Génesis 23
23
Ko Sara y'o'ky ets nyaaxtëjkëy
1Jä'ä ojts yë Sara jyuuky'äty mëko'px ja i'px wëxtujk jëmëjt. 2Jam y'o'ky ma ja it naaxwiinyëtë txëëwatyën Quiriat-arbá, ma tu'uk ja kajpn txëëwatyën Hebrón, ma ja Canaán nyaaxjotmën wyi'imy. Jekpyaat yë Abraham tnimoony tnitujky yë tyo'oxytyëjk Sara ko y'o'ky. 3Ënet ja Abraham tsyo'ony ma ënety jam ja Sara ja nyini'kx wyijtsnën ooky ets ojts nyijkxy ma ja Hit ja'ayëtyën mëti'ipë jam tsënaaytyëpën ma tampë ja it naaxwiinyëtën, tääts t'ënëmaay:
4Oyës n'ëkjaaypyaat n'ëkjaaypyo'kxëty ma yaa miitsëty yë mnaax mkajpnëtyën, mëpaatës yë naax wäänë xytyukmëtooktë, ma tjëkyäpëtyën yë nto'oxytyëjk nyaaxtëkëtyën.
5Tää ja Hit ja'ayëty y'ëtsoowtë:
6Tun yë mëyajtën mijts Wintsën, ëkmëtow yajxon. Mijts Dios m'u'unk'ajtëp ets yë'ë të mwin'ixyë yaa ma ëëtsëtyën. Yajnaaxtëkë yë mto'oxytyëjk ma jawäänë oypyë ja it nnaaxwiinën, ijxtëm mijts mja'ay'ätyën, pën tii mka'ëkmo'ojanëp.
7Ënet ja Abraham wyakë'ky ets tyajnikëxë'k ja winkutsë'kën ma ja Hit ja'ayëtyën, 8ets t'ënëmaay:
Pën janty tëy m'ëna'antë etsës yë nto'oxytyëjk yaa nyajnaaxtëkëty, tuntë mëyajtën amëtowtë yë Efrón, yë Zohar yë y'u'unk, 9etsës xytyukmëtookëty ja y'aank, mëti'ipë myëët'ajtypyën ma ja y'it nyaaxwiinyën jam Macpelá. Ëjts nkujuyäämpyës yam oy jënu'un tyimtsowpaatëty, jëtu'unës jotkujk njä'äniwa'anëty maas ja n'o'kpë nyaaxtëkëtyën ma tääpë it naaxwiinyëtën.
10E yë Efrón, ja Hit ja'ay tam ënety näjyëtu'un yajpaaty ma ja myëku'ukëtyën. Ënet t'ëtsooy ja Abraham ets ja myëku'uktëjk tukmëtowa'any ets tu'kë'ëyë jënu'un nyaxtën jam ma yajnitëkën ja kajpn.
11Ka'ap mëku'uk, tun yë mëyajtën. Tyam mijts namo'ojëty yë it naaxwiinyëtë ets ja nyi'aank mëti'ipë jam naaxjotmën. Yë nmëkunaax nmëkukajpnës yë'ë yam myëtoowtëp, ko mijts yam namo'oy ja nnaaxës nkamës ets jam ja mto'oxytyëjk xyajnaaxtëkëty.
12Ënet yë Abraham tyajnikëxë'ky jatëkok ja winkutsë'kën ma ja ja'ayëtyën mëti'ipë jam kunaax'ajtp kukajpnajtëpën, 13tääts t'ëtsooy ja Efrón jämyë ma ënety jam nimay ja ja'ayëtyën:
Tun yë mëyajtën amëtoow'ijtkës yë n'aaw n'ayuk. Mpëjtsoopyës yë mëyajtën ets xy'ëxaj xykyupëkëty ja nwit nmeenyës mëti'ipës yam ntukujuyäämpyën ja m'it mnaaxwiinyëtë, ënätnëmës ja nto'oxytyëjk jam nyajnaaxtëkëty.
14Ënet y'ëtsooy ja Efrón:
15Amëtoow'ijtkës Wintsën, yë it naaxwiinyëtë, jä'ä tsyowpaaty taxk mëko'px aakyë'ë poop pujxn meeny. E yë nyitsow ka'ap mëpaat tyam yë'ë nätyukäjpxy tsyi'këmë, tiits tim yajnaaxtëjkëkyoj yë mto'oxytyëjk jam.
16Ojts ja Abraham tkupëky jënu'un ënety tsyoowpaatyën ja it naaxwiinyëtë ets ojts tim kyujuy ja nyaax ja Efrón, ma ënety jam nimay yajpaatën ja Hit ja'ayëty, mëët yë poop pujxn meeny, aak kijpxtä'äky nu'unjaty ënety jye'emtyëtyën. 17Paaty ja nyaax kyamtëjk ja Efrón, mëti'ipë ënety jam myëët'ajtypyën Macpelá, awinmtsow wyi'imy mëët yë Mamré, jä'ä jëtu'un ja it naaxwiinyëtë mëti'ipë ënety mëët ja y'aankën ets kepyjyot. 18Yë'ë ojts ja Abraham tjä'äniwanë. Nimay ja Hit ja'ayëty t'ijxtë tmëtoowtë ets tu'kë'ëyë jënu'un ënety jam nyaxtën ma ja kajpn yajnitëkën, jä'ä ojts wyë'ëmtë ijxpë mëtoowpë.
19Ënet ja Abraham ojts ja tyo'oxytyëjk jam tyajnaaxtëkë ma ja tsaajutën mëti'ipë jam yajpatpën Macpelá, winkon nyäpyäätyë mëët yë Mamré, yajtijp näjyëtu'un Hebrón, mëti'ipë jamën Canaán. 20Jëtu'un ojts wyë'ëmnë kyë'ë'am ja it naaxwiinyëtë ets näjyëtu'un ja aank mëti'ipë ënety jamën Macpelá, mëti'ipë tukmëto'kën ja Hit ja'ayëty, tääts jam nyäyajnaaxtëkëtëty.
Currently Selected:
Génesis 23: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
