Génesis 29
29
Yë Jacob jam Harán
1Yë Jacob ojts ja tyu'u tpanëjkxy ets ojts jam jyä'ty ma ja naaxwiinyëtë xëëwpëtsëmtsyowpë.
2E jam kamjotm t'ijxy tu'uk yë nëëjut ets jam näjyëtu'un myäykyo'knëtë tëkëëkpëky yë tsajppaxëty kupixynyëty, nëë'uktëp ënety jam, ma ja nëëjut'aawën janty mëj ja tsaa mëti'ipë y'akë'ë'ajtypyën. 3Ko ja tsajppax ets ja kupixynyëty nimay nyämyukëtë, ënät ja mëti'ipë kyëwent'ajtëpën ja nëëjut t'akëëytyu'utë ets jëtu'un nimay nyëë'uuktë ja jëyujkëty ets ko ënety y'ukta'atë ja kupixyny, ënät ijty jatëkok t'akë'ëtë ja nëëjut'aaw. 4Tä ja Jacob tyajtëëy ja mëti'ipë ënety kupixyny këwent'ajtëpën:
¿Maa mtsoontë jëëkyëty mëku'ukëty?
Ënet y'ëtsoowtë:
Harán ëëtsëty ntsoontë.
5¿M'ixy'ajtëp tu'uk yë nmëku'ukës mëti'ipë xyëëwajtypyën Labán, yë'ë myaank yë Nahor? Ets y'ëtsoowtë: jëtu'un n'ixyajtëpës.
6Tä jatëkok yë Jacob tyajtëëwkojnëpë:
¿Oy mëk yajpaatyë?
Ënet ja kupixyny këwent'ajtpë y'ëtsoowtë:
Oy mëk yajpaaty. Ëk'ix wintsën, tyaa yë nyëëx Raquel tim wyojpminy yë kyupixyny.
7Ënet yë Jacob y'ënäny:
Xëënyëm ets tsojknëm yë'ë, nëkoopë xytyimyajku'ëtujkojtëty yë mjëyujkëty. ¿Wi'ix ko xykyayajnëë'uuktë ets wäänë jyaak'ojkojtëty?
8Ënet y'ëtsoowtë:
Ka'ap tjëkyäp aak ëëtsëty, jëyëjp ëëtsëty n'ëk'ëwxitë ets nimay yajwojpmuktëty yë tsajppaxëty kupixynyëty ets tsajppax këwent'ajtpë nikanaak t'akëëytyu'utë yë nëëjut, tääts yajmo'otë nyëëjëty yë jëyujkëty.
9Tam ënety jëtu'un yë Jacob myëtyä'äky mëët ja tsajppax këwent'ajtpëty. Ko ja Raquel jam twojpmiiny ja tsyajppax, mëti'ipë yë'ë jyä'ä'ajtëpën, jä'ä ko yë'ë ënety Kyëwent'ajtyp. 10Ko t'ijxy ja Jacob yajwojpminy ja jyämy Labán ja tsajppax kupixynyëty. Ënet ojts pojën t'akëëytyu'uty ja nëëjut ets tyajnëë'uky ja jëyujk. 11Ënet ja Jacob ojts tkajpxpo'kxy ja Raquel ets ojts tsu'kxy, tääts tyëjkëy yaxpë. 12Ko ja Jacob tukmëmëtyäky ja Raquel, ko yë'ë ënety tyaak'ajtyp yë Rebeca ets yë'ë jyämy'äjtyp yë Labán. Ënet yë Raquel ojts jam pëyi'ikyë tsyoony ets ojts ninëjkxy ja tyeety, tääts tukmëmëtyäky wi'ix ënety të yajmëëtmëtyä'äkyën.
13Ko yë Labán tmëtooy yajnimëtyä'äky yë Jacob, yë y'uty yë y'u'unk. Ënet ojts pëyi'ikyë tnitsoony ets ojts tsu'kxy jä'ä ko jëtu'un ënety tu'unën'atë, tä ojts twoownëjkxy ma tyëjkën. Ënet yë Jacob tukmëmëtyaktaay ja jyämy, wi'ix ënety të jyäty të kyëpetyën. 14Tä ja Labán t'ënëmaay: Tëy yë'ë ko mijts ntimjyiiky ntimmyëku'ukëty.
Wi'ix yë Jacob tnitunyën yë Raquel ets Lea
Tu'kpo'o yë Jacob ojts wyi'imy ma jyämy Labán yë tyëjkën. 15Ko tu'kpo'o nyäjxy tää yë Labán yë tsyojkmaank Jacob t'ënëmaay:
Ka'ap yowë tyim'oy'ajtnëty koos mijts je'eyë namëyajtën xytyimmëtuunëty ets ka'ap ninu'un ntimmyëjuyëty, mëët je'eyëp ko mijts namëku'uk'aty. Paatykyëjxm ënëmaaykyës tyam, jënu'un myajmëjuyä'äny.
16Yë Labán mäjtsk ënety yë nyëëx tmëëtëty: yë mëjpë Lea xyëëwajtyp e yë mutskpë Raquel xyëëwajtyp. 17Yë Lea mutskjaty ijty yë wyiin, e yë Raquel janty'oy ijty yaj'ixy, tyimtso'ontä'äky ma tyekyën ets jëtu'un tyimja'ty ma kyëpajkën. 18E yë Jacob yë'ë ënety oy tsyojkën'ajtyp yë Raquel, paaty y'ëtsooy:
Yë mnëëx Raquel yë mutskpë yë'ëjës nitunäämpy wëxtujk jëmëjt ma mijtsën.
19Tää yë Labán y'ëtsooy:
Oy'atëp, nikë oy ko mijts myajmo'ojëty, këtiipë wiinkpë, wë'ëm yaa mëët ëëtsëty.
20Jëtu'un yë Jacob ojts tyëkë tuunpë ma Labankën, mëët ko ënety ja nyëëx ja mutskpë të tsojkën'aty, mëti'ipë xyëëwajtypyën Raquel. Wëxtujk jëmëjt ojts nituny, yajxon ënety tjantytsyoky ja Raquel, paaty pojën tja'awëy nyäjxy ja xëëw jëmëjt wëxtujk jëmëjtpë. 21Ko ojts kyä'pxy wëxtujk jëmëjt, ënät ja Jacob t'ënëmaay ja Labán:
Mooykyës ënät ja nto'oxytyëjk, wä'änës mëët mpëky n'uuky, jä'ä ko tëë kya'pxnë wëxtujk jëmëjt ijxtëm ojts ntukwinwanën nitunanyës yë mnëëx.
22Ënet ja Labán twoowmujktaay ja jyiiky myëku'uk ets ja myëjëën myëtëjk tää tnixëëwtuna'any ja nyëëx ja pyëjkën y'ukën mëët ja Jacob. 23E ko kyootsajty, tap ënety yë Jacob myaanë, ko yë Labán yë nyëëx Lea tukpuko'këy yë Jacob. Tääts jëtu'un nimäjtsk myaatë. 24Tää yë Labán näjyëtu'un yë nyëëx Lea tmooy yë tyuunpë, jä'ä xyëëwajtyp Zilpá ets yë'ë pyutëkëtëty. 25Komjëpom myä'äypyëti'ky yë Jacob, ënät t'ijxy kootëm ënety mëët të myä'äy yë Lea. Tä ojts t'ojy ja Labán ets t'ënëmaay ko wi'ix ko ënety jëtu'un të y'ëti'itsy, jëtu'un t'ënëmaay:
¿Tiitën mijts të xytyuny? ¿Tii këtii xyjyä'ämetsyë koos yë'ë Raquel të nitunyë? ¿Wi'ixës ko xywyin'ëëny?
26Ënet ja Labán y'ëtsooy:
Jä'ä ko yaa ka'apës jëtu'un ntu'unën'atë ets ja mutskpë jëyëjp pyëkëty, pën ka'ap ja mëjpë pyikynyëm. 27Paaty tim oy'atëp ko xy'ëkyajka'pxëty yë mxëëw mëët yë Lea, täänëm yë Raquel myajmo'ojëty. Ënet jëtu'un pën mjaaknäy'a'ijxëyëp mtunëty ma ëjtsën nän ja wëxtujk jëmëjt.
28Tä tkupëjky yë Jacob, ko ojts ja xyëëw tyajkä'pxy mëët ja Lea, ënät ja Labán myooyë näjyëtu'un ja Raquel ets to'oxytyëjk'atëty. 29Yë Labán ojts näjyëtu'un yë nyëëx Raquel tmo'oy yë tyuunpë, mëti'ipë putëkëtëpën, jä'ä xyëëwajtyp Bilhá. 30Jëtu'un yë Jacob ojts y'awa'kmuky mëët yë Raquel ets ni'ik ojts tsoky, këtiinëm jyëtu'unëty yë Lea. Oy ënety wëxtujk jëmëjt të jyaak yaj'awitsy ets tyunëty ma Labankën.
Yë Jacob y'u'unk y'ëna'k
31Ko yë Dios t'ijxy, ko yë Jacob ka'ap ënety nëkooyë tsyoky yë Lea. Ënet ojts tyajkutuky ets ja Lea ni'ik ja u'unk maay tmëët'atëty, këtiinëm jyëtu'unëty ja Raquel. Ja Raquel nitu'uk ënety ja u'unk maay tkamëëtëty. 32Ënet ja Lea ojts wyi'imy u'unk mëët ets ojts tyajmëxu'unk'aty tu'uk yë y'u'unk mëti'ipë xyëëwmooyën Rubén, tä y'ënäny: Tiosës të xy'ixy koos nmony ntuky, paatyës tyam yë Jacob ni'ikës xytsyoka'any.
33Ok ojts wiinkpë Lea y'u'unk tyajmëxu'unk'aty mëti'ipë ojts txëëwmo'oyën Simeón, tä y'ënäny: Dios jëtu'un të tmëtoy koos xy'ixtij xy'ëxwa'antë, paatyës wiinkpë u'unk maay të xymyo'oy të xykyexy.
34Ënet ojts wiinkpë u'unk maay tyajmëxu'unk'ajtkojnëpë mëti'ipë ojts txëëwmo'oyën Leví, tääts y'ënäny: Tyam ënät tëy yë niye'etyëjkës ni'ikës xyjaaktimtsyoka'any. Jä'ä ko tyam ëka'any tëkëëk yë y'u'unk myääy nyajmiin nyajjajtës naaxwiiny.
35Yë Lea ojts wiinkpë y'u'unk myääy tyajja'ty naaxwiiny ets ojts txëëwmo'oy Judá, tä y'ënäny: Tyam nkuuy'ëwäämpyës yë Dios yë xyëëw. Jäpaat jëtu'un yë Lea y'u'unk'ijxy ets ka'ap ojts ja y'u'unk myääy t'ëkpat t'ëk'ijxnë.
Currently Selected:
Génesis 29: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
