Maluko 10
10
Kuli ze Talaka
(Mat. 19:1-12; Lk. 16:18)
1Nayo Yesu yakawuka baho, yakabita ku yisi ya Yudiya sunga ko ku nhumbi nzagwe ye likolongo lya Yoludani. Ilipuga lye wanhu likamuziza kanyhi, nayo yakawejiza kanyhi nha vyono yali yazoweye.
2Ale, Iwafalisayo wakamuziza, wakasaka kumujela, wakamuwuza, wakutya, “Wule, munhu yena wukombolwe yamupele u wumugolece wakwe talaka.” 3Nayo Yesu yakawapitula yakawatya, “Ma, Musa yamupelenyi wulajilize?”
4Nawo wakatya, “Musa yalajiliza vyono u mulume kosuma kumupela umugolece wakwe talaka no kumuleka.”
5Nayo Yesu yakawatya, “Musa, yamwandicilenyi ilajilizo lilyo, ku soko yo wukamu we zinhumbula zenyu. 6Ninga kuwulawa ku mwamulizo wo wuwumbwe we yinze, u Mulungu yawumba mulume no mucekulu. 7Holeka mulume kowaleka u sogwe no nyina, no kwilunza no mugolece wakwe, 8nawo vyono wejete wowa muwili monga. Ku soko yiyo si wejete kanyhi, langa muwili monga. 9Holeka cono yacilunza Mulungu, munhu yalece kucitemanula.”
10Nawo wali weza kwinjila kanyhi mu nyumba, iwejizwa wakwe wakamuwuza ze nghani yiyo. 11Nayo yakapitula yakawatya, “Munhu wo wose mono komuleka mugolece wakwe, no kutola yunji, yakwipela wusenyha kuli mugolece wakwe. 12No mucekulu nayo mono yakumuleka u mulume wakwe, no kutolwa na yunji, nayo yakusenyha.”
Yesu yakuwalugutiza iwana wadodo
(Mat. 19:13-15; Lk. 18:15-17)
13Iwanhu wakamuletela Yesu iwana wadodo ho yawapamize, ninga wene iwejizwa wakawatacila. 14Nayo Yesu yaza kuziwona zizo, yakakolwa ikuwo, yakawatya iwejizwa wakwe, “Walecenyi wawo iwana wadodo wanyizize, mulece kuwemila, hambi u wutemi wo Mulungu nha wuli so wanhu wono wenha iwana wadodo wawa. 15Nane nghumulonjelenyi mbeka, vyono munhu wo wose mono siyakuwubocela u Wutemi wo Mulungu kotya mwana mudodo, hamba sikokwinjila mu wutemi wuwo ngʼo.” 16Ale, yakawadinghula mu miwoko yakwe, yakawawicila miwoko, yakawalugutiza.
U munhu mono yali mugoli
(Mat. 19:16-30; Lk. 18:18-30)
17Na lono Yesu yatulukaga kanyhi ku muhinzo wakwe, u munhu yunji yakamuziza lumangho, yakafugama hamwande yakwe, yakamuwuza, yakutya, “Go Mwijizi muswanu, nhende wule ho niwutuje u wumi we cibitilila?” 18Nayo Yesu yakamutya, “Alu so cici wukunyhema muswanu? Hasina yunji mono muswanu, langa Mulungu yali wene du. 19Alu wugamanyile imalajilizo? Wulece kusenyha, wulece kuhiza, wulece kuhomelela wulambi, wuwogopaje usogo no nyina yako.” 20Nayo yakamutya, “Mwijizi, gose gaga nigebate kuwulawa wudodo wangu.”
21Nayo Yesu yakamulanga, yakamwenda, yakamutya, “Alu wukusakwa witume nghani monga du, nayo yoyi, wubite wukaguze ivinhu vyose vyono wina navyo, ukawapele waciwa, nagwe kowa na sawo ku wulanga, hanyuma ho wuze wunhyatye.” 22Nayo yali yeza kuzihulika zizo, hamba si yendezwa yaye, yakawuka akuno yakalaye, hambi nha yali yena sawo nyinji.
23Yesu yakalanga kose kose, yakawatya iwejizwa wakwe, “Nha kukamu ta kuli wagoli kuwinjila mu Wutemi wo Mulungu.” 24Ne wejizwa wakezina muno so zinghani zakwe. Yesu yakawalonjela kanyhi, yakatya, “Nyo wanangu, kukamu muno kuwinjila mu Wutemi wo Mulungu! 25Ninga kupelu kuli ngamiya kuwinjila mu cilanga co lusingʼani, si nha u munhu mugoli kuwinjila mu Wutemi wo Mulungu.” 26Ne wejizwa wakwe wakezina muno, wakewuza weneco wose, wakutya, “Alu nani ʼmbi mono kosuma kupona?” 27Nayo Yesu yakawalanga, yakawatya, “Kuli wanhu siyisumice, ninga si nha vivyo kuli Mulungu, hambi kuli Mulungu, zose nha zisumice.”
28Nayo Petelo yakamutya, “Ase nase ma? Lanje, ase caleka vyose cikakutyatya!” 29Yesu yakatya, “Mbeka nghumulonjelenyi, vyono munhu wo wose mono yalecile kaya, hamba wawahaze, hamba walumbuze, hamba nyina, hamba sogwe, hamba migunda ku soko yangu na ku soko yo Luganuzi Luswanu, 30mu mapango gaga, kopegwa kali igana no kuciza, zikaya, wawahaze, walumbuze, nyina, wana ne migunda hamonga ne magazo, ne vilo vyono vikuza, kobocela wumi we cibitilila. 31Ninga wenji iwalongozi wolowa wa munyuma, na wa munyuma, wolowa walongozi.”
Yesu yakulonga lwe kadatu ze lifwa no wuzuce wakwe
(Mat. 20:17-19; Lk. 18:31-34)
32Ale, wali wali mu nzila wakubita ku Yelusalemi, nayo yali yawalongoleye. Nawo iwejizwa wakwe wakogopa muno, ne wanhu wono wawatyatyaga wakogopa. Nayo Yesu yakawasola kanyhi wali wene hamhelo, wawalya we likumi na wejete, yakanza kuwalonjela zizo zono zomwagana, 33“Yakawatya, Hulicizenyi ta! Cikubita ku Yelusalemi, na kuko u Mwana wo Munhu kokombolwa kuli wakohani wawaha ne wejizi wo Wulajilize, nawo womulingʼaniza yawulagwe, no kumukombola kuli wanhu we makungugo. 34Nawo womuzwajiza, womufunyila mate, womukunanga no kumuwulaga. Hanyuma ye vilo vidatu kozuka.”
Cisakwa ca Yakobo na Yohana
(Mat. 20:20-28)
35Yakobo na Yohana, wana wa Zebedayo, wakamuziza Yesu wakamutya, “Mwijizi cikusaka ucinozeze cinhu cono cokulomba.” 36Nayo Yesu yakawawuza, yakutya, “Alu mukusaka nimunozezenyi ci?” 37Wakatya, “Wucikombole ase cikale yumonga ku lubavu lwako lo kulume na yunji ku lubavu lwako lo kucekulu, kolo wukwinjila mu nhojo yako.” 38Yesu yakawatya, “Simumanyile cono mukulomba! Ma, mosuma kungʼwa cikombe ce Magazo cono ane nongʼwa, hamba kubaputizwa nha vyono nobaputizwa ʼne?”
39Wakapitula, wakamutya, “Cosuma.” Yesu yakawatya, “I Cikombe cono nogʼwa heya mbeka nanye mongʼwa, kanyhi mobaputizwa nha vyono nobaputizwaʼne. 40Ninga kuwikala kulume hamba kucekulu kwangu si mulimo wangu kunoza langa wopegwa wawo wono wawikanizizwa.”
41Wawalya iwejizwa wanji we likumi waza kuzihulika zizo, wakanza kuwasimbila wa Yakobo na Yohana. 42Nayo Yesu yakawacema yakawatya, “Mwene mumanyile vyono wono watezagwa watemi we Makungugo, vyono wawatemaga wanhu wawo kwe vilungo, ne wawaha wawo vyono wena wulajilize muli wanhu wawo. 43Ninga kuli nye, yilece kuwa nha vivyo, langa mono kosaka kuwa muwaha muli nyenye, yimunojeye yawe mwitumami wenyu. 44Mono yakusaka kuwa mulongozi, yimunojeye yawe mwitumami wa wose. 45Hambi u Mwana wo Munhu nha si yaza ho yetumamilwe, langa yetume no kusuza u wumi wakwe so wukombozwe we wanhu wenji.”
Yesu yakumuponya we cibofu mono kacemagwa Batilimayo
(Mat. 20:29-34; Lk. 18:35-43)
46Ale, wakafika ku Yeliko, nayo Yesu lono yawukaga mwikaya lilyo, yena ne wejizwa wakwe hamonga ne lipuga yiwaha lye wanhu, u munhu yunji mwilombelezi we cibofu mono yacemagwa Batilimayo mwana wa Timayo, yali yekaye ha mhelo ye libalabala.
47Nayo yali yeza kuhulika vyono yo Yesu wa ku Nazaleti mono yakupuluta hanhu baho, hodu yakanza kuzoza, yakutya, “Gwe Yesu, Mwana wa Dawudi Umbonele lusungu!”
48Ne wanhu wenji wakamutacila ho yanyamale, ninga mwene ho yakacila muno kuzoza, yakutya, “Mwana wa Dawudi, Umbonele lusungu.”
49Nayo Yesu yakema, yakatya, “Mucemenyi.” Ale, wakamucema yuyo we cibofu, wakamutya, “Wisindamice! Winuce, yakukucema.”
50Nayo yakacitaga kutali icivwalo cakwe, yakazumha ku canyha, yakamubitila Yesu. 51Yesu yakamuwuza, yakutya, “Alu wukusaka nghutendele wule?” Yuyo we cibofu yakamutya, “Mwijizi, nghulomba sume kuwona kanyhi.”
52Nayo Yesu yakamutya, “Ale wubite, wihuwilo wako wakuponya.” Lo lulolulo yuyo we cibofu yakasuma kuwona kanyhi, nayo yakamutyatya Yesu mu muhinzo.
Currently Selected:
Maluko 10: GOG91
Highlight
Share
Copy
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.
