Lucas 9

Ja Jesusi sjeka ja lajchawe sneb'umani

(Mt 10:5-15; Mr 6:7-13)

1Ja Jesusi, stsomo ja lajchawe sneb'uman jumasa ya'yi yipe' b'a oj ya'we tojb'uk ja ma'tik mi lek ayi cho a'ji yipe b'a oj yawe eluk ja tantik pukuj jumasa. 2Ti'xa jekji ye b'a oj waj slo'iltaye ek' ja jastal jel tsamal wa'n yaljel ja Dyosi, b'a oj cho ya'we tojb'uk ja ma'tik mi lek ayi. 3Ti alji yabye yuj ja Jesusi:

—Yajni la wajyexi, mok jas a wi'ex. Mok a wi' a nab'ante'ex mini a morralex, mok a wi' a wa'elex, sok mini a tak'inex. Mok a wi'ex pilan ja wa k'u' a wexexi. 4Yajni la k'otyexi, ja b'a na'its oj ochaniki, ti la ajyiyex tiwi, man oj elanik ja b'a chonab' jawi. 5Ta ay k'a chonab' b'a mi la k'anji yex, ja yajni la elyex ja tiwi, tsijunikan lek ja spolvo'il wa wokexi, b'a jach' ti oj sna'e yuj mi lek a wi'ajex—.

6Ti'xa elye ja sneb'uman ja Jesusi, ti wajye ek' b'a spetsanil ja chonab' jumasa, waj slo'iltaye ek' ja jastal jel tsamal wa'n yaljel ja Dyosi, wa xcho ya'we tojb'ukan ja ma'tik mi lek ayi.

Ja Herodesi, mi sna'a sb'aj ja Jesusi

(Mt 14:1-12; Mr 6:14-29)

7Ja mandaranum Herodesi, ch'ak k'ot schikin spetsanil ja jas wa'n ek'eli, jel cham sk'ujol ja yajni yab' ay ma' wax yala sak'wita ja Juan it ma' wax ya'a yijel ja'i. 8Jaxa tuki wax yalawe sje'a sb'aj ja aluman Dyos Eliasi, ma yuj ja sak'wi june ja aluman Dyos jumasa sb'a najate'i. 9Jaxa Herodesi, ti yala'a: ¿Ma' winikil ja it wax maklaxi jel tsamal ja jas wax yala b'a? Ja smeranili mi ye'nuk ja Juan it wax ya'a yijel ja'i, yuj ja ke'nani jeka miluman ja ye'n tak.

Ja'yuj ja Herodesi, jel t'ilan wa sk'ana oj sna' sb'aj ja Jesusi.

Ja Jesusi, ya' wa' jitsan kristyano

(Mt 14:13-21; Mr 6:30-44; Jn 6:1-14)

10Yaj kumxiye ja lajchawe sjekab'anum ja Jesusi, ti jak yalwe yab' petsanil ja jas sk'u'lane'i. Tsa'an ti i'ji ye yuj ja Jesús b'a chonab' Betsaida, yuj ja stuch'il wa sk'ana oj ajyuk sok ja ye'nle'i. 11Jaxa kristyano jumasa wego sna'awe ke ti'xa wajta b'a Betsaida ja Jesusi, ja'yuj ti wajye nochana.

Yajni k'otye ja b'ay ja Jesusi, spetsanile jel lek iljiye ti och aljuk yabye jastal wan yal jel ja Dyosi, cho ya' tojb'uk ja ma'tik mi lekuk ayi'.

12Yajni wa'nxa ochel ja a'kwali, ti waj aljuk yab' yuj ja sneb'uman jumasa:

—Jekaxa ja kristyano jumasa iti, a'xa waj sle' b'a oj jijluke b'a chonab', ma b'a jun na'its b'a mojan ayi, b'a jach' oj b'ob' sta'e manjel ja jas oj yabye'i, cho jach'ni b'a oj kan wayuke'i, —Yuj ja ili, mi jas ay.

13Ti yala ja Jesusi:

—A'wik yi we'nlex ja jas oj yabye'i.

Ti yalawe ja ye'nle'i:

—Mi jas mas ki'oj tikon, kechan jo'e pan sok chab' chay, ta yuj k'a ke'n oj ka'tikon wa' spetsanil ja kristyano jumasa iti, t'ilan oj waj mantikon jitsan wa'elal, 14yuj ja jel jitsan ja kristyano'i, yuja ay mas ja jo'e mili (5,000).

Jaxa Jesusi, ti yala'a:

—A'wik jijluk ja kristyano jumasa, alawik yabye a spil sb'aje k'olan k'olan, a yi' sb'aje chab' tajb'e sok lajune (50) b'a kada k'ole.

15Ja sneb'uman jumasa jach'ni sk'u'lane ja jastal yala ja Jesusi.

16Jaxa Jesusi, ti yi'aj ja jo'e pan sok ja chab' chay jawi, sk'ela k'e b'a satk'inal ti sk'ana yi ts'akatal ja Dyosi. Tsa'an ti' xet'a'a ya'yi ja sneb'uman jumasa, b'a ye'nlexa oj sk'ep'e yi ja kristyano jumasa.

17Spetsanil ja kristyano'i, ch'ak wa'uke b'ut'ye lek. Jaxa spetsanil janek' kan sobra, b'ut' lajchawe mo'och.

¿Machunk'a ja Jesusi?

(Mt 16:13-19; Mr 8:27-29)

18Ja jun k'ak'u'il ja Jesusi, stuch'il wa'n sk'umajel ja Dyosi, jaxa sneb'uman jumasa ti k'otye ja b'a'yi. Ti job'ji yi'e yuj ja Jesusi:

¿Machun kilukon ja ke'n wax yala ja kristyano?

19Jaxa sneb'uman jumasa, ti yalawe'a:

—Ay chab' oxe wax yalawe ke we'n ja Juan it ma' wax ya'a yijel ja'i; ja tuki wax yalawe we'n ja aluman Dyos Eliasa'; jaxa tuki wax yalawe ja june ja aluman Dyos jumasa sb'a najate ke sak'wita.

20Tsa'an ti job'ji yi'e ja ye'nle yuj ja Jesusi:

¿Jaxa we'nlexi, jas la chiyex? ¿Ma'chun kilukon ja waxa walawexi?

Ti yala ja Pedro:

We'n ja Mesias, sjeka wakon ja Dyosi.

21Ti alji yabye yuj ja Jesús mok ma' yal'e' yab' ta ye'n ja Mesiasi.

Ja Jesusi, yala jastal oj chamuk

(Mt 16:20-28; Mr 8:30—9:1)

22Ja Jesusi, cho yal yab' ja sneb'uman jumasa: —Ja ke'n yuninon ja winiki a'nima jel oj ki' ja wokoli. Ja ma'tik ay ya'tel b'a niwak chonab' jumasa, ja pagre jumasa ma'tik niwak ja ya'teli sok ja ma'tik wa sje'awe ja mandar it a'ji yi ja Moisesi, mi oj skis'one' ojni smil'one'a; jaxa b'a yoxil k'ak'u oj ni sak'wukona.

23Tsa'an ja Jesusi, ti yal yab' spetsanil ja kristyano ma'tik tey tiwi:

—Ay k'a ma' sk'ana oj och jneb'umanil jel t'ilan ayakan spetsanil ja jas jelx k'ank'uni oj sk'u'luk ja ye'ni. A skuch spetsanil ja wokol jumasa, jel t'ilan ja oj sk'u'luk ja jas wax k'ana ja ke'n. 24Ay k'a ma' wax yala jel niwan ja sak'anil ye'n yuj ja oj snoch oni, yuj k'a jach' jastal jawi, ojni ch'ay sna'jela. Jaxa ja ma' wa sk'ana oj snoch oni, a'nima tix milji yuj ja ke'n; ja ye'n ojni sta' ja skoltajela. 25Ta ay ka jun winik wa sk'ana oj sb'ajuk petsanil ja lu'um iti, mi jas oj makunuk yuj ta ja k'a oj sch'ay ja yaltsili.

26—Ay k'a ma wax k'ixwi yuj ja jas wa'non sje'jeli, jach ni ja ke'n ja yuninon ja winiki ojni cho k'ixwukon yuj ja kristyano jumasa jaw ja yajni la jak yon sok spetsanil kipi, sok ja yip ja jtat sok ja yip ja anjel jumasa b'a tsa'ub'ali. 27Ja smeranili, wax kala wabyex, ja we'nlexi, ay chab' oxe ti ayex jmoka, mi oj chamanik man oj ja wil'ex ja yab'al ja Dyosi.

Ja Jesusi, stukb'es sb'aj

(Mt 17:1-8; Mr 9:2-8)

28Ek' waxake k'ak'u, ja Jesusi, yi'aj ja Pedro, ja Juan sok ja Santiago b'a jun cha'anil wits, b'a waj sk'umuke ja Dyosi. 29Ja Jesusi, yajni wa'n sk'umajel ja Dyosi, tukb'i ja sati', jaxa sk'u'i sak lek cho jel wax lijpi. 30Ti'xta sje'a sb'aje ja Moises sok ja aluman Dyos Eliasi, 31b'a sjoyanale jel tsamal wa'n ijlab'anel. Schawanile ti wa'ne lo'il sok ja Jesusi, ja wa'ne yaljel jastal oj miljuk ja Jesús b'a Jerusaleni, sok ja jastal oj sak'wuki, ja jastal oj cho waj b'a satk'inali.

32Jaxa Pedro sok ja chawane smoj neb'umanil jumasa, jelxa k'umb'ele yuj ja swayele'i, jasa mini och swayele'a, yilawe jastal jel tsamal joyb'anub'al yuj ja Jesusi, ja Moises sok ja Eliasi. 33Yajni ojxa wajuke ja Moises sok ja Eliasi, ja Pedro ti yal yab' ja Jesusi: —Je'uman, —Jel lek ja ti' aytik ili—. Taxa k'ana, oj tojb'estikon oxe lejchupat: June b'a wa b'aj we'na, june sb'a Moises sok june sb'a Elias.

Ja Pedro wan k'umal pero mi wa sna'a ja jas wan yaljeli. 34Yajni jach' wa'n yaljeli, ti ko' jun nole ason ja b'a'ye'i musjiye kani. Ja oxwane sneb'umani jel xiwye: 35Ja b'a ason jawi ti yabye jun k'umala, ti wax yala'a: —Ja iti, ja'ni ja kunin Mesias—. Jaxa we'nlexi jel ti'lan oj ja k'u'ukex—.

36Tsa'an sok ja k'umal yabye'i, ja sneb'umani ti yilawe kanta stuch'il ja Jesusi. Ek' jitsan k'ak'u mini ma yalwe yab' ja jas yilawe'i.

Ja Jesusi, ya tojb'uk jun kerem

(Mt 17:14-21; Mr 9:14-29)

37Ja b'a schab'il k'ak'u, yajni ko'yeta kon b'a wits ja Jesús sok ja sneb'uman jumasa, jitsan kristyano jak ta'juke yuj. 38Jun winik tey sok ja kristyano jumasa jawi, ti och mojan sok ja Jesusi, ti yal yab'a:

—Je'uman, wax k'ana a wi jun pavor, koltanki jayal kunini yuj ja kechan ye'ni. 39Junta ch'ay k'ujol wax jak yamjuk yuj ja tan pukuji wax a'ji awanuk, tsats lek wax a'ji k'itk'unuk, sok wax a'ji el spu'xil ja sti'i, yajni wax aktajikan yuj ja tan pukuji, cham sak'an wax a'jikani. 40Jk'anata yi pavor ja wa neb'uman jumasa ke'a ya'we eluk ja tan pukuji, jasa mini wax b'ob' yujile'a.

41Jaxa Jesusi, ti sk'ela ja sneb'uman jumasa, ti yala'a:

—¿Ta yuj k'a mi ti ayukon a mokexi, mini jas oj b'ob' a k'u'lukexa? ¿Jasunk'a waxa k'anawex jmok b'a? Ja we'nlexi, jomel olom ayex sok mixa k'u'anex ja Dyosi.

Ja'yuj ja Jesusi, ti yal yab' ja winiki:

—I'aj jan ja wa wunini.

42Jaxa keremi, yajni wa'n mojxel och sok ja Jesusi, ti cho jipji lu'um yuj ja tan pukuji, tsats lek och k'itk'unuk. Jaxa Jesusi, ti' yal yab' a el ja tan pukuji, yajni el ja tan pukuji, ti ya tojb'uk ja kerema, yajni tojb'ita ti'xa ya'yi ja stati.

43Spetsanil ja kristyano, jel cham ja sk'ujole'i yuj ja wax yilawe, jel niwan ja yip ja Dyosi.

Ja Jesusi, cho yala otro bwelta jastal oj chamuk

(Mt 17:22-23; Mr 9:30-32)

Yajni cham k'ujolto ay ja kristyano yuj ja jas wa'n sk'u'lajel ja Jesusi, jaxa Jesusi, ti yal yab' ja sneb'uman jumasa: 44—Maklayik lek ja jas oj kal a wabyexi. Ja ke'n, yuninon ja winiki, oj ni a'jukon b'a sk'ab' ja matik mini lek wax yilawone'a.

45Jaxa sneb'uman jumasa mi yabye sb'ej ja jas alji yabye yuj ja Jesusi, yuj ja mitonix k'ot ja k'ak'u oj yabye sb'eja, cho jel wa'ne xiwel ja'yuj mi sta'awe jastal oj b'ob' sjob' e yi ja sb'ej ja jas yala.

¿Machunk'a mas niwani?

(Mt 18:1-5; Mr 9:33-37)

46Jun k'ak'u ja sneb'uman jumasa ja Jesusi, och sjob' sb'aje, ja b'a jpetsaniltiki, mach'ma junuk ja mas niwan wax ilji'i.

47Jaxa Jesusi, yajni sna'a ja jas wa'n ek'el sk'ujole'i, ti spaya jan jun yal kerema, ti ya' tek'an b'a snalane, 48Ti yal yabye'a: —Ay k'a ma' wa xya'a sb'aj ch'in jastal ja yal kerem iti, yujni wa sk'u'anon ja ke'na. Yuj k'a ay ma wa sk'u'anon ja ke'n wanix cho sk'u'an ja Dyos ma' sjekawon koni. Ja ma' ch'in wax ya'a sb'aji, ye'n ja jel niwan wax ilji, —xchi ja Jesusi.

Ja ma lek wax ilji yuj ja Jesusi

(Mr 9:38-40)

49Ja Juani, ja'ni june ja lajchawe sneb'uman jumasa ja Jesusi, ti yal yab'a:

—Je'uman, ay ma' kilatikon ja wa sta'awe ti' ja wa b'i'il b'a wa snutsu ja tan pukuj b'a kristyano jumasa. Jaxa ke'ntikoni kalatikon yabye mok sk'u'luke jachuk, yuj ja mini jmojuk jb'ajtik soke'i.

50Ti alji yabye yuj ja Jesusi:

—Mok a kom'ex, yuj ja ma lek wax yilawexi, ja smeranili, yujni lek wax yilawexa.

Ja Jesusi, yutaj ja Santiago sok ja Juani

51Yajni wa'nxa mojxel ja k'ak'u, oj i'juk k'e b'a satk'inal ja Jesusi, ti yala oj waj b'a Jerusalena. 52Sjeka chab' oxe jekab'anum b'a jun chonab' sb'a Samaria, b'a oj wa sle' b'a oj sjijluke b'a oj ya'we ek'uk ja a'kwali. 53Jaxa swinkil ja chonab' jawi, mi sk'anawe ja Jesús yuj ja wa sna'we ti wajum b'a Jerusaleni.

54Yani yabye ja chab' sneb'uman ja Santiago sok ja Juan ja jas alji yabye'i, ti yalwe yab' ja Jesusi: —Kajwal, awotikon libre, oj k'umuktikon ja Dyosi, oj kaltikon yab' a sjekon k'ak' b'a satk'inal b'a oj sch'ak sna'jel spetsanil ja swinkil ja chonab' iti—.

55Jaxa Jesusi, ti sutu sb'aj ja b'a'ye'i ti komjiye'a. 56Jaxa tsa'ani ti'xa wajye b'a pilan chonab'a.

Ja ma oj snoch ja Jesusi

(Mt 8:19-22)

57Yajni ti'xa wajume b'a b'eji, ay ma alji yab' yuj ja Jesusi:

—Chikan b'a oj wajana ojni jnoch a'a, —xchi.

58Ti yala ja Jesusi:

—Ja wet jumasa ay sk'e'en jaxa yal chan jumasa cho ay soj, jaxa ke'n ja yuninon ja winiki mey b'a oj jijlukona.

59Tsa'an ja Jesusi, ti cho yal yab' ja juni:

—Ja we'n nochowon—.

Ti yala ja ye'n:

—Kajwal, majlayon t'usan oj mukan b'ajtan ja jtati, ti oj wajkon a moka, —xchi.

60Ti yala ja Jesusi:

—Ja mas t'ilani, yuj ya'n oj wajan b'a oj waj a wal ek' ja jastal jel tsamal wa'n yaljel ja Dyosi. A'kan b'a sk'ab' ja ma' ch'ayel ay a smuk jax cham winik jumasa.

61Ti cho jak pilan winika jak yal yab' ja Jesusi:

—Kajwal, wax k'ana oj noch a, kechan majlayon oj waj k'umuk kan che'um sok ja kuntikili.

62Ti yala ja Jesusi:

—Mi oj b'ob' ochuk b'a wa skulan mandar ja Dyos jun ma' mi lek wax a'tiji. Ja ma' wa sjutu ja lu'umi, ta yuj k'a wa sk'ela spatik, ja chol jumasa lochan b'ech'anxta wax kani.

Currently Selected:

Lucas 9: YABD

Highlight

Copy