Zyan 8
8
Kanɔnʔɔbyecew kéele
1Koro kàdoʔo ma a Zyezu kári n sáà lúgu Olivye tíiri nyanbelege na. 2Ki nyǐndaligi nyɛ̀ʔɛ nyɔ́ɔ na pɛ́ɛn pɛ́ɛn, a wi lúru n pan kpɔ̀ʔɔrɔli kpaʔa ma. A syɛ́ɛnbèle myɛ kári wi ma, a wi sáà tɛ́ɛn ni be tama. 3Lǎli bee ni a làlwaw sɛ́bɛwelebéle ní Farisibèle pan ní cewaa ní, wee pe da cò kanɔnʔɔrɔ na lè ní baa wi yérige syɛ́ɛnbèle nínge ni, 4níì Zyezu pye: «Tamafɔw, pe n céw naa cò ní nàɔn ní, a be tɔ̀nɔ́ i kanɔnʔɔri kpéʔele. 5#Lev 20:10; Làlw 22:22-24 Mowizi si n gi joo làlwaw sɛ́bɛ ni níì jo, wo ga céw naa wàa taa n cò, wo wi wábagi wo kpóo ní kàdɛnɛrɛ ní. Mɛ̀ɛ́ si mɔ jo?»
6Pe maa gee bee joo bi Zyezu pye wéle, jàngó poro í jànvaawaa taa le wi na. A Zyezu fala n lɛ̀ɛlɛ ni sɛ́bɛ tári na ní wi kabeli ní. 7A be kòro ni wi yíbe. A wi kɔ́ɔ̀ yìri n yére níì be pye: «Wee wi naa lè yele ni kapeele fun, wee bee wi séli wi kàdɛnɛgi láa wi wi wáa.»
8Ní níì lɛ̀ɛlɛ ni sɛ́bɛ tári na. 9A pe ga gee bee lóʔo, a gi séli wolɛɛbèle na, a be i núngu nibin nibin n baa kwɔ́ɔ n céw yaʔa tɛɛ̀yére-níjangi ni ní Zyezu nibin ní. 10A Zyezu yìri n yére, níì wi pye: «Cɔlɔɔ, sán be nyɛ? Wàa ga keelaa tɛ́ʔɛ mɔ na ì?» 11A wi jo: «Eʔe, ni Kàfɔlɔ. Wàa ga yafyɛn tɛ́ʔɛ mii na í.» A Zyezu wi pye: «Mii a wɔ́ɔ yarigaa tɛ́ʔɛ mɔ na í. Da syée. Nlaʔa níjanʔa na, ki ga yɛlɛ mɔ í ní kɔ́ kapeele kpéʔele í.»]
Zyezu wi nyɛ dulunyanw gbɛ̀ɛnmɛ
12 #
Zyan 9:5; Mat 5:14 Lǎli bee ni a Zyezu níì séli ni nyuu ní syɛ́ɛnbèle ní níì jo: «Mii wi nyɛ dulunyanw gbɛ̀ɛnmɛ. Syɔ́ɔnwee wi ga taʔa mii na lè, wee bee a tée tánʔa yébilimɛ ni í, níì cán wi a sìíw gbɛ̀ɛnmɛ taa.» 13#Zyan 9:5 Gee bee na Farisibèle wi pye: «Séeraw mɔ kpéʔele lè, mɔ tiimaa wóo mɔ kpéʔele, séeraw bee o nyɛ kányɛʔɛ í.»
14A Zyezu be yari: «Alí mii ga ni mii tiimaa séera kpéʔele, séeraw bee tɔ̀nɔ́ i nyɛ kányɛʔɛ, níì cán mii n mii tɛɛyìrigi cán ní wɔ́ɔ̀ mii tɛɛkárigi cán. Kàjáa yele ga mii tɛɛyìrige cán í, yele ga wɔ́ɔ̀ mii tɛɛkáriga cán í. 15Yele i kútiiw kúunri ni yɛlɛgi ní dulunyanw naa kèlē ní. Mii si o kútii kúunri syɔɔn faala na í. 16Alí mii ga ni kútiiw kúunri syɛ́ɛnbèle na, kútiiw bee i nyɛ kányɛʔɛ wóo, níì cán mii o kútiiw kúunri mii nibin í, kàjáa mii Tunvɔw i nyɛ ní mii ní. 17Alí ki n caà sɛ́bɛ yele làlwaw sɛ́bɛ ni níì jo: ‹Syɛ̀ɛnnɛ siin séera wi nyɛ kányɛɛgi wóo.› 18Mii i nyɛ ni mii tiimaa séeraw kpéʔele koro i nyɛ kányɛʔɛ, kàjáa mii Tóow si wɔ́ɔ i nyɛ mii séera, woro wee wi mii tun lè.»
19A be fala n wi pye: «Sán mɔ tóow nyɛ?» A wi be yari: «Yele ga mii cán í, yele ga wɔ́ɔ̀ mii Tóow cán í. Yele ga maa mii cán, yele mǎà dée wɔ́ɔ mii Tóow cán.»
20Lǎli ni Zyezu da ni syɛ́ɛnbèle tama lè kpɔ̀ʔɔrɔli kpaʔa ni, tɛ́ɛgee ni be wáliw kaangi lè, nɛɛ bee wi da yére níì syɛ́ɛnri naa joo. Kàjáa syɔɔn faala ga wi cò lǎli bee ni í, níì cán wi lǎli da kɔ́ɔ̀ nan í.
Yele a gbǎn kári beè mii syée lè í
21A Zyezu níì be pye: «Mii a kári, mii si ga kári, yele a kɔ́ ba ra mii caa si ba kùu yele kapeebyeri ni. Tɛ́ɛgee ni mii syée lè, yele a gbǎn nan yaà í.» 22Gee bee na Zyefubèle jo: «A wi a tɔ̀ʔɔ́ wiyɛɛ gbóo lé wii ní kɔ́ɔ̀ jo tɛ́ɛgee ni woro syée lè, wolo a gbǎn nan yaà í?» 23A wi be pye: «Yele i nyɛ táàma wòolo. Mii si na mii i nyɛ ǹjoʔo ma wóo. Yele i nyɛ dulunyanw naa wòolo, mii si o nyɛ dulunyanw naa wóo í. 24Gee bee na mii gi joo yele ma níì jo: Yele a kùu yele kapeebyeri ni. Níì cán yele ga pye yele ga tága gi na ncan woro wi nyɛ mii í, yele a kùu yele kapeebyeri ni.» 25Lǎli bee ni a be wi pye: «Wìí wi nyɛ mɔ?» A Zyezu be pye: «Wee mii nyɛ lè, koro mii téē nyuu yele ma nlaa yaà gi sélimi na. 26Kèlē saʔa i nyɛ mii ma bi joo yele kéeli na, si wɔ́ɔ kútiiw kúun yele na kèlē saʔa ni. Kàjáa wee wi mii tun lè woro wi nyɛ kányɛɛgi fɔ́lɔ, gee mii lóʔo wi ma lè koro mii nyuu dulunyanw syɛ̀ɛnnɛ ma.»
27Pe si da gi cán wi Tóow kéele wi nyuu poro ma í. 28Gee bee na Zyezu be pye: «Lǎli ni yele ga kɔ́ɔ̀ Syɔɔn-pya yìrige n yérige lè, lǎli bee ni yele a náa gi cán bi cán woro wi nyɛ mii, si wɔ́ɔ gi cán mii o yarigaa faala kpéʔele niyɛɛ báriga ni í. Níì cán gee na mii Tóow mii tama lè, gee bee mii nyuu. 29Mii Tunvɔw i nyɛ ní mii ní, wi ga mii yaʔa mii nibin í, níì cán mii i wi nyɛnɛ kérigèle kpéʔele làla o làla.»
30Amɛɛ wi kérigèle bee joo lè, a syɛ̀ɛnnɛ saʔa tága wi na.
Wɔ́rɔbèle ní púlobèle
31Koro na Zyefubèle bele pe da tága Zyezu na lè, a wi be pye: «Amɛɛ yele mii syɛ́ɛnri lúro lè, yele ga kòro ni gi kpéʔele àmɛɛ mii jo lè, yele a náa pye mii pìitamabéle kányɛʔɛ ni, 32si wɔ́ɔ kányɛɛgi cán, kányɛɛgi si yele kpéʔele wɔ́rɔbéle.»
33 #
Mat 3:9; Luk 3:8 A be wi yari: «Wolo i nyɛ Abirahami yòdaʔaya, wolo ga kɔ́ɔ̀ pye syɔɔn faala púlobéle nyáana í. Mɛ̀ɛ́ si gi nyɛ á mɔ jo wolo a náa pye wɔ́rɔbéle?» 34A Zyezu be pye: «Mii a gi joo yele ma kányɛʔɛ ni, syɔ́ɔnwee faala wi kòro kapeegèle na ni kpéʔele lè, wee bee tɔ̀nɔ́ i nyɛ kapeegèle púloro ni. 35Puloo a gbǎn kòro wi kàfɔlɔ kpaʔa ni làla o làla í. Kàjáa jaafɔlɔ i nyɛ wi tóow kpaʔa ni làrigèle myɛ ni. 36Koro na Jaafɔw ga yele lége wɔ́rɔdi ni, yele a tɔ̀nɔ́ pye wɔ́rɔbéle kányɛʔɛ ni. 37Mii n gi cán yele i nyɛ Abirahami yòdaʔaya, koro ní ki myɛ ní yele si i sɔ̀ngí bi mii kpóo. Níì cán syɛ́ɛnri mii nyuu lè, ti ga kɔ́ɔ̀ tɛɛkòrogo taa yele fúnyi ni í. 38Kérigèle gele mii nyaa mii Tóow ma lè, gele bee mii nyuu. Gele si yele wɔ́ɔ̀ nyaa yele tóow ma lè, gele bee yele kpéʔele.»
39A be wi yari: «Jo wolo tóow wi nyɛ Abirahami.» A Zyezu be pye: «Yele ga maa pye Abirahami pìibēle, kérigèle gele wi da ni kpéʔele lè, yele mǎà dée wɔ́ɔ ra gele bee kpéʔele. 40A mii si gi nyaa yele i sɔ̀ngí bi mii kpóo, mii wee wi kányɛɛgi nyuu lè yele ma, gee mii lóʔo Kolocɔlɔɔ ma lè. Abirahami si da tɔ́ɔ ni gee bee kpéʔele í. 41Kérigèle gele yele kpéʔele lè, gele bee i nyɛ yele tóow wòʔolo.»
A be wi yari: «Kanɔnʔɔrɔ piibéle ban wolo nyɛ í. Tofɔlɔ nibin wi nyɛ wolo ma, woro wi nyɛ Kolocɔlɔɔ.» 42A Zyezu be pye: «Kolocɔlɔɔ ga maa pye yele Tóow, mii kéeli mǎà dée yele dɛ́nɛ, níì cán Kolocɔlɔɔ ni mii yiri n pan. Mii ga pan niyɛɛ báriga ni í, woro tundunro na mii nyɛ. 43Gee mii nyuu lè, yele a gbǎn gi kɔ́rɔw cán í. Níì cán nyàʔá na? Amɛɛ gi nyɛ lè yele o sɔ̀ngí bàā mii syɛ́ɛnri lúro í, koro gii. 44Màdebèle kàfɔlɔ wi nyɛ yele tóow, gee bee na yele sɔ̀ngí bàā yele tóow nyɛ́nɛ kèlē kpéʔele. Nlaa gi sélimi na woro wi syɛ́ɛnbèle kúu, wi o téē yèré kányɛʔɛ ni í, níì cán wi o nyɛ kányɛʔɛfɔlɔ í. Wi ga ni jà finɛ lǎlee ni lè, wi n ni wi tiimaa fúngi syɛ́ɛnrɛ nyuu. Wi i nyɛ jànvaafɔlɔ, ní wɔ́ɔ i nyɛ jànvaaw sélimafɔlɔ. 45Amɛɛ mii kányɛɛgi nyuu lè yele ma, gee bee na yele o tági mii syɛ́ɛnri na í! 46Wìí wi naa yele ni bi jo woro n kɔ́ɔ̀ mii nyaa a mii kapeele kpéʔele cangaa? Mii wee si wi kányɛɛgi nyuu yele ma lè, nyàʔá na yele o tági mii syɛ́ɛnri na í? 47Wee wi nyɛ lè Kolocɔlɔɔ wóo, wi i Kolocɔlɔɔ syɛ́ɛnri lúro. Yele o nyɛ Kolocɔlɔɔ wòolo í, gee bee na yele o wi syɛ́ɛnri lúro í.»
Zyezu ní Abirahami
48A Zyefubèle wi yari: «Jàʔá kányɛʔɛ wolo joo níì jo mɔ i nyɛ Samarii ye wóo, ní níì jo màdeo i nyɛ mɔ ni.» 49A Zyezu be yari: «Màdeo o nyɛ mii ni í, mii Tóow mii kpɔ̀ʔɔrɔ́, á yele si i mii faari. 50Mii o mii tiimaa kpɔ́ɔmɔ caa í. Wàa i yaà ni bi caa bi kaan mii ma, woro wi nyɛ kútiiw cerifɔlɔ. 51Mii a tɔ̀nɔ́ gi joo yele ma kányɛʔɛ ni, wee wi ga ni mii syɛ́ɛnri lúro lè ní i gi kpéʔele àmɛɛ mii jo lè, wee bee a tée kùu bi nyaa í.»
52A Zyefubèle wi pye: «Wolo n náà gi sámaga n cán kányɛʔɛ ni ncan màdeo i nyɛ mɔ ni. A Abirahami si gbàn n kùu, a kanyaajoobèle myɛ wɔ́ɔ̀ kùu, á mɔ fɔ̀lɔ n jo syɔ́ɔnwee wi ga ni mɔ syɛ́ɛnri lúro lè ní i gi kpéʔele àmɛɛ mɔ jo lè, wee bee a tée kùu bi nyaa nyáana í. 53A mɔ tɔ̀ʔɔ̂ kpɔ́ʔɔ lé n sɔ̀lɔ wolo tóow Abirahami na? A woro kùu, a kanyaajoobèle wɔ́ɔ̀ kùu. A mɔ félegi si tɔ̀ʔɔ́ i nyɛ mɛ̀ɛ́ n sɛ́ɛ?»
54A Zyezu be yari: «Mii ga maa ni niyɛɛ gbɔ́ʔɔgi, mii kpɔ́ɔmi mǎà dée pye gbanzan. Kàjáa mii Tóow wi nyɛ kpɔ́ɔmi kaanfɔlɔ mii ma, woro wee yele jo lè wi i nyɛ yele Kolocɔlɔw. 55Koro ní ki myɛ ní yele si ga sèʔê wi cán í, á mii si wi cán. Mii ga maa jo mii ga wi cán í, mii mǎà dée wɔ́ɔ pye jànvaafɔlɔ àmɛɛ yele nyɛ lè. Kàjáa mii n wi cán, ní i gi kpéʔele àmɛɛ wi jo lè. 56Ki maa tɔ̀nɔ n yele tóow Abirahami dɛ́nɛ bi mii cángi nyaa, a wi ga baa gi nyaa, a gi pye wi ma fundaanra.» 57A Zyefubèle fala n wi pye: «Mɔ wee wi lè mɔ ga kɔ́ɔ̀ yɛ̀ʔɛlɛ togoye siin ní kpɔrigɔ taa í, a mɔ Abirahami cán lé?» 58A Zyezu be pye: «Mii a tɔ̀nɔ́ gi joo yele ma kányɛʔɛ ni, sáni pe Abirahami see lè, mii maa téè pye yaà.»
59Lǎli bee ni a be fala n kàdɛnɛrɛ jóo níì jo bi Zyezu wábagi kpóo. A wi yiri kpɔ̀ʔɔrɔli kpaʔa kàcoolo ni be taana, pe ga wi làriyirile cán í.
Currently Selected:
Zyan 8: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
