MARIKO 14

Kiaghano cha kumkoma Yesu

(Mat. 26:1-5; Luk. 22:1-2)

1Nyuma ya misi miri neki msi m’baha wa Pasaka, na wa mikate yesina chachu, vabaha va vatasi na vaandiki, vakaenda nzia ya kumgurira kwa kyavya na kumkoma. 2Ambu vetie, “Kisireokia he igheri la ula msi m’baha, nesa hasireketa mkede he vantu.”

Yesu egerwa mafuta uko Betania

(Mat. 26:6-13; Yoh. 12:1-8)

3Naye aho eho Betania he nyumba yakwe Simoni mraumbuka, eikae si ekila kijo, hakaza mche ehete kachupa ka mafuta edi a nardo a zora mbaha, epupuntika nezo, akakabaa, akamgera he mtwi. 4Hekina vantu vevihijwe he ngoro javo, vekiti, “Hanini mafuta edi huvo eteshwa? 5Ambu aa mafuta chekive kutaghwa kwa dinari maghana matatu na kukela, jiinkwe vakiva;” vakamdunkunyikia mno ula mche. 6Yesu akavati, “Mshigheni; hanini mwemrisha vwasi? Eniketiie kintu chedi; 7ambu vakiva muna navo misi yose, muidima kuvaketia chedi vuntu mwekunda; mira mi temuna nami misi yose. 8Eketie vuntu eidime; arongavira mwiri wangu mafuta he kuniringanyija kujikwa. 9Kididi nimutio, ‘Kila hantu Mburi Yedi yenebirikirwa he masanga ose;’ na icho uu eketie kinerelangwa he kumkumbuka.”

Irenge lakwe Yuda

(Mat. 26:14-16; Luk. 22:3-6)

10Ula Yuda Iskarioti, mmwe wa vala ikumi na veri, akaytonga he vabaha va vatasi, nesa amwinkije hevo. 11Navo vekisikia vakazihirwa, vakamraavia kumunka fedha. Akaenda nzia ya kumwinkija igheri leve.

Kijo cha msirikijo

(Mat. 26:17-30; Luk. 22:7-23; Yoh. 13:21-30; 1 Kor. 11:23-25)

12Igheri msi wa kuvoka wa mikate yesina chachu, ewo vekomia Pasaka, varateri vakwe vakamti, “Ni hio wekundie tutonge turekyuharehia ulieho Pasaka?” 13Akavatuma veri va he varateri vakwe, akavati, “Tongani he muzi; na mntu wa kiume etikie sangu ya mpombe enekintana na unywi, mumratere; 14na aho hantu eneingia, mumti uo mwenye nyumba, ‘Mcheji etio: Chumba changu cha vagheni kiohi, nilie ho Pasaka na varateri vangu?’ 15Naye enemuvonya nyumba mbaha uko gu, yekenjije kuhambwa; mutuharehie ho.” 16Varateri vakavuka vakatyonga he muzi, vakavona sa vuntu evavwirire, vakahareha Pasaka.

17Hekioka chahemagheri akaza na vala ikumi na veri. 18Aho veikae si vekila, Yesu akati, “Kididi nimutio, Mmwe wenyu erala nami, eneniregheha.” 19Niho vakavoka kusononoya, na kumvwira mmwe mmwe, “Ngea nimi?” 20Akavati, “Ni mmwe he ava ikumi na veri etoveja hamwe nami he bakuli. 21Ambu Mwana wa Mntu etonga sa vuntu eandikiwe, mira vwasi vwa uo mntu emrengeha Mwana wa Mntu; neki chedi heye nangari uo mntu tekimoghiwe.”

22Aho vekila akaghuha mkate, akauinka lutelwedi, akaubendua, akavainka, akati, “Koni, uu ni mwiri wangu.” 23Akaghuha kikombe, akaanjela, akavainka, vakakinwia vose. 24Akavati, “Ii niyo sakame yangu ya kiaghano, yeitika vuntu vwa vajinki. 25Kididi nimuvwira unywi, Sikanwe neri chemoghwa ni mzabibu mhaka ula msi nenenwa mshaa he vufumwa vwa Mrungu.”

Yesu evavonyesha varateri vuntu venemshigha

(Mat. 26:31-35; Luk. 22:31-34; Yoh. 13:36-38)

26Vekinakenje kuimba, vakafuma vakatonga he ntuvi ya Mizeituni. 27Yesu akavati, “Unywi vose kio iki munevihijwa vuntu vwangu, ambu cheandikwe: ‘Ninim’bigha mrisha, na magonji enezarika.’ 28Mira nekinevuka he vefwie, ninemurongorira kutonga noko Galilaya.” 29Petro akamti, “Navakatevihijwa vose, mira mi hai.” 30Yesu akamti, “Kididi nikuvwira we, Kio iki cha yoo nkuruvi yesinaamba kantu keri, unenikana kantu katatu.” 31Naye akazikateta, “Hata chekinitara kufwa nawe sikakukane neri.” Na vose vakateri huvo.

Yesu uko Getsemane

(Mat. 26:36-46; Luk. 22:39-46)

32Igheri vakafika hantu heitangwa Getsemane, akavati varateri vakwe, “Ikaeni aha aho nekiomba.” 33Akamghuha Petro ne Yakobo ne Yohane, akavoka kubighwa ni haiwa na kula vwasi he ngoro. 34Akavati, “Ngoro yangu ina lusoyoyo kiringanyo cha kufwa, ikaani aha muyae kiavi.” 35Akatonga kamozya, akasoma vusho si, ekiomba iti, kakicha kive iyo saa imveche. 36Akati, “Aba, Vava, hako vyose viidimika; vusha iki kikombe hemi, mira si sa vuntu mi nekunda, esire vuntu we wekunda.” 37Akahunduka, akakicha vashinjia lighohe, akamti Petro, “Simoni, washinjia? Twaidima kuyaa kiavi saa mwe? 38Yaeni kiavi na kuomba, nesa musireingia he mighesho; ngoro yekundie mira mwiri weleghele.” 39Akatonga wa kuomba ekiteta kiteto icho icho. 40Akahunduka wa akakicha vashinjia, ambu meso avo eemeiwe, neri vasivone cha kumgharusha. 41Akahunduka wa ka katatu, akavati, “Shinjiani iki, muheme; chakoloka, saa yafika; rereha, Mwana wa Mntu einkijwa he mikono ya vabanu. 42Vukani tutonge, rereha, ula mrenirengeha azengelela.”

Kugurwa kwakwe Yesu

(Mat. 26:47-56; Luk. 22:47-53; Yoh. 18:2-11)

43Ekiratera huvo hala indi Yuda mmwe wa vala ikumi na veri, akaza ena na luvungano vetikie mihandwi na marungu, vefumie he vabaha va vatasi na vaandiki na vaghosi. 44Na ula mremrengeha ekivainkie luvengo, ekiti, “Uo nenem’bwita, niye, mgureni, mumtike mpoa.” 45Ekinaze, hala indi akamswia akati, “Rabi,” akam’bwita. 46Vakaronga mikono, vakamgura. 47Mmwe wa vala vekiwaho, akajuta mhandwi, akamtema mzoro wa mtasi m’baha, akamchwa isikio. 48Yesu akagharusha, akavati, “Mwaza kuranigura mwehete mihandwi na marungu sa mwegura mraghumba? 49Kila msi nekiho mozya henyu he nyumba ya mtaso nekicheja, temunigurire; mirra ivyo vyeokie nesa maandiko akoloke.” 50Niho vose vakamshigha vakaaha.

51M’bwange mmwezu akamratera edokie ikwembe la suke nyewa; vakamgura; 52naye akashigha ila suke nyewa, akaaha kituhu.

Kulahwa kwakwe Yesu he mtasi m’baha

(Mat. 26:57-68; Luk. 22:54-55, 63-71; Yoh. 18:12-14, 19-24)

53Vakamtika Yesu he mtasi m’baha; vabaha va vatasi na vaghosi na vaandiki vakamvungania vose. 54Petro naye akamratera hae hae mhaka he nyumba ya mtasi m’baha, akaikaa si na vandima he kianga ekiota moto. 55Vabaha va vatasi hamwe na chila yose vakamwendia Yesu vuonwa, vavone mimkomire; vasivone. 56Ambu vajinki vemtetiie vuonwa vwa mongo, mira vuonwa vwavo tevugwiie hamwe. 57Na vakumwe vakavuka vakamtetia vuonwa vwa mongo vekiti, “Uswi twemsikie ekiti, 58‘Mi ninebaja ii nyumba ya mtaso yerongiwe kwa mikono, na he misi mitatu ninejenga ingi yesirongiwe kwa mikono.’” 59Na ere huvo vuonwa vwavo tevugwiie hantu hamwe. 60Niho mtasi m’baha akaimuka aho ghati, akamvwija Yesu ekiti, “Tugharusha kintu he ivyo ava vekuchunga?” 61Mira akahuja asigharushe kintu. Niho mtasi m’baha akamvwija wa akamti, “We niwe Kristo Mwana wa Mwenye ngazo?” 62Yesu akati, “Mi niye; na unywi munemvona Mwana wa Mntu eikae he mkono wa kume wa nzinya, ekiza na majumbi a uko wanga.” 63Mtasi m’baha akabaja suke jakwe, ekiti, “Vaonwa ni vani wa tweenda? 64Mwasikia falaja yakwe, muti ze?” Vose vakachwa kuti chemvaie kukomwa. 65Vakumwe vakavoka kumtufia mate, vakamfinikira vusho na kum’bigha nkundi, na kumti, “Rota!” Hata vandima navo vakam’bigha maluhi.

Petro emkana Yesu

(Mat. 26:69-75; Luk. 22:56-62; Yoh. 18:15-18, 25-27)

66Petro ekiho kijusi uani, hakaza mmwe wa vagitu va mtasi m’baha, 67akamvona Petro ekiota moto, akamrerehisha, akati, “Nawe wekirena na uo Mnazareti, Yesu.” 68Akakana, akati, “Simmanyije neri sisikie icho weteta.” Akafuma nze he lukumbi, nkuruvi ikaamba. 69Ula mgitu akamvona kangi, akavoka wa kuvavwira vala veimuke hala, “Uu ni mmwe wavo.” 70Akakana kangi. Kakenda kadori wa vala veimuke ho vakamti Petro, “Ni cha idi u mmwe wavo, ambu we u Mgalilaya.” 71Akavoka kukurara na kukurighia kuti, “Simmanyije uo mntu mwemteta.” 72Hala indi nkuruvi iikaamba ka keri. Petro akakumbuka kila kiteto ekivwirirwe ni Yesu, “Nkurivi yesinaamba kantu keri unenikana kantu katatu.” Aho ekikidunganya akaia.

Currently Selected:

MARIKO 14: CHSUNT67

Highlight

Copy