Mateo̱ 5
5
Nga tsjuáña kju̱a̱ndá Namiña Diuu̱
(Lk 6.20-23)
1Nga kube Jesuu̱ nga kjínma xu̱ta̱, tsijín ngu tjengi ku kisꞌejñaté. Kꞌi̱a̱ jma kjitjián jichutꞌare ja xi kjibakuyáre̱, 2ku kjia tsaꞌangire̱ nga ikuyare̱ xu̱ta̱:
3«Tsichakunné Namiña Diuu̱
xi kju̱a̱xikjain nga sꞌejínre nga̱tꞌaꞌe,
kui xu̱ta̱ xi chja̱ jma kjibatexuma.
4Tsichakunné Namiña Diuu̱ xi tse kju̱a̱ꞌon tjima,
ku kui xi tsikꞌexú.
5Tsichakunné Namiña Diuu̱ xi ni̱ma̱kju̱a̱,
kui xi sakúre nangi xi kitsu nga tsjuá Namiña Diuu̱.
6Tsichakunné Namiña Diuu̱ xu̱ta̱ xi mejénre̱ nga ndá matsje kju̱a̱,
nga̱tꞌa kui xi tsikitjusúnre̱ najmi xi inchatsikjao.
7Tsichakunné Namiña Diuu̱ xu̱ta̱ xi on kutꞌa xikjin,
ku tekuácha on skutꞌa Namiña Diuu̱.
8Tsichakunné Namiña Diuu̱ xu̱ta̱ xi tsjé anima̱ꞌen,
kuí xi skue ngakjáin Namiña Diuu̱.
9Tsichakunné Namiña Diuu̱ xu̱ta̱ xi inchatsixa
tuxi ꞌbé kju̱a̱chꞌán nga̱sunde,
ku kuí xi kjindiꞌe Namiña Diuu̱ kꞌuya.
10Tsichakunné Namiña Diuu̱ xi tjijnune tjinunfe
nga̱tꞌa mejénre nga ndá ngatutsje ngieje kju̱a̱,
kui xi chja̱ jma kjibatexuma Namiña Diuu̱.
11-12»Jún tsichakunnéjnu Namiña Diuu̱ ni̱tjin nga nga̱tꞌaꞌna tsjune tsuféjnu xu̱ta̱, nga tsindájnu kju̱a̱ndesu. ¡Tisꞌuíjnu! ¡Tsjua tꞌendújnu anima̱jnu! Nga̱tꞌa sakujnu ngu kju̱a̱ndá xi tse ndiu̱jmi. Tekuácha tse kju̱a̱ꞌon kitsikjeyáre̱ xu̱ta̱ kui ja xi tsuya Enꞌen Namiña Diuu̱ xi tjún kisꞌema nga jún.
Kju̱a̱kitakúnꞌe̱n na̱xa̱ ku ndiꞌi xi tsiꞌasen nga̱sunde
(Mr 9.50; Lk 14.34-35)
13»Jún, xukútse na̱xa̱ xi ꞌbendu nga̱ya ujnu ninde̱ tuxi cha̱n masué. Tsanga tjubaꞌáre̱ na̱xa̱ kui ngaꞌñu, je ngite tsamí xi chjiꞌe, ku tu̱ ndiyatétse ma nikjaꞌa, tuxi kꞌi̱a̱ tsjune xu̱ta̱.
14»Jún, xuku ngu ndiꞌi xi inchatsiꞌasénre ngieje xu̱ta̱. Xuku ngu na̱xi̱nanda xi ngatsjá naxi kunda ku ngieje nga tsjejénre. 15Najmí xi ꞌbetí ngu ndiꞌi kandi ku nginde kaxa basengi. Tusáni: ngu ngande jma kꞌa basen tuxi manga ngieje xi sindu nganiꞌya matsejénre. 16Ku jún, tekuácha tsubáre ñaꞌánjnu, tsubáre nga xuku kui ndiꞌi xi kꞌa kjisián uyájnu tuxi bé ngieje xu̱ta̱ ꞌyáni Namiña Diuu̱ ku kúcha tsubáre ñaꞌán xki̱. Najmi xi ndá tiaꞌánjnu. Ku̱a̱cha kuma nga skue xu̱ta̱ xi ngisa kúcha nitsjua ku yatkún Namiña Diuu̱, namijnu xi kjitjián ndiu̱jmi.
Ngataꞌe kju̱a̱kixi ku ja xi tsuya Enꞌen Namiña Diuu̱
17»Kjuaꞌikjebaꞌajíꞌa̱n kju̱a̱kixi ku kjuaꞌixinꞌa̱n nga ngite chjiꞌeji kju̱a̱kitakun xi bakuya ja xi tsuya Enꞌen Namiña Diuu̱. Kuajícha: tusáni kjuaꞌitsjuána ngaꞌñu xukúcha tjitsubáre̱. 18Tsjuájnu én nga ta̱nga kje chajají ndiu̱jmi kju̱ nangi, nguxtinjín kju̱a̱kitakun xi tjínre kju̱a̱kixi tjubaꞌáre̱, janda nga bitjusún ngieje. 19Kui kju̱a̱ tsa tjin xi mejínre tsikitjusún kju̱a̱texuma xi kitsjua Namiña Diuu̱, ndatsa xi chuba ngaꞌñu tjínre, kui xu̱ta̱ tsamí xi kuchjiꞌe jma kjibatexuma Namiña Diuu̱. Tekuácha kumataꞌin xi bakúre kjaꞌi xu̱ta̱ nga tꞌeꞌenjínre̱ Namiña Diuu̱. Ta̱nga xi tsikitjusún kju̱a̱texuma xi yeꞌe Namiña Diuu̱ ku bakuyare kjaꞌi xu̱ta̱ nga tsikitjusún, tuxi chjiꞌe kuma̱ jma kjibatexuma Namiña Diuu̱. 20Kju̱a̱xikjain, tsa nuꞌyajíjnu Enꞌen Namiña Diuu̱ xuku xu̱ta̱ fariseo̱ kju̱ chine Kju̱a̱kixiꞌe Namiña Diuu̱, najmí ni̱tjin nga bitjasꞌenjnu jma kjibatexuma Namiña Diuu̱.
Kúcha tjin nga̱tꞌaꞌe nga nitiju̱ xingiña
(Lk 12.57-59)
21»Tikjaitsjénjnu nga janda ni̱tjin changa kitsú Moise: “Tu xu̱ta̱jí nikjesúnjnu, nga̱tꞌa tsa tjin xi xikjin tsikjesún, majere”. 22Ta̱nga kjatꞌei tetsjuájnu énꞌna nga tuꞌyáni xi tsitiju̱ xikjin kjuaꞌñu tjínre nga faikasén jma kjimatsje kju̱a̱. Tuꞌyáni xi én tsaꞌa̱ kuitsure xikjin tekuácha mangijú jma tjisꞌendá kju̱a̱. Ku xi batené xikjin nga najmi xi ndáji kju̱e̱yare̱ ngajín ndiꞌi xi tjitjutse ngakꞌie̱n nikjaꞌaya.
23»Kui kju̱a̱ tsanga tjin najmi xi mejénri ꞌbesun ngasun nachanꞌen Namiña Diuu̱, ku kjia faitsjénri nga tjin xi tiju̱re̱ ji, 24tꞌejni najmi xi mejénri ꞌbesun ku kijna tꞌáin nga tjaichasei̱ri kui xu̱ta̱ ku tikjéjnu kju̱a̱ti, ku kjiátse ndiukꞌesín najmi xi mejénri nga ꞌbesunri ngasun nachan Namiña Diuu̱.
25»Tsa tjin xi batejenéri nga najmi xi ndáji kiꞌniji̱n, tꞌendaji kju̱a̱si kui xu̱ta̱ tekjé nga tsikasꞌenri ngaya tsja nai. Nga̱tꞌa tsajmí, polisiya̱ ꞌbexáre nai nga mangijúri nduya. 26Ku kixi tjin nga bitjujíji kꞌi̱a̱kua janda nga ꞌbechji ngieje tao̱n xi kjitje̱nri.
Kju̱a̱kitakun nga̱tꞌaꞌe kju̱a̱bixantsja
27»Tekuácha kitsú Moise: “Nga tu̱ kjaꞌi xu̱ta̱jí ꞌbemajúnjnu nga je ixantsjajnu”. 28Ta̱nga kjatꞌei texiyájnu, tsa ngu xta̱ xi nga basére ngu chjun ku tuxi tsikjao nga mejénre fañaju̱n, je kitsixaba anima̱ꞌen.
29»Tsa najmi xi bé xkúnji ngandá xi tjitsiꞌin nga nuꞌyeijíri Namiña Diuu̱, ngisa ndá tsa natsjeiji ku kji̱n nikjaꞌi. Ngisa ndátjin nga chejei nguxtin tukꞌuajíre̱ nga ngieje yajo̱ri nikjaꞌajín ngakꞌien. 30Tsanga najmi xi niꞌinji̱n ndsaji ngandá xi tjitsiꞌin nga nuꞌyeijí, ngisa ndá tsa bichakjai ku kji̱n nikjaꞌi. Ngisa ndá nga chejei nguxtin yajo̱ri ku ngiejeji nga fai nga̱kꞌi̱e̱n.
Tseꞌe nga nikjie kju̱a̱bixantsja
(Mt 19.9; Mr 10.11-12; Lk 16.18)
31»Tekuácha kitsú Moise janda ni̱tjin changa: “Tsa tjin xi ngite mejínre nga ꞌbejñajun chju̱nꞌen, ngatsjuáre xu̱ju̱n jma nga je kinikje kju̱a̱bixantsja”. 32Ta̱nga xiyájnu kjatꞌei nga xu̱ta̱ xiꞌin ma tsikje kju̱a̱bixantsja tsanga kjaꞌi xta̱ kjifañaju̱n chju̱nꞌen. Tsanga nga̱tꞌaꞌe kjaꞌi najmi tsikjere̱ kju̱a̱bixantsja chju̱nꞌen tekuixi ngayatsja jee tjitsikjaꞌa. Tsa kui chjun te̱ bixantsjáni, kuí ku xta̱ xi bixantsjaju tekuixi te̱ sakujénire̱ xukútse nga kjaꞌi xu̱ta̱ inchaꞌbenduju.
Nga Namiña Diuu̱ batere nga baꞌi én
33»Tuku ni̱tjin changa ikú Moise: “Ngatu̱ jinꞌenjín Namiña Diuu̱ batéjnu nga baꞌíjnu ngu en xi bitjusunjínjnu”. 34Ta̱nga kjatjꞌe̱i̱ xiyájnu nga tu̱chu̱ba̱ baꞌijíjnu én xi bitjusunjínjnu. Ndiujmi tsjuára ngatu̱ bixujíjnu, nga̱tꞌa kꞌi̱a̱ jma kjitjián ndabaxáꞌe Namiña Diuu̱, 35nangi tsjuára ngatu̱ bixujíjnu, nga̱tꞌa Namiña Diuu̱ tjitsiꞌinre manda nangi. Jerusalen tsjuára ngatu̱ bixujíjnu, nga̱tꞌa tse̱ꞌe Namiña Diuu̱ kui na̱xi̱nanda, Xta̱xá xi ꞌñu kꞌa nga ngieje. 36Ni̱tjinꞌna tsjuáre ngatu̱ bixujíjnuya, nga̱tꞌa tsajunjín ni̱tjin xi tjimajúnjnu. 37Jun tixújnu tsanga ñaꞌánjnu ngu najmi ku ju̱njín tixújnu tsanga ñaꞌajínjnu. Ngieje én xi ningisúnjnu tse̱ꞌe xindajin chja̱.
Nga ꞌnatsjechjí najmi xi tsꞌijúnña xu̱ta̱
(Lk 6.29-30)
38»Ngi ngu kju̱a̱kitakun xi ikuya Moise: “Tsa tjin xi ꞌbatsjere xku̱n ngu xu̱ta̱, tekuácha tsubáre̱ nga ꞌnatsjére̱ xku̱n; tsa ngu naꞌñu̱ bakjánre̱, tekuácha tsubáre nga bakjan ngu naꞌñu̱ xi kua kitsiꞌin.” 39Ta̱nga kjatꞌei xiyájnu: “Ngatu̱ ꞌnatsjechjijíjnu tsanga tjin xi ndáji tsꞌijúnjnu. Tsa tjin xi ꞌmujin ndatsajnu ngandá, ku̱a̱ tꞌínjnu nga te̱ ngatꞌujínni ndatsajnu ngaskun. 40Tsa tjin xi kjibatejetjáijnu ngakjáin nai ku mejénre kjebaꞌájnu singajnu, titjuájnu janda singa asújnu. 41Tsa ngu jajun tsikaꞌa kju̱a̱ꞌñujnu ngu chꞌa ngumi metro̱, jómi metro̱ tangijújnu. 42Tsa tjin xi minengijnu ngu najmi, titjuájnu, ku xi tu menyátsejnu, tikenyájnu.”
Nga nitjáo xu̱ta̱ xi tao̱nre ña
(Lk 6.27-28,32-36)
43»Ku xikꞌui, kjaꞌi manda xi tekuácha Moise kitsjua janda ni̱tjin changa: “Titjaojnu xingijún ku tichꞌaojnu xi ton ꞌbéjnu”. 44Ta̱nga kjatꞌei xiyájnu: titjáojnu xi tao̱nre jún ku chjinengitjáijnu kju̱a̱ndá xi tsjunne tsjunféjnu. 45Ku̱a̱cha bakujnu yajo̱jnu nga tekuácha ñaꞌánjnu xuku Namiña Diuu̱ xi kjitjián ndiu̱jmi. Kuí xi tjitsiꞌin nga bitjure tsuꞌbi xi ndá kju̱ xi ndáji. Kuí xi tsingiyáre̱ tsí xi tꞌeꞌénre̱ kju̱ xi tꞌeꞌenjínre̱.
46»Tsa jún, tu̱ xu̱ta̱ xi tsitjáotsejnu nitjáojnu, tsichakunnejínjnu Namiña Diuu̱. Tikjaitsjénjnu nga janda xi faꞌachjí ton xi ꞌbechjitjai xá xi mejénre Roma̱, tekuácha tsitjao̱ xi ndá yaꞌa. 47Tsa tu̱ xi ndátse kichꞌájnu nikundájnu, ngují najmi xi tjatse tjiñaꞌánjnu. ¡Janda xu̱ta̱ xi sꞌejinjínre Namiña Diuu̱ tekuácha inchatsiꞌin!
48»Jún, tsubáre̱ nga naxu ꞌnatsjéjnu yajo̱jnu xuku Namiña Diuu̱ xi kjitjián ndiu̱jmi.
Currently Selected:
Mateo̱ 5: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
