Maluko 8
8
Yesu yakuwapela ndigwa wanhu elufu yine
(Mat. 15:32-39)
1Mu vilo vivyo lipuga yiwaha lye wanhu likekonghola kanyhi, nawo wali wasina ndigwa. Ale, Yesu yakawacema iwejizwa wakwe, yakawatya, 2“Nghuwawonela lusungu wanhu wawa, hambi nha cekalana nane vilo vidatu, nawo wasina cinji co kulya. 3Nane hono niwakombole wabite kwawo akuno wadabuce, wozilika mu nzila, hambi wayawo wanji nha walawa kutali.”
4Nawo wejizwa wakwe wakamuwuza, wakutya, “Alu ahano nha nyika, ho yolawa hayi mikate yono yosuma kuwegutya i wanhu wawa wose?” 5Nayo Yesu wakawawuza, yakutya, “Alu ʼnye mwina mikate mhinga?” Nawo wakamutya, “Mupunghati.” 6Ale, yakawalajiliza wanhu wekale hasi. Nayo yakayisola mikate yiyilya vyono yili mupunghati, yakamulumbo Mulungu, yakayibegula, yakawapela iwejizwa wakwe wawagawile wanhu, nawo wakawagawila. 7Kanyhi wali wena ne visomba vicefu. Nayo Yesu yakavilugutiza, yakalajiliza wavigawe kuli wanhu nha vivyo. 8Iwanhu wakatya, wakeguta. Wakatondoleza ivibegulwa vyono vyasigala wakamemya nhoto mupunghati. 9Nawo wono walya wali waficile nha wanhu elufu yine. Yesu yakawakombola, 10lo lulolulo yakenjila mu ngalawa hamonga ne wejizwa wakwe, yakabita ku yisi ya Dalamanuta.
Iwafalisayo wakusaka citanjilo
(Mat. 16:1-4)
11Iwafalisayo wakaza, wakanza kwiwuza na Yesu. Nawo wakawa kumujela, wakamusaka yawanozeze citanjilo cono cikulajila vyono mwene yena wukombolwe kulawa ku wulanga. 12Yesu yakakalala muno mu nhumbula yakwe, yakatya, “Alu so cici u lulelo lulu lukusaka citanjilo? Mbeka nghumulonjelenyi lulelo lulu silopegwa citanjilo co cose.” 13Hodu yakawaleka, yakenjila kanyhi mu ngalawa, yakalowoka ku nhumbi nzagwe ye lilenga.
I cisase ce Wafalisayo na ca Helode
(Mat. 16:5-12)
14Iwejizwa wakasemwa kusoleleza ne mikate, nawo wali wena mukate monga du mu ngalawa. 15Yesu yakawakonghonheza, yakutya, “Lanjenyi ta! Mweze musujile kuli cisase ce Wafalisayo ne cisase ca Helode.” 16Iwejizwa wakanza kulongana weneco wose, wakutya, “Alu yakulonga nha vivyo vyono cisina mikate.” 17Nayo Yesu yakamanya cono walongaga, yakawatya, “Alu so cici mukulongana nyo weneco wose vyono musina mukate? Alo mukali sinezuka du, hamba kumanya ngʼo? Alo i zinhumbula zenyu zikamupe? 18Alu nha mwina ne meso, simukuwona? Nha mwina ne makutu, simukuhulika? Alu simukukumbucila, 19i cidaha cilya lono nayibegula mikate yiyilya mihano, no kuwapela wanhu elufu yihano? Wulenyi, mwatondola nhoto yilinga zono zali zimemile vibegulwa vyono vyasigala?” Wakamutya, “Ikumi na nyejete.”
20“Na lono nayibegula mikate yiyilya mupunghati no kuwapela wanhu elufu yine, ma, mukatondola nhoto yilinga zono zali zimemile vibegulwa vyono vyasigala?” Wakamutya “Mupunghati.” 21Nayo yakawatya, “Alu sunga nalu mukali si nezuka du?”
Yesu yakumuponya we cibofu wa ku Betesayida
22Yesu yakafika ku Betesayida hamonga ne wejizwa wakwe. Na kuko, wanhu wakamuletela munhu yunji we cibofu, wakamunena yamupamize. 23Nayo Yesu yakamwibata muwoko munhu yuyo we cibofu, yakamutegula kunze ye cikaya ca Betesayida. Yakamubaka mate mu meso, yakamuwicila miwoko yakwe, yakamuwuza, yakutya, “Wule, wukusuma kuwona cinji.” 24Nayo u munhu yuyo we cibofu yakalanga, yakatya, “Nghuwawona wanhu wakwijela kotya mabici gakujenda.” 25Hanyuma yayo Yesu yakamuwicila kanyhi miwoko yakwe mu meso gakwe, nayo yakanugula muno, ne vilungo vyakwe vyo kuwona vikamuwuyila yakaviwona vyose viswanu nha vyono vinha. 26Yesu yakamutya yabite ku kaya kwawo, yakamukongʼonheza, yakutya, “Ulece hamba kwinjila mu cikaya!”
Petelo yakumuvumila Yesu vyono yo Kilisito
(Mat. 16:13-20; Lk. 9:18-21)
27Hanyuma Yesu ne wejizwa wakwe wakabita ku vikaya vya Kayisaliya Filipi. Nawo lono wali wali mu nzila, Yesu yakawawuza iwejizwa wakwe, yakutya, “Alu wanhu wanhezaga nene nani?” 28Wakamutya, “Wanhu wanji watezaga gwegwe yo Yohana u Mubaputizi, na wanji Eliya, ninga wanji watezaga wuli yumonga muyagwe ne wawizi.” 29Nayo yakawawuza, yakutya, “Ninga anye nanye ma? Munhezaga nene nani?” Petelo yakamutya, “Agwe yo gwegwe Kilisito.” 30Hanyuma Yesu yakawakongʼonheza walece kumulonjela munhu wo wose zinghani zakwe.
Yesu yakulonga zo wugazwe no wufwe no wuzuce wakwe
(Mat. 16:21-28; Lk. 9:22-27)
31Yesu yakanza kuwejiza iwejizwa wakwe, yakutya, “Yimunojeye u Mwana wo Munhu yatuje magazo menji no kulemwa ne wanyamhala, ne wakohani wawaha ne wejizi wo Wulajilize. Kowulagwa na hanyuma ye vilo vidatu, kozuka.” 32Yesu yakawalonjela nghani yiyo calinze. Holeka Petelo yakamuteza Yesu ha mhelo, yakanza kumutacila. 33Ninga Yesu yakapituka, yakawalanga iwejizwa wakwe, yakamutacila Petelo yakutya, “Uwuce haliʼne Setani! Imahweso gako si mahweso go Mulungu, langa ga cimunhu munhu.” 34Hanyuma Yesu yakalicema i lipuga lye wanhu, hamonga ne wejizwa wakwe, yakawatya, “Hono munhu wo wose yasace yawe mutyatyi wangu ale, yimunojeye yekapise mweneco, yawudinghule umusalaba wakwe. 35Hambi munhu mono yakuhila kuwuponya wumi wakwe mweneco, nha kowajiliza, langa munhu mono kowajiliza u wumi wakwe, ku soko yangu na ku soko yo Luganuzi Luswanu, yuyo, langa kowuponya u wumi wakwe. 36Alu ma, u munhu kocituga cambuzici, hono yayituje yinze yose kono yalila, ninga yawajilize u wumi wakwe? 37Hamba munhu kolavyaci, cihomele wumi wakwe? 38Umunhu wo wose wa mu lulelo luluno lubi, lono si lukumucelelelo Mulungu, hono yambonele soni nene, hamonga ne mejizo gangu, Umwana wo Munhu nayo, kolomuwonela soni u munhu yuyo, mwipango lyono kokuziza mu nhojo yo Sogwe, hamonga ne wamalayika wono welile.”
Currently Selected:
Maluko 8: GOG91
Highlight
Share
Copy
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.
