Luki 9

Zyezu n pìitamabèle kɛɛ ní siin tun

(Mat 10:5-15; Mar 6:7-13)

1A wi pìitamabèle kɛɛ ní siin yeri n kpóʔoro, níì séew ní fǎngi kaan be ma pe gbǎn màdebèle myɛ jáa, si wɔ́ɔ ra yáami láari syɛ́ɛnbèle na. 2A wi be tun pe sa ra Kolocɔlɔɔ fǎngi kéele nyuu da máari, sáā yáabèle poori. 3#Luk 10:4-11; Kap 13:51 Wi n be pye: «Yele a kɔ́ kùsɛɛ-yárigaa faala láa í, kpèegēle yoo, kpàbibēle yoo, búru yoo, wáli yoo, yele a wɔ́ɔ kɔ́ buroyo siin-ziin láa í. 4Yele ga sáà jée kpaʔa o kpaʔa ni, ye kòro gee bee ni fwɔɔ bi taa yele làrigárili í ba nan. 5Kěgee syɛ̀ɛnnɛ ga sáà pye lè pe ga fɔ̀lɔ yele na í, yele ga yiri kěgi bee ni, ye cíbigi kóri ye láʔa yele tɔ́lɔyi na, gee bee a pye bele bee ma séera.» 6A be kári n sa ni kěyi myɛ nyaari ni Syɛɛnjóocǎnri nyuu, ní i yáabèle poori.

Herodi funjurugori kéele

(Mat 14:1-12; Mar 6:14-29)

7 # Mat 16:14; Mar 8:28; Luk 9:19 A fànʔafɔw Herodi ga kérigèle bee myɛ lóʔo gele ke da ni kpéʔele lè, a wi fúngi curugo wi na, níì cán syɛ́ɛnbèle pèle maa jo Zyan wi nyán n yiri kúbèle nínge ni, 8á pèle jo Elii wi níì pan, á pèle si jo booma kanyaajoowaa wi nyán n yìri. 9A Herodi jo: «Mii maa Zyan nyǔngi ceri. Wee kéele na si mii kérigèle naa lúro lè, wìí wi nyɛ syɔ́ɔnw bee?» A wi i kanmaa caa bi wi nyaa.

Zyezu n nànbēle selebingéle siin ní saala kagunɔ kaan a be lìi

(Mat 14:13-21; Mar 6:30-44; Zyan 6:1-14)

10A pìitunbèle ga lúru n pan, gee be sáà kpéʔele lè, a pe baa gee bee joo Zyezu ma. A wi be kɔ́ri n kári Bɛtisayida ma pe yagwɔɔlɔ. 11Amɛɛ si syɛ́ɛnmi wi tɛɛ̀kárigi cán lè, a bi kári wi kurugo. A wi sáà bi sámaga n cò, ní i Kolocɔlɔɔ fǎngi kéele nyuu be ma. Bele be yáa lè, a wi i bele bee poori.

12Lǎli ni cángi kòro cɛɛri si jée lè, a wi pìitamabèle kɛɛ ní siin nùuni wi na n baa wi pye: «Ki n yɛlɛ mɔ í syɛ́ɛnmi yaʔa bi kári wolo taana kěyi, ní vǒyi ma bi sa syɔ́ɔn yaà, si yaliire taa lìi, níì cán tɛ́ɛgi naa ni wolo nyɛ lè, ki i nyɛ fìímɛ tára.» 13A wi be pye: «Yele ye a be kaan be lìi.» A be jo: «Búrubéle kagunɔ ní fàala siin yagana be naa wolo ma, fwɔɔ wolo ga kári n sáà lìilaa syɔɔ syɛ́ɛnbèle naa myɛ kéele na.» 14Nǎnbèle si maa selebingéle siin ní saala kagunɔ félege kwɔ́ɔ. A wi wi pìitamabèle pye: «Ye be télege kabiya kabiya be pye syɛ̀ɛnnɛ togoye siin ní kpɔrigɔ kpɔrigɔ félege.»

15A be gi kpéʔele nya n pe myɛ télege télege. 16A Zyezu búrubèle kagunɔ ní fábèle siin láa, níì wi yɛ́ɛgi yìrige n le nyɛ̀ʔɛni ni níì dùbaw taʔa di na, níì di kabagi kabagi n kaan pìitamabèle ma níì jo pe di lɛɛ syɛ́ɛnmi na. 17A be myɛ lìi n tín, a be wogabagiri koli, dee di kòro lè, a di sɛ̀ʔɛgēle kɛɛ ní siin nyìn.

Pyɛri n jo Zyezu wi nyɛ Kirisi

(Mat 16:13-19; Mar 8:27-29)

18Cangaa Zyezu maa sa ni nyɛ́ɛri wi nibin, wi pìitamabèle yagana si i nyɛ ní wi ní. A wi be yíbe níì jo: «Wìí syɛ́ɛnmi jo mii i nyɛ?» 19#Mat 14:1-2; Mar 6:14-15; Luk 9:7-8 A be wi pye: «Pèle n jo mɔ wi nyɛ Zyan Batisiti, á pèle jo mɔ wi nyɛ Elii, á pèle si jo booma kanyaajoowaa wi nyán n yìri.» 20#Zyan 6:68-69 A wi be pye: «A yele doò, wìí si yele jo mii i nyɛ?» A Pyɛri wi pye: «Mɔ wi nyɛ Kirisi, wi lè Kolocɔlɔɔ wów.»

Zyezu n wi kùúw ní wi nyányirili kéele joo

(Mat 16:21-28; Mar 8:31—9:1)

21A wi gi joo n gbàn be ma gbanʔama níì jo, pe a kɔ́ gee bee joo syɔɔn faala ma í. 22A wi fala n be pye: «Ŋàʔanaga gii fwɔɔ Syɔɔn-pya í wɔʔɔ kèlē saʔa ni, wolɛɛbèle, ní sáriga-wòlobèle kàfɔɔlɔ, ní làlwaw sɛ́bɛwelebéle si ba wi cée, si wi kpóo. Wi si a nyán bi yiri kúbèle nínge ni candaanri wógi na.»

23 # Mat 10:38; Luk 14:27 A wi níì syɛ́ɛnbèle myɛ pye: «Syɔ́ɔnwee faala wi ga ni caa bi taʔa mii na lè, ki n yɛlɛ wi wi nyɛnɛ kérigèle yaʔa, wáā wi tiiparigi lée canʔa o canʔa waa maa mii kurugo. 24#Mat 10:39; Luk 7:33; Zyan 12:25 Wee wi ga ni caa bi wi sìíw syɔɔ lè, wee bee fɔ́lɔ a bɔ̀nɔ wi ni, wee si wi bɔ̀nɔ wi sìi ni mii kéeli na lè, wee bee a ba wi woò taa. 25Syɔɔn ga dulunyanw yárira myɛ taa, níì pùuni wàlá n wiyɛɛ gálagi, nyàʔá gee bee a nyɔɔ wi na? 26Níì cán wee wi ga ni fɛ̀ɛrɛ kpéʔele mii kéeli na lè, ní mii syɛ́ɛnri ní mii joo lè, Syɔɔn-pya a ba fɛ̀ɛrɛ kpéʔele wee bee kéele na lǎli ni wi ga ni maa lè wi tiimaa nìjangbɔɔri ni, ní wi Tóow nìjangbɔɔrɔ, ní wi tundunjanbèle wóro ní. 27Mii si a gi joo yele ma kányɛʔɛ ni, pèle i naa nɛɛ woyérebéle ní yele ni, pe a kùu cán nyáana í bi taa pe Kolocɔlɔɔ fǎngi nyaa.»

Zyezu kàrili kéele

(Mat 17:1-8; Mar 9:2-8)

28 # 2Pyɛ 1:17-18 A canya kɔrɔtaanri félege ga kwɔ́ɔ syɛ́ɛnri bee joolo kadoʔo ma, a Zyezu Pyɛri, ní Zyan, ní Zyaki kɔ́ri n kári n sáà lúgu nyanbelegi ǹjoʔo ni bi sa nyɛ́ɛri yaà. 29N wi yaʔa nyɛ́ɛrigi na, a wi yɛ́ɛgi kàri kanmaa na, a wi búroyi wɔ́ɔ̀ kàri ni fíligi kere kere. 30Wéle, a be nànbēle siin nyaa a be i nyuu ní wi ní, poro pe da pye Mowizi ní Elii. 31Pe maa peyɛɛ dɛ̀ɛn ní nìjangbɔɔri ní, pe maa ni nyuu ní Zyezu ní wi kùúw kéele na, àmɛɛ gi kòro lè cɛɛri wi sa kùu Zyerusalɛmi ni bi wi fáliw foro. 32Pyɛri ní wi pínɛnyɛnbèle si maa ni ŋúnɔ gbanʔama, a ŋúnɔmi cèlege be na. A be wi nìjangbɔɔri nyaa ní wɔ́ɔ̀ nǎnbèle bee siin nyaa wi taana woyérebéle ní. 33Amɛɛ nǎnbèle bee syée lè níì Zyezu yaʔa, a Pyɛri jo: «Kàfɔw, àmɛɛ wolo pan naa lè, ki n tɔ̀nɔ n nyɔɔ, tíi wolo í kpáagéle taanri kpúmɔn, làa í pye mɔ wólo, làa si pye Mowizi wólo, làa si pye Elii wólo.» Gee wi da ni nyuu lè wi da gi cán í.

34N wi yaʔa syɛ́ɛnri bee joolo na, a fàfanʔa baa tɔ́n be na, àmɛɛ si fàfaangi baa jée be ni lè, a be fyáa. 35#Eza 42:1; Mat 3:17; 12:18; Mar 1:11; Luk 3:22 A be yákpolo lóʔo fàfaangi fúngo ni a li jo: «Wee naa wi nyɛ mii Jáaw, wee mii nyɛ́nɛ n wòlo lè, yaa lúro wi ma.» 36Yákpoli bee lóʔolo kadoʔo ma a be Zyezu nyaa wi nibin. A be pyèri cányi bee ni, kérigèle be nyaa lè, pe ga li làa faala joo syɔɔn ma í.

Zyezu n pìiwaa pɔʔɔ, wee màdeo da ni fɔ̀rɔgí lè

(Mat 17:14-18; Mar 9:14-27)

37Ki nyǐndaligi na lǎli ni be tìgi nyanbelegi na lè, a syɛɛnnɛʔɛmɛ baa Zyezu fàra. 38Nànwaa si maa pye syɛ́ɛnmi bee ni, a wi yákpoli wáa níì jo: «Tamafɔw, mii i mɔ nyɛ́ɛri mi mii pɔʔɔ mí wéle mii pìíw na mii ma, níì cán woro nibin wi nyɛ mii ma. 39Màdeo i wi yìrigí, wi ga wi yìrige, pìíw n yákpoli foo n wáa, wi n wi fúugo gbanʔama n cáan, tɛ́ɛkabɔlɔgi n ni yirigi wi nyɔ́ɔgi ni, wi láʔaganmi n tɔ̀nɔ n gbàn, sáni wi wi yaʔa lè, wi n wi wɔʔɔ gbanʔama, si náa wi yaʔa. 40A mii baa mɔ piitamabèle nyɛ́ɛri níì jo pe màdew nɛnɛ be yirige wi ni, be fanʔa si ga taa í.»

41A Zyezu jo: «Yele lǎli naa syɛ̀ɛnnɛ, ye nyɛ lè sìndagabéle ní kakolobyebèlē, làrigēle jòorí mii a kwɔ́ɔ ní yele ní bàā yele kpàracó? Da maa ní mɔ piiw ní.» 42A pìíw ga ni syée, a màdew wi yìrige, níì wi fúugo gbanʔama n cáan tári na. A Zyezu si fúlo màdew na, níì pìíw pɔʔɔ n lúrugo n kaan wi tóow ma. 43A Kolocɔlɔɔ fǎngi ní wi séekpɔɔw kéele pye pe myɛ na bìngaara.

Zyezu n níì wi kùúw kéele joo

(Mat 17:22-23; Mar 9:30-32)

Amɛɛ pe myɛ da ni káama wi kapyegèle bee myɛ na lè, a wi gi joo wi pìitamabèle ma níì jo: 44«Syɛ́ɛnri naa mii a joo yele ma lè, ye di cò cama, níì cán pe a kɔ́ ba Syɔɔn-pya le syɛ́ɛnbèle kɔ́yɔ ni.» 45Kàjáa pe si da tɔ́ɔ̀ syɛ́ɛnri bee kɔ́rɔ cán í. Ti maa làra be na, koro na pe ga di cán í. Amɛɛ be fɛ̀ɛgí lè, pe ga fɔ̀lɔ n wi yíbe syɛ́ɛnri bee kɔ́rɔ na í.

Wìí wi kpɔ́ʔɔ n sɔ̀lɔ wo ni?

(Mat 18:1-5; Mar 9:33-40)

46 # Luk 22:24 Kàkabalaga maa yìri pìitamabèle nínge ni, a be i peyɛɛ yíbe jàngó bi gi cán wee wi kpɔ́ʔɔ lè poro ni n sɔ̀lɔ wozanbèle na. 47Amɛɛ si Zyezu pe funzɔnguri cán lè, a wi pyà láa n yérige wiyɛɛ daana, 48#Mat 10:40; Luk 10:16; Zyan 13:20 níì be pye: «Wee wi ga pìíw naa láa lè mii mɛ́ɛgi na, mii wi sèʔê láa. Wee si wi ga mii láa lè, mii Tunvɔw wi wɔ́ɔ̀ láa. Níì cán wee wi ga wiyɛɛ jɛ́rɛ lè yele níngi ni, wee bee wi nyɛ wogbɔɔw.»

Wee wi ga pye lè yele kéeli ga wi bɛɛn í wi i nyɛ ní yele ní

49A Zyan wi pye: «Kàfɔw, wolo maa nànwaa nyaa wi i màdebèle nɛnɛ ni yirigi syɛ́ɛnbèle ni mɔ mɛ́ɛgi na. A wolo wi pye wi láʔa gee bee na, níì cán wi o nyɛ ní wolo ní ni syée mɔ kurugo í.» 50A Zyezu wi pye: «Ki ga yɛlɛ yele í ní kɔ́ wi yérige í. Níì cán wee wi ga pye lè yele kéeli ga wi bɛɛn í, wee bee i nyɛ ní yele ní.»

Samarii tári kègaa wòolo ga fɔ̀lɔ n Zyezu tìrige í

51Amɛɛ lǎli da nùuni lè Zyezu í yiri dulunyanw ni bi lúgu kári nyɛ̀ʔɛni na, a wi sɔ̀ngumi kòro Zyerusalɛmi gàriw kéele na. 52A wi tundunbèle pèle tun wiyɛɛ yɛ́ʔɛ ma. A be kári n sáà jée Samarii ye kègaa ni bi jàtigi-tɛ́ʔɛ caa wi ma. 53Pe si ga fɔ̀lɔ n jàtigi-tɛ́ʔɛ kaan wi ma í, níì cán pe maa gi nyaa wi i syée Zyerusalɛmi ma. 54#2Fàn 1:9-16 Pìitamabèle bele be yiri lè Zyaki ní Zyan, àmɛɛ poro gee bee nyaa lè, a be jo: «Kàfɔw, a mɔ i caa lé wolo í gi joo si jo náagi í yìri nyɛ̀ʔɛni na bi ba too be na bi be kálagi [àmɛɛ Elii da gi kpéʔele lè láà?]»

55A Zyezu fíige be ma n fúlo be na níì jo: «[Gee gi yele fúnyi kàragí lè, yele ga gi cán í. Níì cán Syɔɔn-pya ga pan bi ba syɛ́ɛnbèle kálagi í, a wi pan bi ba be syɔɔ wii.]» 56A be kári kègaa nikwɔɔ ma.

Bele be caa bi taʔa Zyezu na lè

(Mat 8:18-22)

57Amɛɛ be syée kólogi na lè, a syɔɔnwaa sáà Zyezu pye: «Mii a taʔa mɔ na bàā syée ní mɔ ní mɔ tɛɛ̀káriyi myɛ ni.» 58A Zyezu wi pye: «Weegèlē i nyɛ sɔ́riyi ma, zyàara si i nyɛ féjɛɛngèle ma, kàjáa nyùngo tɛɛ̀légege o nyɛ Syɔɔn-pya ma í,» 59níì wàa nikwɔɔ pye: «Da maa wo kári ní mii ní.» A wee bee jo: «Kàfɔw, tíi mii í kári sa mii tóow tɔ́n gbɛnʔɛnɛ.» 60A Zyezu wi pye: «Mi kúbèle yaʔa paa peyɛɛ dɔ́ngi. Mɔ tiimaa si na, maa syée mi sa ra Kolocɔlɔɔ fǎngi kéele nyuu.»

61 # 1Fàn 19:20 A wàa nikwɔɔ wɔ́ɔ̀ gi joo wi ma níì jo: «Kàfɔw, mii a taʔa mɔ na, kàjáa mi gi yaʔa mii í sa wòsiiw kaan mii kpaʔa wóbèle ma gbɛnʔɛnɛ.» 62A Zyezu wee bee pye: «Wee wi nìtěgi cò n kwɔ́ɔ lè níì kòro ni wéle kàdoʔo ma, wee bee fɔ́lɔ ga yɛlɛ ní Kolocɔlɔɔ fǎngi ní í.»

Currently Selected:

Luki 9: CB10

Highlight

Copy