Mateo̱ 7
7
Kúcha tjin kju̱a̱ nga̱tꞌaꞌe nga xu̱ta̱ nukju̱a̱ya
(Lk 6.37-38,41-42)
1»Nga tu̱ naijín ꞌnatsjéjnu yajo̱jnu nga jún chusúnjnu kúcha tjima xu̱ta̱, tuxi kuajícha tsikjeyájnu Namiña Diuu̱. 2Tsa tuxi taja ꞌnatsjéjnu yajo̱jnu nga chusúnjnu kúcha tjima xu̱ta̱, tekuácha taja tsiꞌin yajo̱ꞌe Namiña Diuu̱ nga kusúnre̱ kúcha tjimájnu. Tekuácha tsikjeyájnu xukúcha nikjeyájnu xu̱ta̱.
3»Mí xá yiji najmi xi ndáji tjin xi tsiꞌin kjaꞌi xu̱ta̱, ku yijíjni ngieje najmi xi ndáji tjin xi niꞌín. Xukútse tsa chaseiji nga tje chubachí tjingi xku̱n kjaꞌi xu̱ta̱, ku chaseiji nga tjia ndujuꞌe ya kjingi tsi̱. 4Kúcha mári nga ꞌmíri kjaꞌi xu̱ta̱: “Titjuéna kju̱a̱ nga ꞌbatsjengiꞌan tjechi xi tjingi xkunji”, ku ngu nduju tjiaꞌe ya kjingi xkunji. 5¡Jó ngakjáin jí kua! Tjún natsjengima tjiaꞌe̱ ya xi kjingi xkunji, ku kjia nga ndá kutsejenri nga ꞌnatsjengi tjechi xi tjingi xku̱n kjaꞌi xu̱ta̱. 6»Ngatu̱ nañajín baꞌíjnu najmi xi tse̱ꞌe Namiña Diuu̱, ku tu̱ chi̱nga̱jí nikjaꞌájnu najmi xi ꞌñu chjiꞌéjnu. Chi̱nga̱ bejí najmi xi tjínre ngu chji, ku naña mare̱ tsa tekuini kjinejnu.
Kúcha chjinengi, minchitsjai, ku nukju̱atꞌáre Namiña Diuu̱
(Lk 11.9-13; 6.31)
7»Chjinengijnu Namiña Diuu̱, ku tsjuájnu. Nukju̱ajújnu Namiña Diuu̱, ku sakujnu najmi xi tjiminchitsjaijnu. Nukju̱atꞌájnu, ku tsiꞌinjnu xki̱. 8Nga̱tꞌa xi sꞌejínre Namiña Diuu̱, sakúre xi minengi, xi kjimangitsjai, kútsa chjatꞌáre, ñaꞌán xki̱.
9»Najmí xi ndi̱a̱jo̱ tsjuáre kjindiꞌe tsa ni̱pan kjiminengíre̱. 10Ku te̱ ye̱jí tsjuáre tsa ti̱ kjiminengíre̱.
11»Jún, nga ndajíjnu xu̱ta̱, májnu baꞌíre̱ najmi xi ndá kjindijnu, a tu̱ kjamíra Namiña Diuu̱, Na̱mijnu xi kjitjián ndiu̱jmi, tsjuáre̱ najmi xi ndá xi minengitꞌare̱.
12»Ku̱a̱cha tjikjeyájnu xu̱ta̱ xukúcha mejénjnu nga feyájnu, nga̱tꞌa kui ndiya xi bakúña Xu̱ju̱n Enꞌen Namiña Diuu̱.
Kjinde̱tju̱a̱ xi teyájí
(Lk 13.24)
13»Ichijí niꞌin ꞌbema ndiya xi faiju̱ña jma mare̱ chajáña, nga̱tꞌa teya kui ndiya. ¡Ku kjín xu̱ta̱ xi kꞌi̱a̱ fue! 14Ta̱nga tuxi niꞌin ꞌbema ndiya xi faiju̱ña jmanga tjin kju̱a̱mijñachun, nga̱tꞌa nchú kui ndiya. Kui kju̱a̱, nga chubatséma xi sakúre.
Kúcha tjin tse̱ꞌe̱ ya ku tu xi bajare̱
(Lk 6.43-44)
15»¡Chúnjnu yajo̱jnu nga̱tꞌaꞌe xu̱ta̱ xi inchatsú nga chjineꞌenꞌen Namiña Diuu̱ tjima! Nga fichukinchatꞌájnu xuku chu̱tsa̱nga̱ xi tꞌe fichu, ta̱nga nga xikju̱a̱xikjáin xukútse lobo̱ xi niꞌyú. 16Tekui xi yájnu ꞌyáni kui, nga̱tꞌa ngují najmi xi ndá mare̱ tsiꞌin. Xuku naꞌyá xi mare̱ tsiꞌónña. 17-18Yá xi ndá, tú xi ndá bajare̱ ku ya xi ndáji, tú xi ndáji bajare̱. 19Yá xi bajajíre̱ tú xi ndá ma bichá ku ꞌbetí. 20Kui kju̱a̱, nga yánijnu kui xu̱ta̱ ndesu nga̱tꞌaꞌe kju̱a̱xaba xi mare̱ tsiꞌin.
¡Ndá chaséjnu!
(Lk 13.25-27)
21»Ngiejejí xu̱ta̱ xi tsú nga án xi ndi̱aꞌere̱ án ku basꞌen jma kjibatexuma Namiña Diuu̱. Tukuijítse en xi machjiꞌe; tsubáre nga tjun nikitjusun ngieje kju̱a̱kixi xi yeꞌé Namiña Diuu̱, xi kjitjián ndi̱u̱jmi. 22Nga fichú ni̱tjin nga ndiutsitsje Namiña Diuu̱ kui nga̱sunde, kjínma xi kuitsuna: “Ndi̱a̱jni̱, kiꞌmiyájni ngajori kjaꞌi xu̱ta̱ én xi kikjani. Ku tekuácha kinichjénjni jínri nga kiꞌnatsjejni̱ xindajin ku kꞌi̱a̱ kiñaꞌánjni najmi xi se̱n maña”. 23Ta̱nga kjiakua ku̱i̱tsecha xinjnu: ¡Tisubaꞌatꞌájnu kꞌui xu̱ta̱ xaba! ¡Xuku nga án skanda Bejinjínjnu!
Jó tku̱ya xu̱ta̱ xi tjin.
(Mr 1.22; Lk 6.47-49)
24»Xi tꞌe najmi xi tebakuꞌan ku tsiꞌin najmi xi texinꞌan, xukútse ngu xu̱ta̱ xi te̱tje̱n kusúnre̱ najmi xi tsiꞌin ku nga̱sun ndi̱a̱jo̱ taja kitsindá niꞌyaꞌe̱. 25Jiꞌi chatsi, ku tsijín ndijuaꞌe ndana, ku tuxi ꞌñu yeꞌére̱ tjao̱ niꞌya. Ta̱nga tsenyají niꞌya, nga̱tꞌa ngasún ndi̱a̱jo̱ taja kundasún.
26»Ta̱nga xi tꞌe najmi xi tebakuyaꞌan ku tsiꞌinjín najmi xi texinꞌan xukútse xu̱ta̱ ndsen xi ngajín tsumi kitsindasún niꞌyaꞌe̱. 27Jindibá tsi, ku ndifaꞌe ndana tuxi ꞌñu kunanga̱, ku tuxi ꞌñu yeꞌére̱ tjao̱ kui niꞌya. Ku tsenya niꞌya ku tuxi ixundú.»
28Nga je tsichja Jesuu̱, ngieje xi i̱nchatꞌe, tuxi se̱n kumáre̱ nga̱tꞌaꞌe kju̱a̱kitakun xi kjibakú, 29nga̱tꞌa tuxi tjínre ngaꞌñu enꞌen nga chja̱, mítsa xuku chjine Kju̱a̱kixiꞌe̱ Namiña Diuu̱.
Currently Selected:
Mateo̱ 7: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
