Zyan 21

Zyezu n wiyɛɛ dɛ̀ɛn pìitamabéle kɔrɔsiin na

1Gee bee kàdoʔo ma a Zyezu níì wiyɛɛ dɛ̀ɛn wi pìitamabèle na Tiberiyadi lòkpɔɔgi nyɔ́ɔ na. Kánmi naa na ki da pye, 2Siimɔn Pyɛri, ní Toma, wee be wɔ́ɔ̄ yiri lè Didimi, ní Natanayɛli, wi lè Kana ye wów, Kana wi lè Galile tári kègaa, poro ní Zebede jáabèle ní, n náà fàra be pìitamanyɛnbèle pèle siin na, pe maa pínɛ n pye tɛɛnijanga ni. 3#Luk 5:5 A Siimɔn Pyɛri be pye: «Mii a kári sa cɔ̀ɔ wáa.» A bele wi yari: «Wolo a wɔ́ɔ pínɛ kári ní mɔ ní.»

A be yìri n kári n sáà jée kɔ́rɔwaa ni, kàjáa pe ga yafyɛn taa n cò yébiligi bee ni í. 4A ki ga pye nyǐngi nyɔ́ɔ na pɛ́ɛn pɛ́ɛn, a Zyezu baa yére lǒgi kàgomɔ na, pìitamabèle si da gi cán Zyezu wii í. 5A Zyezu be pye: «Ni pìibēle, yele ga fàala taa ì?» A be wi yari: «Eʔe.» 6#Luk 5:6 A wi be pye: «Ye cɔ̀ɔ́w wáa kɔ́rɔw kàliige ma, yele a taa.» A be wi wáa yaà. Pe si ga gbàn n níì wi kíle n yirige í fábèle nɛʔɛnɛ báriga ni. 7Gee bee na pìitamawee kéele li da Zyezu dɛ́nɛ lè, a wee bee Pyɛri pye: «Kàfɔw wii!»

A Siimɔn Pyɛri ga lóʔo wi ma Kàfɔw wii, àmɛɛ wi da pye lè cepyá, a wi fala n búrogi láa n le n too lǒgi ni ni syée wi ma. 8A wi pìitamanyɛnbèle pan kɔ́rɔw ni, ncan pe da léeli lógbew na í, ki maa pye mɛ́tiribéle dabata félege, a be i cɔ̀ɔ́w kíle ni maa, ncan wi maa nyìn fábèle na. 9A pe ga yiri kɔ́rɔw ni n yére kàfugi na, a be naàniganʔana náa nyaa ní fyáā ní n fàra búru na. 10A Zyezu be yari: «Fábèle yele cò lè tɔ́ɔliw ni, yaa maa ní be pèle ní.»

11A Siimɔn Pyɛri jée kɔ́rɔw ni n cɔ̀ɔ́w kíle n yirige kàfugi na, fákpoloyo maa cɔ̀ɔ́w nyìn, yi maa pye togoye kɔrɔsiin ní kpɔrigɔ ní fàala taanri. Amɛɛ yi da wírè nɛʔɛ lè nya, cɔ̀ɔ́w ga sèʔê cɛnɛ í. 12A Zyezu be pye: «Yaa maa wo ba lìi.» Pìitamawaa faala si ga fɔ̀lɔ n wi yíbe níì jo: «Mɔ wìí wii» í. Níì cán pe maa gi cán Kàfɔw wii. 13A Zyezu fala n búruw lɛɛ be na ní fáw ní. 14Amɛɛ Zyezu da ni wiyɛɛ dèé lè pìitamabèle na wi nyán-yirili kàdoʔo ma kúbèle nínge ni lè, gee naa gi pye tɔdaanri wógi.

Zyezu ní Pyɛri

15Lǎli ni pe lìi n kwɔ́ɔ lè, a Zyezu Siimɔn Pyɛri pye: «Siimɔn, mɔ wi lè Zyan jáaw, a mii kéeli mɔ dɛ́nɛ lé n sɔ̀lɔ bele naa na?» A wi jo: «Ɛɛn, Kàfɔw, mɔ n gi cán mɔ kéeli n mii dɛ́nɛ.» A wi wi pye: «Maa lìile kaangi mii bàpiigèle ma.»

16A wi níì wi yíbe tɔziin wógi na níì jo: «Siimɔn, mɔ wi lè Zyan jáaw, a mii kéeli mɔ dɛ́nɛ lé?» A wi jo: «Ɛɛn, Kàfɔw, mɔ n gi cán ncan mɔ kéeli n mii dɛ́nɛ.» A Zyezu wi pye: «Maa mii bǎbèle nàʔá.»

17A wi níì wi yíbe tɔdaanri wógi na níì jo: «Siimɔn, mɔ wi lè Zyan jáaw, a mii kéeli mɔ dɛ́nɛ lé?» A gi pye Pyɛri ma funbɛɛnrɛ àmɛɛ Zyezu wi yíbe lè tɔdaanri wógi na níì jo: «A mii kéeli mɔ dɛ́nɛ lé?» A wi Zyezu yari: «Kàfɔw, mɔ n kérigèle myɛ cán. Mɔ n gi cán ncan mɔ kéeli n mii dɛ́nɛ.» A Zyezu wi pye: «Maa mii bǎbèle kaangi paa líi. 18Mii a tɔ̀nɔ́ gi joo mɔ ma kányɛʔɛ ni, mɔ nigɔcarigi làla ni mɔ maa ni mɔ sɛntiiriw lée ni miyɛɛ bwoo ni syée mɔ nyɛ́nɛ tɛ́ɛyi ni. Kàjáa lǎlee ni mɔ ga baa lɛɛ lè, mɔ a mɔ kɔ́yi sánʔa, wàa si mɔ sɛntiiriw pwɔɔ mɔ na si mɔ tórigo beè lè mɔ o caa bi kári í.» 19Wi n dee bee joo bi gi tɛ̀ɛn kánmee na Pyɛri a ba kùu lè si nìjangbɔɔri taʔa Kolocɔlɔɔ na. A wi ga dee bee joo n kwɔ́ɔ, a wi Pyɛri pye: «Taʔa mii na.»

Zyezu ní pìitamawee kéele li da wi dɛ́nɛ lè

20 # Zyan 13:25 Pìitamawee kéele li da Zyezu dɛ́nɛ lè, a Pyɛri kàri n wéle n wee bee nyaa wi i maa poro kurugo, pìitamaw bee wi da tɛ́ɛn n télege Zyezu na yébiligee ni pe da ni líi lè níì wi yíbe níì jo: «Kàfɔw, wìí wi nyɛ mɔ levɔw nigoobèle kɔ́yɔ ni?» 21Amɛɛ Pyɛri wi nyaa lè, a wi Zyezu pye: «Kàfɔw, a wee naa doò?» 22A Zyezu wi yari: «Alí mii ga jo woro í kòro beè bi taa mii í lúru pan, nyàʔá mɔ caa gee bee ni? Mɔ mi taʔa mii na.» 23Koro gi gi kaan a syɛ́ɛnri bee cariga senyɛnbèle nínge ni, a be jo pìitamaw bee a kùu í. Bi gi taa Zyezu da gee bee joo níì jo wi a kòro beè sìnguu í, kàjáa wi maa gi joo níì jo: «Alí mii ga jo woro í kòro beè bi taa mii í lúru pan, nyàʔá mɔ caa gee bee ni?»

24Pìitamaw bee si wi kérigèle bee séera kpéʔele níì ge sɛ́bɛ. A wolo gi cán wi séeraw i nyɛ kányɛʔɛ.

Syɛɛnsanri

25Zyezu maa kérigèle kèle nikwɔɔlɔ saʔa kpéʔele. Kapye gele bee myɛ maa sɛ́bɛ nibin nibin, mii i gi sɔ̀ngí sɛ́bɛbèle bee mǎà dée gbǎn kúun dulunyanw ni í.

Currently Selected:

Zyan 21: CB10

Highlight

Copy