Lucas 16

Jun a'tijum jel sna'a jas oj sk'u'luk

1Ja Jesusi, ti cho yala yab' ja sneb'uman jumasa:

—Ajyi jun winik jel ja jastik sb'aji, sok ay jun ya'tijum ye'n ya' oj yi b'a sk'ab spetsanil ja jastik b'aj b'a oj stalna; jun k'ak'u ja ajwalali, yab' yab'alil, wa'n ch'ak jel yi lom ja stak'in yuj ja ya'tijum jawi. 2Ja'yuj sjeka spayjel ti yal yab'a: ¿Jach' kab'ta jastal it ja wa muli? Ja'yuj ja ya'n ala kab' janek' ay ja spetsanil ja jtak'in sok ja jastik jb'aji, yuj ja mixa ojto a'tijanan jmoki, —x'utji.

3—Jaxa a'tijum jawi, jel cham ja sk'ujoli, ti yala'a: ¿Jasunka oj k'uluk ja ya'ni? —Ja kajwali wax ya' elki ja ka'teli. Me'y kip ja oj ochkon joto uk'umi, wala k'ixwiyon ja oj jk'an ek' jlimosna. 4—Jna'ata jasunk'a oj k'uluki, b'a jach' oj ta' ma oj snol'on, ja yajni mixa ay ka'teli.

5—Ti spaya jujune' ja ma'tik ay sjel sok ja yajwali, ja ma' jul b'ajtani ti sjob'o yi'a: ¿Janek' ja wa jel sok ja kajwaltiki? —xchi. 6Ti yala ja winiki: Ay jo' tajb'e (100) barril aceite olivo. —Ti alji yab' yuj ja a'tijum jawi: Itul wa jeli, kulanan kechan a och ju'un chab' tajb'e sok lajune (50) barril wa jeli. 7Ti cho sjob'o yi ja juni: —Jaxa we'n, ¿janek' wa jel sok ja kajwaltiki? Ti yala ja winik jawi, Ay lajune mil (10,000) kilo trigo. —Ti alji yab' yuj ja a'tijum jawi: —Itul wa jeli, kechan a och ju'un waxake mil (8,000) kilo.

8—Yajni yab' ja ajwalal ja jas wa'n sk'ulajel ja ya'tijumi, ti yala'a, ja a'tijum iti, mi lekuk ja jas pensaran oj sk'u'luk ja tsa'ani. Jach'ni ja kristyano ma mi wa sk'u'an ja Dyosi, mas wa sna'a ja ye'nle'i, yuj ja ma' wa sk'u'an ja Dyosi.

9—Ja'yuj ja we'nlex ja ma'tik jneb'umanexi, ja ke'n wax kala a wabyex ja tak'in jawi, mok a talnayex syajal, awik makunuk, b'a jach' jel oj a ta' wa mojexi, jaxa yajnix ch'aka wujilex ja tak'in jawi, ti'xa oj yi'ex k'e b'a satk'inal ja Dyosi.

10—Ja ma' wa syajta ja t'usan yi'oji, jach'ni oj cho sna' syajtajel ja b'a a'ayi, jaxa ma' mi syajta ja t'usan yi'oji, ja'uk toma oj sna' syajtajel ja b'a a'ayi. 11Jachuk ja we'nlexi, ta yuj k'a mixa na'awex jastal oj ja yajtayex ja t'usan a wi'ojex jastal ja tak'in lom a' ta'unejexi, ¿jastal oj b'ob' a yajtayex ja jastik b'a mi oj ch'ak b'a? 12Ta mik'axa yajtayex ja jastik sb'aj wa mojexi, ¿machun oj ya' wi'ex ja wa b'aj we'nlex b'a?

13—Mini jun a'tijum oj b'ob' ya'telta chab' yajwal, ta yuj k'a jach' jastal jawi, ja juni oj b'ob' syajta jaxa juni miyuk. Ja juni oj sk'u'uk yi ja yab'ali, jaxa otro oj sk'ok yi ja smandari. Ja'yuj jach' sok ja tak'in tak, mi oj b'ob' a wa'telta ja Dyos ja mismo tiempo oj a pensaruk wa tak'ini, —xchi ja Jesusi.

Ja tuk jastik sje'a ja Jesusi

(Mt 19:1-12; Mr 10:1-12)

14Ja fariseo jumasa, ja'ni jel wajel sk'ujole ja stak'ine'i. Ja'yuj ja yajni yabye spetsanil ja jas yala ja Jesusi, jel och sk'e'nane'. 15Ti yala ja Jesusi:

—Ja we'nlexi waxa k'ana je'a b'ajex yi' ja tuk jumasa ke yuj jel lek kex, jasyuj ja Dyosi wa sna'a lek jastal ay ja wa waltsilexi. Spetsanil ja jas jel niwan wax yila ja kristyano ja ili, jaxa Dyosi mini jun ya'tel yuj ja.

16—Man b'a sk'ak'u'il ja Juan ma' ya'a yi'jel ja'i, ja kristyano'i t'ilan ja' wa sk'u'ane ja mandar it a'ji yi ja Moisesi, sok ja jas wa sje'awe ja aluman Dyos jumasa, man tiwi wa'n je'xel ja tsamal yab'al ja Dyosi, sok spetsanile was k'ana oj ch'ak ochuke.

17—Mas mi wokoluk oj ch'ay ja satk'inal sok ja lu'umi, yuj ja mi oj k'ot smeranil spetsanil ja ab'al it ajiyi ja Moises yuj ja Dyosi.

18—Jun winik ta wan k'a sjipakan ja sche'umi, sok wax cho nupani sok pilan ixuk, ja jastal jawi, wani sta'a smula yuj ja mi tojuk ay sok ja sche'umtak. Cho jach'ni jun winik ta wan k'ax nupani sok jun ixuk jipub'al kan yuj ja statami, wani sta'a smula, —xchi ja Jesusi.

Ja Lazaro sok ja winik jel stak'ini

Ti cho yala ja Jesusi:

19—Ajyi jun winik jel ja stak'ini, jel tsamalik wa slapa ja sk'u' swexi. Kada k'ak'u wa sk'u'lan k'in ja b'a snaji, jaxa swa'el wax yab'i ja'ni b'a cha'an lek sts'akoli. 20Cho ay jun winik jel ajula sb'aj Lazaro sb'i'il, ja ye'ni k'a'el ja skwerpo, ti wax ajyi mech'an b'a spuerta ja winik jawi. 21Ti wax jak ja ts'i' jumasa wax jak slek' ja sk'a'elal ja skwerpo'i. Jaxa ye'ni jel ni wa'inx yab'i, lajan sok oj waj stul ja ts'ub'il ja swa'el wax mok' b'a yib' smesa ja winik jel stak'ini.

22—K'ot jun k'ak'u cham ja Lazaro, ti yi'aje ja yanjel jumasa ja Dyos b'a jun tsamal chonab', ja b'ay ja Abraham ma' ek' paxta yujile'i, cho mi ek' jitsan k'ak'u cham ja winik it jel ja sta'kini ti waj mukjuk kana. 23Jaxa winik jel stak'in jawi, yajni jel wa'n yi'jel ja wokol ja b'ayi b'a wax waj ja cham winik jumasa, ti yila ja Abrahami, jaxa Lazaro ti kulan ek' b'a sts'e'el, najat lek wax yila sb'aje.

24—Ja'yuj ti yawa' tsats lek ja Abrahami, ti yala'a: —Tat Abraham, talna jya'ujlal. Jeka ja Lazaro a ya po'xuk sok ja' ja sni syal sk'ab'i, a scheb'es ki t'usan ja kak'i. Jel tsats ja wokol wa'non yi'jel ja b'a yoj k'ak' iti. 25Ti yala ja Abrahami: Cho jach'ni ja we'n cho kintila'ni'a, a jak ak'ujol ja yajni sak'anexto, ja we'n jel lek ek' a wuj ja b'a lu'umi, jaxa Lazaro jel ajujla sb'aj ek' sok ja schameli, ja'yuj ja ye'n ja ya'n, jel tsamal ja b'ayi, jaxa we'n ojni a wi lek ja wokola. 26Sok mi kechanuka, ja we'nlex sok ja ke'ntikoni, ay jun niwan k'e'en b'a wa spilawotiki, mini ma' oj b'ob' ek' kujtikika, ja'yuj mini oj b'ob' jta' jb'ajtika, —xchi ja Abrahami. 27Ja winik it jel stak'ini ti yala'a: —Tat Abraham ta yuj k'a jach' jastal jawi, wax k'ana a wi pabor jeka ja Lazaro ja b'a snaj ja jmoj aljel jumasa. 28A waj yal yab' ja jo'e jmoj aljel jumasa, ta yuj k'a mix ya'we kan sle'jel ja smule'i, tini oj jakuke ja b'a jel ja wokoli. 29Ti yala ja Abrahami: Ja wa moj alijel jumasa tey b'a sk'ab'e ja jas ts'ijb'anub'al ja b'as mandar ja Moisesi. ¿Jasyuj ja mi sk'umane'i? 30Ti yala ja winik it jel stak'ini: Tat Abraham, —Mi malanuk sok ja jawi—. Yuj k'a wax waj junuk ja ma chamelxa a waj lo'lanuk soke, wax k'u'an ja ke'n oj sutxuk ja sk'ujole b'a oj sk'u'uke ja Dyosi, —xchi ja winik it jel stak'ini. 31Ti yala ja Abrahami: Ta mik'a skisawe ja jas wax yala ja b'a yab'al ja Dyosi, jastal oj skis'e jun cham winik, —xchi ja Jesusi.

Currently Selected:

Lucas 16: YABD

Highlight

Copy