HLIMI 25
25
Abrahamu wi kùʔù kayoʔo ní, ní wi kluʔu pii pe tɔɔ kayoʔo
1Abrahamu wɔ̀ɔ cɛlɛ wà kpe nɛ. Pe dáa wi yeri Ketura. 2Ki cɔ wɔ̀ɔ bâ pii pèè he wí kan, à pe na pe yeri: Simran, Yokisyan, Medan, Majan, Yisyibaki, ní Syuwasyi nì. 3Yokisyan wɔ̀ɔ bâ Seba nì Dedan he. Dedan wi pii pee bɛ: Asyurimu woo ní, Lewumimu woo ní, ní Lemɛ woo ní. 4Majan wi pii pe dá bo: Efa nì, Efɛri nì, Enoke nì, Abida nì, ní Elidaa nì. Pè bɛfu pé nyɛ Ketura wiì pii bɛ?
5Abrahamu wi dá wi masaʔa kì bɛfu kan Isake ma we. 6Wi dá nadanma yrɛbɛ kan wi pii pe tɔɔ ma be. Wɔ̀ɔ po nyuwyeʔe na adi. Ki kruʔu ma wɔ̀ɔ pe troʔo wa klo namyɛlɛ la na yaajɛhaʔa namyɛlɛ na. 7Abrahamu wi yɛ̀ʔɛ́ kè bɛfu ke dá bo yɛʔɛ́ too natanri ní kprɔʔɔ ní yɛʔɛ́ kɔgunnu. 8Abrahamu wɔ̀ɔ ku. Wi dá lɛ ceŋge mà nyiŋi ga ta, àʔa wi glan ceŋge. À pe yɔ́ɔ̀ le wa wi tokpɔɔ tanla be. 9Wi pii Isake nì Isimayɛli nì à pe yɔ́ɔ̀ le wa Makpela ŋglɛnwyeʔe ni wa Efron kere ni, ŋa wí nyɛ Tisowari pyɔ, Ɛti woo ŋa wí nyɛ wa Mamre yɛ̀ʔɛ̀ ma ge. 10Ki kere tiì di da Abrahamu wi dá syɔ Ɛti pii ma be. Pe dá Abrahamu nì wi cɔ Sara le wa ki deʔe kiì na. 11Abrahamu wi kùʔù kruʔu ma, Nyɛʔɛlɛ à li frɛmɛ pa wi pyɔ Isake na we ceŋge. Wi dá bo wa klɛnhaʔa Lakayi Hruwa kɔ̀lɔ́ tanla we.
12Isimayɛli wi kluʔu pii pe yegee ke gee: Abrahamu nì Agari nì pe pyɔ we. Agari ŋa Ejipite klo woo mâ po wi dá bo Sara wi tungɔɔ wiì wi wi dá ki pyɔ he Abrahamu ma we. 13Isimayɛli wi pii pe yegee ké gee: Nebayɔti, Isimayɛli wi pikplɛɛ wiì wi, Kedari nì, Mibisamu nì 14Misyama nì, Duna nì, Masa nì, 15Hadadi nì, Tema nì, Yeturi nì, Nafisi nì, ní Kedema nì 16Isimayɛli wi pii pee bɛ, bì yala pe yegee ní, ní pe kere kyɛpibi ní, ní pe kyɛrɛ̀ nì de. Pee bɛ pe dá bo pe kluru kɛ̂ ma kɛ̀ syɛn ti lagwɔɔ be. 17Isimayɛli wi dá lɛ mà yɛʔɛ́ too noli ní kprɔʔɔ ní yɛʔɛ́ nasyɛn ta. Wɔ̀ɔ ku. À pe yɔ́ɔ̀ le wa wi heme woo pe fanra ni bee pe dá gu ge. 18Wi pii pe dá bo wa Afila ni fɔ mà yá no wa Syuri na we. Kí nyɛ wa Ejipite tanla wa Asiri namyɛlɛ na le. Wi dá bo wa wi woo tanla be.
Esawu nì Jakɔbe nì
19Isake wi kluʔu pii pé bee ŋa Abrahamu wi pyɔ we: 20Abrahamu wi dá Isake he. Isake wi da bâ da yɛʔɛ́ too syɛn nyiŋi ga na wɔ̀ɔ Hrebɛka kpe wi cɔ, ŋa Betuwɛli picɛ we, ŋa Arimenyɛyee woo wa Pada Aramu ni. Wi dá bo Laban wi cɛpii Arimenyɛyee woo we. 21Isake wi dá Bajegɔ Nyɛʔɛlɛ nyɛri wi cɔ kan we, mɛjɛn wi da bo cɛbahe. Bajegɔ Nyɛʔɛlɛ à li wi nyɛrimi syɔ me. Wi cɔ Hrebɛka wɔ̀ɔ acɛnlɛ ta. 22Pii à pe bâ jɛ na can wá wi ma lama ni me. Hrebɛka wɔ̀ɔ yo: «Nàʔa po kí nyɛ banmɛ ge, nyaʔa ma kan á mi ki acɛnlɛ ta le?» Ki kruʔu ma wɔ̀ɔ kɛri mà yâ Bajegɔ Nyɛʔɛlɛ yugu le. 23Bajegɔ Nyɛʔɛlɛ à luu po:
«Klòʔo syɛn nyɛ wa ma lama ni me.
Hɛɛn klɛnmɛ syɛn bi ba nyini wa ma nî bì gonʔolo pe na pe henyiŋi na.
Ki hɛɛn klɛnmɛ mà bi ba bo fanŋa nì bi doro mi tɔ na me.
Lagwɔ wí bi ba glɛn bì tatunŋu wiì kan.»
24Wi hewlɛrɛ ti da gâ funŋu kɔ, wɔ̀ɔ he piŋaa syɛn bee pe dá bo wa wi lama ni me. 25Kplɛɛ wɔ̀ɔ nyini. Wì bɛfu wɔ̀ɔ po nyɛɛ wi yujoro ní wi wre deʔe kì bɛfu na. À pe yele kan wí na noo yeri Esawu.
26Ki kruʔu ma wi conlo wɔ̀ɔ na nyini mà po wí ma wi lɛ Esawu co yogbolo na we. À pe yele kan wí na noo yeri Jakɔbe. Isake wi dá lɛ mà ta yɛʔɛ́ too tanri mà na pe he.
27Ki pii à pe lɛ. Esawu wɔ̀ɔ bâ grɛʔɛ disonaŋa kpangbanŋa mà po kere hɛn, di Jakɔbe wɔ̀ɔ po nyíŋi ceŋge. Wɔ̀ɔ na kori wa kpasyoro goro ni de. 28Esawu wi dáa Isake glanʔa we, mɛjɛn wi dáa kara ka. Jakɔbe wɔ̀ɔ na Hrebɛka glanʔa we.
29Wlɛʔɛ kà na Jakɔbe wɔ̀ɔ báa baʔa tyɛnlɛ la hori, Esawu nì, wi jɛ nyarihaʔa na wa nya ni mà po wi té ceŋge. 30Esawu wɔ̀ɔ kí yo Jakɔbe ma we mà yo: «Ki anyɛʔɛ ga, maʔa yaʔa, ma na kan kà nì bìʔi ka. Mí na ma fɛn ceŋge, mɛjɛn mi té.»
Ki kala na à pe yele kan wí na noo yeri Edɔmu.#25:30 Edɔmu: Nà pe yo Edɔmu, ki na po pé yo: Anyɛʔɛ.
31Jakɔbe wɔ̀ɔ wí po: «Ma ma lɛrɛ tonro pɛrɛ na ma alaʔa nî ge.»
32Esawu wɔ̀ɔ wí po: «Welé, mí na cɛn bì gu. Ki lɛrɛ tí bi nyaʔa tonro kan na ma.»
33Jakɔbe wɔ̀ɔ wí po: «Ma mà klanʔa na ná kan kpɛn.»
Wɔ̀ɔ wì klan mà wi lɛrɛ tonro pɛrɛ Jakɔbe ma we.#25:33 ma wèle wa Ebr 12:16 ni wè.
34Ki nyiŋi na Jakɔbe wɔ̀ɔ bru wà kan wí ma mà baʔa kà plɛn Wɔ̀ɔ li mà jɔ mà jɛ mà kɛri. Ki dá bo ban Esawu wɔ̀ɔ wi lɛrɛ tonro cɛrɛ we.
Currently Selected:
HLIMI 25: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
