LUKA 22

Irenge lakwe Yuda

(Mat. 26:1-5; Mrk. 14:1-2, 10-11)

1Msi m’baha wa mikate yesigerirwe chachu, ewo weitangwa, Msi m’baha wa Pasaka, ukafika hafuhi.

2Vabaha va vatasi na vaandiki vekienda nzia ya kumkomia; ambu vekifoleka vantu.

3Shetani akamwingia Yuda, eitangwa Iskarioti; naye ni mmwe wa vala ikumi na veri. 4Akavuka akatonga kuratera na vanaha va vatasi na vabaha va vasikari, vuntu eneidima kumwinkija he mikono yavo. 5Vakaizihirwa, vakaaghana naye kumunka fedha. 6Akakunda, akaenda nzia vuntu enemwinkija hevo hantu hesina luvungano.

Kuringanyika kijo cha msirikijo

(Mat. 26:17-19; Mrk. 14:12-16)

7Msi wa mikate yesigerwa chachu ukafika ewo wetara kukoma Pasaka. 8Akavatuma Petro ne Yohane, ekiti, “Tongani muturinganyije Pasaka, nesa tuile.” 9Vakamti, “Uenda tuiringanyije hio?” 10Akavati, “Rereha, mwekiingia he muzi, munezomana na mntu wa kiume etikie sangu ya mpombe; mratereni, muingie he nyumba ye eneingia. 11Mumti uo mwenye nyumba Mcheji ekuti, ‘Chumba cha vagheni kiohi, nesa nilie hi Pasaka hamwe na varateri vangu?’ 12Naye enemuvonya chumba kibaha uko gu, chekenjije kuhambwa; ringanyijani aho.” 13Vakatonga, vakavona sa vuntu evavwirire, vakaringanya Pasaka.

Kijo cha msirikijo

14Saa ikinafike, akaikaa si halia kijo, ye hamwe na ntume. 15Akavati, “Nesikie nkwina mno kula ii Pasaka hamwe na unywi aho nesinarishwa vwasi; 16ambu nimutio, Sikareila wa, mhaka yenekoloshwa he vufumwa vwa Mrungu.” 17Akaghuha kikombe, akaanjela, akati, “Koni iki mughaviane; 18ambu nimutio, Kuvokia iki sikarenwa cha ntunda ja mizabibu, mhaka vufumwa vwa Mrungu vwekineza.” 19Akaghuha mkate, akaanjela, akaubendua, akavainka, ekiti, “Uu niwo mwiri wangu weinkijwa vuntu vwenyu; ketani huvo kwa kunikumbuka.” 20Na kikombe nirehuvo, vekikenja kula; ekiti, “Kikombe iki ni kiaghano kishaa he sakame yangu yeitwa vuntu vwenyu. 21Mira rereha, mkono wa ula enirengeha uho hamwe nami aha he meza. 22Ambu Mwana wa Mntu etonga sa vuntu cherekerwe; mira vwasi vwa mntu ula enemrengeha.” 23Vakavoka kuvwijana venye na venye, “Ni ani eneketa icho.”

Vubaha vwa idi

24Vakaketa nkani ghati hevo, kuti ni ani chemtara kuoka m’baha. 25Akavati, “Vafumwa va Vakiisanga vemutetia, na vala vena nzinya hevo veitangwa vedi; 26mira he unywi kisioke huvo, esire ula e m’baha he unywi, naoke sa e mdori; na ula e mrongori aoke sa mrepipirikia. 27Kanao, m’baha ni uhi, ni ula eikae si he kijo kana ni ula epipirikia. 28Ni unywi mweikae nami he mighesho yangu. 29Nami nimuvikia unywi vufumwa, sa vuntu Vava wangu enivikiie mi; 30nesa muidime kula na kunwa he meza yangu uko he vufumwa vwangu; na kuikaa he vichumbi vya kifumwa, na mwekilaha mbari ikumi na mbiri ja Israeli.”

Kukana kwakwe Petro kwerotiwe

31Akati, “Simoni, Simoni, rereha, Shetani emuenda unywi amuhete sa ngano; 32mira nekuombiie iti mwitikijo wako usiduike; nawe wekinegharuka uvadindije vandughu vako.” 33Akamti, “Mfumwa, neho hamwe nawe nekuringanye kutonga he kichungo kana na ere he kifwa.” 34Akati, “Petro, nikutio, Yoo nkuruvi teikaambe, wesinanikana kantu katatu iti tunimanyije.”

35Akavavwija, “Hala nekimutumie mwesina mfuko neri ibene, neri viratu, mwekisovekiwe ni kintu?” Vakati, “Hai!” 36Akavati, “Mira iki, ena mfuko nautike, nirehuvo hata ibene; na ula esina mhandwi, nataghe ijoho lakwe auzore. 37Ambu nimutio, Ivyo vyeandikwe nire sari vikoloshijwe he mi; iti, ‘Etarirwe hamwe na vabanu.’ Ambu vila vyenitara vina mhaka wavyo.” 38Vakamti, “Mfumwa, rereha aha hena mihandwi miri.” Akavati, “Ikoloka.”

Getsemane

(Mat. 26:36-46; Mrk. 14:32-42)

39Akafuma akatonga he ntuvi ya Mizeituni, sa vuntu emanyere; varateri vakwe vakatonjanya naye.

40Ekinafike aho hantu, akavati, “Ombani, nesa musireingia he mighesho.” 41Ye mwenye akatana navo sa kiringanyo cha kuvirita ibwe, akadunkuta, akaomba, ekiti, 42“E, Vava, wekikunda, univushije iki kikombe; mira si sa vuntu nekunda, esire kikundire chako kikoloke.” 43Malaika efuma uko wanga akamzia, akamdindija. 44Naye kila eho he vwasi, akazika kuomba mno; isenuko lakwe likaoka sa madofe a sakame ekidofa aho si. 45Ekikenja kuomba akavazia varateri vakwe, akavakicha vashinjia lughohe vuntu vwa lusoyoyo. 46Akavati, “Hanini mweshinjia lughohe? Vukani muombe, musireingia he mighesho.”

Kugurwa kwakwe Yesu

(Mat. 26:47-56; Mrk. 14:43-50; Yoh. 18:2-11)

47Aho echeriteta, nziilo irivati la vantu na ula eitangwa Yuda, mmwe wa vala ikumi na veri, evarongorire, akamzia Yesu hafuhi nesa am’bwite. 48Yesu akamti, “Yuda, umrengeha Mwana wa Mntu kwa kum’bwita?” 49Na vala veho hafuhi naye vekivona icho cheketika, vakati, “Mfumwa, tuvateme na mhandwi?” 50Mmwe wavo akamtema mzoro wa mtasi m’baha, akamchwa isikio la kume. 51Yesu akagharusha, akati, “Kushighireni du.” Akamkunta isikio, akam’banja. 52Yesu akavati vabaha va vatasi na vabaha va nyumba ya mtaso na vaghosie vezie vuntu vwakwe, “Mwezie na mihandwi na marungu sa mweragura mkibonda. 53Misi yose nekiho na unywi he nyumba ya mtaso, temunirongiie mkono, mira ii niyo saa yenyu ya nzinya ya kija.”

Petro emkana Yesu

(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)

54Vakamgura, vakamtonja, vakatonga naye he nyumba ya mtasi m’baha. Petro naye akamratera eho cha hae. 55Vekinafute moto hala ghati he iboho, vakaikaa si hantu hamwe, Petro naye akaikaa ghati hevo. 56Niho mgitu mmwe akamvona eikae si he kianga, akamrerehisha, akati, “Na uu ekina naye.” 57Akakana, akati, “We mche, simmanyije.” 58Kakenda kadori mntu ungi akamvona, akati, “We nawe ure mmwe wavo.” Petro akati, “We mntu, esimi.” 59Saa mwe yekivecha, mntu mmwe akazikateta, “Ni cha idi, na uu ekirena naye, ambu naye nire Mgalilaya.” 60Petro akati, “We mntu, simanyije iti uteta ni.” Na aho echeriteta, nkuruvi ikaamba. 61Petro akakumbuka kila kiteto cha Mfumwa vuntu emvwirire, “Yoo nkuruvi yesinaamba unenikana kantu katatu.” 62Akafuma na nze, akaia kwa lusulumiro.

63Na vala vantu vemgurire Yesu vakamsola, vakam’bigha. 64Vakamfinikira meso, vekikenja vakamvwijavwija, vekiti, “Rota, ni ani ekubighie?” 65Vakamteta na viteto vingi vijinki vya kumrara.

Yesu mozya ya vatasi vabaha

(Mat. 26:59-66; Mrk. 14:55-64; Yoh. 18:19-24)

66Igheri hekinache, hakavungana mvungano wa vaghosi na vabaha va vatasi, na vaandiki, vakamwete he chila yavo, vekiti, 67“Kakicha niwe Kristo tuvwire.” Akavati, “Nanikatemuvwira, temukaitikije neri. 68Kangi nekimuvwija, temukagharushe. 69Mira kuvokia iki, Mwana wa Mntu eneikaa mondo wa kume wa Mrungu Mwenyenzinya.” 70Vakateta vose, “Iki we niwe Mwana wa Mrungu?” Akavati, “Ni unywi mwati iti mi niye.” 71Vakati, “Iki tuendiani wa vuonwa? Ambu uswi venye twasikia viteto vya momo wakwe.”

Currently Selected:

LUKA 22: CHSUNT67

Highlight

Copy