Amós 2
2
1Kin ne Xanllon:
Be'nn Moab ka' ba ben ake' dazan kwis daxhinj,
na bi wdegunan kaze, deksde wsakzia le ake',
le bzey ake' llit ke be'nnen bnebia gan nzi Edom,
na bayakten deze.
2Kelen'na, wzeya konen yi' llalninen latj ke Moaben,
na yi' llalninen wzeyen yo' raw ke Querioten,
radje gan llusia ake' gan llak wdilen,
na kwell trompet ka',
be'nn Moab ka' kweyi ake'.
3Wakoasa kale be'nn wnebian raw yell ke'en,
wlleyie'e, na rente be'nn ka' llnebiarenen.
Kan ne Xanllon.
4Kin ne Xanllon:
Be'nn Judá ka' ba ben ake' dazan kwis daxhinj,
na bi wdegunan kaze deksde wsakzia le ake',
le bakoas ake' kale lloa xtillan,
na bi bzenay ake' ke da ka' ba bdichjbian,
na beraw ake' loe lsak ka'
beraw xustaw ake' ka'.
5Kelen'na, wzeya konen yi' llalninen Judán,
na lekse yi' llalnin'na wzeyen yo' raw ke Jerusalén'na.
Gak yel korchis ke Israelen
6Kin ne Xanllon:
Be'nn Israel ka' ba ben ake' dazan kwis daxhinj
na bi wdegunan kaze deksde wsakzia le ake',
le llot ake' be'nn ka' binap dolen konen mell,
na be'nn yachen llot ake' le ake' konen chkoe warach.
7Llsakzi ake', na lltitj akre be'nn yach ka',
na bi llun ake' yel korchis ke be'nn nexjrall ka'.
Xe'e na xhi'nne llatren ake' tuze no're,
na ka' lltitj akre yelxhirall kian.
8Na lla't ake' raw rall dan llkoan be'nn yach ka' llbay ke aken,
na llej llawren ake' be'nn ka' keten llunxhen ake' loe lsak ka',
llde aktere llchixhj ake' be'nn ka' dan llbay aken, na kone len lla'w ake' da llsulle le ake',
na lljej ake' lo yo' dao ke dios ke aken.
9Axha nada' ba bsarja xnesren,
blleyia be'nn amorreos ka',
dokenak ake' blleyia,
lakse nak ake' be'nn ton, kekse yay cedr ka', na be'nn war kekse yay rall ka'.
10Nada' babeja re' Egipton,
na broa re' nez choa iz, latj dachen
nench'na bena' re' yellriw ke be'nn amorreos ka'.
11Na bi gak nere' bi naken ka', be'nn Israelitas, le radjre ni ba breja be'nn
llixhjwe xtillan, na be'nn ba bena xhirall nzi nazareos.
Kan ba bne Xanllon.
12Na re' bchierere be'nn xhirall ka' wej ake' zun,
na bill be re' latj chixjwe be'nn ka' lloa xtillan.
13Kelen'na, nada' wchochja re' raw yun,
kekse llchochj to karret da zanoa yajlaw trigo.
14Lakse cha wxhonjdo re', bit warare,
ni be'nn waren, bi gakren yel war ke'en le'e,
nigaze be'nnen llun rall-lluyen, bi gak wasre'e yelnban ke'en.
15Be'nn ka' noxh xhis waxiten bi sue akre, na bi wara ake'
ni be'nnen zado rresen,
ni be'nnen llbia kull kabayen.
16Na ke lla'na, xte rente be'nn waren llun rall-lluyen llaj raw wdilen
wsanlalle'e ya ke'e ka', nench'na gak waxhonjdoe'e.
Kan ba bne Xanllon.
Currently Selected:
Amós 2: ZPUPAT
Highlight
Share
Copy
Want to have your highlights saved across all your devices? Sign up or sign in
