San Mateo 1
1
Xozixhto Jesucristo
(Lc 3.23-38)
1Guichi ni zoa lo ka bene rhakake xozixhto Jesucristo, goke dia'adza ki David le'an ki Abraham:
2Abraham goke xozi Isaac, Isaac goke xozi Jacob te Jacob goke xozi Judá le'an kan kika bene bichie'. 3Judá goke xozi Fares le'an Zérah, na xhnake goke Tamar. Na Fares goke xozi Hesrón te Hesrón goke xozi Aram. 4Aram goke xozi Aminadab, Aminadab goke xozi Nahasón te Nahasón goke xozi Salmón. 5Salmón goke xozi Booz, na Rahab goke xhna Booz. Na Booz goke xozi Obed, te Rut goke xhna Obed. Obed na goke xozi Jesé, 6te Jesé na goke xozi bene gne'abe grelawe David.
Bene gne'abe grelawe David goke xozi Salomón, na xhna Salomón goke nigolha kie Urías.
7Salomón goke xozi Roboam, na Roboam goke xozi Abías te Abías na goke xozi Asá. 8Asá na goke xozi Josafat, Josafat na goke xozi Joram te Joram na goke xozi Ozías. 9Ozías goke xozi Jotam, Jotam na goke xozi Acaz te Acaz na goke xozi Ezequías. 10Ezequías goke xozi Manasés, Manasés na goke xozi Amón te Amón na goke xozi Josías. 11Josías na goke xozi Jeconías le'an kika bene bichie', lo tiembo kati ka israelitas beche'ake le'ake Babilonia.
12De beche'ake le'ake Babilonia, Jeconías goke xozi Salatiel te Salatiel goke xozi Zorobabel. 13Zorobabel goke xozi Abihud, Abihud goke xozi Eliaquim te Eliaquim goke xozi Azor. 14Azor goke xozi Sadoc, Sadoc goke xozi Aquim te Aquim goke xozi Eliud. 15Eliud goke xozi Eleazar, Eleazar goke xozi Matán te Matán goke xozi Jacob.
16Jacob goke xozi José, bene gxhi María, te María goke xhna Jesús, te nake Cristo.
17Na kan gota' chida' kue' yiza de ga' gzolho yiza ki Abraham bchhinte'a yiza ki David, chida' yiza ki David bchhinte'a ga' bsakaya'ake ka israelitas lo yechhi Babilonia, te ye chida' yiza kati bsakaya'ake ka bene israelitas bchhinte'a golhaj Jesús.
Kin goka kati golhaj Jesús
(Lc 2.1-7)
18Kin goka kati golhaj Jesús: María, xhna Jesús, nokie'abe gtzagane' le'an José; te zia'alha kati zi soake tzaxhen, bea xhi'inhe le'an balorhe ki Be'egrasia ki Diozo. 19José, bene kie' goke to bene wen te labi go'onhenhe gonhe sdo'o ki María lo ka bene yechhi, go'onhenhe yele'e le'an María sinka no' snisie. 20Chi be'anhe kuenda gonhe kan, kati to angle ki Diozo, yiajse lo chigalhe te gochhie le': José, dia'adza ki David, labisdzebilho silho María gake nigolha kio', le'a balorhe ki Be'egrasia ki Diozo be'an nonga María goe' bindo. 21María soa kie' to bindo, te güelho lobi Jesús. Kan si' lobi le'a gslabi yechhi kie'abi ki dolaxhkia' kie'ake.
22Yogote'a ten goka kinda gaka kumplirhe tan gne'a Diozo le'an bene btzalaje laze:
23Le'a bin rhoaban goa xhi'inbi
te soa to xhi'inbi,
te güeke lobi Emanuel
(rhe'anhe sne'a: Diozo le'an rho'o).
24Kati José bebanhe lo chigalhe, be'anhe ka' gochhi angle ki Diozo le', te gxhie' María. 25Te labine rzoale'anhe lee, bchhinte'a golhaj xhi'inhe bguio', te José bsie' lobi Jesús.
Currently Selected:
San Mateo 1: XDZPY
Highlight
Share
Copy
Want to have your highlights saved across all your devices? Sign up or sign in
Porciones en Zapoteco de Yalahui, Oaxaca, México © Sociedad Bíblica de México, A.C.
