktaayënë tëjknëkëjxm ets ja Dios ja myëj'ajt y'oyajtën yë'ë ënety të tyajtuktujkta'ay ja tëkot. 36Ko ja yoots ijty pyëti'iky, mëti'ipë jam ko'knääpyën ma ja tëjk kopkën, yë Israel ja'ayëty ënätyë ijty näjyëtu'un tyajpëtë'ëktë ja tsyënaaytyaknëty. 37E pën ja yoots ijtp jam jeky, näjyëtu'un ja tsyënaaytyaknëty ka'ap nëkoo tyajpëtë'ëktë; jä'änëm y'ëwxijtëp ja yoots koonëm pyëti'iky. 38Jëtu'un ojts nyë'ëye'eytyë tyu'uye'eytyë ja Israel ja'ayëty, t'ijxtë tkoowtë winë mëj këjää, ko ijty xyiiny'äty ja Wintsën ja yoots ijty nyitëëynyääpy ja Dios ja jyëën tyëjk e ko kyoots'aty jëtu'un jam kyëxë'ëky ma ja tëjk kopkën, ma ja Dios ja jyëën tyëjkën, tä tu'uk yë mëj jëënyä'änkën.
Currently Selected:
Éxodo 40: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
