Hechos 9

Ja Saulo sk'u'an

(Hch 22:6-16; 26:12-18)

1-2Jaxa Saulo jel tajkel, wanxta yaljel ek' oj ch'ak smil spetsanil ja ma'tik wa sk'u'an ja Kajwaltik Jesusi. Ja'yuj ti waj sk'an yi jun ju'un b'a oj a'juk yi yuj ja ma' niwan ja ya'tel yuj ja pagre jumasa. Wa sk'ana oj waj b'a chonab' Damasco b'a oj waj ya' el b'a yoj snajtsil tsomjel ja ma'tik wa'ne nochjel ja jas wa'n sje'jel ja Kajwaltik Jesusi, b'a oj ch'ak slut preso b'a Jerusalen.

3Mojan xa oj k'otuk ja Saulo b'a Damasco, jun ita ch'ay k'ujol lijpi jun k'ak' ja b'a satk'inali, ti joyb'aji el yuj ja, lajan sok jastal wax ko' ja chawuki. 4Jaxa Saulo man lu'um mok'i, ti yab' jun k'umal wax alji yab' yuj ja:

—Saulo, Saulo. ¿Jasyuj ja lom jach' waxa wixtalanoni? —xchi ja k'umal jawi.

5—Ti sjob'o ja Saulo, ¿Kajwal Mach'a ya ja we'n b'a?

—Ke'n ja Jesusoni, —xchi ja k'umali. Ke'nani ja ma' wana yixtalajel tak. 6Ja'yuj k'e'an tulu a b'aj ochan ja b'a yoj chonab'i, ti oj aljuk a wab' tiw, ja jas oj a k'uluki.

7Jaxa ma'tik wajum sok ja Saulo, jel xiwel kanye yuj ja yabye ja k'umali, mini ma yila yujile'a. 8Ti'xa k'e tek'an ja Saulo, spitsan ay ja sati minix yila k'inala. Ja'yuj ti schechawe'a, yi'aje och b'a Damasco. 9Ajyi oxe k'ak'u b'a Damasco ja Saulo, mini t'unx yila k'inala, sok mini t'un sk'ana jas oj ya b'a, mini t'un ja' sk'ana oj yu'e.

10Ja b'a Damasco tey jun winik nochoman ja Kajwaltik Jesusi, Ananias sb'i'il, jun k'ak'u ti snaj satin ja Kajwaltik Jesusi, ti alji yab'a:

—Ananias. —Ananias, —x'utji.

—Ti yala ja ye'ni, Kajwal it b'a'yona, —xchi.

Ti alji yab' yuj ja Kajwaltiki:

11—K'e'an, ka'ax b'a tojol b'ej b'a snaj ja Judasi, kax job'o yab'alil jun winik it sb'aj b'a chonab' Tarso. Saulo sb'i'il, ti wan sk'umajel tiw ja Dyos. 12Ke'n ka'ta snaj satuk jun winik sb'i'il Ananias oj k'otuk b'a oj ya' kajan ja sk'ab' b'a s'olomi, b'a jach' oj b'ob' yil k'inal otro bwelta.

13—Ti yala ja Ananiasi. —Kajwal, ja winik jawi kab'unej yab'alil jel malo ja jas wa'n sk'ulajel yi ja ma'tik wa snochowa b'a Jerusaleni. 14Jaxa ya'n ti'xa ay jul ili, jekub'al yuj ja ma niwan ja ya'tel yuj ja pagre jumasa b'a oj jak syam spetsanil ja ma'tik wa stoyowa, —xchi ja Ananiasi.

15B'a' ja wila, ti alji yab' yuj ja Kajwaltik Jesusi:

—Ka'ax, ke'n jtsa'ata ja winik jaw b'a oj makunuk kuj. Ye'n oj slo'ilta yab' ja jb'i'il ja niwak mandaranum jumasa sok ja kristyano jumasa ma mini t'un wa sna'awe jb'aji, cho jach'ni ja b'a schonab'il ja israelenio jumasa. 16Ke'n oj je'yi ja wokol oj yi' yuj ja ke'ni.

17Ti'xa waj ja Ananiasa, yajni k'ot ja b'a na'its alji yab' tey ja Saulo, ti ocha, ya' kajan ja sk'ab' ja b'a s'olomi, ti yala'a: —Kermano Saulo, ja Kajwaltik Jesusi, sje'a sb'aj a wi' ja yajni ti jakuma b'a b'eji. Cho ye'n sjekawon ja ke'n ja ili, b'a oj b'ob' a wil k'inal otro bwelta, b'a jach' oj b'ut' ja wa waltsil sok ja Espiritu Santo.

18Yajni ch'ak yal jastal it ja Ananiasi, ti'xta ko' ja b'a yoj sat ja Saulo jastal kajlab'il chay wego yila k'inal. Ti k'e tek'ana, ti'xa a'ji yi ja'a. 19Tsa'an ti'xa wa'a, cho sta'a yip jastal ajyi.

Ja Saulo el ja b'a Damasco

Ja Saulo ti ajyi chab' oxe k'ak'u b'a Damasco sok ja sneb'uman jumasa ja Kajwaltik Jesusi, 20Ti'xta'a och waj ek' ja b'a snajtsil tsomjel jumasa b'a waj yal yab' ja judio jumasa, ja Jesusi ja'ni yunin ja Dyosi. 21Spetsanil ja ma'tik wa smakla ja jas yala ja Saulo, jel wax cham ja sk'ujol'ei, ti wax yalawe'a: —Ye'n ja winik it ja ma jel wax yixtalan ja ma'tik wa sk'u'an ja Jesús b'a Jerusalen tak, ja'yuj jak ja ili. Ja jak sle' ja ma'tik wa snocho ja Jesusi, b'a mochan oj yi' och b'a sti sat ja pagre jumasa ma'tik niwak ja ya'tele yuj ja pagre jumasa.

22Jaxa Saulo kada k'ak'u jel tsats wa'n yaljel sok ja yip ja Espiritu Santo ja Jesusi, ke ye'nani ja Mesiasi. B'a'ya ja judio jumasa b'a Damasco wani smakla ye'a, mini t'un wax yabye sb'eja. 23Tsa'an slajawe ja judio jumasa oj smil'e' 24Jaxa Saulo sna' k'inal ja jas chapanxa yujile'i. Yab' yab'alil k'ak'u a'kwal talnanub'al lek ja spwerta'il ja chonab'i sok cho ay winik chapub'al b'a oj miljuk yuj. 25Ja'yuj jun a'kwal ja sneb'uman jumasa ja Jesusi, snak'awe b'a yojol jun niwan mo'och ja Saulo, ti ya'we ko'uk ja b'a scha'anil sts'akab'il ja chonab'i.

Ja Saulo b'a chonab' Jerusaleni

26Jaxa Saulo ti waj b'a chonab' Jerusalen, yajni k'oti, sle'a jastal oj stsom sb'aj sok ja sneb'uman jumasa ja Jesusi. Jaxa ja ye'nle'i jel wa xiwye yuj ja Saulo, mi sk'u'ane ta meran ja wanxa sk'u'an ja Jesús ja ye'n.

27Ja Bernabeji skolta ja Saulo, yi'aj och b'a sti' sat ja jekab'anum jumasa. Ti och yal jastal sta'a ja Kajwaltik Jesús ja Saulo b'a sb'ejlal ja chonab' Damasco, yala jastal k'umaji. Cho yala jastal mi xiw ja k'umani b'a Damasco ja yajni yala ja jas jel tsamal sk'u'lan ja Jesusi.

28Desde man tiwi ja Saulo ti'xa smojan sb'aj sok ja ma'tik wa sk'u'an ja Kajwaltik Jesús ja b'a chonab' Jerusaleni, mini t'un wa xiw ja yajni wa sta'a ti' ja Kajwaltik Jesusi. 29Cho sle'a modo jastal oj ya sk'u'uk ja judio jumasa ma wax k'umani griego, jaxa ye'nle'i kechan och schap sb'aje b'a oj smil'e'. 30Yajni yabye ja sneb'uman jumasa Kajwaltik Jesús ja jastal jawi, ti yi'aje ja Saulo man b'a Cesarea, yajni k'otye sok ja tiwi, ti'xa sjekawe b'a Tarso.

31Jaxa lugar jumasa b'a Judea, b'a Galilea sok b'a Samaria, wa stsomo sb'aje ja b'a snajtsil tsomjel b'a wa stoyowe ja Kajwaltiki, mixa wa xiwye b'a oj ixtalajuke, kada k'ak'u ja' niwan sk'ujole ja Kajwaltiki, sok ja Espiritu Santo, ja'yuj kada bwelta wa'n ochel ja ma'tik wa sk'u'an ja Kajwaltik Jesusi.

Ja Pedro ya tojb'uk ja Eneas

32Ja Pedro ti wa'n wajel ek' b'a jitsan chonab' jumasa, b'a wa'n yulatajel ja sneb'uman jumasa ja Kajwaltik Jesusi. Jun k'ak'u ti ek' b'a jun chonab' Lida sb'i'il, b'a waj yulata ja kermanotik jumasa b'a chonab' jawi. 33Ti sna'a sb'aj tiw jun winik sb'i'il Eneas, ayxa waxake jab'il ay chamel, mixax b'ob' stul sb'aj ja b'a sch'ati.

34Ti alji yab' yuj ja Pedro: —Eneas, ja Kajwaltik Jesús Mesiasi, ya'ta tojb'an. K'e'an tuluj ja wa waynub'i, xchi ja Pedro.

Jaxa Eneasi ti'xta k'e'i. 35Yajni yilawe ja milagro jaw ja swinkil ja Lida sok ja Saroni, ch'ak sk'u'uke ja Kajwaltik Jesusi.

Ja Tabita sak'wi

36Ja b'a yal chonab' Jope tey jun ixuk wa sk'u'an ja Kajwaltik Jesusi, Tabita sb'i'il, wa sk'ana yal ja b'a griego Dorcas, ja ixuk jawi, jel lek ja smodo wa skolta jama jel ajula sb'aji. 37Ja k'ak'u jumasa jaw ja Tabita, ko' chamel sok chami. Ti sak'awe yi ja skwerpo jastalni kulan yujile'i, yajni ch'ak sak'e'i, ti ya'we k'e b'a jun kwarto b'a schab'il kaje ja na'itsi.

38Ja Jope mojan yi'oj sb'aj sok ja chonab' Lida, ti yabye yab'alil ja sneb'uman ja Jesús tey tiw ja Pedro, ja'yuj ti sjekawe chab' winike b'a waj yal'e yab' a jak wego, ti yalawe yab'a: —Awapabori, la wego b'a janek' wax b'ob' a wuji—.

39Yajni yab' ja Pedro ti waj sok ja winik jumasa jawi. Kechan ja k'otye'i ti yi'aje k'e b'a kwarto b'ay ja skwerpo ja cham winiki, jaxa viwuda jumasa sjoyb'ane el ja Pedro wa'ne ok'el, ti sje'awe yi ja sk'u'e'i, ye'n b'i ch'ak sk'u'luk ja Tabita ja yajni sak'an ajyi.

40Jaxa Pedro ti sk'anayi pabor ja kristyano jumasa k'e a ch'ak eluke. Ti ko' mek'ana och sk'umuk ja Dyosi, yajni ch'ak sk'umuk ja Dyosi, ti sutu sb'aj ja b'ay ja skwerpo ja Tabita,#9:40 Ja b'i'ilal Tabita: B'a griego, wa sk'an yale Dorcas. ti yal yab'a: —Tabita, k'e'an, —xchi.

Jaxa ye'ni wego sjama ja sati, ti yila tey ja Pedro ti k'e kulana. 41Jaxa Pedro ti syama yi ja sk'ab'i ya k'e tek'an; ti'xa spaya ja sneb'uman jumasa ja Jesús sok ja viwuda jumasa, ti yala'a k'elawilex ja Tabita, sak'wita, —xchi ja Pedro.

42Spetsanil ja swinkil ja Jope k'ot schikine ja jastal sak'wi ja Tabita, ja'yuj jel jitsan ja ma sk'u'an ja Kajwaltik Jesusi. 43Jaxa Pedro ti kan chab' oxe k'ak'u ja b'a chonab' Jope, b'a snaj jun winik sb'i'il Simon ja ya'teli wax yajna ts'u'um.

Currently Selected:

Hechos 9: YABD

Highlight

Copy