Mateo̱ 26

Kucha ꞌyendá xu̱ta̱ nga ꞌyetꞌáre Jesuu̱

(Mr 14.1-2; Lk 22.1-2; Jua 11.45-53)

1Ku nga je kumá nga ikuya Jesuu̱ ku̱i̱cha kitsúre̱ ja xi kjibakuyáre̱: 2«Jún, yájnu nga jótse ni̱tjin chajá nga ma sꞌuiꞌe Paskua̱. Ngajinꞌen kui sꞌui, an, Kjindiꞌe xu̱ta̱ nga̱sunde, kja̱beꞌñúnna xu̱ta̱ tꞌa kru beyaꞌan.»

3Kui ni̱tjin, ja chanaꞌmi xi ngitku̱ kju̱ xu̱ta̱ xi inchatetjúnre̱ na̱xi̱nanda kutku niꞌya tsjuatjinꞌen Kaifa̱, xi siantetjunre ja chanaꞌmi. 4Ngieje nga kitsindsiji̱n xikjin nga ꞌbanachajo Jesuu̱, kjaꞌbeꞌñu ku tsikꞌien. 5Ta̱nga tjin xi tsú: «Ngajinꞌenjín sꞌui nga ku̱a̱cha ñaꞌánña, tuxi ñajín tsitiju̱ña xu̱ta̱ ku sijí ma.»

Ngu chjun kitsisinje̱n tsjai Jesuu̱

(Mr 14.3-9; Jua 12.1-8)

6Ngande xi ꞌmí Betania̱ kjitjián Jesuu̱, niꞌyaꞌe̱ Ximo̱, xi kisꞌere chiꞌin xi findujun tjiuxínña. 7Nga tjikjien Jesuu̱, jichú ngu chjun xi tsuꞌbajo ngu lometa̱ ndijua sinje̱n xi chjí. Kui chjun kitsitiña yajo̱ꞌe jma kjitjián Jesuu̱ ku ngatsjatkuu̱ ietejún ndijua sinje̱n.

8Ja xi kjibakuyáre̱ Jesuu̱ kitsiti ku ku̱i̱cha kitsú:

—¡Mí xá ku̱a̱cha tsikjetsún najmi! 9Kumá tsa kikateñá kui ndijua sinje̱n, ku ton xi tsejen kumá tsa kjín xu̱ta̱ xi ni̱ma̱ kitsiꞌíre ngaꞌñu. 10Tsitꞌére Jesuu̱, ku tjeꞌñu ku̱i̱cha kitsúre̱:

—Ngatu̱ chꞌaojí ꞌmíjnu kui chjun. Ndátjin najmi xi tjitsꞌijúnna. 11Tutsjai nga kꞌue xu̱ta̱ xi ni̱ma̱ jmanga kꞌu̱e̱májnu, ta̱nga an je xatí nga ngite̱ kꞌu̱i̱jí batejñajúnjnu. 12Kui chjun ndijua sinje̱n itejun tku̱ꞌan, ku bejí tsa yajoꞌna kjiꞌbendá nga fañajínna. 13Kju̱a̱xikjain najmi xi xinjnu nga tujmáni nga tsijaꞌakja Enꞌen Namiña Diuu̱ ku kꞌi̱a̱ kju̱a̱ꞌakja najmi xi kitsiꞌin kui chjun ku tju̱yá jínꞌen.

Juda̱ skabe ngatun Jesuu̱ ku kitsikasꞌen

(Mr 14.10-11; Lk 22.3-6)

14Kui ni̱tjin, Juda̱ Iskariote̱, kju̱ kui xi tejó ja xi kjibakuyáre̱ Jesuu̱, kikasére̱ ja chanaꞌmi xi inchatetjun 15ku ku̱i̱cha kitsúre̱: «Kó ꞌbechjíjnu tsa basejúnjnu nga chjabeꞌñújnu Jesuu̱.»

Kui ja chanaꞌmi kitsúre̱ nga kate tao̱n tiaba. 16Ku janda kjiaku̱a̱ tsangitsjai ngande Juda̱ kúcha ndá tsiꞌin nga tsikasꞌenre.

Chayají kúcha tsakjienjun Jesuu̱ nga jñú ja xi kjibakuyáre̱

(Mr 14.12-25; Lk 22.7-23; Jua 13.21-30; 1Co 11.23-26)

17Ni̱tjin xi tjúnre̱ sꞌuiꞌe ni̱pan xi nisanjín, ja xi kjibakuyáre̱ Jesuu̱ kitsitiñare yajo̱ꞌe jma sián ku ku̱i̱cha kitsúre̱:

—Jmá mejenri nga ꞌbendájni xi chineña kui jñu nga̱tꞌaꞌe sꞌuiꞌe Paskua̱.

18Ku̱i̱cha skengire Jesuu̱:

—Tangijnu na̱xi̱nanda, Tinchitsjáijnu xta̱ xi ndá kichꞌaña, xi yájnu ꞌya, ku titjuájnu kui en: “Ku̱i̱cha tsú chjine: béꞌan nga je xati beyaꞌan; kui kju̱a̱ mejenna nga niꞌyari tsiꞌinꞌan sꞌuiꞌe Paskua̱ kju̱ ja xi tebakuyana.”

19Kijí ja xi kjibakuyáre̱, ku kitsikitjusún xukúcha kitsúre̱ Jesuu̱. 20Nga je tsejen jñu, nga inchakjien Jesuu̱ ku ja xi kjibakuyáre̱, 21kui ku̱i̱cha kitsúre̱:

—Ngu xi jña tijñaña kꞌui, xi tsikasꞌenna ngaya tsja xi táonreꞌan.

22Kui nga tuxi ngí kumáre̱ ja xi kjibakuyáre̱, ku ja tsichja ja tsichja nga ngu ngu kui ja, ku ku̱i̱cha kitsúre̱:

—Ndi̱a̱ꞌna̱, ta̱nga anjín xi tjibixíni, atsa kjain.

23Skengi Jesuu̱:

—Xi kitsikꞌanchi̱ ni̱panꞌe̱n ngaya tiba xi tekji̱e̱nyaꞌa̱n, kui xi tsikasꞌenna. 24Chji tjichja̱ Xu̱ju̱n Enꞌen Namiña Diuu̱ nga an, Kjindiꞌe xu̱ta̱ nga̱sunde, tu̱xá nga beyaꞌan. Ta̱nga xi tsikasꞌenna, xi kjabe ngatu̱nna, ngu najmi xi tuxi chꞌao tjin kumataꞌin. ¡Ngisa chjiꞌere̱ tsa kitjukjají!

25Juda̱, xi jaskan nga kitsikasꞌen Jesuu̱, tekuácha tsinengiyáre̱:

—Jí kua Chji̱ne, a án xi tjibixíni.

Ku̱i̱cha skengire Jesuu̱:

—Jí xi ku̱a̱ tjibixiji.

26Ku nga inchakjien, Jesuu̱ skabe ngu ni̱pan ku kitsjuáre nikꞌuechji Namiña Diuu̱. Kjia ikjanya, ku kitsjuáre ja xi kjibakuyáre̱ ku ku̱i̱cha kitsúre̱:

«Tꞌiujnu ku chinejnu; yajoꞌna xikꞌui.»

27Ku kjia skabe ngu baso, kitsikitse nga incha bino ku kitsjuare nikꞌuechji Namiña Diuu̱. Kjia kitsikjaꞌare̱ ja xi kjibakuyáre̱ ku kitsúre̱:

«Tꞌiujnu nga ngiejejnu kui bino. 28Jínꞌna xikꞌui, ku kui xi tsichjen Namiña Diuu̱ nga ꞌbendaju̱jnu ngu kju̱a̱. Kui jín xi machjen nga kjín xu̱ta̱ nichatꞌáre jeꞌe. 29Kꞌui kju̱etꞌa kꞌui nga kui bino ꞌbijújnu. Ta̱nga nga te̱ jña ꞌbemániña ngi ngu ndiya, jma kjibatexuma Namiꞌna, kjia kjiaku̱a̱ nga bino tjatse ꞌyúña.»

30Ku nga je kumá, kise sun xi ndá chja̱ya Namiña Diuu̱ ku kijí Tjengi jma tjin ya olibo̱.

Kitsjua en Pe nga tsikjaꞌa basenjín Jesuu̱

(Mr 14.26-31; Lk 22.31-34; Jua 13.36-38)

31Nga jichú Tjengi jma tjin ya olibo̱, Jesuu̱ ku̱i̱cha kitsúre̱ ja xi kjibakuyáre̱:

—Kui ni̱tja̱n ngite̱ sꞌejinjínjnu an. Nga̱tꞌa ku̱i̱cha tsú Xu̱ju̱n Enꞌen Namiña Diuu̱:

“Tsikꞌienꞌan xi ndá béna,

ku̱a̱cha kuma nga stetsajo na̱xi̱nandaꞌna.”

32»Ta̱nga nga te̱ tsikjaiyánina Namiña Diuu̱, án tjun fueꞌa̱n Ngalilea̱ nga jún.

33Ku kjia kitsú Pe:

—Ndatsa ngieje xi tsikjaꞌabasenri, ta̱nga an tsikjaꞌabasenjínra.

34Ku̱i̱cha skengire Jesuu̱:

—Pe, ngatu̱ ꞌñujín kixi ꞌbejniri yajori nga kuacha niꞌin; tekjie nga kjinda ján ndiya xa̱nda̱ xicha, bixíni nga yijína.

35Te̱ skengini Pe:

—Ndatsa jña beyajura, najmí ni̱tjin tsanga xínꞌa̱n nga bejinjínra.

Ja xi kjibakuyáre̱ Jesuu̱, xi ngisa, tekuácha kitsú.

Tuxi ngi tjínre Jesuu̱ nga tsinengíre̱ kju̱a̱ndá Namiña Diuu̱

(Mr 14.32-42; Lk 22.39-46)

36Ja̱skánni, Jesuu̱ jña kijíni kju̱ ja xi kjibakuyáre̱ ngu ngande xi ꞌmí Ngetsemaní, ku kitsúre̱: «Tijñájnu kꞌui, Namiña Diuu̱ faichjatꞌamana kꞌi̱a̱.»

37Jesuu̱ kitsikitꞌe Pe, Santia ku Jua tuxi jña fueju̱. Ku kjia tuxi ngí kumáre̱ anima̱ꞌen, 38«Tuxi ngí tjínna. Xuku xi beyaꞌan kjimana. Jña tjiꞌñaju̱njnu kꞌui ku tu̱ sufejíjnu.»

39Kitsikjinre yajo̱ꞌe Jesuu̱ jmanga kisꞌendu kui ja, isén tkiuꞌe nangi ku skanda nangi kitsikꞌajore tjen, ku tsinengíre̱ kju̱a̱ndá Namiña Diuu̱: «Nami, ¡kúratsecha mejénna nga chjubaꞌína kui kju̱a̱ꞌón kju̱a̱nde! Ta̱nga najmi xi texinjínꞌa̱n xi ku̱ma, xi tjibixiji kui xi ku̱ma.»

40Jichúni Jesuu̱ jma sindu xi ján ja xi kjibakuyáre̱, ta̱nga sindufétse. Jesuu̱ ku̱i̱cha kitsúre̱ Pe: «A kumajín kisꞌendukúnjnu ndatsa ngu ura nga an tjimajúnjnu. 41Ngatu̱ sufejíjnu; chjinengijnu Namiña Diuu̱ tuxi chukju̱a̱jnu najmi xi ndiba. Mejénjnu nga ñaꞌánjnu najmi xi ndá, tanga chujíjnu kju̱a̱ ngatu̱ jun subá.»

42Te kijíni Jesuu̱ ngi ngu ndiya nga kikinengíre̱ kju̱a̱ndá Namiña Diuu̱, ku ku̱i̱cha tjitsú:

—Nami, tsanga tsubáre̱ nga faꞌaꞌa̱n kui kju̱a̱ꞌón, ngatitjusún xukúcha tjibixiji.

43Te̱ jichúni Jesuu̱ jma sindu ngiajan ja xi kjibakuyáre̱, ku te̱ sinduféni, nga̱tꞌa tuxi jenda kui ja. 44Ku te̱ kitsikjínni yajo̱ꞌe ku te̱ tsinengínire̱ kju̱a̱ndá Namiña Diuu̱ xi ma jan ndiya, ku tuku kuitse en te̱ kitsúni. 45Ku kjia te̱ jichúni Jesuu̱ jma sindu xi jan ja xi kjibakuyáre̱ ku ku̱i̱cha kitsúre̱: «A tuku tisuféjnu. Je ndiba xu̱ta̱ xi ndáji nga ndiukjaꞌaꞌñúna, Kjindiꞌe xu̱ta̱ nga̱sunde. 46¡Tisitjenjnu ku ndibajnu, kꞌi̱a̱ ndiba kꞌi̱a̱ xi tsikasꞌenna!»

Nga kiskabeꞌñu Jesuu̱ xu̱ta̱ xi táonre

(Mr 14.43-50; Lk 22.47-53; Jua 18.2-11)

47Tuku tjichja Jesuu̱ nga jichú Juda̱, ngu xi tejó ja xi kjibakuyáre̱ Jesuu̱. Kjín ja xiꞌin jña kjitsuꞌbajo xi yaꞌa ya xi yaꞌa michilu. Ja chanaꞌmi xi ngitku̱ kju̱ ja xi inchatetjúnre̱ na̱xi̱nanda kitsingiya. 48Je kisꞌendaju̱re̱ Juda̱ kui ja: «Xi mindsuꞌáꞌan ndatsaꞌe̱, kui xi Jesuu̱; ¡ku chjabéjnu!»

49Juda̱ kitsitiñare yajo̱ꞌe jma kjisián Jesuu̱ ku kitsúre̱:

—¡Kundarí Chji̱ne!

Ku indsuꞌa ndatsaꞌe̱.

50Ku̱i̱cha kitsúre̱ Jesuu̱:

—Amingo̱, kijna ti̱ꞌin xá xi tsubáre̱ nga niꞌín.

Ku ja xiꞌin xi jichú, skabeꞌñu Jesuu̱. 51Ku kjiakua, ngu ja xi jña tjima Jesuu̱ itsjé spadaꞌe̱, ku tsate ngu ñajun ngu xta̱ xi musuꞌe xi sián tetjúnre̱ ja chanaꞌmi. 52Ta̱nga Jesuu̱ ku̱i̱cha kitsúre̱:

—Chjayei spada̱ri, nga̱tꞌa xi spada̱ tsikꞌeju̱n xu̱ta̱, tekuácha spada̱ tjikuyáre̱. 53Janda yiji mí xi tu̱ ma minengina Namiꞌna, ku nga trátse tsingiyána kjín kjinditsje xi ꞌbatsjengiña. 54Titjue kju̱a̱ nga ngatumá ngieje najmi xukúcha kjima kjatꞌei; ku̱a̱tsecha kuma nga ku̱i̱tjusún xukúcha tjichja Xu̱ju̱n Enꞌen Namiña Diuu̱.

55Tsasére̱ Jesuu̱ ngieje xu̱ta̱ xi tjitku kꞌiaku̱a̱ ku tsinengiyáre̱:

—Mí xá ya ku michilu tjimajúnjnu, xuku xi xu̱ta̱ mána nikꞌen. Ngieje ni̱tjin nga ikuyána xu̱ta̱ ngaya ni̱ngu̱xi̱, ku najmí ni̱tjin nga kichjabéjnu. 56Ta̱nga ngieje kui najmi tsubáre̱ nga ma, tuxi bitjusún en xi kitsuya chjine enꞌen Namiña Diuu̱.

Ku kui chu̱ba̱, ja xi kjibakuyáre̱ Jesuu̱ kitsikjaꞌabasen ku tsanga.

Kúcha kumá nga kutsje kju̱a̱ꞌe̱ Jesuu̱

(Mr 14.53-65; Lk 22.54-55,63-71; Jua 18.12-14,19-24)

57-58Pe kijitjengí kjínre Jesuu̱ ku jichú janda kjindetsinꞌen nda̱ba̱xá tsjuatjin. Kꞌi̱a̱ kisꞌejñajínre xi inchakunda ngande tuxi ma base ngieje najmi xi kjima. Xi skabeꞌñú Jesuu̱ ndabaxá tsjuatjinꞌen Kaifa̱ kiju̱, xi sián tetjúnre̱ ja chanaꞌmi. Kꞌi̱a̱ sindutku chjine Kju̱a̱kixiꞌe̱ Namiña Diuu̱ kju̱ ja xi inchatetjúnre̱ na̱xi̱nanda.

59Ja chanaꞌmi tetjun kju̱ xi chja̱ Komite̱ xi Kꞌa xáꞌe inchamangitsjai xu̱ta̱ xi chja̱ kju̱a̱ndesu xi fuére̱ kontra̱ Jesuu̱, tuxi ma nga nikꞌen Jesuu̱. 60Ta̱nga, ndatsa kjín xu̱ta̱ xi kitsindá kju̱a̱ndesu, kumajín kisendá nga nikꞌen Jesuu̱.

61Janda nga itjujín jó xi kitsú: «Kui xta̱ nga tsichja, kitsú nga tsikixundú ni̱ngu̱xi̱ꞌe Namiña Diuu̱, ku nga jantse ni̱tjin te tikisitjenjni.»

62Xi ngitku̱ ja chanaꞌmi ku̱i̱cha kitsúre̱ Jesuu̱:

—A ndá kinuꞌyéi mi jee xi tjibatejenéri. Mí xi bixi nga nukju̱atjai yajo̱ri.

63Ta̱nga ngují najmi skengi Jesuu̱. Ku kjia xi sián ngitku ja chanaꞌmi ku̱i̱cha kitsúre̱:

—Kjibase Namiña Diuu̱, xi tutsjai nga tjikun, tixuyéijni tsa jí xi Kjuaꞌiꞌnatsjengíjni, xi Kjindiꞌe Namiña Diuu̱. 64Ku̱i̱cha skengire Jesuu̱:

—Jí xi kua tjibixi ji. Ku nuꞌyéina, nga chubatse ni̱tjin faꞌa, ku cha̱jnu nga an, Kjindiꞌe Namiña Diuu̱, faꞌiꞌan ngajin yufi nga tjiujun ngieje ngaꞌñu ku xá xi tjitsjuána Namiña Diuu̱ xi najmí xi fichutꞌáre ngaꞌñuꞌen. 65-66Nga tsitꞌe kui én xi kjisián ngitku̱ ja chanaꞌmi, skendiyajun yajo̱ꞌe najñu xi yaja, nga kjibaku nga kutire̱, ku ku̱i̱cha kitsú:

—Kúcha chaséjnu. ¡Chꞌao kitsúre̱ Namiña Diuu̱, ku jún kjuanuꞌyájnu kꞌui! ¡Ngite machjenjínña kjaꞌi najmi xi chusúnre̱ ngisa!

—¡Nganikꞌien! —kitsú ngieje xi kꞌi̱a̱ incha.

67Ku tjin xi itetejún ngakjáin ku tjin xi tjiungu yeꞌére̱. Ku kjaꞌi xi inchabeꞌére ngakjáin, 68ku ku̱i̱cha inchakjindiáre̱: «Ji xi jajinri Namiña Diuu̱ nga kjuaꞌiꞌnatsjengíjni, ¡tixuyéi ꞌyá xi yeꞌéri̱!»

Nga kitsú Pe nga bejí Jesuu̱

(Mr 14.66-72; Lk 22.56-62; Jua 18.15-18,25-27)

69Nga kjima ngieje kui najmi, Pe kjitjián kjindetsinꞌen niꞌya tsjuatjin kjitjián. A tu̱ kꞌi̱a̱ kube ngu chjun chjineꞌao xi kitsitiñáre yajo̱ꞌe ku ku̱i̱cha kitsúre̱:

—Ji tutsjai nga Jesuu̱ kjitsutjaji, xi chja̱ Ngalilea̱.

70Ku ngakjáin ngieje xu̱ta̱, ku̱i̱cha skengi Pe:

—Kju̱a̱xikjainjín kui najmi; ¡bejí najmi xi tjibixíni!

71Itju Pe kjinde̱tju̱a̱ xi bitju ngatje̱n kjindetsin, ta̱nga kjaꞌi chjineꞌo te kubeni ku kitsuyáre̱ xu̱ta̱ xi kꞌi̱a̱ sindu:

—Xikꞌui, tekuácha Jesuu̱ tsuꞌbajo, xi jindibá Nasaree̱.

72Te̱ kitsibejíni yajo̱ꞌe Pe ku ku̱i̱cha kitsú:

—¡Tsjuajnu énꞌna nga bejinjínꞌa̱n kui xta̱!

73Ngichi ma tꞌa̱jíni, yajín xi sindu kui ngande kitsitiñáre yajo̱ꞌe jma tjián Pe ku kitsúre̱:

—Xuku xi jíni xi tsutjai tjengiri Jesuu̱; xukúcha chja̱ xu̱ta̱ Ngalilea̱ nukju̱a̱iji.

74Tu̱ sa ꞌñu kiskengi Pe:

—¡Je kua kixínjnu nga bejíꞌa̱n kui xta̱! ¡Ngatsijéna Namiña Diuu̱ tsa kjainjín en xi texi̱nꞌa̱n!

Ku kui ma chu̱ba̱ skinda ngu xa̱nda̱ xicha, 75ku jitsjenre Pe én xi kitsúre̱ Jesuu̱: «Te̱ kje nga kjinda xa̱nda̱ xicha, ján ndiya je kibixíni nga yijína.» Itju Pe kui ngande ku tuxi ngí kiskinda.

Currently Selected:

Mateo̱ 26: MZI

Highlight

Copy