Génesis 42
42
Yë José yë y'äjtytyëjk nyëjkxtë jap Egiptë
1Ko ojts yë Jacob tnijawë, ko tap yë tsajpmok Egiptë, ënät ojts y'u'unk y'ëna'k t'ënëëmë: Tiijën mtuuntëp ko je'eyë mnäywyintë'kxëtë xim yam. 2Tëëjës nnijawë ko jap Egiptë tap yë tsajpmok, nëjkxtë jap ets xyjyuytyëty yë tsajpmok, tääts njaakjuuky'ajtmëty.
3Ënet ojts nimajk yë José yë y'äjtytyëjk nyëjkxtë jap Egiptë tsajpmok juupyë. 4Yë Jacob ka'ap ojts tkexy yë Benjamín, yë José y'uty, jä'ä ko tyaa ënety myäy tyäjy ko tii y'ëkjajt y'ëkëpäjtënëty. 5Yë y'u'unk y'ëna'k yë Israel ojts nyëjkxtë mëët wiinkëtpyë ja'ayëty, mëti'ipë näjyëtu'un jap nëjkxtëpën tsajpmok juupyë, jä'ä ko ma tu'kë'ëyë Canaán nyaaxjotmën jam'ajtp ënety ja yuu xëëw.
6Yë José yë'ë ënety ënä'ämpë ijtp jap Egiptë ets yë'ë ja tsajpmok tyukmëto'kpy ja ja'ay mëti'ipë miintëpën tsajpmok juupyë. Ko ojts ja y'äjtytyëjk jam jya'të ma yë'ëjën, ënät nyäjyijtakëtë yë'ë wyintum ets nyaaxkoowtë. 7José ojts t'ixkäpy ja y'äjtytyëjk, ko t'ijxy; jëtu'un ojts nyäpyëjktä'äkyë ijxtëm jeexyë ka'ap t'ixkäpyën ets tyajtëëy:
Miitsëty ¿Maaxë mtsoontë?
Canaán ëëts ntsoontë tsajpmok njuyantëpës, jëtu'un y'ëtsoowtë yë'ëjëty.
8Oy ënety ja José tëë ja myëku'uk tja'ijxkajpta'ay, ja myëku'uk ka'ap y'ijxkapëtë. 9Ënet ja José tja'amyejtsy ja wyinkuma'ay mëti'ipë ënety të t'ixyën mëët yë'ëjëty, tä t'ënëmaay:
Miitsëty je'eyë min xy'ixa'an xytyuna'antë tii yaa kajpn myëët'ajtyp kyamëët'ajtyp.
10Ka'ap Wintsën. Jëtu'un y'ëtsoowtë. Ëëtsëty mijts yë mtuunpëtëjk, tsajpmok ëëts njuyantëp. 11Tu'kë'ëyë ëëtsëty tu'ukyë teety ëëtsëty ets oyës nja'ay'atë, jamës ntsëënëtë Canaán, ëëtsëty nijëna'a muum nkanëjkxtës ets je'eyë n'ixtës ntuntës winë. 12José ni'ikyë y'ënaan'ëtëtsy:
Ka'ap tyiyajtënëty m'ëna'antë, miitsëty je'eyë të mintë ijxpë tuunpë ma ya'atë naax kajpnën, pën tii myëët'ajtyp oy ëxëëk.
13Ënet y'ëtsoowtë:
Ëëtsëty Wintsën jä'ä ëëtsëty nyiwinë'atë nimajkmäjtsk ets tu'uk ëëts ja nteetyëtyës ntukmuktë ets jamës ntsëënëtë Canaán. Ja n'utyëtyës ja mutskpë tëë ja wyi'imy mëët yë tyeety, e ja wiinkpë ka'apës yam mëëtëtynyë.
14Ënet ja José y'ënaankojnëpë:
Jëtu'un ijxtëm n'ëna'anyënës je'eyë mijts mintë ijxpë tuunpë, 15ets ya'atë ënät mëët n'ëkjanty'ijxmëty. Yajxon miitsëty yam n'ënëëmëtë ko ka'ap yaa mtsoontëty, koonëm xyajmintëty ja m'utyëty ja mutskpë. 16Wä'än miitsëty nitu'uk pën nëjkx tyajtsoony, ja nimaypyë wä'än twë'ëmtë tsumy. Tsojk n'ëkjanty'ijxëm pën janty tëy m'ëna'antë, e pën ka'ap tyiyëty, jää jyänty yaj'ixëty ko miitsëty ijxpë tuunpë je'eyë të mintë. Ja mëj yajkutujkën xyëëwkëjxmës yam jëtu'un n'ëna'any.
17José tsumy ojts tyaj'ity ja myëku'uktëjk tëkëëk xëëw, 18e kom tëkëëk xëëw ojts t'ënëëmë:
Ëjts ntsë'këpës yë Dios, tuntë ya'atë ets miits npokymyä'kxtëty. 19Pën mijts janty'oy mja'ay'atë, ëxmatstë yaa tu'uk yë mmëku'ukëty ets wiinkpë wä'än tmënëjkxtë yë tsajpmok, mëti'ipë kyäytyëp y'uuktëpën yë mjëëky mmëku'ukëty. 20Ets xyajmintëty ja m'utyëty mutskpë ets n'ëkjanty'ijxmëty pën tëy mkajpxtë, e pën ka'ap, m'ooktëp ënät.
Ënet tkupëjktë ja José ja y'ayuk, 21ets nyäy'ënanëtë jaxim jayam:
Tyam ënät n'ijxëm ets tyam ënät nkëpäjtëm ko ojts ëxëëk ja n'uty'ajtëm ntu'unëmë. Ojts xyjyamënu'kxtakëmë ets jeexyë npa'ëyo'owëm nas'ëyo'owëmë e ëëtsajtëmë ka'ap ja ntu'unëmë këwentë, ojts nja'ijxëm ko ënety mon tuk yajpaaty. Paaty ënät ëëtsajtëm tyam ya'atë ëxëëkajtën npatëm n'ijxëmë.
22Ënet yë Rubén t'ëtsooy ja myëkä'äxtëjk:
Ëjts ojtsës nja'ëna'any ets jeexyë ka'ap wi'ix ntu'unëmë, e miitsëty ka'apës ojts xykyäjpxymyëmëtowtë, e ëëtsajtëm kwanë ënät n'ëtsoowinpijtmëty yë y'o'kën tyëko'oyën.
23Yë'ëjëty ka'ap ënety nijawëtë ko ja José wa'ats tja'akyukë mëti'ipë myëtyaktëpën, yë José wiink ayuk ënety tyukmëkäjpxyp ja y'äjtytyëjk, ëpëky tmëëtëty ja wiinkpë ja ja'ay mëti'ipë kajpxwatsëyëpën ja y'ayuk. 24Ënet ja José twinwa'ktuty ja jyiiky myëku'uk ets ojts nyijkxy yaxpë. E ko jatëkok wyimpijty, tää ojts jatëkok tmëkäjpxy, ënät ojts ja Simeón jä'ä tyajwë'ëmy ets tkë'ëtsuumy tekytsyuumy, tam jëtu'un ja myëkä'äx t'ixtë 25Ojts tni'ënä'ämë ets ja xya'k y'utstëty mëët yë tsajpmok ets jatëkok ja myeeny yajmo'otëty ets yajmo'otëty näjyëtu'un ja kyä'äyënëty y'ukënëty mëti'ipë tyu'ukaytyëpën. Jëtu'un ojts jyänty yajtuny. 26Tä ja jyëyujkëty tukjëtsëëmë'ktaaytyë ja xya'këty ujts mëët yë tsajpmok, tä ojts jap tsyo'onëtë.
27Ko jya'ajtë ma ja tsuu tyajnaxa'antën, tu'uk ojts t'akejy ja xya'k ets tyajjë'kxa'any ja jyëyujk, e ko t'ijxy taptëm ja meeny myiny ma xa'k'aawën. 28Ënet t'ënëmaay ja myëkä'äxtëjk:
Tä mëk jyänty jotmaypyätë ets tsë'ëkëmëë nyäy'ënanëtë jaxim jayam:
¿Tiitën ko jëtu'un yë Dios xytyu'unëmë?
29Ko jya'ajtë jam Canaán, ënät ja tyeety tukmëmëtyaktaaytyë tiijaty ënety të jyat të kyëpätëtën ets t'ënëmaaytyë.
30Ja ja'ay mëti'ipë jap ënä'ämpë'ajtpën Egiptë, janty ëxëëkëty të xy'ëktimmyëkajpxnëtës, etsës të xy'ënëëmëtë ko ëëtsëty je'eyës jap nëjkxtë kyajpnjoty ijxpë wo'ompë ets n'ixa'antës tii myëët'ajt kyamëët'ajtëp. 31Ënet ëëtsëty të n'ënëëmëtë ko ka'apës jëtu'un nja'ay'atë, nijëna'a ëëtsëty maa nkanëjkxtë kajpntum je'eyë ijxpë wo'ompë; 32tëë n'ënëëmëtës näjyëtu'un ko jä'ä ëëts ntu'kä'äx'atë niwinëty nimajkmäjtsk tu'ukyë teety, tu'uk tyëkoy'ity ets ja mutskpë jä'ä të wyi'imy Canaán mëët mijts. 33Ënet të xy'ënëëmëtës: Tyam y'ëkjanty yaj'ixëty pën oy miitsëty yë mjot mwinma'anyëty xymyëët'atë. Ko yaa nitu'uk wyë'ëmëty yë mmëkä'äxëty ets nitu'uk xymyënëjkxtëty yë tsajpmok, mëti'ipë yë mteety mtaak ets mjëëky mmëku'uk jyë'kxtëpën pyëktëpën, 34ets xyajmintëty ja m'uty mëti'ipë mutskën, jëtu'untsës nmëpëkëty ko miitsëty oy yë mjot mwinma'any xyjyänty myëët'atë ets ka'ap je'eyë mintë ijxpë wo'ompë; nyaj'ëwaatsëpëtsëmëpës ja mëku'ukëty ets miitsëty jotkujk mnaxtëty mtëkëty naaxjoty kajpnjoty.
35Ko tyajku''ëwatstaaytyë ja xya'këty, ënät ja José ja myëkä'äxtëjk t'ijxtë ko aak taptëm ja meeny yajpaaty xa'k'ëkë'p, xuumyjoty atsumy. Ko jëtu'un t'ijxtë ja meeny atsumy xuumyjoty, ënät tsyë'këtyaktë, jëtu'un yë'ëjëty ets näjyëtu'un ja tyeetyëty. 36Ënet ja Jacob t'ënëmaay ja y'u'unk y'ëna'k:
Miitsëty u'unktukës je'eyë xyajwë'ëmnëtë, yë José ka'ap yajpaaty ma ëtsajtëmën, Simeón nän ka'ap e tyam yë Benjamín ënät näjyëtu'un xypyëjkëjantëpës ets xëmë aak'ëjts jëtu'un winë xytyukkëtakpäjtääpy.
37Ënet yë Rubén ja tyeety t'ënëmaay:
Ixmats yë Benjamín, ëjts nkëwent'atëp ets mijts jatëkok nëjkx ntukë'ëtëkë e pën kajts ntukë'ëtëkë jatëkok, nkë'ëyäjkpyës yë n'u'unk nimäjtsk ets xyaj'ookëty.
38Tä yë Jacob y'ëtsooy:
Yë n'u'unkës ka'ap yë mpanëjkxëtëty, ojts yë y'äjty José y'ooky, e yi'iyë tu'uk jaakwë'ëmp, ko tii jyatëtëty kyëpätëtëty ma mnëëye'eya'an ntu'uye'eya'antën, mijts ënety yë poky mëët'ajtëp ko ya'atë mëjja'ay y'ookëty mëët yë monyëtukyë.
Currently Selected:
Génesis 42: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
