Embandizo 20

Aburahamu na Abimeleki

1Aburahamu aruga Mamure agenda ayolekeire ensi ya Negebu. Atura omugati ya Kadeshi na Shuri, ashuba afurukira Gerari; 2kandi mukaziwe yamwetaga munyanya. Nikwo Abimeleki omukama wa Gerari kutumaho Sara akamutwara. 3Kyonkai Ruhanga abonekera Abimeleki omu kiroto omu kiro, amugambira ati, “Leba, ofire, aha rw'enshonga y'omukazi owo watwara aha rw'enshonga ni muk'omushaija.” 4Abimeleki akaba atakamugobire. Aho agamba ati, “Waitu Mukama wange, oraita eihanga nyakatetere? 5Isi ti Aburahamu ayangambiire ati, ‘Ni munyanyazi?’ N'omukazi wenene akagamba ati, ‘Aburahamu ni munyanyazi?’ Ekyo nakikoza omutima nyakatetere, n'engaro zilikwera.” 6Ruhanga amugambira omu kiroto ati, “Ego nimanya okwo ekyo wakikoza omutima nyakatetere, mara n'inye nakulinda otanfakalira; aha rw'ekyo tinakujubura k'omukoraho. 7Mbwenu aho ogarureyo muk'omushaija, kuba omushaija murangi mara arakushabira, orore. Kyonkai k'oraba otamugarwireyo, omanyire kimoi okwo orafa n'abali bawe bona.”

8Abimeleki aimuka bwankya karai ayeta abairube boa abagambira ebigambo ebi bona bahuliliize; batina muno. 9Abimeleki ayeta Aburahamu amubaza ati, “Otukoleireki? Nkufakaliireki? Aha rw'okuba inye n'obukama bwange watugwisa omu ntambara mpango. Onkoleire ebintu ebitakukozirwe. 10Obaire notekeleza kukora ekintu nk'ekyo?” 11Aburahamu amuhorora ati, “Nkikozire aha rw'okuba ntekeleize okwo munu hatalimu kutina Ruhanga n'akake, mara nibaija kunyita kuntura mukazi wange. 12Kandi mazimakwo ni munyanyazi, mwana wa tata kyonkai ti mwana wa mawe; nikyo yabeleire mukazi wange. 13Orwo Ruhanga yanyihire omwaitu akanjenjeza, nkagambira Sara nti, ‘Orambera oti: Buli hantu mbali turata nitugya, ogambe okwo ndi munyanyoko.’ ” 14Ahanyuma Abimeleki akwata entaama n'enumi, aziha Aburahamu, amuteraho abairu n'abazana; mara amugarulira mukaziwe Sara.

15Abimeleki agamba ati, “Lea, Ensi yange yona nogibona, oture aharakushemelera.” 16Kandi agambira Sara ati, “Munyanyoko namuha ebichweka rukumi by'efeza; obu bujulizi ahali bona ab'oinabo okwo oli nyakatetere.” 17Ahanyuma Aburahamu ashabira Abimeleki na mukaziwe n'abazanabe ahali Ruhanga, abakiza bazara abaana. 18Aha rw'okuba ab'omwa Abimeleki bona Omukama akaba abakomire enda nabatura Sara muka Aburahamu.

Currently Selected:

Embandizo 20: RHAY01

Highlight

Copy