Juan 21

Ja Jesusi, sje'a sb'aj yi juke sneb'uman

1Tsa'an t'usan ja Jesusi, cho sje'a sb'aj yi pilan majke ja sneb'uman jumasa b'a sti' paman ja' Tiberias. Jach' ek' jastal iti: 2Ti smoj sb'aje ja Simon Pedro, ja Tomas it wax alji sb'a loji, ja Natanael sb'a chonab' Cana sb'a Galilea, Ja Santiago sok ja Juan yuntikil ja Zebedeo, sok ja otro chab' sneb'uman ja Jesusi. 3Ti alji yabye yuj ja Pedro:

—Ja ke'n oj wajkon ya'jel el chay.

—Jach'ni ja ke'ntikoni, oj wajkotikon a mok —xchi ja smoj jumasa.

Ja'yuj ti waj k'e'uke b'a jun barco'a, spetsanile ch'ak wajuke ja ya'jel el chayi. Ja a'kwal jawi, lomxani wajye'a, mini jun chay syamawe'a. 4Mitox sakb'i jaxa Jesusi, ti'xa tek'an k'ot b'a sti' ja', ja sneb'uman jumasa mi wa sna'awe sb'aj ta yuj ye'na. 5Ti job'ji yi'e yuj ja Jesusi:

—Winike jumasa, ¿a yamawex t'unuk ja chayi?

—Mini jas jyamatikona, —xchi ja ye'nle'i.

6Ti alji yabye yuj ja Jesusi:

—Jipa wa wenub'ex b'a lado stojol wa k'ab'exi, ja tiwi, ojni a wa'wex eluk chaya.

Ja sneb'uman jumasa sk'u'ane ja jas alji yabye'i, yajni b'ut' ja yenub'e'i, mixax b'ob' el yujile b'a yoj ja' yuj ja jel jitsan sta'awe ja chayi.

7Jaxa neb'uman it jel yaj wax ilji yuj ja Jesusi, ti yal yab' ja Pedro: —Ja iti, ja' Kajwaltik Jesusi—

Yajni yab' ja Pedro ke ja Kajwaltiki, wego waj slapa ja sk'u' yuj ja sopan yuj ajyi, cho juts'in sjipa sb'aj b'a yoj ja'i. 8Jaxa tuk neb'uman jumasa k'otye sok man b'a sti' ja' ja sbarco'e'i, ti kichan yujile ja yenub'e'i, b'ut'el chay, ja janek' snajtil ochel le och b'a yoj ja'i, ay mojan jo' tajb'e (100) metro.

9Yajni eltikon k'ot b'a ti' ja'i, ti kilatikon jun tsome k'ak'a, ti wa'n ta'jel jun chay sok ti'xa pach'an jun pan b'a sti' k'ak'i. 10Ti alji yabye yuj ja Jesusi: —I'ajik jan chab' oxuk ja chay b'a wantox ch'ak a yam'exi—.

11Jaxa Simon Pedro ti k'e' b'a barco skicha jan ja enub' man b'a sti' ja'. B'ut'el lek, b'a' miyuka ay yi'oj jun syen chab' tajb'e sok ox lajune (153) niwak chay. Jachuk a'ay lek ja chayi, mini k'uts ja enub'a.

12Ti alji yabye yuj ja Jesusi: —La'xa wa'anik, x'utji ye.

Mini june ja neb'uman jumasa sjob'owe yi machunkiluka; —yujni wa sna'awe yuj ye'n ja Kajwaltik Jesusi— 13Ti och mojan ja Jesusi, syama ja pani, ti ya' yi'le'a, cho jach'ni ja chayi.

14Ja k'ak'u jawi, ja'xa yox majkil wa sje'a sb'aj yi ja sneb'uman jumasa man k'ak'u sak'wi.

Ja Jesús sok ja Pedro

15Yajni ch'ak wa'uke'i, ja Jesusi, ti sjob'o yi ja Pedro:

—Simon, yunin ja Juani, ¿Mas waxa yajtayon ja we'n ke yuj ja it jumasa?

Ti yala ja Pedro:

—Jach'ni'a Kajwal. Ja we'n wanixa na'a ke wanix k'anawa'a.

Ti alji yab' yuj ja Jesusi:

Yuj k'a jachuki, talna ja neb'uman jumasa, yuj ja ye'nle'i, lajane sok ja yal chej jumasa.

16Ja Jesusi, cho sjob'o yi otro bwelta:

—Simon, yunin ja Juani, ¿Waxa yajtayon?

Ti yala ja Pedro:

—Wan, Kajwal. Ja we'n wanixa na'a ke wax k'anawa'a.

Ti alji yab' yuj ja Jesusi:

—Yuj k'a jachuki, talnaki ja jneb'uman jumasa, yuj ja ye'nle'i, lajane sok yal chej jumasa.

17B'a yoxil bwelta sjob'o ja Jesusi:

—Simon, yunin ja Juani, ¿Meran ma ja waxa k'anawoni?

Jaxa Pedro jel cham sk'ujol yuj ja ja'xa yoxil bwelta wax job'ji yi ta wax k'anwani merani. Ja'yuj ti yala ja ye'n:

—Kajwal, ja we'n wanix ch'aka na' spetsanila; wanixa na'a ke wanix k'anawa'a.

Ti alji yab' yuj ja Jesusi:

—Talna ja jchej jumasa. 18Ja yora untikato we'n waxa lapa wa k'u' a wexi, chikan b'a' waxa k'ana oj wajana ti wala waja. Ja smeranili, oj kala wab'i, ja yajni la byejo'axi, oj ja xijpuk wa k'ab'i, pilan ma' oj ya'a lap wa k'u' a wexi, sok ti oj i'jan b'a mixa k'ana oj wajani, —xchi ja Jesusi.

19Ja Jesusi, ja wax ya jak sk'ujol ja Pedro, ja jastal oj chamuki, sok jach' jastal jaw oj b'ob' stoy ja Dyosi.

Tsa'an ti yal yab' ja Pedro:

—Pedro, nochowon.

Ja Jesús sok ja sneb'uman it je syajta

20Ja sneb'uman it jel yaj wax yab' ja Jesusi, ye'nani nochob'al ja Jesús sok ja Pedro. Ja neb'uman jawi, cho ye'n ja it ti ajyi sok k'ub'an ja Jesús ja k'ak'u wa'ye b'a k'in sya'al k'inali, ja k'ak'u mitox a'ji k'e' lokan b'a cruz ja Jesusi, cho ye'nani ja ma' sjob'o yi ja Jesús ma' oj k'ul juk yuj entregari. 21Jaxa Pedro yajni yila ja jastal jawi, ti sjob'o yi ja Jesusi:

—Kajwal, ¿Jaxa wa neb'uman it b'a, jasunk'a oj ek' sb'aj ja ye'n b'a?

22Ti alji yab' yuj ja Jesusi:

—Ja ye'n ta yuj k'a wax k'ana sak'anto oj jak jta' ja yajni la kumxiyoni, ke'n wax na'a, ¿Ja we'n mi a wocheluk? Ja we'n nochowon.

23Ja'yuj b'a janek' ja sneb'uman jumasa ja Jesusi, el ja lo'ili, mi b'i oj chamuk ja sneb'uman jawi. Mi jachukuk yala jastal jaw ja Jesusi. Ja jas yala jach' jastal iti: —Ta wax k'ana sak'anto oj jak jta' ja yajni la kumxiyoni, ¿Mi a wochel ja we'n?, xchi ja Jesusi.

24Cho ye'nani ja neb'uman it ja ch'ak yal spetsanil ja jastik jumasa iti. Ye'n sts'ijb'a, sok wax na'atikon ja jas wax yala yujni smeranila.

25Ay jas jel jitsan tuk jastik jumasa sk'u'lan ja Jesusi, lek wanuktox ch'ak ts'ijb'axuk spetsanil ja jas ch'ak sk'u'luki, mi oj sta' b'a oj ochuk ja b'a lu'um iti.

Currently Selected:

Juan 21: YABD

Highlight

Copy