Marko̱ 12
12
Jnu̱ꞌe̱n tu̱ tseje xi machji xkisa
(Mt 21.33-46; Lk 20.9-19)
1ku̱i̱cha yeꞌechuba Jesuu̱ nga tsaꞌángire̱ nga yeꞌé én:
«Ngu xu̱ta̱ yeꞌé ngu jnu̱ tu̱ tseje ku ngu chꞌua kitsindare nga ꞌyengaꞌya. Tekuácha kitsindá ngu ngande jmá nindá bino nga je kiti tu̱ tseje, kju̱ ngu torre̱ xi kꞌa jmá ma chase nga nikuenda nangi. Kjia kitsjuáre̱ xu̱ta̱ xi ꞌyendajo nga ꞌbechjíre nga tsixaju nangi, ku nga je kisꞌendá ngieje kjiátse janda xín ngande kijí.
2»Nga jichú nitjinꞌen nga bicha tu̱ tseje, xi ndia̱ꞌe kitsingiya ngu xta̱ xi tjitsixatꞌare, xi kikinengi tu̱ tseje xi kui mejénre. 3Ta̱nga ja xi inchatsixajo jnu̱ tu̱ tseje tuxi ndá isenre xi jichú ku tu yajá tiyatse tsja nga kitsingiya.
4»Ndia̱ꞌe jnu̱ tu̱ tseje te̱ kitsingiyáni kjaꞌi xta̱ xi tjitsixatꞌare, ta̱nga kui xta̱ chꞌotse kitsúre̱ ja xi inchatsixajo nangi ku tutku̱ tutku̱ tuxi ndá kitsjuáre̱.
5»Te̱ kitsingiyáni ngingu xta̱ xima, ta̱nga kitsikꞌentsa kui xta̱. Jaskan tuku kjín ja kitsingiya ngisa; tjin xi kikꞌere ku tjin xi kinikjesun.
6»Tu tiꞌe̱tse tjiánre̱ ngisa, xi tuxi ndá tjao̱re. Tucha̱n nga kui kitsingiya, nga̱tꞌa kitsikjo: “Skue kja tiꞌna kui ja”.
7»Ta̱nga xi inchatsixajo jnu̱ tu̱ tseje ku̱i̱cha kitsúre̱ xikjin: “Kui xta̱ nistichi kui xi tse̱ꞌe kuma kui jnu̱ tu̱ tseje nga ꞌmé xi ndia̱ꞌe. Sikꞌienna; tuxi tsaña kuma ngieje.”
8»Kui nga kui xta̱ skabe kui xta̱chii, kitsikꞌien ku xín kitsikjaꞌa.
9»Kúcha nikjójnu jun, míxutse xi ndia̱ꞌe jnu̱ tu̱ tseje. Xiyajnu mí xi: fue kꞌi̱a̱ jmá kjiꞌi jnu̱ tu̱ tseje ku tsikjesun kui xu̱ta̱, ku kjaꞌi xi tsjuánire̱.
10»A faitsjenjínjnu en xi kjitꞌa Xu̱ju̱n Enꞌen Namiña Diuu̱:
“Ndia̱jo xi kumejínre
xi kitsindá ni̱ngu̱xi̱
kui ndia̱jo xi tetjun kjatꞌei.
11Kui najmi xi ma nise
nga̱tꞌa Namiña Diuu̱ xi ku̱a̱cha kitsiꞌin.”»
12Ja chanaꞌmi tetjun, Jí kua Chji̱ne Kju̱a̱kixiꞌe Namiña Diuu̱ kju̱ ja xi inchatetjunre̱ na̱xi̱nanda kube nga kui xi kitsikjaꞌare̱ én Jesuu̱ ku mejénre nga skabeꞌñu. Ta̱nga kuajícha kitsiꞌin nga̱tꞌa tjenre kju̱a̱tkunꞌen xu̱ta̱ xi tjore̱ Jesuu̱. Kui nga tusá kijí.
Nga kumejénre nga tsꞌanacha̱ju Jesuu̱
(Mt 22.15-22; Lk 20.20-26)
13Jaskan kitsingiya xu̱ta̱ fariseo̱ xi tuxa tonre Jesuu̱ ku Erode̱ kꞌiaxu mejénre nga tsꞌanacha̱ju Jesuu̱. 14Jichutꞌare kui xu̱ta̱ ku ku̱i̱cha kitsúre̱:
—Jí kua Chji̱ne, yájni̱ nga tutjsai nga kju̱a̱xikjain én xi tjibixiji. Nikju̱a̱jii̱ri yajori najmi xi tsikjao xu̱ta̱ nga̱tꞌaꞌe kju̱a̱kitakun xi tjibakiji, nga̱tꞌa tutjsai nga tjibixiji nga tsubáre nga nuꞌyaꞌénña Namiña Diuu̱ nga ngieje tku̱ya najmi. Tixuyejni kúcha nikjoiji. A ndá tjin nga ꞌbechjiña xi kjibatexuma Roma̱ tón xi tsikꞌechjitjaiña nga̱tꞌaꞌe xáña.
15Nga̱tꞌa be Jesuu̱ nga xu̱ta̱ jó ngakjáin xi jichú, ku̱i̱cha kitsúre̱:
—Mí kju̱a̱ nga mejénjnu nga chꞌanachajujnu. Ndibajujnu ngu kicha̱ tón xi nichjen nga ꞌbechjitjai xáña.
16Kjia kijure ngu tón tiaba, ku Jesuu̱ xi tsinengiyare̱:
—Kꞌi̱a̱ asenꞌen xi kjitꞌa kui kicha̱ tón. Kꞌi̱a̱ jínꞌen xi kjitꞌa.
Ku̱i̱cha skengi kui xu̱ta̱:
—Xitetjun xi manda Roma̱.
17Kitsú Jesuu̱:
—Já titjuajnu Xitetjun xi tjitsiꞌin manda xi kui tse̱ꞌe, ku Namiña Diuu̱ titjuajnu xi tse̱ꞌe Namiña Diuu̱.
Nga tsitꞌere kúcha skengi Jesuu̱, tuxi kua kumáre kui xu̱ta̱.
Xu̱ta̱ Saduseo̱ chjajo Jesuu̱
(Mt 22.23-33; Lk 20.27-40)
18Kjín xu̱ta̱ Saduseo̱ jichukasere̱ Jesuu̱, ta̱nga sꞌejinjínre nga ma te̱ ꞌbemani xu̱ta̱ xi je jesun, ku tsinengiyare̱:
19—Jí kua Chji̱ne, ku̱i̱cha kiski Moise, tsa ngu xu̱ta̱ ꞌmé ku kisꞌeju̱jíre kjindi chjunꞌen, xi tsꞌe̱ ma kui xu̱ta̱ tsubáre nga bixantsjaju kui chjun tuxi ma nga ꞌbére kjindi. Ta̱nga tsa kju̱a̱kixi mangitjengiña, kui ngieje kui kjindi tse̱ꞌe tsꞌe̱ xi je kꞌien ku kui jínꞌen baꞌa.
20»Ndá tjin, yatu kuma xi tsꞌe̱ kuma xikjin. Xi changa ixantsja ku chubatse ni̱tjin kisꞌejñajun chjunꞌen ku najmi kjindi kisꞌejínre nga kꞌien. 21Kui nga tsꞌe̱ xi ma jó ixantsjajuni chjun xi kisꞌejña subá nga kꞌien xꞌinꞌe̱n, ta̱nga chubatse ni̱tjin xu̱ta̱ꞌan ku te̱ kꞌienni xikꞌui ku tekuácha najmi kjindi kisꞌejínre. Tekuácha kumataꞌin tsꞌe̱ xi ma xu̱ta̱. 22Ku ku̱i̱cha kumataꞌin ngieje xi yatu tsꞌe̱ kumáre xikjin. Tucha̱n nga jetꞌa, tekuácha kꞌien chjun.
23»Ku̱a̱cha tjin najmi, ta̱nga kjia nga tsiꞌin manda Namiña Diuu̱ nga ngieje xu̱ta̱ te̱ fueyánire ku te̱ ꞌbemani, kꞌi̱a̱ chjunꞌen kuma kui chjun nga ngayatu xu̱ta̱ xi tsꞌe̱ kuma xikjin ixantsjaju.
24Kiskengire Jesuu̱:
—Jun inchamakjínjínjnu. Yajíjnu kúcha tjichja Xu̱ju̱n Enꞌen Namiña Diuu̱, ku yajíjnu ngieje ngaꞌñu xi tjínre Namiña Diuu̱. 25Nga fichu ni̱tjin nga tsikjaiyare Namiña Diuu̱ xi je jesun ku te̱ ꞌbemani, je kite najmi xi bixantsja, nga̱tꞌa ngieje nga xuku kjinditsjeꞌe ndiu̱jmi uya. 26Ta̱nga kju̱a̱ xi tse̱ꞌe nga te̱ fueyánire xi je jesun, jun, ma ꞌbexkiyajnu Xu̱ju̱n Enꞌen Namiña Diuu̱ kúcha tjin tse̱ꞌe naꞌya ndsu. Kꞌi̱a̱ ku̱a̱cha kitsúre̱ Moise Namiña Diuu̱: “Án xi Namiña Diuu̱ꞌe̱ Abran, Isa kju̱ Jako̱, xi xu̱ta̱ changári ma.” 27Kui nga Namiña Diuu̱ mitsa Diuu̱ꞌe̱ je jesun, tse̱ꞌe xi tjimakun, nga̱tꞌa Namiña ngieje kui xu̱ta̱, xu̱ta̱ sindukunre xuku nga kui. ¡Mí xá tuxi yajíjnu kúcha tjin nga̱tꞌaꞌe Namiña Diuu̱!
Ngiajo manda xi ꞌñu chjiꞌe
(Mt 22.34-40)
28Ngu chjine Kju̱a̱kixiꞌe Namiña Diuu̱ tsitꞌe nga inchabasen nijmi Jesuu̱ ku xu̱ta̱ Saduseo̱. Nga kube nga tuxi chan kiskengire Jesuu̱, kitsitiña yajo̱ꞌe ku tsinengiyare̱:
—Jmá manda xi yeꞌé Namiña Diuu̱ xi ꞌñu chjiꞌe nga ngieje.
29Kiskengire Jesuu̱:
—Xi tjún kui manda xi ꞌñu chjiꞌe kui xi ku̱i̱cha tsu: “¡Nuꞌyi na̱xi̱nanda Irrae̱! Ngutsema Namiña Diuu̱ña, Namiña Diuu̱ xi xu̱ta̱ Irrae̱. 30Titjoi Diuu̱ri nga nikjoi ngieje tku̱ya najmi, nga nikjoi ngieje najmi xi tjínri ku nga ngieje najmi xi chjiꞌeji.” 31Ku xima jó xi tekuácha ꞌñu chjiꞌe, kuixi ku̱i̱cha tsu: “Nga ngungujña nga xu̱ta̱ ña tsubáre nga nitjóña xi ndsijín xu̱ta̱ ña, xukúcha nitjóña yajoña.” Najmi manda xi ꞌñu chjiꞌe ngisa nga ngiajo xikꞌui.
32Ku̱a̱cha kitsú chjine Kju̱a̱kixi:
—Ndátjín Jí kua Chji̱ne. Kjáinni najmi xi bixiji: tuma Namiña Diuu̱tse xi ndia̱ña, ku najmi kjaꞌi xuku nga kui. 33Tsubáre̱ nga ngieje anima̱ña nitjó, nimejénña, ku nitjóña ngieje xu̱ta̱ xukúcha tjoña yajoña. Kui manda xi ꞌñu chjiꞌe tukꞌuajíre ngieje tku̱ya najmi xi ñaꞌánña kju̱ nga nikitjusúnña nga sꞌejínña nga̱tꞌaꞌe Namiña Diuu̱.
34Nga̱tꞌa kube Jesuu̱ nga ndá tsichja kui chjine Kju̱a̱kixiꞌe Namiña Diuu̱, kitsúre̱:
—Kjínjín tijniri ngande jmá batexuma Namiña Diuu̱.
Ku ngují xi tsinengiyare̱ najmi ngisa.
Nga kichjínengiyare nga̱tꞌaꞌe Xi ꞌBatsjengiña
(Mt 22.41-46; Lk 20.41-44)
35Nga kjibakuyáre̱ xu̱ta̱ ngaya ni̱ngu̱xi̱, ku̱i̱cha tsinengiya:
«Mí xá ku̱i̱cha tsu xu̱ta̱ chjine Kju̱a̱kixi xi xu̱ta̱ Namiña Diuu̱ nga tjeꞌe̱ xu Xitetjun Ndabi̱ xi kuma Xi ꞌBatsjengiña. 36Tikjaitsjénjnu nga Ngayaꞌasen xi Tsjé ku̱i̱cha kitsú xukúcha kitsuyaña Ndabi̱:
“Namiña Diuu̱ ku̱i̱cha kitsúre̱ Ndia̱ꞌna Xi ꞌBatsjengiña:
‘Kꞌui tijni nga̱tjen nganda jmá sian yaxile chakunꞌna,
janda nga tsichajaꞌan xi tonre jí.’”
37»Jí kua, tixuyejni: Mí kju̱a̱ nga Xitetjun Ndabi̱ Ndia̱ꞌna tsure Xi ꞌBatsjengiña. Kúcha nga Xi ꞌBatsjengiña ku tjeꞌe̱ jíndiba. ¡A janda Ndabi̱ tsibé yajo̱ꞌe nga kui xi ꞌñu chjiꞌe ngisa nga kui!»
xu̱ta̱ beya xi tjin kui ngande, ku ngieje nga tsjuáre nga inchatꞌere Jesuu̱.
Jesuu̱ kitsuya tetjunre xu̱ta̱ kju̱ ja xi kjibakuyáre̱
(Mt 23.1-36; Lk 11.37-54; 20.45-47)
38Tuku ikuyáre xu̱ta̱ ngisa Jesuu̱ ku ku̱i̱cha kitsúre̱:
«¡Chunjnu yajo̱jnu nga̱tꞌaꞌe xu̱ta̱ chjine Kju̱a̱kixiꞌe Namiña Diuu̱! Ngieje kui xu̱ta̱ tuxi tjsuaree̱ nga xu̱ta̱ tkun ꞌbatsjé nga ndá najñu xi baja, ku nga tuxi xu̱ta̱ nikundaree̱ ngajín ndetsin. 39Nga fai ngu sꞌui kútsa nga fai ni̱ngu̱xi̱ tuxi tsjuáre nga yaxile xi ndá ꞌbenduya. 40¡Ku kui xi inchatsiꞌin cheje nga niꞌyaꞌe yachjín xi je jesun xꞌinꞌe̱n, ku tuxi fetꞌajiña nga minengire kju̱a̱ndá Namiña Diuu̱! Ta̱nga ꞌñu tsé jee tsjuáre Namiña Diuu̱ tukꞌuajíre xu̱ta̱ xi ngisa.»
Chje̱ xi kitsjua chjun xi ni̱ma̱ ku je kꞌien xꞌinꞌe̱n
(Lk 21.1-4)
41Ngu ni̱tjin, ngaya ni̱ngu̱xi̱ kjitsuꞌba Jesuu̱, ku ngakjáin kaxaa̱ jma nga tjimincha tón chje̱ kisꞌejña. Kꞌi̱a̱ kjibasere kúcha inchamincha tón xu̱ta̱. Kjín xu̱ta̱ xi tsé tón tjínre tuxi tsé incha tsjua. 42Kjia jichú ngu chjun xi ni̱ma̱ xi je kꞌien xꞌinꞌe̱n ku jó kichasenchi inchá ngaya ngu kaxaa̱. 43Ku kjia ku̱i̱cha kitsúre̱ Jesuu̱ xu̱ta̱ xi kjibakuyáre̱:
—Tsjuájnu énꞌna nga kixi tjin nga kui chjun xi je kꞌien xꞌinꞌe̱n ku ni̱ma̱ tsuꞌba tsé kitsjua ngisa tukꞌuajíre ngieje xi tjínre. 44Nga̱tꞌa xi tjínre xi inchaꞌbangitsere xi kitsjua, ta̱nga kui chjun, xi tuxi ni̱ma̱ tsuꞌba, kitsjua ngieje tón xi machjenre nga tsuꞌba nga̱sunde.
Currently Selected:
Marko̱ 12: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
