Okuruga 24
24
Endagano nekomelerwa
1Omukama ashuba agambira Musa ati, “Otembe eibanga ongobe, iwe na Aroni, Nadabu na Abihu, n'abebembezi nshanju ba Isiraeli, munfukamire kyonkai mwemire harai. 2Iwe wenkai obe niwe ongoba. Abandi batangoba, kandi abantu batakutemba ibanga kukuhondera.”
3Musa aija agambira abantu eby'Omukama yagamba byona n'emigenzo yona. Abantu ba bahorora n'eiraka limoi bati, “Byona ebyo Omukama yagamba turabikora.” 4Aho Musa ahandika bya eby'Omukama yagamba. Aho aimuka omu bwankya karai ayombeka ealutare omu kibazi ky'eibanga, n'enyomyo ikumi na ibili nk'okwo enganda za Isiraeli zili. 5Ahanyuma atuma abasigazi Abaisiraeli, bagya bahongera Omukama ebihongo by'okwokibwa, bamutambira n'ebihongo by'emilembe eby'ente. 6Musa akwata enusu y'obwamba abuteka omu pakuli, kandi enusu yabwo obundi abushaimulira ealutare. 7Akwata ekitabo ky'endagano, akishomera embaga, ahanyuma bahorora bati, “Byona eby'Omukama yagamba turabikora, mara turabihikya.” 8Musa akwata obwamba abushaimulira abantu, agamba ati, “Obu bwamba bw'okukomelera endagano ey'Omukama yakora na inywe orwo yaba nabagambira ebigambo ebi.”
Abebembezi nshanju
9Musa, na Aroni, Nadabu, na Abihu n'abebembezi nshanju ba Isiraeli batemba eibanga, 10babona Ruhanga wa Isiraeli; ahansi y'ebilengebye oti hakaba hatinzirwe amabare ga safiro, emyelere nihashusha eiguru lyonene. 11Abebembezi abo ba Isiraeli Ruhanga tiyabashasize. Bakamubona, balya banywa.
Musa aha Ibanga lya Sinai
12Omukama agambira Musa ati, “Otembe eibanga ongobe, mara oikareyo olinde. Ninyija kukuha embengo z'amabare, zina Amateka n'emihango ebyo nahandika kubegesa.” 13Musa aimukya n'omwiruwe Yoshua, atemba omw'ibanga lya Ruhanga. 14Agambira abebembezi ati, “Mutulindilire aha omu rusisira kugoba orwo turagaruka. Muraba mwina Aroni na Huri. Omuntu aragira ekigambo ekisikiire abagendere.”
15Aho Musa atemba eibanga, ekichwi kilishweka. 16Ekitiinwa ky'Omukama kibandara aha Ibanga lya Sinai, n'ekichwi kilishweka ebiro mukaga; aha kiro kya mushanju Ruhanga ayema omu kichwi ayeta Musa. 17Emibonekere y'ekitinwa ky'Omukama aha ibanga eiguru, okwo Abaisiraeli bakiboine, kikaba nikishusha omuliro ogulikurabagira. 18Musa atemba eibanga ataha omu kichwi. Akamarayo ebiro makumi ganai kusibayo akararayo.
Currently Selected:
Okuruga 24: RHAY01
Highlight
Share
Compare
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
