Embandizo 14
14
Aburamu nanyaguruza Loti
1Omu makiro ga Amurafeli omukama wa Shinari, na Arioko omukama wa Elasari, na Kedorolaoma omukama wa Elamu, na Tidali omukama wa Goimu, 2abakama aba bakarashana na Bera omukama wa Sodoma, na Birusha omukama wa Gomora, na Shinabu omukama wa Aidima, na Shemeberi omukama wa Seboimu n'omukama wa Bela (niyo Zoari). 3Aba bona bema hamoi omu Ruhanga rwa Sidimu (niyo Nyanja y'Omwonyu). 4Emyaka ikumi n'ebili bakabanza bakolera Kedorolaoma, nawe omu mwaka gwa ikumi n'eshatu bamushenga. 5Omu mwaka gwa ikumi n'enai Kedorolaoma n'abakama abo yabaire ayemire nabo, baija basinga Abarefai omuli Ashiterotikarinaimu, Abazuzi omuli Hamu, Abaemi omuli Shawekiriyataimu, 6n'Abahori omw'ibanga lyabo lya Seiri, kuhika Eliparani bwatana aha irungu. 7Aho bahinduka baija Enimishipati (niyo Kadeshi), basinga ensi yona y'Abaamaleki, n'Abaamori kwakwo abaturaga Hasasonitamari. 8Aho omukama wa Sodoma, n'owa Gomora, n'owa Adima, n'owa Seboimu n'omukama wa Bela niyo Soari, bashohora bema hamoi omu Ruhanga rwa Sidimu 9kurashanisa Kedorolaoma omukama wa Elamu, na Tidali omukama wa Goimu, na Amurafeli omukama wa Shinari na Arioko omukama wa Elasari. Barashana abakama banai omu batanu. 10Oruhanga rwa Sidimu rukaba rwijwire ebina by'elami. Orwo abakama ba Sodoma na Gomora bairukire, abandi babigwamu, abasigaire bairukira omw'ibanga. 11Aho ababisha banyaga eitunga lyona lya Sodoma na Gomora, n'ebyakulya byabo byona, bagenda. 12Banyaga na Loti mutabani wa Aburamu ow'omurumuna ayaturaga Sodoma, n'eitungalye, bagenda.
13Omuamori ayaruhungireho murumuna Isikori na Aneri, aija agambira Aburamu, Omuheburania ayaturaga aha mialoni ya Mamure. Mamure n'abarumuna abalimu Isikori na Aneri bakaba bali banywanyi ba Aburamu. 14Aburamu kayahuliire okwo omutabani bamutwete endore, akwata abashaijabe abegesiibwe eby'endashana, mara bakaba bazaliirwe omwe, bona hamoi bikumi bishatu mwo ikumi na munana, bababinga babagobya Dani. 15Alenga abaisherukarebe ababeganisamu ebichweka. Ayema n'abairube abo babatamagya babagobya Hoba amagyaruguru ga Damasiko. 16Aho agarura omutabani Loti n'eitungalye lyona, n'abakazi n'abantu abandi.
Melikisedeki naha Aburamu omugisha
17Omukama wa Sodoma ashohora kuchwekera Aburamu omu Ruhanga rwa Shawe (nirwo Ruhanga rw'Omukama). Aburamu kayabaire yagarukire, asingiire Kedorolaoma n'abakama abo yabaire ayemire nabo, 18Melikisedeki omukama wa Salemu, aturuka n'omukate n'edivai. Kandi akaba ali mukuhani wa Rukirabyona. 19Aha Aburamu omugisha nagamba ati,
“Ruhanga Rukirabyona,
omutonzi w'eiguru n'ensi,
akutung'omugisha, Aburamu.
20Ruhanga Rukirabyona asingizibwe,
ayakunaga ababisha bawe omu mikono.”
Aburamu amuha ekichweka kya ikumi kya buli munyago. 21Melikisedeki omukama wa Sodoma agambira Aburamu ati, “Abantu obampe, shana ebintu ebyo obitware.” 22Aburamu amushubamu ati, “Ninahira obuso bw'Omukama Ruhanga Rukirabyona, omutonzi w'eiguru n'ensi, 23okwo ntalikwija kutwara ruhuzi anga rukoba rwa nkaito, anga kintu kyona kyona ekili kyawe, otalija okagamba oti, ‘Nkatungisa Aburamu.’ 24Tindikwija kutwara kantu Ebyo abashaija bange balya nibimara. Kyonkai batahi bange: Aneri, Eshikoli na Maure abo batware omugabo gwabo.”
Currently Selected:
Embandizo 14: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.
