Maluko 14

U wihehe wo kumuwulaga Yesu

(Mat. 26:1-5; Lk. 22:1-2; Yoh. 11:45-53)

1Na lono vyali vikali vilo vyejete du, ho yiwe sikukuu ya Pasaka na ye mikate yono siyisasize. Iwakohani wawaha ne wejizi wo Wulajilize, walondolaga nzila yo kumwibata Yesu ko wusugu ho wamuwulaje. 2Ninga hamba nha vivyo wakatya, “Cilece kumwibata mwizuwa lye sikukuu, ho yilece kuwa wuma muli wanhu.”

Yesu yakubakwa mafuta ku Betaniya

(Mat 26:6-13; Yoh. 12:1-8)

3Nayo Yesu yali ku Betaniya, mu kaya ya Simoni Mukoma. Na lono yalizaga zindigwa ha meza, yakaza mucekulu yunji mono yali yena supa ye mafuta go wulenzi go wuguzi wukamu, yakayitula isupa yiyi, yakamujidila Yesu mafuta gago mu mutwe wakwe. 4Na wanji wa muli wanhu wono wali wali baho, wakasimba wakawa kulongana weneco wose wakutya, “Alu so cici mafuta gaga gajilizwe caka caka nha vivi? 5Hambi nha gali gaguzwe pesa zono zificile dinali magana madatu, ho wapegwe waciwa!” Hodu wakamutacila u mucekulu yuyo.

6Ninga Yesu yakawatya, “Mulecenyi, alu nhawule mukumugaza? Kanyitumila mulimo muswanu. 7Hambi iwaciwa nha muwezanaga nawo nhondo zose, holeka mosuma kuwataza mwipango lyo lyose lyono mwendile. Ninga ane, si mosuma kuwezana nane nhondo zose. 8U Mwene kanoza nha vyono yadahile, kawubaka umuwili wangu mafuta so wuwikanizwe wo wuzikwe wangu mu citenjelo. 9Nane nghumulonjelenyi mbeka, vyono ko kose mono yinze yose kono loganulwa u Luganuzi Luswanu, ilitumo lili lyono yetumile u mucekulu yuyu, lyowa kutongwa so cikumbucizo cakwe.”

Yuda yakuvumila kumugaluka Yesu

(Mat. 26:14-16; Lk. 22:3-6)

10Ale Yuda Musikaliyota, muyagwe na wawalya we likumi na wejete, yakabita kuli wakohani wawaha ho yamugaluce Yesu kuli wene. 11Nawo Wakohani wawaha weza kuhulika inghani yiyo, wakasecelela muno, wakalagana nayo vyono womupela zipesa. Hodu nayo Yuda yakawa kwanza kulondola cilejeho co kumukombola Yesu kuli wene.

Yesu yakulya ndigwa ye Pasaka hamonga ne wejizwa wakwe

(Mat. 26:17-25; Lk. 22:7-14, 21-23; Yoh. 13:21-30)

12Na mwizuwa lilongozi lye sikukuu ye mikate yono siyisasize, mwipango lyono wawulajilaga nyana ye ngholo we Pasaka, iwejizwa wakwe wakamuwuza, wakutya, “Wukusaka cikuwikanizize hayi ndigwa ye Pasaka?”

13Ale Yesu yakawatuma wejete wa muli wejizwa wakwe yakuwatya, “Bitenyi kwikaya, na kuko mokwitangʼanila na munhu yunji yadinghuye njlio ye malenga. Ale, mumutyatyaje yuyo, 14sunga ko ku kaya yono kokwinjila, mumutye munya kaya, ‘Umwijizi yakutya, cili hayi cumba cangu cono nolila Pasaka hamonga ne wejizwa wangu?ʼ 15Nayo komulajilenyi cumba ciwaha ca ku golofa cono ciwikanizizwe lukulu, kanyhi cihambigwe. Ale mucitenjelaje mu cumba cico.”

16Iwejizwa wakatuluka, wakabita kwikaya, nawo wakagana vyose viwikanizwe nha vyono Yesu yali yawalonjeye. Wakawa kuyitenga i ndigwa ye Pasaka. 17Yaza kuwa cinyamihe. Yesu yakaza hamonga ne wejizwa wakwe we likumi na wejete. 18Na lono walizaga zindigwa ha meza, Yesu yakatya, “Mbeka nghumulonjelenyi, muyenyu yunji mono cikulizana hamonga nane, kongaluka.” 19Baho iwejizwa wakwe wakanza kukalala, hanyuma wakawa kwanza kumuwuza Yesu yumonga yumonga, wakutya, “Ma yo nene?” 20Yesu yakawatya, “Muyenyu yumonga wa muli nyenye ikumi na wejete, mono cikulilizana i nhonje hamonga nane mu bakuli. 21Mbeka u Mwana wo Munhu nha kofwa nha vyono i Mandiko Gono Gelile gakulonga zomwene, ninga, woyi he, kuli munhu yuyo mono yakumugaluka Mwana wo Munhu! Yali yiwe yili ciba kuli munhu yuyo, yalece kulelwa!”

I ndigwa yo Muwaha

(Mat. 26:26-30; Lk. 22:14-20; 1 Kol. 11:23-25)

22Na lono walizaga, Yesu yakasola mukate, yakalumba, yakawubegula no kuwapela wejizwa wakwe akuno yakutya, “Solenyi awu wo muwili wangu.” 23Hanyuma yayo yakasola ne cikombe naco, yakamulumbo Mulungu, yakawapela, nawo wose wakacingʼwela i cikombe cico. 24Yesu yakawatya, “Ayi yo sakami yangu yono yikukangaza i cilagane co Mulungu, isakami yono yikwitika so wanhu wenji. 25Mbeka nghumulonjelenyi, sinongʼwa kanyhi divayi ye zabibu, sunga mwizuwa alilya lono noloyingʼwa divayi yimhya mu wutemi wo Mulungu.” 26Ale baho wakemba lwimbo, nawo waza kondya, wakatuluka, wakabita kwitunda lye Mizeyituni.

Yesu yakuwila vyono Petelo komukana

(Mat. 26:31-35; Lk. 22:31-34; Yoh. 13:36-38)

27Yesu yakawatya wejizwa wakwe, Anye wose motiza no kundeka nili wene, hambi i Mandiko Gono Gelile nha gakutya, “Nolomutowa u mudimi, ne zingholo nazo zolokwiyagala ako na ako.” 28Ninga kolo nakondya kuzuka, nomulongolelenyi ku Galilaya. 29Nayo Petelo yakamutya, “Hamba wose watize wakulece wuli wene, ninga ane si nokulecela lukulu!” 30Nayo Yesu yakamutya, “Mbeka nghukulonjela Petelo, vyono i cilo cici lono i nzogolo yowa yikali si yinalila kali kejete, agwe kowa wakondya kunghana kali kadatu.” 31Ninga Petelo yakehinda muno kulonga yakutya, “Hamba hono yiwe yinojeye cifwizane hamonga nagwe, ane sinokulecela lukulu hamba hadodo.” Ne wejizwa wose nawo wakalonga nhavivyo.

Yesu yakulomba mu busitani ya Getisemane

(Mat. 26:36-46; Lk. 22:39-46)

32Ale, wakaza ku cigundu cono cacemagwa Getisemane. Yesu yakawatya iwejizwa wakwe, “Ikalenyi baha, ane lono nghali kulomba.” 33Ale, yakawa kuwasola wa Petelo, na Yakobo na Yohana, yakawa kwanza kugazika no kuwona wusungu mu nhumbula yakwe. 34Yakawatya, “I nhumbula yangu yina wukalale wuwaha wono wunhuliye muno muno. Ale, mwikalaje bahano akuno mwilanjiliye.” 35Yakatela ha mwande hadodo, yakagwa hasi, yakalomba vyono, hono yiwe yisumice, yalece kucagana cipango cico ce magazo. 36Yakatya, “Gwe Baba, kuligwe zose nha zisumice. Ale wumbusizaje icikombe cicino ce magazo. Ninga si vyono nyendile nene, langa yiwe nha vyono wendile gwegwe.”

37Hanyuma yayo yakaza kuli wejizwa wawalya wadatu, yakawagana wagonile. Ale yakamuwuza Petelo, yakutya, “Simoni, alu, wagona? Si wusumile kwikala meso hamba saa monga du? 38Yakawa kuwatya, mwikalaje meso, mulombe ho mulece kwinjila mu wujelwe. Mbeka nhumbula yendile, ninga muwili wusoceye.”

39Yakabita kulomba kanyhi yakuwuyajila kulonga zinghani zizilya du. 40Ale, yakaza kanyhi kuli wejizwa wakwe, yakawagana wagonile. Nhondo hamba si wasuma bwete no kunugula ne meso gawo. Hamba siwamanya na yono wopitula.

41Nayo yali yeza kuwaziza lwe kadatu yakawatya, “Alu mukali mugonile mucehile? Ninga alu hodu zakwila! icipango nha cakondya kuza! U Mwana wo Munhu yakukombolwa kuli wanhu wabi. 42Ale, yinucenyi, cibite. Lanjenyi ta, ayo u munhu mono yakungaluka yaza!”

Yesu yakwibatwa

(Mat. 26:47-56; Lk. 22:47-53; Yoh. 18:3-12)

43Na lono Yesu yali yakali yakulonga, lanje, Yuda yuyulya u muyagwe na wawalya iwejizwa we likumi na wejete, yakawa kuza, hamonga ne lipuga lye wanhu, wena ne mimaje ne zishale. Iwanhu wawo wali watumigwe ne Wakohani wawaha, ne wejizi wo Wulajilize hamonga ne Wanyamhala. 44Nayo Yuda u mugaluci, yali yakondya kuwapela citanjilo yakutya, “Yuyo mono nomunonela, ale yo yuyo mono mukumusaka, nanye mumwibataje mumutegule hasi yo walindilizi.”

45Nayo Yuda yaza kuza du, yakawa kumubitila Yesu, yakawa kumutya, “Mwijizi!” Hanyuma yakawa kumunonela. 46Ale, iwanhu wawo wakamwibata Yesu. 47Ninga yunji muyagwe na wawalya wono wali wemile hamonga na Yesu, yakawukwega u mumaje wakwe, yakamutowa muwanda wo Mukuhani muwaha, yakamubuha likutu. 48Nayo Yesu yakawatya, “Alu muza mwina ne mimaje hamonga ne zishale ho munyibate nha kotya nili muhizi? 49Na kumbe nhondo zose nawezanaga nanye nghwijiza mu Nyumba yo Mulungu, ninga simwanyibata ngʼo. Ninga alu yinojeye i Mandiko Gono Gelile gafisilizwe.” 50Ale baho iwejizwa wakwe wose wakamuleka, wakatiza. 51Baho hali hoyuli muzelelo yunji mono yamutyatyaga Yesu, akuno yekumbile mwenda we bafuta. Nawo wakajela kumwibata. 52Ninga mwene yakawesukula, yakawuleka u mwenda wuwulya we bafuta, yakatiza yali cipwi.

Yesu hamwande ye libalaza lye wanyamhala

(Mat. 26:57-68; Lk. 22:54-55, 63-71; Yoh. 18:13-14, 19-24)

53Ale, wakamutegula Yesu kuli Mukohani Muwaha, kono Iwakohani wawaha wose, ne wanyamhala ne wejizi wo wulajilize wali wekongholeye. 54Nayo Petelo yali yamutyatyizye Yesu, akuno yakujendela kutali, Petelo yakenjila mwikumbo lyo Mukohani Muwaha, yakekala hamonga ne walindilizi, yakawa yakota moto. 55Iwakohani wawaha ne Libalaza lyose, wakalondola wuhomelezi wo kumusitacila Yesu ho wamuwulaje, ninga hamba nha vivyo, si wawutuga yaye. 56Ne wanhu wenji wakahomelela zo wulambi kuli Yesu, no wuhomelezi wawo wali wusutane. 57Ale na wanji nawo wakema, nawo wakahomelela zo wulambi kuli Yesu, wakutya, 58“Ase camuhulika umunhu yuyu yakutya, Ane noyimwagula i Nyumba yiyino yo Mulungu yono yizenjigwe ne miwoko, na mu vilo vidatu, ane noyizenga yinji yono siyizenjigwe ne miwoko.” 59Ninga, hamba nha vivyo, u wuhomelezi wawo nawo, wali wusutane.

60Ale, Mukohani Muwaha yakema haciligati yawo, yakamuwuza Yesu, yakutya, “Alu, siwukupitula cinji? Nghanici yono wakukuhomelela i wanhu wawa?” 61Ninga u mwene yakanyamala twii, hamba kulonga cinji. Mukohani Muwaha yakamuwuza kanyhi yakutya, “Ma, alu yo gwegwe Kilisito. U mwana wo Mulungu Mulugutizwe?” 62Nayo Yesu yakapitula, yakutya, “Heya yo nene. Na kanyhi, molomuwona u Mwana wo Munhu yekaye ku lubavu lo kulume lwa Mono yena Vilungo, yakuziza mu mavunde ga ku wulanga.” 63Baho Mukohani Muwaha yakavidemulanga i vivwalo vyakwe vye cikohani, akuno yakutya, “Hambi alu kanyhi cikusaka wuhomelezi wa cici? 64Hambi nha muwuhulika nyo weneco u wotovule wakwe!” Alu nye mukuwona wule? Wose wakatemya vyono yimunojeye yawulagwe. 65Ale ho baho baho du, wanji wa muli wene, wakanza kumufunyila mate, wakamugubika wusu, wakamutowanga makofi no kumutya, “Ale wutambule ta, nani mono yakutowile!” Sunga ne wetumami wakamusola, nawo wakamutowanga makofi.

Petelo yakumukana Yesu

(Mat. 26:69-75; Lk. 22:56-62; Yoh. 18:15-18, 25-27)

66Na lono Petelo yali yakali he kumbo, yunji wa muli wetumami we cicekulu wo Mukohani Muwaha yakaza. 67Yaza kumuwona Petelo yakota moto, yakamulanga, yakamutya, “Hamba na gwegwe wali hamonga na Yesu wa Nazaleti.” 68Ninga mwene Petelo yakakana, yakutya, “Si manyile hamba singhwizuka yono wukulonga!” Hanyuma yayo Petelo yakatuluka yakalawila kunze. Baho inzogolo nayo yikawa kulila. 69No muhinza yuyulya yaza kumuwona kanyhi Petelo, yakanza kanyhi kuwalonjela i wanhu wono wali wemile baho, yakutya, “U Munhu ayu nayo mama, muyawo.” 70Nayo Petelo yakakana kanyhi. Na hanyuma yayo hadodo, iwanhu wono wali wemile baho wakamutya Petelo, “Mbeka nagwe uli muyawo, hambi nagwe ha wuli Mugalilaya.” 71Ninga Petelo yakanza kwilijita no kwilaha yakutya, “Ane si nimumanyile munhu ayu mono mukumulonga.” 72Baho nayo inzogolo yikawa kulila lwe kejete. Ale, Petelo yakakumbucila vyono Yesu yali yamulonjeye, vyono “Lono inzogolo yowa yikali siyinalila kali kejete, agwe kowa wakondya kunghana kali kadatu.” Hodu Petelo yakalila muno muno tobo ne mahozi.

Currently Selected:

Maluko 14: GOG91

Highlight

Copy