Luka 13
13
Hhu'u'uúm
1Qoomaadár kilae mukko nina hardáh, iidíguú mukko Galilaya guri oó' dír Yesu, adór Pilato ngura tsuú/ qoomár inooín tawa hikwaá ilahhooár duxun amór Mungú, tam tseerer'ín tiri aleedók nee tidár hikwa. 2Yesu giri báy, “Mukduú Galilaya oo taa adoosír tsuú/ kuungá' ka xua' an ak múk tlákwe ta múk Galilaya kuduú hatlá' sleémeerowo? 3Aasla'áy, a adoosingeeká. Ala kuungá' bar hhu'u'uunda'aaká, a qwadá' adoosír kilár alé. 4Laqaá mukdá' mibá nee dakaát, kudá' doó gawtí tleér aa i huú', giri tsuú/, dír Siloamu, kuungá' ka xua', mukdá' a ak múk tlákwe ta kuduú hatlá' oo Yerusalemúr i diriia sleémeero? 5Aasla'áy, a adoosingeeká. Ala kuungá' bar hhu'u'uunda'aaká, a qwadá' adoodár kilár alé.”
/Aantsír na/'aá koomaaká
6Yesu giri slaqsaywí báy, “Heeko wák i xa'anoó /aantsír kón, oo taa dahaás baraá qaymoorós ar xaaiikaari ta babay misabiíbu. Ina tláy iri na/'aá leelehhituú áy gawaawós i alé, ala gaa slayká. 7Iri oó' dír heé qaymoodár misabiíbu ga amohhe'emamiís, ‘Ga/aaweek, kureeriká' tamaawo nin na/'aá leelehhituú aa'áw gawaá /aantsírí aleeró, ala gár ni slaaslaw i káhh. /Aantsírí tsateek. Gár yaamu ngihar hhitiin tawó alé a milá?’ 8Ala heé qaymoodár misabiíbu ga amohhe'emamiís iri oó', ‘Aáko, kurkí malé maweek. Án a kakaanuús nee a xaw'í qaás. 9Bar na/'ii ngaa laqwál aluuwo, ka hhoo'. Ala bar ngaa laqwaliká, daqaní ka tsát.’”
/Ameenír taa hungu/uús deelór hungu/umaawo
10Bál deelór hungu/umaawo Yesu ina intsaahhatimís baraá doó saaliingo. 11Nee /ameenirka didaádae i deer ar neetlaamér koom. Inós neetlaameedá' iimír ngiwa eér kureeri a mibá nee dakaát. Neetlaameedá' gari qwambitisa hhe'és, slám inós gan'aasaro ti aleesleeraká. 12Yesu ngiwa ár, gari ateét kari báy, “Aáyo, kiíng taa gweér baraá slahha'amaayeerók tisinge.” 13Yesu dabaawós giri gawaá /ameenidá' i qaás. Nee inós iri ganá' hamtidár kilae, Mungú guri xirfayeemís.
14Heedaáduú úr oo doó saaliingw iri buúhh, asma adoodá' Yesu /ameenidá' ngiwa hungu/uús deelór hungu/umaawo, iri oó' dír boo/aydá', “Deelo lahhoó' ar gadiyeét i deer. Hardaharé' gawaá deeloodá' lahhooe, kuungá' tunduwa hungu/uumisi, ala a bál deelór hungu/umaawooká.”
15Aako iri oó' dír heedá' úr oo doó saaliingw, “Kuungá' a hhaahhafuuse. Umuúqo heewo dirhunge awuuwós laqaá daqwaywós gu duúxiíke baraá matla/aangw nguwa wahaasár ay deelór hungu/umaawo. 16Ala /ameenirí ar xwaylár Abrahamu, inós Neetlaangw gaa tseék kureeri mibá nee dakaát, ala inós i hariíndaáke kawa gweeri baraá tseegamoorihe bál deelór hungu/umaawo.” 17Qoomár iwa axweesi, kudá' sleémeero inós ngu tlaampa'amisá' kiri mureekeés. Ala boo/aay sleémeero iri qwalalaá/ asma muruuduú waa/oo/amo sleémeero oo Yesu aa tleéhh.
Ilmoó haradaáli
(Mt 13:31-32; Mk 4:30-32)
18Yesu iri oó', “Waawuti'iimár Mungú gár kara slaqamís a milá? Laqaá án gár ngir slaqtis a milá? 19Gár kara slaqamís a ilmoó xa'anooko ta babay haradaáli. Hee guna dahaás baraá qaymoorós. Niri ti'iít, iri xa'anoó úr tleehhiít, nee tsir/o maray'ín#13:19 Maray'ín Gídaabá tsuureemooín. giri gawaá haleemiiwós i tlehhít.”
Slaqsoó gár mikaáte ir sluufasluf
(Mt 13:33)
20Iri malé oó', “Waawuti'iimár Mungú gár ngir slaqtis a milá? 21Kana slaqás nee gár mikaáte ir sluufasluf, ar /ameeni aa qás baraá puuruú oo har afi qoomár deebedaá tsár, tam puuruúdá' sleémeero iri sluúf.”
Dahmaá afkuú iiraákw
(Mt 7:13-14, 21-23)
22Yesu ina waaraáhh ar baraá gixsadu nee aya, iri hara loohi intsaahhatimís qoomár iwa aaiiwós kay Yerusalemúy alé. 23Heeko wák Yesu guna yaahaás, “Aáko, múk ba/ám ku niináwe?”
Yesu iri oó', 24“Ilakaaharu tleehhaak tawa data' ar afkuú iiraákw#13:24 Afkuú iiraákw Gídaabá tsufáy iiraáw.. Asma án a kah, awa yaariir dahmu ngu leelehhiyá', ala ngu aleeslay'aaká. 25Qoomár heé do' loó' bira tláy, afkuú do' burngwa tseék, kuungá' tari sihhitá' tsee/aá wa ale tawa ateetiinda' tawa kata', ‘Aáko, do' gweereek.’ Nee kuungá' nuri bay, ‘Amór ta dahha' aníng a xuaaká.’ 26Kuungá' kuri beera', ‘Ana al/ayiimaán nee ana alwahamaán dinkwa nee kuúng, nee kuúng an intsaahhatimaamís baraá yaamuurén wa ale.’ 27Inós kuungá' nuri bay, ‘Amór ta dahha' aníng a xuaaká. Quutlé' dir'eene kuungaásingá' sleémeero awa tlakuuse.’ 28Qoomár Abrahamu nee Isaka nee Yakobo nee aaruuse sleémeero bira aandé' baraá waawuti'iimár Mungú i alé, nee kuungá' tunduri tsee/áy kwaahh, qoomaadae kuungá' tari /aa/amiindá', tari /atlaá /agá'. 29Muu nin hardah oo da/aáw daáhh nee /uwawo, nee oo /iikwaá daáhh nee basko, nee inooín tari iwiit dír muruú /ayma baraá waawuti'iimár Munguhe. 30Nee baraá kuká' awa alaá har'a, bahh'alé ta geerí waaraahh. Nee baraá kudá' geerá har'a, bahh'alé ta alhhe'eesáy kii/.”
Yesu gixsár Yerusalemu ga al/aa/amín
(Mt 23:37-39)
31Siiwadár kilae Yesu kuri i daqáy nee múk Farisayo, kuri báy, “Quútl diirihe, amór hatlá' i tlaweek, asma Herode inós i kuúng gaasár wa slaa'.”
32Yesu giri báy, “Tlawsé', intsangwdá' adbawaak gídaabá, ‘Qaytsiít, laarí nee matlo aníng a neetlaamér gusisiím, nee tiqtuuse ngiwa hungu/umiis. Ala bál tám gadiyér'eé' a boo/eés.’ 33Slám gár án iwa hariím a an kumiít aaiieene laarí nee matlo nee balooqawo, asma i ya/aandaaká aarusmo kuwa dír hatlá' i gaasi, aqo har baraá Yerusalemu.
34“Yerusalemu, Yerusalemu, kiíngadá' aaruusér tsu/a/iim, nee kiwa tlaqwaqut ar tlaa/e kudá' tinda amoorók ya/aáw. A sagaáwa magá' án mukók nguwa burumburtá wa slaa', adoodár koonki tsiioorós ngir burumburariin baraá hhaampi'iiwós, ala kuungá' aga ya/aandi'iiká. 35Qaytsité', Mungú doohúng gwa geexáy. Án a kah, aníng i baloó aanda'aaká daxta ay dír ti oa', ‘I xirfuuti kudá' hardáh ar umuú Aako.’”
Currently Selected:
Luka 13: IQWNT
Highlight
Share
Copy
Want to have your highlights saved across all your devices? Sign up or sign in
Iraqw New Testament © Bible Society of Tanzania, 1977.
