Imetumo ge Watumwa 5
5
U wulambi wa Ananiya na Safila
1Ninga kukawa na munhu litagwa lyakwe Ananiya, no mugolece wakwe Safila, nawo wakawuguza u mugunda wawo nha vivyo. 2Ninga yakacepula nusu ye zipesa, no kuleta kuli watumwa nusu yayo du, no mugolece wakwe nayo yali yayimanyile nghani yiyi. 3Ninga Petelo yakamuwuza yakutya, “Ati, Ananiya, alo so cici Setani yakumemizye nhumbula yako, ho wumukoce u Muhe Mono Yelile, ho wukacepule nusu ye zipesa zono wawuguza mugunda? 4Lono wali wukali sinawuguza, wali wako, na lono wali wakondya kuwuguza, izipesa zizo zali zako, ho wuzitumamile nha vyono wendile. Alu so cici kulamula nghani yiyi mu nhumbula yako no kwituma nghani yiyi? Ninga wumanye vyono si wumukonjile munhu, langa kumukonga Mulungu!” 5Nayo Ananiya yaza hulika zinghani zizi, yakagwa hasi no kufwa baho baho. No woga wuwaha muno muno wukawebata wose wono wazihulika zizi. 6Iwazelelo wakenuka, wakawuwopa umuwili wakwe ne sanda, wakamutegula kunze, wakamuzika mu citenjelo.
7Caza kupuluta cidaha kotya ca saa yidatu nhavi, u mugolece wakwe yakenjila mu nyumba, akuno si yamanyile zono ziweye. 8Petelo yakamutya, “Ati Safila wunonjele ta, ati, lili lyo liwalo lye zipesa zono mwawuguza mugunda?” Nayo Safila yakatya, “Heya, lyo liwalo lilyo.” 9Nayo Petelo yakamutya, “Alo so cici mulagane no mulume wako kumujela u Muhe wo Muwaha?” Wulanje ta! Awalya iwanhu wono wamuzicile u mulume wako, wali ha mulango, nawo wokutegula na gwegwe kunze. 10Lo lulo lulo Safila yakagwa ha magulu ga Petelo, nayo yakafwa baho baho. Iwazelelo wakenjila wakamwagana yafwiye, nawo wakamutegula kunze, wakamuzika behi no mulume wakwe. 11Ne likanisa lyose hamonga na wose wono wazihulika zizo, wakebatwa na woga wuwaha muno muno.
I watumwa wakunoza mapoto ne mezino menji
12I Watumwa wakanoza mapoto ne mezino menji muli wanhu. Wono wehuwila, wakawa wakwitang'anila kuko wose hamonga, kwi'kumbo lya Solomona. 13Ninga, hasina muli wanhu wono si wali wehuwiye mono yejelela kwilunza nawo. Langa sunga ne wanhu wono si wali wehuwiye, wakawakumya. 14Iliwalo lye wanhu wono wamwihuwila Muwaha lye walume ne wacekulu, likacila konjelezeka muno muno. 15Na ku soko yiyo, wanhu wawawikaga watamwa mu nzila, wawawikaga mu vitanda na mu zinyhingo, Petelo kolo yakupuluta, hamba muzizi wakwe du wuwaficile wanji wayawo. 16Wanhu wenji wakafika kulawa makaya ga mu mhelo mhelo ya Yelusalemi, wakuwaleta iwatamwa wawo, na wono wagazikaga ne macisi mavu, nawo wakaponywa wose.
I watumwa wakugazwa
17Ninga u mukohani muwaha ne wayagwe wono wali we mhuga ye Wasadukayo we hanhu baho, wakawawonela wivu. 18Wakawebata watumwa no kuwatajila mu jela ye wenji wose. 19Ninga ne cilo, Malayika wo Muwaha yakadigula milango ye jela, yakawalavya kunze, yakatya, 20“Bitenyi mukeme mu Nyumba yo Mulungu, mukawaganulile wanhu zinghani zose zo wumi wuwu.” 21Nawo watumwa wakahulika, wakenjila mu Nyumba yo Mulungu hakali mitondo muno, wakawa kwanza kwijiza. Ninga u Mukohani Muwaha, hamonga na wono wali nayo, wali weza kuza, wakacema mukung'ano we libalaza lyose, hamonga ne wanyamhala wose we wanhu wa Isilayeli, hanyuma wakawatuma wanhu ku jela wakawalete watumwa. 22Ninga wawo wetumami waza kufika ku jela, si wawagana yaye. Wakawuya, wakalonga, 23wakutya, “Ciyagana jela ndindwe yikamile, ne walindilizi wemile ha milango, ninga ceza kudigula, si cagane munhu wo wose mugati.”
24U Muwaha we walindilizi we Nyumba yo Mulungu ne wakohani wawaha, waza hulika zizi, wakawa na mahwele, hamba kumanya zono ziwatujile. 25Yakaza yunji yakawalonjela yakawatya, “Lanjenyi ta! Wanhu wono mwawatajila mu jela, wali mu Nyumba yo Mulungu wemile wakuwejiza wanhu.” 26Hobaho yakabita muwaha we walindilizi we Nyumba yo Mulungu, hamonga ne wanhu wakwe, yakabita ku Nyumba yo Mulungu, yakawaleta. Ninga si wawebata kwe vilungo hambi nha wawogopa wanhu, lunji wali wawatowanje ne mabwe. 27Waza kuwaleta, wakawawika ha mwande ye libalaza. U Mukohani muwaha yakawawuza, yakutya, 28“Ase camulemezenyi cagalanze, vyono mulecele lukulu kwijiziza mwi'tagwa lyo munhu yuyu, alu kumbe anye mwagatandaza imafundo genyu hanhu hose mu Yelusalemi, sunga nalu mukuhila kuciletela lilema lyo wufwe wo munhu yuyo.”
29Ninga Petelo lono yali hamonga ne watumwa wayagwe, yakapitula, yakatya, “Cinojele cimuhulice Mulungu, si nhe wanhu. 30U Mulungu we wakuku zetu yamuzukula Yesu, mono anye mwamuwulaga ko kumutumbika mu musalaba. 31Yuyo yo Mulungu yamwinula sunga ko ku muwoko wakwe wo kulume, yakawa Mulongola no Muponyi, yawapele wanhu Isilayeli u wunene, ho wanenelwe uwubi wawo. 32Nase cili wahomelezi we zinghani zizi, nayo nhavivyo Muhe Mono Yelile, mono u Mulungu yawapela wono wakumuhulika, nayo yakuyihomelela nghani yiyo.”
33Ninga wose wono wali wali baho mwi'balaza lilyo wali weza kuzihulika zizi, wakakolwa ne likuwo, sunga wahilaga kuwawulaga. 34Ninga Mufalisayo yunji mono yacemwaga Gamaliyeli, mono yali mwijizi wo Wulajilize, na mono yali yena lilumbo yiwaha hali wanhu wose, yakema ha mwande ye libalaza, yakasaka wawalya watumwa walawile hadodo kunze. 35Hanyuma yakawatya, “Nye wandugu zangu wa Isilayeli, mwitetelaje kuli wanhu wawa, muli yiyo yono mukusaka kuwatendela. 36Hambi mu vilo vyono vipulute nha yenuka munhu yunji, litagwa lyakwe yacemwaga Teyuda, yakeyitya vyono mwene yo munhu mutambule, na wanhu kotya nha magana ma'ne wakelunza nayo. Ninga u mwene yawulagwa, ne watyatyi wakwe wose wakeyagala, ne cipuga cakwe cikawa kufwa. 37Kanyhi hanyuma yayo, mu cipango cicilya co kuwala wanhu, yakenuka Yuda wa ku Galilaya. Yuyu nayo yakawakwega wanhu wanji, wakamutyatya, ninga nayo nha vivyo, yakawulagwa, ne watyatyi wakwe wose wakeyagala. 38Alu, holeka nane nghumutyenyi nhavi, mwilegaje kuli wanhu wawa, muwalekaje ye! Hambi inghani yiyi hamba mulimo wuwu, hono wuwe wa wanhu, nha wohodanjika du weneco. 39Ninga hono wuwe wo Mulungu, si mosuma kuwemila ye, yilece kuwa na lunji muwe nha mukwihoma no Mulungu.” Wakawa kwilumbaniza nayo.
40Nawo waza kuwacema watumwa, wakawakuna viboko, no kuwalonjela vyono, walecele lukulu kwijiza mwi'tagwa lya Yesu, hanyuma wakawa kuwaleka wabite. 41Watumwa wakalawila hanze ye libalaza wasangalaye, vyono wejela wanojeye kukozwa cevu ku soko ye litagwa lya Yesu. 42Nawo wakajendelela nhondo zose kwijiza no kuganula Luganuzi Luswanu lwa Yesu, mu Nyumba yo Mulungu na mu zikaya ze wanhu, vyono mwene yo Kilisito.
Currently Selected:
Imetumo ge Watumwa 5: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
