Luki 17
17
Kapeeli ní kùsuluzyɔɔri
(Mat 18:6-7,21-22; Mar 9:42)
1A Zyezu gi joo wi pìitamabèle ma níì be pye: «Kérigèle ge syɛ́ɛnbèle pùuní ni légi kapeebyeri ni lè, ke a tɔ̀nɔ́ gbǎn fɔ̀n beè í, kàjáa wee báriga ni syɛ́ɛnbèle a pùuni lè, wɔʔɔli a pye wee bee na. 2Sáni wi pìipiigèle naa làa nibin kaan li lúru kàdoʔo ma lè, ki a pɔ́rɔ wi ma pe tírekpɔʔɔ pwɔɔ wi yátiigi ni, si wi wáa sólomi lòkpɔʔɔ ni. 3#Mat 18:15 Yaa yeyɛɛ kɔ̀rɔsíi.
Mɔ senyɛnwaa ga kapeele kpéʔele mɔ na, mi jo ní wi ní, wi ga kàdoʔo wáa wi kapeeli ma, mi wi kùsulugi syɔɔ. 4Wi ga ni kapeegèle kpéʔele mɔ na cángi nibin ni n baa taa tɔlɔyɔ kɔrɔsiin, ní wɔ́ɔ i syée mɔ ma n baa taa tɔlɔyɔ kɔrɔsiin n sa ni gi nyuu níì jo: ‹Mii n kàdoʔo wáa mii kapeegèle ma, maa wi kùsulugi syoo.› »
Tágali
5A pìitunbèle gi joo Kàfɔw ma níì wi pye: «Mi kàa fàra wolo tágali na.» 6A Kàfɔw be yari: «Alí yele tágali ga maa pye àmɛɛ mutaridi tíige piifalila nyɛ lè, yele mǎà dée gbǎn gi joo miriye#17:6 miriye: Mɔ ga lóʔo miriye tíige, Zyefubèle tára tiisangaa gii. Tíiyi bee i kpólogi gbanʔama. tíigi naa ma si gi pye: ‹Mi kɔ́n mi sa cɔ́rɔ sólomi lòkpɔʔɔ ni,› ki mǎà dée lóʔo yele ma.
Gee falipyew yɛlɛ da kpéʔele lè
7«Wìí syɔ́ɔn wi naa yele ni falipyeo ga pye wi ma ni fála, wàlá a wi i yaweere nàʔá, wi ga yìri ségi ma n pan, mɔ a ba wi pye lé: ‹Ba tɛ́ɛn kelekele mi lìi?› 8Eʔe, mɔ a gi joo wi ma si wi pye: ‹Mi mii lìíli sámaga, mí mɔ búroyi fàli máā lìíli kaangi mii ma bi taa mii í lìi gbɛnʔɛnɛ si gbaa, koro kàdoʔo ma mɔ a náa miyɛɛ daa bi lìi si gbaa.› 9Kapye falipyew bee n gi kpéʔele àmɛɛ wi kàfɔw jo lè, a gi yɛlɛ lé wi wi syáanri gee bee na? Eʔe. 10Anbée si gi wɔ́ɔ̄ nyɛ yele ma. Gee Kolocɔlɔɔ joo yele í kpéʔele lè, lǎli ni yele gee bee myɛ kpéʔele n kwɔ́ɔ lè, ki n yɛlɛ yele í sèʔé jo: ‹Wolo i nyɛ tɔ̀nɔ fun falipyebèlē, gee wolo da yɛlɛ bi kpéʔele lè, gee bee yagana wolo kpéʔele.› »
Zyezu n yaanyɛɛnmɛfɔɔlɔ kɛɛ pɔʔɔ
11Lǎli ni Zyezu pye kólogi na ni syée Zyerusalɛmi ma lè, a wi sa ni forogi Samarii tári ní Galile tári nínge ni. 12A wi ga sa ni jǐn kègaa ni, a yaanyɛɛnmɛfɔɔlɔ kɛɛ i wi fàrá, níì yére tɛɛ̀leelige ni, 13ní i yákpogèle wáa níì jo: «Zyezu, mɔ wi lè wo Kàfɔw, mi nyinimɛ taa wolo na.» 14#Lev 14:1-32 A Zyezu ga be nyaa a wi be pye: «Yaa syée ye sa yeyɛɛ dɛ̀ɛn sáriga-wòlobèle na.»
Amɛɛ be syée lè, a be pɔʔɔ n nyɔɔ. 15A wàa nibin ga gi nyaa àmɛɛ woro pɔʔɔ lè, a wi lúru ni Kolocɔlɔɔ kpɔ̀ʔɔrɔ́ ní yákpogbɔɔlɔ ní ni maa, 16ní baa too n wi yɛ́ɛgi cíbele Zyezu taana, níì bariga kaan wi ma. Wi si maa pye Samarii ye wóo. 17Lǎli bee ni a Zyezu jo: «Syɛ̀ɛnnɛ kɛɛ ban be pɔʔɔ n nyɔɔ ì? Sán si bele kpanjɛrɛ nyɛ? 18Syɛ́ɛnbèle bee wàa nibin ga taa si lúru naa ba Kolocɔlɔɔ kpɔ̀ʔɔrɔ lé í, kapye nibɔnnanw naa ban í?» 19Níì wi pye: «Yìri maa syée, mɔ tágali n mɔ pɔʔɔ.»
Kolocɔlɔɔ fǎngi panna kéele
(Mat 24:15-28,37-41)
20 Farisibèle maa Zyezu yíbe níì jo: «Làlìí ni Kolocɔlɔɔ fǎngi a pan?» A wi be pye: «Kolocɔlɔɔ fǎngi a tée pan syɔɔn í gi wéle nyaa í. 21Pe si a wɔ́ɔ gi joo si jo: ‹Ye wéle, ki i naa gee,› wàlá ‹ki i yaà gee› í. Níì cán Kolocɔlɔɔ fǎngi i nyɛ yele níngi ni.»
22A wi gi joo pìitamabèle ma níì jo: «Canyaa a kɔ́ ba pye, yee ni yele a tɔ̀nɔ́ da caa bi Syɔɔn-pya cángaa nibin nyaa lè, yele si a gi nyaa í. 23Pe a kɔ́ ba gi joo yele ma si yele pye: ‹Ye wéle nɛɛ yaa,› wàlá ‹nɛɛ naa.› Ki si ga yɛlɛ yele í kári yaà í, ki ga wɔ́ɔ̀ yɛlɛ yele í taʔa be na í. 24Níì cán àmɛɛ nyɛ̀ʔɛni nyɛ́ʔɛnɛmɛ gbɛɛnmɛ gáà yiri nyɛ̀ʔɛni kàbangaa nibin ma fwɔɔ n sáà nan kàbangee na kánmee na lè, ànbée Syɔɔn-pya a wɔ́ɔ ba pye wi canbangi na. 25Kàjáa sáni gee bee í kpéʔele lè, ŋàʔanaga gii fwɔɔ wi tɔ̀nɔ́ wɔʔɔ kèlē saʔa ni, tɔ́ɔliw naa syɛ̀ɛnnɛ si wi cée. 26#Sél 6:5-8 Amɛɛ ki da pye lè Nowe lǎli ni, ànbée ki a wɔ́ɔ ba pye Syɔɔn-pya lǎli ni. 27#Sél 7:6-24 Níì cán syɛ́ɛnbèle maa ni líi, ní i gbo, ní i cèpɔrigi kpéʔele, ní wɔ́ɔ i be pìíbèle kaangi pe i be pɔri, níì kòro gee bee myɛ na ni kpéʔele n taa n sáà nan Nowe cânjeegi na kɔ́rɔkpɔɔgi ni. A lònɛʔɛgi pan n baa pe myɛ kpóo. 28#Sél 18:20—19:25 Ki si a wɔ́ɔ ba pye àmɛɛ ki da pye lè Lɔti lǎli ni. Syɛ́ɛnbèle maa kòro ni líi, ní i gbo, ní i yáriri syoo, ní wɔ́ɔ i pára, ní i fála, ní i kpáayi faanri. 29Kàjáa cángee na Lɔti yiri lè Sodɔmi ni, a náagi ní dìrigíw yìri nyɛ̀ʔɛni na n baa too àmɛɛ zàʔá nyɛ lè n pe myɛ kpóo. 30Anbée si ki a wɔ́ɔ ba pye cángee na Syɔɔn-pya a ba wiyɛɛ dɛ̀ɛn lè.
31 #
Mat 24:17-18; Mar 13:15-16 Cángi bee na wee ga pye lè binge ǹjoʔo ni, wi kɔlɔ̀ yáriri si i yaà bíngi ni, ki ga yɛlɛ wi tìgí jée gi ni bi jo woro a di láa í. Wee wi ga wɔ́ɔ̀ pye lè seʔe ni, ki ga yɛlɛ wi lúru kári kàʔa ma bi jo woro a sa wi yáriri láa í. 32#Sél 19:26 Ki n yɛlɛ ye sɔ̀ngi ye taa Lɔti céw kéele na. 33#Mat 10:39; 16:25; Mar 8:35; Luk 9:24; Zyan 12:25 Wee wi ga ni caa bi wi sìíw syɔɔ lè, wee bee a bɔ̀nɔ wi ni. Wee si wi ga bɔ̀nɔ wi sìi ni lè, wee bee a ba wi woò taa. 34Mii a gi joo yele ma, cángi bee yébilige ni syɛ̀ɛnnɛ siin a pye yasinɛgɛ nibin na, pe a wàa nibin láa si wàa yaʔa. 35Càbala siin a pye bi pínɛ da tire, pe a wàa nibin láa si wàa yaʔa. 36[Nànbēle siin a pye seʔe ni, pe a wàa nibin láa si wàa yaʔa.]»
37A pìitamabèle wi pye: «Kàfɔw, sán gee bee a kpéʔele?» A wi be yari: «Yakuugo ga pye tɛ́ɛgee ni lè, nɛɛ bee kàcɔʔɔri a tiyɛɛ gbóʔoro.»
Currently Selected:
Luki 17: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
