Lucas 21

Ja slimosna ja viwuda

(Mr 12:41-44)

1Ja Jesusi, tey b'a snajtsil tsomjel, ti yila chab' oxe ja ma' jel ja jastik sb'aje'i, wa'ne ya'jel och slimosna'e ja b'a wa snolowe ja limosna jumasa. 2Ti cho yila jun viwuda wa'n ya'jel och chab' sat tak'in b'a jel ko'el. 3Jaxa Jesusi, ti yal yab' ja sneb'uman jumasa:

—Ja smeranil ja viwuda iti, jelni ajula sb'aj ja ye'n pero jelni jitsan ya'a ja slimosna ja ye'n yuj spetsanil ja ma'tik jel ja stak'ini. 4Spetsanile ja ye'nle'i, jel t'usan ja janek' ya'awe'i, ja ya'awe b'a mas ko'eli; jaxa viwuda iti, jelni ajula sb'aja, yuxta ya'ani kan spetsanil ja janek' yi'oja, mixani jas yi'aj kana, —xchi ja Jesusi.

Ja snajtsil tsomjeli ojni jomuka

(Mt 24:1-2; Mr 13:1-2)

5Chab' oxe ma'tik wa'ne slo'ilajel, yuj ja tsamal ton jumasa och ja b'a snajtsil tsomjel ja k'ak'u wa'ne stojb'esjeli, sok ja jastik jel tsamal lokan yujile b'a yojoli. Ja'yuj ti yala ja Jesusi: 6—Oj k'otuk ja k'ak'u oj ch'ak jom spetsanil ja iti, —Mini jun ton oj kan latsan ja b'a snajtsil ja tsomjela.

Chapa a b'ajik yuj ja b'a stik'anali

(Mt 24:3-28; Mr 13:3-23)

7Ja Jesusi, job'ji yi yuj ja sneb'uman jumasa:

¿Kajwal, ja sk'ak'uil oj ch'ak jomuk ja snajtsil ja tsomjel b'a? ¿Ja senya'il oj ilxuk ja yajni ojxa ek'uk ja it b'a?

8Ti alji yabye yuj ja Jesusi:

—Talna lek a b'ajik. Mok a wa'a b'ajex lo'lajel. Jel jitsan ja ma oj yi' majan ja jb'i'ili, jach' oj yalwe yab' jastal it ja kristyano jumasa: Ke'non ja Mesiasi oj chi'uke. Ja ya'ni yujni ti k'ot ja jk'ak'utika oj chi'uke. Mok lom a k'u'ukex. 9Oj ja wabyex yab'alil ja niwak tiro'anel jumasa, sok ja tuktukil wokol b'a niwak chonab' jumasa, mi lom la xiwyex. Ja wokol jumasa jawi ojni ek'uka, kechan mitoni ja'uk ja stik'anila. 10Ja niwak chonab' jumasa, ye'n ita oj och k'e'uke tiro'anel, 11Ja b'a tuktukil chonab' jumasa jel tsats oj ek'uk ja templori. Jaxa b'a tuk chonab' jumasa, mi oj sta' jas oj yabye jel tsats oj yi'e ja wokol yuj ja chamel jumasa. Jel xiwela sb'aj ja jas oj ilxuk b'a satk'inali, oj ya k'itk'unukotik.

12—Jaxa yajni mitox ek' spetsanil ja iti, ay winik oj syam'ex oj slut ex. Oj a'janik b'a sk'ab' ja ma' ay ya'tel ja b'a snajtsil tsomjel b'a oj waj lut' janik kani, oj i'janik b'a sti sat ja mandaranum jumasa, oj ya'wi'ex niwak wokol, ja'ni yuj ja lom jneb'umanexi.

13—Ja jawi jun slekil, b'a jach' oj a ta'ex jastal oj ja ta'ex ti' ja jb'i'ili. 14Mok chama k'ujolex, yuj ja jas oj ja wal'ex b'a oj ja kolta b'ajexi. 15Ke'n oj ka jul a k'ujolex jasunk'a oj a wal'exi, mixani june ja ma' mi lek wax yilawex oj sta' jas oj yal'e', sok mixa oj b'ob' yal'e yuj mixa na'awex ja jas waxa walawexi.

16—Jaxa we'nlexi a'nima Ja'uk ja wa nan a tatexi, ma ja wa moj alijelex jumasa, ma ja ma' lekxa wila a b'ajex soki, ojni ya'wex b'a sk'ab' ja ma' ay ya'teli, sok ay ma' oj miljuk a wujilex. 17Spetsanil ja kristyano jumasa, jel oj staklayex yuj ja jneb'umanexi. 18—Mi lom xcham a k'ujolex. 19Ta yuj k'a toj wala ajyiyex man b'a stik'anal ojni a ta' wa koltajelexa.

20—Yajni xa wilawex joyb'anub'alxa ja chonab' Jerusaleni, na'awik yujni jelxa mojan oj ch'ayjuk sna'jela. 21Ja'yuj ja ma'tik tey b'a chonab' jawi, elanik ja tiwi; jaxa ma'tik tey b'a chonab' jumasa b'a Judea pakawik ajnel b'a wits; jaxa ma' tey b'a witsi, mokxa kumxanik ja b'a chonab'i. 22Ja Dyos ja k'ak'u jumasa jawi, oj ya stup ja smul, ja ma'tik mix k'okxi b'a oj sk'u'uke ja Dyosi, jach' jastal wax yala b'a ts'ijb'anub'al ja yab'al ja Dyosi. 23Jaxa ixuke jumasa ma'tik kuchan yujile niwan chamel ja k'ak'u jawi, jel oj yi'e ja wokoli. —Ajula sb'aj ja ma' ay yi'oj yawal alats ja k'ak'u jawi—. Yuj ja spetsanil ja swinkil ja chonab' iti, jel oj yi'e ja wokoli, cho ojni a'ji stup ja smule'a. 24Ay ma sok machit oj miljuk, jaxa tuki oj lutjuke b'a tuktukil chonab'. Jaxa chonab' Jerusaleni oj ch'akuk oj cho i'juk kan yuj swinkil b'a tuktukili chonab', man oj cho k'otuk ja k'ak'u oj ch'ayjuk sna'jele ja kristyano jumasa jaw yuj ja Dyosi.

Oj kumxuk ja yunin ja Dyosi

(Mt 24:29-35,42-44; Mr 13:24-37)

25—Ja k'ak'u jumasa jawi, jel tuk oj ilxuk ja k'ak'u, ja nan ixawi sok ja k'anal jumasa, b'a slechanal ja lu'umi, ja kristyano jumasa jel oj jomuk ja s'olome'i, sok jel oj xiwke yuj ja jastal jel tsats wa spuk'tsin sb'aj ja ja' b'a niwan paman ja'i. 26Ja kristyano jumasa, ti'ni oj ajyuke b'a yojol ja wokol jumasa ita, oj jom sk'ujole yuj ja jelxa mojan ja stik'anali. Oj ch'ak syo'pes ja yip ja Dyosi, ja jas tey b'a satk'inali oj ch'ak mokoni. 27Ja senya jumasa jaw oj ja wil'exi, yujni ja'xa wa'n sje'jel yuj jelxa mojan oj cho jakon otro bwelta ja b'a lu'um ita, jaxa ke'n ja yuninon ja winiki, oj yil'on ja kristyano jumasa ti jakumon b'a yoj ason sok spetsanil kip sok jel tsamal. 28Yajnix ch'ak ek' spetsanil ja iti, tsats lek la ajyiyex, yujni jelxa mojan oj jak skoltanex ja Dyosi.

Ja jas wa sk'ana yal yuj ja ste'il ja igo

(Mt 24:32-35; Mr 13:28-31)

29Ja Jesusi, cho yala ja lo'il iti:

—Neb'awik ja jastal wax waj ja ste'il ja igo, ma ja pilan te' jumasa. 30Yajni waxa wilawex wa'nxa elel ja syawal spowil jumasa, yuj ojxa k'e' ya' ja ja'i. 31Cho jach'ni ja yajnixa wilawex wa'n ek'el spetsanil ja jas kalunej a wabyexi, na'awik yuj jelxa mojan oj ke skul mandar ja Dyosi. 32Ja smeranili, wax kala wabyex, ja oj ek'uk ja iti, ayni ma' sak'anto oj ajyuk ja ma sak'an ay ja ya'n. 33Ja satk'inal sok ja lu'umi oj ni ch'akuka, jaxa jas wax kala ojni k'ot smeranila.

Ja Jesusi ya sna' ja sneb'uman jumasa

34—Talna a b'ajex— Moka ch'ay'ex lom k'ak'u sk'u'ljel k'in ma oj och yakb'anik, sok mini ja jas oj sk'apa a wi'ex ja lu'um iti. Ja ke'n jun ita ch'ay k'ujol oj jakon, 35jaxa we'nlexi, ja lajanex sok ja yal chan b'a jun ita ch'ay k'ujol wax ko trampa. 36Ja'yuj k'elan jakan ajyanik, k'umanik ja Dyos spetsanil k'ak'u b'a jach' oj b'ob' a kolta b'ajex sok ja wokol jumasa oj ek'uki. Jachuk oj b'ob' ajyanik jmok yuj ja ke'n yuninon ja winiki.

37Ja Jesusi, spetsanil ja k'ak'u jumasa, ti wa'n sje'jel ja yab'al ja Dyos b'a yoj snajtsil tsomjeli, ja'xa b'a a'kwali ti wax waj b'a wits Olivos. 38Ja kada sakb'el ja kristyano jumasa ti wax wajye b'a snajtsil tsomjel wax waj smaklaye ja jas wax yala ja Jesusi.

Currently Selected:

Lucas 21: YABD

Highlight

Copy