Mateo̱ 9

Xta̱ xi majín fue

(Mr 2.1-12; Lk 5.17-26)

1Nga je kumá kui najmi, Jesuu̱ tsijín ngu tsutsu je ku tsꞌatiu ngunda chincha jma tjián ngande xi ꞌmí Kafarnau̱m, jma nga kjitjián. 2Ku kꞌi̱a̱ jichutꞌare xu̱ta̱ xi tjimajun ngu xta̱ xi kjisún nachan, nga̱tꞌa majín fué. Nga kube Jesuu̱ nga kui xu̱ta̱ sꞌejínre nga̱tꞌaꞌe, ku̱i̱cha kitsúre̱ xta̱ xi kjisún nachan: «¡Ngatu̱ nikjajendají amingo̱! Tsichatꞌára jee xi tjinri.»

3Yajín chjine Kju̱a̱kixiꞌe̱ Namiña Diuu̱ xi tjima kui ngande, ku̱i̱cha kitsikjao: «ꞌYá xu̱ta̱ kjibe yajo̱ꞌe xikꞌui. A xu̱ Namiña Diuu̱ni kjimáre̱ yajo̱ꞌe. ¡Ta̱nga kjiꞌbanachaju yajo̱ꞌe ꞌma!»

4Ta̱nga kubéni Jesuu̱ najmi xi inchatsikjao kui ja, kui nga tsinengiyáre̱: «Mí xá tuxi chꞌao nikjojnu. 5Tixuyájnu, mí najmi xi niꞌinjín. A nga nichatꞌare xikꞌui xi ndáji tjínre, a xu nga nindaya. 6Ta̱nga bakumájnu nga án, Kjindiꞌe Xu̱ta̱ Nga̱su̱ndee̱, nga tjínna ngaꞌñu ngasun nangi nga tsichatꞌana jeꞌe xu̱ta̱.»

Ku ku̱i̱cha kjitsúre̱ Jesuu̱ xta̱ xi majín fái: «Tisitjein, chjabi na̱chanri ku tꞌáin nganiꞌyári.»

7Isitjén xta̱ ku kijí niꞌyaꞌe̱. 8Nga kube xu̱ta̱ kui najmi, tuxi se̱n kumáre ku kubetkun Namiña Diuu̱, nga̱tꞌa kitsjuáre kui ngaꞌñu xu̱ta̱ nga̱sunde.

Kúcha ku̱ma nga tsichjare Mateo̱, Jesuu̱

(Mr 2.13-17; Lk 5.27-32)

9Nga itju Jesuu̱ kui ngande, kube xta̱ xi ꞌmí Mateo̱, xi tjitja ngu yamexa nga kjifaꞌachji tao̱n xi machjitjái najmi, xi minengi xta̱xá Roma̱. Ku̱i̱cha kitsúre̱ Jesuu̱: «Ndibitjengína.»

Isitjén Mateo̱ ku kijitjengire̱.

10Tekuíni ni̱tjin, Jesuu̱ ku ja xi kjibakuyáre̱ kikjién niꞌyaꞌe Mateo̱. Ku kꞌi̱a̱ inchakjiénya kjaꞌi ja xi tekuácha tao̱n xi machjitjái najmi faꞌachji kju̱ xu̱ta̱ xi xaba. 11Yajín ja fariseo̱ xi kube ngieje xu̱ta̱ xi inchakjién nganiꞌyaꞌe̱ Mateo̱, ku ku̱i̱cha tsinengiyare̱ ja xi kjibakuyáre̱ Jesuu̱:

— Mi xá nga chjinejnu jña tjikjienju̱n ja xi faꞌachji tao̱n xi machjitjái xá xi ñaꞌan kju̱ ja xi tjínre jee.

12Tsitꞌe Jesuu̱ én xi inchachja̱ xu̱ta̱ fariseo̱ ku ku̱i̱cha kitsúre̱:

—Xi machjénre chji̱netki kuixi ndáji sindúre, mítsa xi ndá sindúre̱. 13Tusa tangíjnu ku tinchitsjaiyájnu mí xi mejénre kitsú Namiña Diuu̱ nga tsichja kui én: “Mejénna nga ndá xu̱ta̱ natsjejnu yajojnu ngatꞌaꞌe kjaꞌi xu̱ta̱, mítsa mejénna nga baꞌíjnu”. Jiꞌíña an nga kju̱a̱ꞌitsikitꞌeꞌan xi xu̱ta̱ jee ku mejénna nga xu̱ta̱ xi bakuyana ngatꞌuya, mítsa xu̱ta̱ xi tu̱ éntsere nga ndájni inchatsú.

Jmanga baku Jesuu̱ kúcha tjin tse̱ꞌe nga kjíndia nikjaꞌa yajo̱ña

(Mr 2.18-22; Lk 5.33-39)

14Ja xi kjibakuyáre̱ Jua xi Batenda kikasére̱ Jesuu̱ ku tsinengiyáre̱:

—Ji̱n ku xu̱ta̱ fariseo̱ nikjaꞌájni kjíndia yajoꞌjni. Mí xa ja xi tjibakuyéiri kuajícha tsiꞌin.

15Ku̱i̱cha skengire Jesuu̱:

—Jma kjima kju̱a̱xke, ngieje xu̱ta̱ xi kinikitꞌe sꞌui najmíre̱ kju̱a̱ngí nga tuku kjitjián xke. Ta̱nga fichú ngu ni̱tjin nga mangiju xke. Kjia kjiakua nga xu̱ta̱ xi kinikitꞌe sꞌui tsikjaꞌá kjindia yajo̱ꞌe.

16»Tsa ngu singa changa tjiya, majín najñu tja̱tse̱ ꞌbetiuju̱. Nga̱tꞌa nga mane singa, faitkiu najñu tjatse ku kjendiya singa changa; ku tusa tse chajaña.

17»Tekuácha majín mincha bino xi sꞌei kunda ngaya kjundu tjiuxin xi changa, nga̱tꞌa nga masán bino tjatse, tjiya kjundu tjiuxin xi changa; ku nga ku̱a̱cha ma tusá chajá bino tjatse, ku tjiya tiji tjiuxin. Kui kju̱a̱ nga bino xi tjatse ku tiji tjiuxin xi tjatse tsubáre mincha. Nga ku̱a̱cha ñaꞌan, chajají bino kute̱ chajají tiji tjiuxin.

Ngu tsakichi xi je kꞌien ku ngu chjun xi ndáji tjínre

(Mr 5.21-43; Lk 8.40-56)

18Nga tjicha Jesuu̱, jichú ngu xta̱ xi ngitku xu̱ta̱ judio̱, ku isentꞌare tkiuꞌe ku tsichjajo̱: «¡Kꞌien tsakjínꞌna! Ta̱nga tsa faichaséiri ku fanéi ndsaji, kjuaiyánire̱.»

19Isitjén Jesuu̱ ku kiju̱. Kijitjengire̱ ja xi kjibakuyáre̱.

20-21Nga tjima ndiya, jaꞌa jma nga tjián ngu chjun xi je tejó nu tjínre nga jínꞌñu kjimáre̱. Nga inchafaꞌa, kitsikjáo chjun: «Tsa kumamá kjingajúnꞌa̱n najñu ndiu xi yaja Jesuu̱, kjatꞌama mandayaꞌa̱n.» Kui nga ngatje̱n nga̱tun Jesuu̱ kitsitiña yajo̱ꞌe ku skingajun najñu xi chajándiu xi yajá. 22Jatjiya nga tsase nga̱tun Jesuu̱, ku kube chjun ku ku̱i̱cha kitsúre̱: «Ngite nindusinjínri yajo̱ri, nga̱tꞌa sꞌejínri nga̱tꞌaꞌe Namiña Diuu̱, kui kju̱a̱ je kundayéi.»

Ku janda kjiaku̱a̱ tuxi kundaya kui chjun.

23Kijí Jesuu̱ janda niꞌyaꞌe xta̱ xi ngitku judio̱. Nga jichú, kube ja xi tsikjane xi je inchanda nga faiñajín xi kꞌien, ku kjínma xu̱ta̱ xi inchakjíndia nga inchakjinda. 24Kitsúre Jesuu̱: «Titjújnu kꞌui. Kꞌienjín tsakichi, kjifétse.»

Xu̱ta̱ tsijnukétse Jesuu̱. 25Ta̱nga nga je kiꞌnatsje ngieje xu̱ta̱, tsasꞌén Jesuu̱, skabére̱ tsja tsakichi, ku isitjén.

26Ngieje xi chja̱ kui nangi tsitꞌe najmi xi kumá.

Kitsindaya Jesuu̱ jó xu̱ta̱ xi tka

27Nga itju Jesuu̱ kui ngande, jó xu̱ta̱ tka kitjengire ku inchakjíndiatjengire̱:

—¡Jesuu̱, jí xi Kjuaꞌiꞌnatsjengijni, on chutꞌaijni ngu kju̱a̱ndá!

28Xu̱ta̱ tkia kitjengire̱ Jesuu̱ janda nganiꞌya. Ku nga je sindu ngaya, tsinengiyáre̱ Jesuu̱:

—A sꞌejinjnu jún nga mana nindayajnu.

Ku ku̱i̱cha skengi kui ja:

—Jun Ndi̱a̱jni̱; sꞌejínjni.

29Kui nga skingajun xku̱n kui xu̱ta̱ Jesuu̱, ku kitsúre̱:

Mandayájnu, nga̱tꞌa kisꞌejínjnu nga̱tꞌaꞌna.

30Trátse kutsejénnire̱ ngiajo kui xu̱ta̱ xi tki̱a̱. Ta̱nga kitsiꞌínre kjuakixi Jesuu̱:

—Ngatu ngují xu̱ta̱ ꞌmiyajnu najmi xi kumá.

31Ta̱nga nga itju kui xu̱ta̱, kitsuya ngiejere̱ xi chja̱ kui nangi najmi xi kitsiꞌin Jesuu̱.

Jesuu̱ kitsindaya ngu xu̱ta̱ xi tka

32Nga je itju kui xu̱ta̱ kui nganiꞌya, kjín ma xi jichuju̱re̱ Jesuu̱ ngu xta̱ xi tjujire̱ en, nga̱tꞌa xindajin tjijín yajo̱ꞌe. 33Nga itsjé Kjesu̱u̱ xindajin, kumá tsichjani kui xta̱. Kui nga xu̱ta̱ xi kꞌi̱a̱ sindu tuxi se̱n kumáre̱, ku ku̱i̱cha tsichja: «¡Kjema yáña ngu najmi xi ku̱a̱cha ma nangi Israe!»

34Ta̱nga xu̱ta̱ fariseo̱ ku̱i̱cha kitsú: «Nga mare̱ Jesuu̱ ꞌnatsje xindajin ngajín yajo̱ꞌe xu̱ta̱, xi siántetjúnre̱ ngieje xindajin tjitsjuáre ngaꞌñu.»

Jesuu̱ ma nimatakúnre̱ ngieje xu̱ta̱

35Nga ngieje ngande, nga ngieje na̱xi̱nanda ꞌñu kisꞌebixí Jesuu̱. Bakuyare xu̱ta̱ ngaya ni̱ngu̱xi̱ꞌe judio̱, ku kjibatetsaju kju̱a̱ndá tjatse xi tjínre jma kjibatexuma Namiña Diuu̱, ku kitsindaya xu̱ta̱ xi onre̱, xi ndáji sindure. 36Ku nga kube Jesuu̱ nga tuxi kjínma xu̱ta̱ xi tjimatje̱ngire̱, on kumáre̱ anima̱ꞌen, nga̱tꞌa kube nga tjin xu̱ta̱ xi inchamakjinjínre̱, nga najmíre̱ xi ꞌbatsjengi. ¡Xuku ngu tjiꞌñu chu̱tsa̱nga̱ xi najmíre̱ xi faitsikjien!

37Jesuu̱ tsichjáju ja xi kjibakuyáre̱: «Tuxi kjínma xi machjénre nga basꞌen ngande jma kjibatexuma Namiña Diuu̱, ta̱nga kjinjinma xi tebakuyána nga fuetsuya kju̱a̱ndá tjatse xi tjin. 38Kui kju̱a̱ chjinengijnu Namiña Diuu̱ nga ngatsingiya kjín xi bakuyare, tuxi faikatetsajure̱ kui xu̱ta̱ en tjatse xi tjínre kju̱a̱ndá.»

Currently Selected:

Mateo̱ 9: MZI

Highlight

Copy