Embandizo 11
11
Omunara gwa Babeli
1Ensi yona ekaba eina orulimi rumoi n'emigambire emoi. 2Orwo abantu babaire nibafuruka kuruga oburugaizoba bagwamu omuteleka omu nsi ya Shinari, batura omwo. 3Aho bagambirangana bati, “Mwije tubumbe amatofari, tugokyege.” Bayombekesa amatofari omu mwanya gw'amabare, mara bagombekesa elami omu mwanya gw'einoni. 4Bagamba bati, “Mwije twombeke ekigo, n'akatwetwe k'omunara kagobe omw'iguru, tubone eiranga batutine, batalija bakatupapaaza bakatumazaho ensi.”
5Omukama asongoka kuleba ekigo n'omunara ogwo abantu abo babaire bombekire. 6Agamba ati, “Abantu aba bona ihanga limoi, mara baina orulimi rumoi. Egi mbandizo y'ebyo barakora, mara taliho kyo barategeka kukora kikabalema. 7Mwije tusoke tugye tubatangure orulimi rwabo, balekere kushobokerwangana omu migambire.” 8Aho Omukama abapapaaza, abemya aha kigo kyabo abamalira omu nsi zona, n'elyombeka ly'ekigo balinagaho. 9Nikwo ekigo ekyo kwetwa eibara Babeli, kuba aho niho Omukama yatabanguliire orulimi rw'ensi yona, mara ho niho yabemiza kubapapaaza akabamalira omu nsi zona.
Baish'enkuru Aburamu
(1Ma 1:24-27)
10Aba nibo baijukuru ba Shemu. Shemu orwo yabaire aina emyaka kikumi, nirwo yazaire Aripakishadi, emyaka ebili omutunga guhoiremu. 11Kayamazire kuzara Aripakishadi, arora emyaka endijo bikumi bitanu. Mara omwo azara abojo abandi n'abaisiki.
12Aripakishadi kayabaire aina emyaka makumi gashatu n'etanu nirwo yazaire Sela. 13Kayamazire kuzara Sela, arora emyaka endijo bikumi binai n'eshatu. Mara omwo azara abojo abandi n'abaisiki.
14Sela kayabaire aina emyaka makumi gashatu, nirwo yazaire Eberi. 15Kayamazire kuzara Eberi, arora emyaka endijo bikumi binai n'eshatu. Mara omwo azara abojo abandi n'abaisiki.
16Eberi kayabaire aina emyaka makumi gashatu n'enai nirwo yazaire Pelegi. 17Kayamazire kuzara Pelegi, arora emyaka endijo bikumi binai n'eshatu. Mara omwo azara abojo abandi n'abaisiki.
18Pelegi kayabaire aina emyaka makumi gashatu nirwo yazaire Reu. 19Kayamazire kuzara Reu, arora emyaka endijo bikumi bibili na mwenda. Mara omwo azara abojo abandi n'abaisiki.
20Reu kayabaire aina emyaka makumi gashatu n'ebili nirwo yazaire Serugi. 21Kayamazire kuzara Serugi, arora emyaka endijo bikumi bibili na mushanju. Mara omwo azara bojo abandi n'abaisiki.
22Serugi kayabaire aina emyaka makumi gashatu nirwo yazaire Nahori. 23Kayamazire kuzara Nahori, arora emyaka endijo bikumi bibili. Mara omwo azara abojo abandi n'abaisiki.
24Nahori kayabaire aina emyaka makumi gabili na mwendai nirwo yazaire Tera. 25Kayamazire kuzara Tera, arora emyaka endijo kikumi mwo ikumi na mwendai. Mara omwo azara abojo abandi n'abaisiki.
26Tera kayabaire aina emyaka nshanju nirwo yazaire Aburamu, Nahori na Harani.
Oruzaro rwa Tera
27Aba nibo baijukuru ba Tera. Tera akazara Aburamu, Nahori na Harani; Harani akazara Loti. 28Harani akafera mbere Tera, ishe, yagwa omu nsi y'obuzarebwe, Uri ey'Abakalidayo. 29Aburamu na Nahori bakashwera abakazi. Muka Aburamu eibaralye ni Sarai, na muka Nahori eibaralye ni Milika, muhara wa Harani. Harani nashuba nazara Isika. 30Sarai akaba ali mugumba, ataina mwana.
31Tera akwata Aburamu omutabani, n'omwijukuru Loti mutabani wa Harani, n'omuka Sarai omukamwana Aburamu, baruga Uri ey'Abakalidayo kugya Kanaani. Kyonkai kabagobire Harani baba nimwo batura. 32Ebiro bya Tera byona hamoi myaka bikumi bibili n'etanu, mara akagwa Harani.
Currently Selected:
Embandizo 11: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
