Lucas 12

Ja rason jumasa

(Mt 10:26-27)

1Jitsan kristyano sjoyb'ane ja Jesusi, ti wa sjutb'ila'an sb'aje'a, jaxa ye'n ti yal yab' ja sneb'uman jumasa:

—Talna a b'ajex yuj ja jastal toj le'uj ab'al wa sje'awe ja fariseo jumasa. Ja ye'nle'i, wani slo'lane ja kristyano yuj ja lajan sok smeranil ja jas wax yalawe'i. 2Yuj spetsanil ja jas nak'an ayi ojni chiknajuka, cho jach'ni ja jas nak'ul ayi, ojni ch'ak na'xuka. 3Ja jas ti' oj ja wal'ex b'a k'ik'inali, b'a sat k'ak'u oj ch'ak na'xuk; ja jas nak'ul oj ja wal'exi, oj ch'ak sna' spetsanil ja swinkil ja lu'um iti.

Jama oj xiw kutik yuji

(Mt 10:28-31)

4—Jmoj aljel jumasa, mi lom la xiwyex yuj ja ma' wa sk'ana oj smil wa kwerpo'exi, yuj ja jawi mi jas oj b'ob' sk'u'luk a wi'ex. 5Mas lek ja la xiwyex yuj ja Dyosi, ja ye'n mi kechanuk oj smil wa kwerpo'exi, ojni b'ob' schay na'jel wa waltsilexa, ja'yuj sb'ejni oj xiwanik yuj ja ye'na.

6—K'elawilex, jo'e yal chan kechan chab' oxe sat tak'in wa sts'akolan, jaxa Dyosi wax cham sk'ujol yuj ja yal chan jumasa jawi. 7Jachuk ja we'nlexi: Ja Dyosi, man stso'otsil a olomex kwenta ay yuj, ja'uktoma ja we'nlex mi kwenta ayukex yuja. Ja'yuj, —Mok xiwanik— Ja we'nlexi, yuj mas niwan wax yilawex ja Dyos ke yuj ja yal chan jumasa.

Sta' jel ti ja Jesusi

(Mt 10:32-33; 12:32; 10:19-20)

8—Ja we'nlexi, yuj k'a waxa walwex yab' ja tuk kristyano ke jneb'umanex, jach'ni ja ke'n yuj ja ye'n yuninon ja winiki, ojni cho kal toj ja b'a sti sat ja anjel jumasa, ke yujni jneb'umanexa. 9Kechan ta waxa walwex yab' ja kristyano ke mi jneb'umanukex, jach'ni ja ke'n oj cho kal yab' ja yanjel jumasa ja Dyos ke mini jachukuk jastal jawa.

10—Yuj k'a mi lek waxa ta'awonex ti ja k'en ja yuninon ja winiki, ja Dyosi, mi oj ya'a tup'ex, kechan ta ja' mi lek oj ja ta'ex ti ja Espiritu Santo, ja Dyosi, ojni ya'a tup'exa.

11—Yajni la i'jiyex och b'a wa stsomo sb'aje b'a sti sat ja ma'tik wa sk'elawe ja mulali, sok ja ma'tik ay ya'tel b'a oj sk'el ja wa mulexi, mok cham ak'ujolex yuj ja jas oj ja wal'exi, ma ja jastal oj b'ob' a kolta b'ajexi. 12Ye'n ja Espiritu Santo oj ya jak a k'ujolex ja jas oj ja wal'ex ja k'ak'u jawi, —xchi ja Jesusi.

Ja ma mi jas na'a

13June ja ma' tey tiwi, yal yab' ja Jesusi:

—Je'uman, al yab' ja jmoj alijel a ya'ki ja jdote k'en it ya kan ja jtatikoni.

14Ti yala ja Jesusi:

—Ja ke'n mi kocheluk oj tojb'es ja wa tiro'ex sok wa moj alijeli.

15Ti'xta sk'ela ja Jesús ja ma'tik tey tiwi, ti yal yab'a: —Talna lek a b'ajex mok ja' jel wajuk a k'ujolex b'a jel oj a ta'ex ja jastik ab'ajexi— Mi ja'uk yuj ja jel wa' jastik a b'ajex ja ti oj ajyuk a sak'anilex jitsan k'ak'u.

16Tsa'an ja Jesusi, ti yala jun senya lo'ila:

—Ja b'a slu'um jumasa jun winik jel ja jastik sb'aji, jel ajyi ja sb'a'al ja yalaji. 17Jel jitsan ya eluk ja sb'a'al ja yalaji, jaxa winik jawi mi sna'a b'a oj snol ja sb'a'al ja yalaji. 18Tsa'an ti spensaran ti yala'a: Jna'ata jas oj jk'u'luk —xchi, oj jip ko ja snajtsil mixa lekuki, oj ka' k'u'lajuk jun niwan lek. Ti oj nol tiw ja sb'a'al ja kalaji, sok spetsanil ja jastik jb'aji. 19Tsa'an ti oj kal jb'aj ja: —Ja ya'n ayxa ki'oj jas oj kab' b'a jitsan jab'il. Kechan oj jak wa', k'u' ja', oj chak jk'u'luk ja jas wax k'ana oj k'uluki—. —Oj chi'uk ja winik jawi.

20—Jaxa Dyosi, ti alji yab' yuj ja: —Mi jaxa na'a, ja jastal wa'n ek'el a k'ujoli, mini jun sb'eja—. Jaxa ta lek la cham ja ya'n a'kwal b'a, pilan ja ma' jel lek oj yil yuj spetsanil ja jas a noloneji.

21—Jach' wax ek' yuj jastal it spetsanil ja ma'tik jel ja stak'ine'i. Wani sna'awe yuj ja jelni ja stak'ine'a, ja smeranil b'a sti' sat ja Dyosi, jel ni ajula sb'aje'a—.

Ja cham k'ujol jumasa

(Mt 6:25-34)

22Tsa'an ja Jesusi, ti yal yab' ja sneb'uman jumasa:

Mix chama k'ujolex yuj ja jas oj ja wabyex sok ja jas oj ja wu'exi, cho jach'ni ja jastal oj ja k'u'tes a b'ajexi. 23Ja wa sak'anilexi, mi kechan oj makunuk b'a wa'el, cho jach'ni wa kwerpo'exi mi kechan oj makunuk b'a oj ja k'u'tesex.

24—K'elawilex ja joji: mi jas wa ts'unuwe mix jach'ulaniye, mi b'a wa snolo ja swa'ele'i. Jaxa Dyosi wanix ya' yi swa'ele'a. —Cho na'awik t'unuk ja Dyosi, mas niwan wax yilawex ja we'nlex ke yuj ja yal chan jumasa—.

25—¿Wa'n a maxa walawex yuj ja cham k'ujolxta ayexi, ja'yuj oj alb'uk wa sk'anilexi? 26Sok ja jastik jumasa iti mini jas oj ja ta'exa, ¿jasyuj ja lom wax cham a k'ujolex yuj ja tuk jastik jumasa b'a?

27—K'elawilex ja nichim jumasa b'a witsi: Mix a'tijiye, mi ye'n wa stojb'es ja sk'u'e'i, mini ja jastal wa slapa jas k'u' ja mandaranum Salomoni mi slaja ja yelaw ja ye'nle'i.

28—Yuj k'a jach' tsamal wa sk'u'lan ja yal nichim jumasa ja Dyosi, sok jel t'usan k'ak'u ti wax ajyi ye'a, ¿mi' ma jach' oj sk'u'luk yuj ja we'nlex b'a? —Lajan sok mitoxa neb'awex jastal oj ja k'u'ukex ja Dyosi.

29—Mok cham a k'ujolex yuja ja jas oj a wabyexi sok mini ja jas oj ja wu'exi. 30Kechan ja ma mi sk'u'an ja Dyosi, wanix cham sk'ujol yuj ja jaw jumasa'a. Jaxa we'nlexi, ja Dyos wa tat we'nlexi, wani sna'a spetsanil ja jastik jumasa jawi, yujni oj makunuk a wujilexa.

31—Ja mas t'ilani, ja oj ja na'ex sb'aj ja Dyos yuj ja kechan ye'n mandaranumi. Spetsanil ja jastik jumasa ti oj ya'wi'ex ja yajnix k'ot ja sk'ak'u'ili, —xchi ja Jesusi.

Ja kosa jumasa smeranili

(Mt 6:19-21)

32—Mi lom la xiwyex, a'nima jel t'usanukex ja janek' jneb'umanexi— Ja Dyos wa tat we'nlexi, wa sk'ana ye'n oj yala wabyex ja jas oj ja k'u'lukexi. 33Chonowik ja jas a wi'ojexi, k'epawik yi ja sts'akol ja ma'tik jel ajula sb'aji. K'u'lanik yal moral b'a mi oj k'utsuk, ti'xa nolowex b'a satk'inal ja jastik jel lek a wi'ojexi. Ja tiwi mi oj b'ob' yelk'an ja elk'anumi, mini ja xoji, mi oj b'ob' sch'ake. 34Na'awik t'unuk ja jas jb'ajtik b'a jel leki, ja oj ja k'u'ukonex sok spetsanil wa k'ujolexi.

Ja a'tijum jumasa

(Mt 24:45-51)

35-36—Ja we'nlexi, jel t'ilan chapanxta oj ajyanik, jach' oj ajyanik jastal chapanxta ja ma' yib' k'ab'al ay wajum b'a jun ch'ak ab'ali. Ja ye'nle'i mix och swayele' wani ajlel ja skandile'a, chapanxta aye b'a oj k'e sjam'e ja pwerta ja yajnix k'umaji ye'i. 37-38—Jel lek oj iljuke ja yajnix k'ot ja swinkil ja na'itsi, a'nima nalan a'kwaluk, ma mojan sakb'el k'inal— Ja smeranili wax kala wabyex ja jaw jumasa, ye'n oj a'ji kulanuke b'a mesa yuj ja yajwale'i, ye'nani ja ajwalal oj a'ji ek' yi'e yuj ja swa'ele'i.

39Jun swinkil na'its wan k'a sna'a yuj oj och jun elk'anum b'a snaji, ojni smajla b'a mi oj ya' ochuka. 40Ja'yuj ja we'nlexi, jel t'ilan chapan oj ajyanik, yuj ja ke'n ja yuninon ja winiki, ja oj jakon ja yajni mini t'un ja'uk waxa na'awexi.

41Jaxa Pedro ti sjob'o yi'a:

—Kajwal, ¿Ja jas waxa wala kechan ma ke'n jb'ajtikon, ma sb'aj spetsanil ja ma' tey ili?

42Ti yala ja Kajwaltik Jesusi:

—Ja ma' yib' k'ab'al ay ma' wax a'tiji leki, wa sk'u'lan ja jas wax alji yab' yuj ja yajwali, ye'n wax a'jikan b'a sk'ab' ja yuntikil oj stalnan sok b'a oj ya'yi ja swa'eli. 43—Jel lek oj iljuk ja a'tijum jaw yuj ja yajwali, ta wan k'a sk'u'lan spetsanil ja jas wax alji yab'i. 44Oj ni a'juk yi b'a sk'ab' spetsanil ja jastik sb'aj ja yajwal b'a ye'n oj stalna. 45Jaxa a'tijum jawi, ta wan k'ax yala: —Ja kajwali wajel b'a najtil chonab' mi na' jas k'ak'u oj kumxuk, ti wax och smak' ja tuk a'tijum jumasa, wax och yu' wax yakb'i lek. 46Yajni wax kumxi ja yajwali, ja k'ak'u mi ja'uk wa'n smajlajeli, jel tsats oj a'juk yi ja swokoli, jach' jastal wax a'ji yi wokol ja ma' mi sk'u'ani.

47—Jun a'tijum wan k'a sna'a lek ja jas wax yala ja yajwali, yuj k'a mi sk'u'lan jelni tsats oj a'juk yi ja swokola. 48Jun a'tijum ta mi lek ja jas wa sk'u'lani, yuj k'a mi wa sna'a, mas ko'el ja wokol oj a'juk yi'i'. Ja Dyosi, jel lek a mokex, cho jach'ni ja we'nlexi, wa'n smajlajel jach' lek oj ja wa' a b'ajex.

Ja Jesusi, yal yab' ja sneb'uman jumasa

(Mt 10:34-36)

49—Ja ke'n jakelon b'a oj ka' ajluk k'ak' ja b'a lu'um iti. —Jel tsamal ja lek wa'nunxa ajleli. 50Yuj jel t'ilan b'ajtan oj ek' kuj jun tsatsal wokol, jelni oj ki'a man oj k'otuk ja k'ak'u jawi. 51¿Wa'n a maxa walawex ja we'nlex yuj ta jakelukon b'a oj ajyuk laman ja swinkil ja lu'umi? —miyuk— Ja ke'n mi ja'uk jakelukon yuj ja jawi. Ja ke'n jakyon b'a mi oj ka yil sb'aj lek ja kristyano jumasa. 52B'a jun na'its ta b'a jo' wane, mi oj yil sb'aje lek, sok ja chawane'i, jaxa chawane'i. 53Ja tatal sok ja yunini mi oj yil sb'aje lek, cho jach'ni ja nanal sok ja yak'ixi mi oj yil sb'aje lek, ja nanal sok ja yalib'i mi oj yil sb'aje lek.

Ja jastik oj sje' ja Dyosi

(Mt 16:1-4; Mr 8:11-13)

54Ja Jesusi, ti yal yab' ja kristyano jumasa:

—Yajnixa wilawex wax och ja k'ak'u, yuj k'a ay ason ja b'a satk'inali, ti' waxa walawexa: —Ja ya'n oj ya' ja' —la chiyex, sok wanix ya'a ja' smeranila. 55Yuj k'a waxa wilawex ti wa'n jakel ko'el k'inal ja ik'i, ja ya'n jel leman oj ek'uk la chiyex, sok jach'ni wax ek'a. 56¿Machunk'a waxa k'ana oj ja lo'layex b'a? Wanixa na'awex jasunk'a oj ek'uk' ja b'a satk'inal sok b'a lu'um ye'n, sok jach'ni ja jas wax k'u'lani, wanixa wilawexa, kechan mini t'unxa na'awex ta ye'n ja Dyos wa sk'u'lana.

Laman ajyan sok ja ma' mi lek wax ilwani

(Mt 5:25-26)

57—Ja'xa stsa'a oj ja k'u'luk ja b'a leki. 58Ay k'a ma' wa sloko wa ab'al yuj waxa ta'a ti yuj ay jas mi lek a k'ulunej, ka'ax kax tojb'es ab'aj sok, ta mik'a, oj ya b'a sk'ab' ja ma' ay ya'teli, jaxa ma' ay ya'teli oj slut a. 59Ja tiwi mi oj elan, man oj ch'ak a tup spetsanil wa muli ti oj elana.

Currently Selected:

Lucas 12: YABD

Highlight

Copy