Lucas 3
3
Ja Juan it wax ya'a yijel ja'i
(Mt 3:1-12; Mr 1:1-8; Jn 1:19-28)
1-2Ja Juan it ma' ya'a yijel ja'i yunin ja Zacariasi, ti ajyi b'a chayan lugar. Ti k'umaji tiw yuj ja Dyosi, Jaxa winik sb'i'il Tiberio ja k'ak'u jawi, ayxa jo' lajune jab'il (15) ye'n mandaranum ja b'a chonab' Roma, jaxa b'a Judea ja mandaranum ay ja Poncio Pilato. Jaxa Herodesi, ye'n mandaranum ay ja b'a Galilea; jaxa Felipe smoj alijeli, ti mandaranum ay b'a Iturea sok b'a Traconitide; jaxa Lisaniasi, ti mandaranum ay b'a Abiline. Jaxa Anas sok ja Caifasi ye'nle mas niwak ya'tele yuj ja pagre jumasa.
3Jaxa Juani, ti waj ek' ja b'a chonab' jumasa b'a mojan yi'oj ja niwan ja' Jordani. Ti wax yal yab' ja kristyano'i, a sutxuk ja wa k'ujolexi, k'u'anik ja Dyosi, cho i'ajik ja', ja jachuki, oj b'ob' sch'ay ja wa mulex ja Dyosi.
4Ek' jitsan k'ak'u ja aluman Dyos Isaiasi, ti sts'ijb'an jastal it yuj ja Juani, ti yala'a:
—Ay ma tsats lek oj awanuk ja b'a chayan lugari:
—Tojb'esik yi ja sb'ej ja Kajwaltiki.
—Jamawik lek,
—Mok jas timjuk yuj.
5—B'ut'uwik ja lopan jumasa,
lajawik ja b'a cha'an jumasa,
tojowik ja b'a lochani.
6—B'a jach' oj yil spetsanil ja swinkil ja lu'umi
ja jkoltanum it oj sjek ja Dyosi,
xchi ja aluman Dyos Isaiasi.
7Jitsan kristyano jak b'a oj ya' yi' ja' ja Juani, ti wax yal yabye'a:
—Ja we'nlexi, ja a mojex ja b'its'il chani, ¿Wa'n a maxa walawex ta oj ja koltan a b'ajex ja b'a wokol oj ya'wi'ex ja Dyosi? 8Je'awik jastal oj ja wa'ex kan sle'jel wa mulexi. Mok a wal'ex ja ti oj a ta' a koltajelex yuj ja kechan yuj ja yintilex ja Abrahami. Yuj ja Dyosi, asta ja ton jumasa iti, oj b'ob' pax yintilil ja Abrahami. 9Ta yuj k'a ay jun te' b'a mi lek wax satini, oj sk'uts el man yech ja swinkili, oj ch'ak slap k'ak'. —Jach'ni oj sk'u'l jastal jaw ja Dyos sok ja we'nlexi, ja Dyosi, chapanxta b'a oj sch'ay sna'jel ja ma' mi lekuk ja jas wa sk'u'lani.
10Ja kristyano jumasa, ti sjob'owe'a:
¿Jasunk'a oj k'u'ltikon ja ke'ntikon b'a?
11Ti yala ja Juani:
—Ja ma' ay chab' lame ja sk'u'i', a ya'yi junuk ja ma' me yi'oji. Ja ma' ay swa'eli; a ya'yi ja ma mey yi'oji.
12Ti cho jak chab' oxe tajb'a kontribusyon b'a Roma, ti sjob'owe ja ye'nle'i:
¿Jaxa ke'ntikoni, jasunk'a oj k'ultikon b'a oj ta' ja jkoltajeltikon b'a?
13Ti yala ja Juani:
—Mok a tajb'ayex mas ja kristyano yuj ja janek' t'ilan oj stup'e'i, —xchi ja Juani.
14Ti cho sjob'owe chab' oxe soldado'a:
—Jaxa ke'ntikon Juan, ¿jasunk'a lek oj k'ultikon b'a?
Ti yala ja Juani:
—Ja we'nlexi, mok a lo'layex lom ja kristyano'i, mok a k'an'ex yi lom tak'in. Ajyanik gusto sok ja wa ts'akolex janek' wala tupjiyexi, —xchi ja Juani.
15Jaxa kristyano jumasa jel cham sk'ujole yuj ja jas wax yala, wa sk'ana oj sna'a'e ta ye'nxa ja Mesias it wa'ne smajlajeli. 16Jaxa Juani, ti yala'a:
—Ja ke'ni, kechan wax ka' awi'ex ja' sok toj ja'. Jaxa ma' ti jakum tsa'an yuj ka ke'n mas jel ja yip ja ye'n yuj ja ke'ni. Ja ye'n oj ya' awi'ex ja' jani sok ja Espiritu Santo, sok k'ak'. —Jaxa ke'n mixa oj makunukon b'a moso'il. 17Ja ma' ti' jakum tsa'an yuj ja ke'n, oj ch'ak spil ja b'a lek sok ja b'a mi lekuki. Ja b'a leki oj snolkani, jaxa b'a mi lekuki ti oj sjip b'a yoj k'ak' b'a mix tupi.
18Jach' jastal iti, ja Juani je sle'a smodo'il, jastal oj slo'ilta yab' ja kristyano ja ab'al it jel tsamali. 19Cho yal yab' toj jas mul ja mandaranum Herodes yuj ja lom slo'lan sb'aj sok ja Herodias sche'um ja Felipe smoj alijeli, ch'ak yal yab' spetsanil ja jas jel kistal sk'uluneji. 20Jaxa Herodesi, mi sk'ulan gusto ja jas alji yab'i, mas to sk'u'lan: cho sluto ja Juani.
Ja Juani ya yi' ja' ja Jesusi
(Mt 3:13-17; Mr 1:9-11)
21Yajni ch'ak ya yi' ja' spetsanil ja kristyano ja Juani, ti' cho jak ja Jesusi cho yi'aj ja' ja ye'ni. Yajni wa'n sk'umajel ja Dyosi, ja satk'inali sjama sb'aj 22jaxa Espiritu Santo ti ko' tek'an sb'aj jastal wax ko' jun pumus, jaxa b'a satk'inali ti ab'xi jun k'umal wax yala jastal iti: —We'n, ja kunina, jel wax yajtaya, jel gusto ayon a mok, —xchi ja k'umali.
Ja ma' ek' paxta yuj ja Jesusi
(Mt 1:1-17)
23Ja Jesusi, ay yi'oj mojan jun tajb'e lajune jab'il (30) ja yajni k'e yal ja yab'al ja Dyosi, ja kristyano'i wax yala ja' yunin ja Jose. Ja b'i'ilal jumasa iti, ja ma' ek' paxta yuji:
Jose,
Eli,
24Matat,
Levi,
Melqui,
Janai,
Jose,
25Matatias,
Amos,
Nahum,
Esli,
Nagai,
26Mahat,
Matatias,
Semei,
Josec,
Joiada,
27Johanan,
Resa,
Zorobabel,
Salatiel,
Neri,
28Melqui,
Adi,
Cosam,
Elmadam,
Er,
29Jesús
Eliezer,
Jorim,
Matat,
30Levi,
Simeon,
Juda,
Jose,
Jonam,
Eliaquim,
31Melea,
Mena,
Matata,
Natan,
32David,
Jese,
Obed,
Booz,
Selah,
Nahason,
33Aminadab,
Admin,
Arni,
Herson,
Fares,
Juda,
34Jacob,
Isaac,
Abraham,
Terah,
Nahor,
35Serug,
Ragau,
Peleg,
Eber,
Selah,
36Cainan,
Arfaxad,
Sem,
Noe,
Lamec,
37Matusalen,
Enoc,
Jered,
Mahalalel,
Cainan,
38Enos,
Set,
Adan,
sok ja Dyosi.
Currently Selected:
Lucas 3: YABD
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México 2021
