LUKA 17
17
Mafundisho masiku akwe Yesu
(Mat. 18:6-7, 21-22; Mrk. 9:42)
1Akavati varateri vakwe, “Vikuvajo tevikatere kuza, mira vwasi vwa ula mntu vyeneza vuntu vwakwe. 2Chekimtara kukela, uo mntu achungijwe loa he singo yakwe, aregerwa he bahari, hantu enemgera mmwe wa ava vadori kuteshanya. 3Kurindeni, kakicha mndughu wako ekiteshanya, mchunde, ekichwa mti, mshighie. 4Hata kakicha eteshanya hako kantu kafungate he msi mmwe, na kuhunduka hako kantu mfungate, ekiti, ‘Nachwa mti,’ iremshighie.”
5Ntume vakamti, “Mfumwa tuongejije mwitikijo!” 6Mfumwa akati, “Nanga mwekiketa mwitikijo kiringanyo cha ntembe ya haradali, mwekiuti uu mkuu, ‘Ng’oleka urehandwa uko he bahari,’ nawo wekimusikia. 7Mira, ni ani wa henyu, ena mzoro eima kana kurisha ng’ombe, eye enemti hala indi ekihunduka he mghunda, ‘Nzo fia, ikaa si ule kijo?’ 8Hamao, tekamti, ‘Niharehia kijo nile, kudoke unipipirikie mhaka nekikenja kula niho nawe wenela na kunwa?’ 9Ngea enemti ula mzoro nahavache, kila ahareha sa vuntu eazerwe? 10Na unywi nirevwo, mwekikenja kuronga vyose mweazerwe, tini, ‘Uswi vazoro vesina lumazo; twarinda du kila chetutara kuronga.’”
Yesu ebanja vareumbuka ikumi
11Igheri aho veho nzieni vekitonga Yerusalemu, eho ekivecha ghati ya Samaria na Galilaya. 12Ekiingia he kamuzi kamwe, akakintana na vantu ikumi veumbuka; vakaimuka hae, 13vakateta na wanga vekiti, “E, Yesu, Mfumwa, utuvoneie!” 14Ekinavavone akavati, “Tongani murekuvonyesha he vatasi.” Aho vekitonga, vakazera. 15Mmwe wavo ekivona iti abanda, akahunduka ekimkaza Mrungu na izii ibaha; 16akasoma vusho si he maghu akwe, akamwanjela; naye neki Msamaria. 17Yesu akagharusha, akati, “Tevezerijwe vose ikumi, vala kenda veohi? 18Tehevoneke vehunduke kumunka Mrungu ngazo, esire uu mgheni?” 19Akamti, “Vuka, kutongire, mwitikijo wako wakukija.”
Kuza kwa vufumwa vwa Mrungu
(Mat. 24:26-28, 37-41)
20Ekinavwijwe ni Vafarisayo, “Vufumwa vwa Mrungu vuza rini?” Akavagharusha, akavati, “Vufumwa vwa Mrungu tevuza kwa kuvusungia; 21neri tevekati, ‘Rereha, vuwaha;’ kana, ‘Nzivula;’ ambu, rereha, vufumwa vwa Mrungu vuho ndeni he unywi.”
22Akavati varateri, “Misi ineza, eho mwenesikia nkwina kuvona msi mmwe he misi ya Mwana wa Mntu, mira temukauvone. 23Kangi venemuti, ‘Rereha, kula! Rereha kunu!’ Musivuke hantu mweho, neri musivaratere; 24ambu sa vuntu luimiki lweimika kufuma mondo uu mhaka mondo ungi, nivwo vuntu Mwana wa Mntu eneoka he misi yakwe. 25Mira kuvoka, kimtara arishwe mavwasi mangi, na kusuwa ni lukolo ulu. 26Sa vuntu chekiikee he misi yakwe Noa, nivwo vuntu cheneoka he misi ya Mwana wa Mntu. 27Vekila na kunwa, vekilondola na kulondolwa, mhaka ula msi Noa aingia he safina, mpombe mbaha ikasea, ikavabunta vose. 28Nirevwo vuntu cheikee he misi yakwe Loti, vekila na kunwa, vekizorana na kutaghija, vekihanda na kujenga; 29mira msi ula Loti afumia Sodoma hakagwa moto na kibiriti kufuma uko wanga vikavabunta vose. 30Huvwo nivwo vuntu cheneoka he msi ula Mwana wa Mntu enefunukurwa. 31He msi uo, eho wanga he nyumba, na ntanu jakwe jeho nyumba, asisee iti ajighuhe; nirehuvo, eho he mghunda asihunduke na nyuma. 32Mkumbukeni mche wakwe Loti. 33Kila mntu eenda kukija moo wakwe eneutesha, na ula eneutesha, eneukija. 34Nimutio, kio icho vantu veri veho he kitanda kimwe; mmwe eneghuhwa, mmwe eneshighwa. 35Vache veri veshagha hamwe; mmwe eneghuhwa, mmwe eneshighwa. 36Vantu veri veho he mghunda; mmwe eneghuhwa, mmwe eneshighwa.” 37Vakagharusha, vakamvwija, “Hio Mfumwa?” Akavati, “Hantu hena kimba, niho hantu mitonyi yevungana.”
Currently Selected:
LUKA 17: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
