YOHANE 9
9
Yesu ebanja mntu e ituntu too kumoghwa
1Aho ekivecha akamvona mntu, ituntu too kumoghwa. 2Varateri vakwe vakamvwija, vekiti, “Rabi, ni uhi ebanie, uu mntu kana vamoghi vakwe, cheshigha amoghwe ituntu?” 3Yesu akagharusha, “Uu tebanie, neri vamoghi vakwe; mira ni iti ndima ja mrungu jifunyirijwe heye. 4Kikutara kuronga ndima ja ula enitumie herecheri msi; kio kiza mntu esiveiwa kuronga ndima. 5Igheri mi neho he ii si, mi ni kianga cha ii si.” 6Ekinakenje kuteta ivyo, akatufa mate hala si, akahareha itonto na ala mate; akamvira ituntu itonto he meso, 7akamti, “Tonga urekuoja he mdiva ya Siloamu” (niko kuti, Etumiwe). Niho akatonga akakuoja; ekihunduka evona. 8Niho vaghenji vakwe na vala vemvonie aho kuvoka e mretanja, vakati, “Hama uu si ula ekinaikaa si na kutanja?” 9Vakumwe vakati, “Niye.” Vangi vakati, “Hai; mira etafwanana naye.” Ye mwenye akati, “Niye mi.” 10Niho vemti, “Meso ako etambarushwe ze?” 11Ye akagharusha, “Mntu eitangwa Yesu eharehe itonto akanivira he meso akaniti, ‘Tonga Siloamu uzekuoja;’ nikatonga nikakuoja, niho nikavona.” 12Vakamti, “Uo eohi?” Akati, “Nesimanyije.”
13Niho ula eki ituntu kae vakatomtonja he Vafarisayo. 14Hala Yesu ekihareha itonto na kum’banja meso neki msi wa sabato. 15Niho Vafarisayo vakamvwija kangi vuntu cheketike ekiidima kuvona. Akavati, “Enivirire itonto he meso, nikakuoja, iki nivona.” 16Vafarisayo va kumwe vakati, “Mntu uu tefumie ha Mrungu, ambu tegura sabato.” Vangi vakati, “Mntu m’banu eveiwa ze kuronga maluvengo sa ao?” Hakaketa kughavanyika ghati hevo. 17Niho vakamti ula ituntu kantu ka keri, “We uti ze he mburi yakwe kila ekutambaruje meso?” Akati, “Ni mroti.” 18Heicho Vayuda teveitikije iti neki ituntu, akanavona; mahaka vekiitanga vamoghi va ula eidime kuvona. 19Vakavavwija, vekiti, “Uu ni mwana wenyu, eye mweti ekimoghiwe ituntu? eidime ze kuvona iki?” 20Vamoghi vakwe vakagharusha vakati, “Twemanyije iti uu ni mwana wetu, kangi iti emoghiwe ituntu; 21mira vuntu iki evona tetumanya; neri tetumanyije iti ni ani emtambarije meso. Mvwijeni ye mwenye; ye ni mntu mzima; eneteta ye mwenye.” 22Vamoghi vetetie huvo kila vevafoleke Vayuda; kwa kila Vayuda vekenjije kuaghana iti, ye eneteta boo iti ye ni Kristo, enechwiiwa nzighi kiungia he sinagogi. 23Nicho cheshighie vamoghi vakwe vekiti, “Ye ni mntu mzima, mvwijeni ye mwenye.”
24Niho vakamwitangawa ula eki ituntu, vakamti, “Mshimie Mrungu. Uswi twemanyije iti uu mntu ni m’banu.” 25Niho ula mntu akagharusha, “Kari ye ni m’banu, simanya. Cho nemanyije ni kimwe, iti mi neki ituntu iki nivona.” 26Niho vakamti, “Ekuketie ze? Ekutambaruje ze meso?” 27Akagharusha, “Nakenja kumuvwira neri temusikia; hanini mweenda kusikia wa? Na unywi mutaenda kuoka varateri vakwe?” 28Niho vakamrara, vakati, “We niwe mrateri wakwe; uswi tu varateri vakwe Mose. 29Uswi twemayije iti Mrungu etetie ne Mose; mira uu tetumanya hantu efuma.” 30Ula mntu akagharusha, akavati, “Icho ni kimako! Iti unywi temumanya hantu efuma, uko enitambaruje meso! 31Twemanyije iti Mrungu tevasikia venye mabanu; mira kakicha mntu emfoleka Mrungu, na kuronga vila ekunda, uo emsikia. 32Narini tetunasikia mntu etambaruje meso a mntu emoghiwe ituntu. 33Nanga uo esefumie ha Mrungu, esekiidima kuketa kintu neri.” 34Vakagharusha, vakamti, “We wemoghiiwe he mabanu matuhu, nawe utucheja uswi?” Vakamfunya na nze.
35Yesu akasikia iti vamfunya na nze; naye ekinamvone, akati, “We wemwitikije Mwana wa Mrungu?” 36Naye akagharusha, akati, “Mfumwa, niye uhi nesa nimwitikije?” 37Yesu akamti, “Wamvona, na uo eteta nawe, Niye.” 38Akati, “Mfumwa, naitikija.” Akamdunkutia. 39Yesu akati, “Mi nezie he si ii kwa mlaho, nesa vala vesivona vavone, na vala vevona vaoke matuntu.” 40Va kumwe he vala Vafarisayo vekiho hamwe naye, vakasikia ivyo, vakamti, “H’ii! na uswi ture matuntu?” 41Yesu akavati, “Nanga mweki matuntu, mwesekiketa mabanu, mira iki kila mweti, ‘Tovona;’ heicho mabanu enyu eikaa.”
Currently Selected:
YOHANE 9: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
