YOHANE 3

Yesu egaya ne Nikodemo

1Hekina mntu mmwe wa Vafarisayo, eitangwa Nikodemo, m’baha wa Vayuda. 2Uo akamzia Yesu kio, akamti, “Rabi, twemanyije iti we u mcheji, wefumie ha Mrungu; ambu tehena mntu eveiwa kukera maluvengo aa we weaketa, kakicha Mrungu esiho hamwe naye.” 3Yesu akagharusha, akamti, “Kididi, kididi, nikutio, Mntu ekisamoghwa ka keri, teidima kuvona vufumwa vwa Mrungu.” 4Nikodemo akamti, “Mntu eidimaze kumoghwa anakua? Eveiwa kuingia he ndeni ya mlala wavo ka keri amoghwe?” 5Yesu akagharusha, “Kididi kididi, nikutio, Mntu ekisamoghwa kwa mpombe na kwa mpeho, tekaidime kuingia he vufumwa vwa Mrungu. 6Kila chemoghiwe ni mwiri nire mwiri, na chemoghiwe ni Mpeho nire Mpeho. 7Usimake iti nekutie, niresari kumoghwa ka keri. 8Nkungu ifefeta vuntu yekunda, na mrurumo wayo uusikia mira tumanya hantu yefuma, neri hantu yetonga; nirehuvo na miikarire ya kila muntu emoghiwe ni Mpeho.” 9Nikodemo akagharusha, akamti, “Ivi viidimika ze?” 10Yesu akagharusha, akamti, “Hamao! We mcheji wa Vaisraeli, na ivi tuvimanyije? 11Kididi, kididi, nikutio, Kila twekimanyije tukiteta, na kila twekivonie tukitetia vuonwa; na vuonwa vwetu temuvukunda. 12Ukinakiche nemuvwirire mburi ja aha si, neri temuitikija, muneitikija ze nekimuvwira mburi ja uko wanga? 13Tehena mntu anakwea uko wanga, esire ula eseie kufuma uko wanga, eye Mwana wa Mntu. 14Na sa vuntu Mose evushije ila nyoka uko nyika, nirevwo vuntu chenemtara Mwana wa Mntu akwejwe, 15nesa kila emwitikija Ye avone nkalamo ya kae na kae.

16Ambu nivwo vuntu Mrungu ekundie si ii, mhaka akamwinkija Mwanawe ere mmwe, nesa kila mntu emwitikija asiteke, mira avone nkalamo ya kae na kae. 17Ambu Mrungu temtumie Mwanawe he ii si iti alahe si ii, esire iti si ii ikijwe vuntu vwakwe. 18Ula emwitikija ye telahwa; ye esimwitikija akenja kulahwa, ambu ni kila asaitikija izina la Mwana wa Mrungu ere mmwe. 19Na uu niwo mlaho; iti kianga chezie he ii si, na vantu vakakunda kija kukela kianga; ambu mihiro yavo neki mivivi. 20Ambu ula ehira vivivi evihiwa kianga, neri teza he kianga, mihiro yakwe isirebunkulwa. 21Mira ye eronga vya idi eza he kianga, nesa ndima jakwe jivoneke boo iti jerongiwe he Mrungu.”

Yohane M’batizi emtetia wa Yesu vuonwa

22Ivyo vyekinavecha Yesu na varateri vakwe vakatonga mhaka he isanga la Yudea; akashinda uko hamwe navo, akabatiza. 23Yohane naye ekiho uko Ainoni, hafuhi na Salimu, ekinatiza, kila uko hekina mpombe nyingi; na vantu vakamswia, vakabtizwa. 24Ambu Yohane tekinagerwa he kichungo. 25Hakaketa makanano he varateri vakwe Yohane na Myuda mmwe he mburi ya kuzera. 26Vakamswia Yohane, vakamti, “Rabi, ula wekina naye sela ya Yordani, ula wemtetiie vuonwa, rereha zuo ebatiza, na vantu vose vemswia.” 27Yohane akagharusha, akati, “Mntu tenacho eidima kughuha esire kila ekiinkiwe kufuma uko wanga. 28Unywi venye munitetia vuonwa kuti netetie, ‘Mi simi Kristo, mira netetumwa iti nirongorire.’ 29Ula ena na mwai niye mralondola; mira mmbwie wa mralondola, ula eimuka na kumsikija, eizihirirwa mno izii la mralondola. Huvwo kuizihirwa kwangu kwakoloka. 30Ye kimtara aongejike, mira mi niduike.

31“Ula eza kufuma uko wanga, uo eho wanga ya vyose. Ula e wa ili isanga, nire wa kiili isanga, naye eteta vya ili isanga. Ula eza kufuma kufuma uko wanga, uo eho wanga ya vyose. 32Vila evivonie na kuvisika nivyo evitetia vuonwa, neri tehena ekunda vuonwa vwakwe. 33Ula ekunda vuonwa vwakwe, evikie kisimbiko iti Mrungu ni wa idi. 34Ambu ula etumiwe ni Mrungu eteta viteto vya Mrungu; ambu tefunya Mpeho kwa kiringanyo. 35Vava emkundie Mwana, naye emunkie vyose he mkono wakwe. 36Ula emwitikija Mwana ena nkalamo ya kae na kae; ye esimwitikija Mwana tekavone nkalamo, mira oro ya Mrungu imwikaia.”

Currently Selected:

YOHANE 3: CHSUNT67

Highlight

Copy