Matayo 20
20
Doosluusér qaymór misabiíbu
1“Waawuti'iimár doori a slaqás nee heé qaymór misabiíbuú koóm. Inós ina tseewa ti'iít doosluuse ngiwa leelehhituú ay, ngiwa huuwi baraá qaymoorós ar misabiíbu. 2Tana al'axweés nee inós, umuú heewo nguwa bui ar shilingmoó wák tlaatla/aangw sleémeerowo. Giri huúw ay baraá qaymoorós ar misabiíbu. 3Iri malé ti'iít matlaatleero qoomár looár tám, múk hatlá' guna ár i sihhimiit baraá sokoónír wa ale, i gadiyér kon'aaká. 4Inós giri báy, ‘Tlawsé' kuungá' sleeme, gadiyeét awaagáy baraá qaymor'eé' ar misabiíbu. Bu'utuuhúng oo hariím án ngu haniís.’ 5Tari daqáy. Iri malé ti'iít looár lahhoó' nee looár gwaleél, aqo adoodár kilá' gana tleéhh malé alé. 6Looár mibá nee wake iwa malé ti'iít, awa hatlá' gina malé ár baraá sokoónír i alé, ta sihhimiit tawó alé. Giri báy, ‘Baré a tawó sihhimitá' diirí wa ale, tlaatla/aangw sleémeero, slám a gadiyér koonda'aaká.’ 7Kuri báy, ‘Asma heé atén taa gadiyeét i haniis i kaahh.’ Giri báy, ‘Kuungá' sleeme tlawsé' ay baraá qaymór misabiíbu.’
8“Qoomár looa iwa dát, aakooduú qaymo loó' sageesihhitusmoowós guri báy, ‘Doosluuse ateeteegáy, bu'utuuín haniiseek. Bu'utu ku iimu/uún dír kudá' naa aluú wa hardah, nee daqadá' ku alhhe'és tam ay dír kudá' naa geerí hardah.’ 9Mukdaáduú gadiyeét gaa iimu/un qoomár looár mibá nee wak, umuúqo heewo aqo shilingmoó wák guna sláy. 10Kudá' aáng gadiyeét ngaa geerí iimu/un, inooín tindiwa hardáh, inooín geera ngiwa xuiya', bu'utuú úr kun kár sláy. Ala umuúqo heewo gár aa sláy aqo shilingmoó wák. 11Qoomár ooharo kuwa hhe'eés, tari qununuú/ dír heedaáduú qaymo loó' i alé. 12Tari oó', ‘Mukwí naa aluú wa hardah, gadiyeét kana tleéhh ar qoomár looár wák kilós, ahaá kuúng bu'utuuín musa alqoomés nee koorén, ateédá' tsee/amá ugwa qiqtlaatlimaan tlaatla/aangw sleémeero?’
13“Inós heé wák dir'ine guri báy, ‘Mulqúmo, án kuúng ugwa /aytimiiká. Aníng nee kuúng gár taa al'axweesaán a shilingmoówoóke? 14Ooheegáy tidá' kuúng wa hariím, waátl. Aníng aga slaá' bu'utuú kudá' naa aluú wa hardah nguwa alqoomees nee kók. 15I hariindakáhe aníng muruueé' nguwa ar gadiyuus ar adór án ngur slaa'. Laqaá daxta kuúng da/i an ara'aánda asma aníng tiwa hhoó'?’”
16Yesu iri ilawaáts giri báy, “Gawaá adoorihe, kudá' alaá hará' ta geerí waaraahh, nee kudá' geerá hará' ta alhhe'eesáy kii/.”
Yesu gwa'araarós ngaa geerí oó' sagaáwa tame
(Mk 10:32-34; Lk 18:31-34)
17Qoomár Yesu iwa tsa/aa/an iwa Yerusalémúr kay, eeharuuseedá' mibá nee tsár kilooín gari huúw dinkwa nee inós. Tawa loohír i dirii'i, gari báy, 18“Ga/aawaagáy, hamí a tsa/aa/amaán tawa Yerusalémúr kawaan, nee Garmoó Hee ku qaas baraá dabaá geeraharuusér uren ar saalíngw múk Yahudi nee intsaahhatuusér hara'ayár Musa. Inooín kuri sakwasleemuut ar kuwa gaasi. 19Aluuwo kuri qaas baraá dabaá múk xoordaá hatlá' as kuwa niqimisi, nee kuri kikii' gawaá msalaába, nee bál tám kuri waaslee/atis.”
Firór Yakobo nee Yohana
(Mk 10:35-45)
20Aayór doó Sebedayo Yesu guri i daqeér dinkwa nee daaqaywós, guri i tumbarara'át, guri firiín /aymuuwo.
21Yesu gari báy, “Gár ta sla' a milá?”
Aayoodá' iri ó', “Na/'iieé' kuká' tsár ya/aameek niwa iwiitiya' oo wák dakók oo doó /iyáy, kuqá' dakók oo doó basáy baraá waawuti'iimaroge.”
22Yesu iri oó', “Gár ta fiririinda' a xua'aaká. Slahha'amkwá#20:22 Slahha'amkwá baraá tsifrír Grikiro gár taa gooín a xooslmo. án ni slaw, kuungá' u qitlá'a?”
Kuri báy, “Adoosíng a aleeslawaán.”
23Yesu giri báy, “Slahha'amkwá án ni slaw, uqo sleerá', ala kángw kuungá' tawa iwita' heeqá' dakw'eé' oo doó /iyáy, kuqá' dakw'eé' oo doó basáy, kangwsíng a kwe'eeneeká. Ala kiteeridá' ki haniis dír mukdá' kisa amohhe'ees nee Baabuúeé'.”
24Nee eeharuuseedár mibaangw adoodá' ngiwa axás, hhaeedá' tsár giri i búhh. 25Ala Yesu eeharuuseedá' gari ateét gari báy, “A xuá' gídaabá waawitú xoordu in waawuti'ii'ín ar /uuru, nee muk'ín oo aleesleemuú koóm gun hara'ayiiyín. 26Ala dirhunge a adoosingeeká. Ala umuúqo heewo oo uroó slaá' dirhunge, masók a sageegadiyusmoohúng. 27Nee umuúqo heewo dirhunge oo geerí warhhamaá slaá', masók a lawaalmoohúng. 28Asma tam Garmoó Hee sleeme naa hardahiiká as kuwa sagadiyuusi, ala nina hardáh as muu nguwa sagadiyuusi nee as slafiingós nguwa haniisi as múk yaariír nguwa gweeri.”
Taampaá tsár kiwa qaytsitís
(Mk 10:46-52; Lk 18:35-43)
29Qoomár tawa tláy Yerikór wa ale, Yesu kuri eehaár nee boo/oó úr oo muu. 30Nee mukko tsár oo taampu aa iwiít afaá loohír i alé. Inooín ngiwa axaasiyé' gídaabá Yesu in waaraahh, tari tseé' ar afór ur, tari oó', “Aáko, Garmoó Daudi, atén ti gurtleer.”
31Mukduú taampu kuri iigahhaát nee boo/oó muu as iwa xasliitiya', ala inooín tseeamooro tari ak buúhh tari oó', “Aáko, Garmoó Daudi, atén ti gurtleer.”
32Yesu iri sihhiít, mukduú taampu guri ateét, iri oó', “Adór ta sla'a' ar nu laaq a adoomá?”
33Kuri báy, “Aáko, gár ta sla'aan, masók ilaarén in qaytsitiyá'.”
34Yesu guruuwós iri tláy, ilaaín giri kwatiít. Hamtidár kilae ilaaín niri qaytsitiyé', Yesu kuri eehaár.
Currently Selected:
Matayo 20: IQWNT
Highlight
Share
Copy
Want to have your highlights saved across all your devices? Sign up or sign in
Iraqw New Testament © Bible Society of Tanzania, 1977.
