LUKA 1
1
Kivokio
1Kila vantu vajinki vekugerire kuringanyanya he kuandika kwa mraterano jila mburi jekoloshwe he uswi, 2sa vuntu vala vaonwa na vandima va iyo mburi vetuukulile, sa vuntu vevonie too aho kuvoka; 3kila nami neendie kwa kukonesha ijo mburi jose too kuvoka, nevonie iti ni chedi kukuandikia kwa mraterano, we Teofilo Mrashimiwa, 4nesa uidime kukonesha mburi jila wechejijwe.
Vuroti vwa kumoghwa kwakwe Yohane M’batizi
5Misi ila Herode e mfumwa wa Yudea, hekina mtasi eitangwa Zakaria, wa ija lakwe Abia, na mche wakwe eitangwa Elizabeti, efuma he lukolo lwakwe Aroni. 6Vose veri ne venye kitea mozya ya Mrungu, vekitongia he maamoro ose a Mfumwa na maazero akwe, hesina cho veshaghwa. 7Navo vesekina mwana, ambu Elizabeti neki mgumba, kangi vose veri vekuie.
8Aho ekironga ndima ya vutasi mozya ya Mrungu he kuraterija lakwe, 9sa vuntu kiziomo cha vatasi cheikee, manga akamgura kuingia he nyumba ya mtaso kurafukija uvumba. 10Na he iyo saa ya kufukija uvumba, mavungano ose a vantu vekiho nze vekiomba. 11Akafumiwa ni malaika wa Mfumwa, eimuke mondo wa kume wa meza ya kufukijija. 12Zakaria ekivona akaituka na kusikia fole. 13Mira ula malaika akamti, “Zakaria, usifoleke, ambu maombi ako asikiwa, mche wako Elizabeti enekumoghia mwana wa kibwange, na izina lakwe unemwitanga Yohane. 14Nawe uneketa luizihiro na mng’aro, na vantu vajinki veneizihirwa vuntu vwa kumoghwa kwakwe, 15ambu eneoka m’baha mozya ya Mfumwa; tekanwe mvinyo neri kiengeji; naye eneizujwa Mpeho Wedi too ereho ndeni he mlala wavo. 16Enevahundua Vaisraeli vajinki he Mfumwa Mrungu wavo. 17Naye enerongora mozya heye ena na mpeho na nzinya yakwe Elia, nesa agharushe ngoro ja vavava jihote na he vana, na kuvagera vazabera icha la venye kitea, na kumringanyija Mfumwa vantu veharehwe.” 18Zakaria akamti malaika, “Ninemanya ze icho? Ambu mi nakua, na mche wangu ekuishe misi mingi.” 19Malaika akamgharusha, akamti, “Mi nimi Gabrieli neimuka mozya ya Mrungu, netumiwe iti nitete na kukumanyisha iyo mburi yedi. 20Rereha! uneherwa kuteta, mhaka ula msi ivyo vyeneokia, ni kila wasaitikija viteto vyangu; navyo vinekoloshwa he igheri lavyo.”
21Na vala vantu vekimwinda Zakaria, vakamaka kula kuikaisha kwakwe he nyumba ya mtaso. 22Ekifuma kila esiidime kuteta navo, vakamanya iti hena cho evonie he nyumba ya mtaso, akaikaa esiidimateta, akatuavakonya. 23Misi ya vuhiri vwakwe yekisia, akaghotoka na kaa hakwe. 24Misi ila yekivecha, Elizabeti mche wakwe akajitoha, akakuvisa mieji misano ekiti, 25“Huvu nivwo vuntu Mfumwa eniketie he misi ila ekinirereha nesa anivushe soni he vantu.”
Vuroti vwa kumoghwa kwakwe Yesu
26Mweji wa katandatu malaika Gabrieli akatumwa ni Mrungu kutonga he muzi wa Galilaya, weitangwa Nazareti, 27he m’bora hiryo, ekizangiwe ni mntu eitangwa Yosefu, wa lukolo lwakwe Davidi; na izina la uo m’bora hiryo niye Maria. 28Akaingia he nyumba yakwe, akati, “Nikukezya we wevoneiwe, Mfumwa eho hamwe nawe.” 29Naye akamagarara haiwa he vuntu vwa viteto vyakwe, akadunganya he ngoro: Ni ngezya ani ii? 30Malaika akamti, “Maria, usifoleke, ambu wavoneiwa ni Mrungu. 31Rereha, uneketa ndeni, umoghe mwana wa kibwange, na izina lakwe unemwitanga Yesu. 32Uo eneoka m’baha, eneitangwa Mwana wa Ula Eho uko Wanga; na Mfumwa Mrungu enemunka kichumbi cha kifumwa cha vavee eye Davidi. 33Enetetia nyumba yakwe Yakobo kae na kae, na vufumwa vwakwe tevukahakane.” 34Maria akamti malaika, “Icho kineoka ze, ambu simanyije mume?” 35Malaika akagharusha akamti, “Ni Mpeho Wedi enekuzia wanga hewe, na nzinya ja Ula Eho uko Wanga jinekuvikia mjwii; heicho, icho chenemoghwa kineitangwa; Chezerire, Mwana wa Mrungu. 36Kangi, rereha, mndughu wako Elizabeti ena ndeni ya mwana wa kibwange, nziaho ekuie; na uu mweji ni wa mtandatu heye ula ekiitangwa mgumba; 37ambu tehena cherema he Mrungu.” 38Maria akamti, “Rereha mi ni mgitu wa Mfumwa, nakioniokie sa vuntu wati.” Niho ula malaika akavuka, akatonga.
Maria emkusha Elizabeti ula ekaziwe
39Niho Maria misi ila akavuka, akatonga fia kula ngujini, mhaka he muzi mmwe wa Yuda, 40akaingia he nyumba yakwe Zakaria, akamkezya Elizabeti. 41Igheri Elizabeti ekisikia ila ngezya yakwe Maria, kajana kakajima uko he ndeni yakwe; Elizabeti akaizujwa Mpeho Wedi; 42akateta na izii ibaha, akati, “We weinkiwe lutelwedi he vache, na ula emoghwa niwe einkiwe lutelwedi. 43Icho cheikee ze mlala wavo Mfumwa wangu ekiza hangu? 44Ambu izii la ngezya yako lekinaingie he masikio angu, kajana kadori kakajima uko ndeni hangu kwa mng’aro. 45Ena chedi ni ula eitikije, ambu vila evwirirwe ni Mfumwa vinekoloshwa.” 46Maria akati,
Ngoro yangu imkaza Mfumwa,
47Na mpeho wangu emwizihirwa Mrungu Mkija wangu;
48Kila ererehe vusoka vwa mgitu wakwe.
Ambu, rereha, kuvokia iki,
Mbari jose jineniitanga mreinkwa lutelwedi;
49Ambu Mnzinya eniketie vibaha,
Na izina lakwe lezerire.
50Na mbonea yakwe iikaa he marika na marika he vala vemfoleka.
51Eketie vya nzinya kwa mkono wakwe;
Akavazara vala vekubaa he madunganyo a ngoro javo;
52Akavagusha vabaha he vichumbi vyavo vya kifumwa;
Na kuvakweja vasoka.
53Vena nza evaighushe na vintu vyedi,
Na venye mari akavangasha mikono mituhu.
54Emghenjije Israeli mndima wakwe;
Nesa akumbuke mbonea yakwe;
55Sa vuntu evavwirire vavava vetu,
Abrahamu na lukolo lwakwe kae na kae.
56Maria akaikaa naye hantu ha mieji mitatu, ekikenja akahunduka na kaa hakwe.
Kumoghwa kwakwe Yohane M’batizi. Einkiwe lutelwedi
57Igheri misi yakwe Elizabeti ya kuchunguka yekinakoloke, akamogha mwana wa kibwange. 58Vala vetujanye, na vandughu vakwe, vakasikia iti Mfumwa amwongejija mbonea, vakaizihirwa hamwe naye. 59Niho msi wa kanane vakaza kumtavana mwana; vakaenda kumwitanga Zakaria sa vavee. 60Mlala wavo akagharusha, akati, “Hai, sivwo; mira naitangwe Yohane.” 61Vakamti, “Tehena mntu wa mbari yenyu eitangwa ilo izina.” 62Vakamkonya vavee nesa vamanye vuntu enemwitanga. 63Akaenda kabao, akaandika iti, “Izina lakwe niye Yohane.” Vose vakamaka. 64Hala indi momo wakwe ukajuvuwa, na lumi lwakwe, akavoka kuteta na kumkaza Mrungu. 65Vala vetujanye navo vakafoleka; iji mburi jose jikabirikirwa he masanga ose a ntuvi ja Yudea. 66Na vose vejisikie vakajivika he ngoro javo vekiti, “Uu mwana eneoka muni? Ambu mkono wa Mfumwa wekina naye.”
67Zakaria vavee akaizujwa Mpeho Wedi, akarota ekiti,
68“Mfumwa Mrungu wa Israeli nakazwe,
Ambu avazia vantu vakwe na kuvakombola.
69Atugimbikia luhembe lwa lukio
He mbari yakwe Davidi mndima wakwe.
70Savuntu etetie too kuvoka
He momo wa varoti vakwe vezerire;
71Tukijwe he vanzo vetu
Na he mikono ya vose vetuvihiwa;
72Nesa avafwe mbazi vavava vetu,
Na kukumbuka kiaghano chakwe chezerire;
73Kirigho ekurighie he Abrahamu vava wetu,
74Iti enetughenja uswi,
Tukie he mikono ya vanzo vetu,
Na kumtasa hesina fole,
75He kuzera na kitea
Mozya heye misi yetu yose.
76Nawe mwana, uneitangwa mroti wa Ula Eho uko Wanga,
Ambu unemrongorira Mfumwa, umharehie nzia jakwe;
77Uvamanyishe vantu vakwe lukio,
He kushighiwa mabanu.
78He nzia ya mbonea ja Mrungu wetu,
Ejo he vuntu vwajo, kianga chefuma uko wanga chatufikia,
79Kuvaangaja veikaa he kija na kivuri cha fwire,
Na kutonjija maghu etu he nzia ya mporere.”
80Ula mwana akaeha, akaongejika nzinya he ngoro, akaikaa uko nyika mhaka msi ula ekivafumia Vaisraeli.
Currently Selected:
LUKA 1: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
