Éxodo 6
6
1Ënet ja Dios y'ëtsoowë:
Tyam xy'ixtëty wi'ixës yam yë mëj'ënä'ämpë ntuna'anyën, yë'ë atsip nëjkx m'ëxmajtsënëtë ma nyaax kyajpnën, yë'ëpaat nëjkx kë'ëm y'ënanë: Nëjkxtë.
Tios tmëkäjpxy jatëkok yë Moisés
2Ënet yë Dios ojts tmëkäjpxy yë Moisés ets t'ënëmaay:
Ëjts WINTSËN. 3Ojtsës nnänyikëxë'ëkyë ma Abraham, Isaac ets Jacob, etsës ojts jëtu'un ja nxëëw nkë'ëyäky, Dios mëti'ipë maaytyääyëpën winë. Ëjts ka'apës nëkoo ja nxëëw ojts ntimkyë'ëyajkojy, tääjës mëtëy nxëëwatyën: Wintsën. 4Ntuunës tu'uk yë käjpxytyu'unën mëët yë'ëjëty etsës ojts ntukwinwanëtë, ko nmo'oja'antë tu'uk yë it naaxwiinyëtë jam Canaán. Yë'ës n'antijpy ja naax kam ma ojts miitsëty m'ëk tsënaaytyëpën, tä yë jaaypyaat jaaypyo'kxyën. 5E tyam maas të nijawën wi'ix yë Israel ja'ayëty y'ëyowtën ets wi'ix yë Egiptë ja'ayëty tyiytyunëtën mëët yë tuunk mëkëtypë, paatyës tyam nja'amyetsy ja nkäjpxytyu'unënës, mëti'ipës ojts nyajwë'ëmyën. 6Tyam, nëjkx ënëëmëtë yë Israel ja'ayëty, ko ëjts, mëti'ipë Wintsën'ajtpën nyajpëtsëmantëpës ma je'eyë myëtun y'ëyowtën mëët ja mëktuunk mëti'ipë ja Egiptë ja'ayëty mooyëtëpën. Nyaj'ixanëpës yë nmëjajtën mëj këjää ets nyajpëtsëma'antës mëët tu'uk yë kuttujkën tëypyë jaantypë. 7Jëtu'un miitsëty n'ëxajëja'antë, tääjës yë ntimnyaax ntimkyajpnën etsës miits xyTios'atëp ets xynyijawëtëty, ko ëjts Wintsën, mëti'ipë miits mTiosajtëpën, mëti'ipë të myajpëtsëmëtën, ma ënety miitsëty je'eyë mëtun m'ëyowtën, mëët ja mëkëtypë ja tuunk, mëti'ipë mooyëtëpën ja Egiptë ja'ayëty. 8Jamës yë naax kajpn nyajnëjkxa'any maas ojts yë Abraham, Isaac ets Jacob të ntukwinwanëtën ets yë'ë tjä'ä'atëty. Ëjts jëtu'un Wintsën.
9Moisés ojts ja aaw ayuk tjakajpxnaxy, e yë'ëjëty ka'ap ojts tmëpëktë, jä'ä ko ja mëktuunk jä'ä ënety tyäty myëmaay tyäty myëtajtëp. 10Ënet ja Dios t'ënëmaay ja Moisés:
11Nëjkx ënëëmë yë mëj'ënä'ämpë, ko wä'än t'ëxmatsy yë Israel ja'ayëty jap Egiptë.
12Tä yë Moisés t'ëtsoy yë Dios:
Yë Israel ja'ayëty nijënu'unës xykyatuntë këwentë. ¿Tyam tiijës ënät tjaaktimtyuunta'akëp ets mëj'ënä'ämpë tmëpëkëty yë n'aaw n'ayukës. Tyamës ka'ap njatukjajtpë wi'ixës oy n'ëwëty nkajpxëty?
13Ënet ojts yë Aarón ets Moisés tyuk'ënä'ämëtë yë Dios: ets t'ënëëmëtëty ja Israel ja'ayëty ets ja mëj'ënä'ämpë näjyëtu'un, ko yë'ëjëty myëët'ajtëp ja kuttujkën ets tëë tuknipëjktaakëtë ko tyajtsoona'antë ja Israel ja'ayëty jap Egiptë.
Yaa myiny kuja'ay kukeetsy yë y'u'unk y'ok yë Aarón ets Moisés
14Ya'atë jëtu'un ojts tnikopk'atë yë jyiiky myëku'ukëty jënu'un tu'ktaak tu'kteety tyu'kmëku'uk'atën.
Yë'ë Rubén y'u'unk'ajt y'ëna'k'ajt yë Israel yë myëtu'uk u'unk, mëti'ipë xyëëwajtën Hanoc, Falú, Hesrón ets Carmí, ya'atë jëtu'un jyä'äy'ajt.
15Yë Simeón yë y'u'unk y'ëna'k jä'ä xyëëwajtë Jemuel, Jamín, Ohad, Jaquín, Zohar ets Saúl mëti'ipë tyaak'ajtën ja Canaán ja'ay. Ya'atë jëtu'un yë Simeón jyä'äy'ajt.
16Yë Leví jä'ä jyuuky'äjty mëko'px ja i'px majkmokx mäjtsk jëmëjt. Jä'ä xyëëwajtë ja y'u'unk y'ëna'k, Guersón, Quehat ets Merarí, jëyëjp yë mëjpë ets ok yë mutskpë. 17Mëti'ipë ojts yë Guersón t'u'unk'atyën ets jënu'un ojts tyu'kja'ay'atën, jä'ä xyëëwajtë Libní ets Simí. 18Yë Quehat jä'ä ojts jyuuky'äty mëko'px ja i'px majktëkëëk jëmëjt ets y'u'unk y'ëna'këty jä'ä ojts txëëwatë: Amram, Ishar, Hebrón ets Uziel. 19Yë Merarí y'u'unk y'ëna'k jä'ä xyëëwajtë, Mahli ets Musi, jëyëjp yë mëjpë ets ok yë mutskpë. Ya'atë jëtu'un jyä'äy'ajt yë Leví.
20Amram yë'ë ojts mëët pyiky ja tsyëkuu mëti'ipë xyëëwajtypyën Jocabed, yë'ë ojts tyajmëxu'unk'aty yë Aarón ets Moisés. Yë Amram jä'ä jyuuky'äjty mëko'px ja i'px majkmokx mäjtsk jëmëjt.
21Yë Ishar yë y'u'unk y'ëna'k jä'ä xyëëwajtë: Coré, Néfeg ets Zicri.
22Yë Uziel yë y'u'unk y'ëna'k jä'ä xyëëwajtë: Misael, Elsafán ets Sitri.
23Yë Aarón yë'ë ojts mëët pyiky tu'uk yë to'oxytyëjk mëti'ipë xyëëwajtypyën Eliseba, yë'ë nyëëx yë Aminadab ets yë'ë yë myëkä'äx yë Nahasón, yë'ë myaank'ajt mëti'ipë ojts txëëwatën; Nadab, Abihú, Eleazar ets Itamar.
24Yë Coré yë y'u'unk y'ëna'k jä'ä xyëëwajtë: Asir, Elcana ets Abiasaf. Ya'atë jëtu'un ojts ok yajtijtë Coré ja'ayëty.
25Tu'uk yë y'u'unk yë Aarón mëti'ipë xyëëwajtypyën Eleazar, yë'ë ojts mëët pyiky yë nyëëx yë Futiel ets yë'ë ojts tyajminy tyajja'ty naaxwiiny ja mëti'ipë yajtijyën Finees. Ya'atë jëtu'un ojts tnikopk'atë yë Leví ja'ayëty, jëtu'un ja xyëëwëty këxja'ay myintë tä tyu'kja'ay'ajtën.
26E ya'atë ojts y'itë Aarón ets Moisés, mëti'ipë ja Dios ënëmaayëtën ets tyajpëtsëmtëty ja Israel ja'ayëty jap Egiptë, jëtu'un tä yë maytsyiptuunpë muum nimay tsyoontën waatswitsy. 27Näy yë'ë ya'atë Moisés ets Aarón ojts t'ënëëmëtë ja yajkutujkpë, mëti'ipë ënety jap ënä'ämpën Egiptë, ko tyajpëtsëma'antë ja Israel ja'ayëty ma tääpë kajpnën.
Tios tmëkäjpxy yë Moisés ets Aarón
28Jä'ä xëëw ma Dios ojts tmëkäjpxyën yë Moisés jap Egiptë, 29jëtu'un t'ënëmaay:
Ëjts jëtu'un Wintsën. Tukmëmëtya'ak yë Egiptë mëj'ënä'ämpë tëkokyë mëti'ipë yam ntuk'ënëmääpyën.
30E yë Moisés ojts y'ëtsoy:
Wintsën ëjts ka'apës ntukjaty wi'ixës nkajpxëtyën, ¿tiijës ntuunta'akëp etsës yë yajkutujkpë yë n'aaw n'ayukës tmëpëkëty?
Currently Selected:
Éxodo 6: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
