Matayo 9

Yesu heé tiqtír sol'omit nguwa húngu/uús

(Mk 2:1-12; Lk 5:17-26)

1Yesu iri tsa/án gawaá miringamoó i alé, iri waaraáhh ar baraá tla/ángw tlawi, iri hardáh ay baraá gixsadá' inós i hooti. 2Heé tiqtír sol'omit kuri huúw dír Yesú i alé, aa qaát gawaá qatani. Nee Yesu haratlintaaor'ín ngiwa ár, iri oó' dír heedaáduú tiqtír sol'omit, “Ma da'ayumiitaar, garmaaeé'. Tlakweemaawók kaa gurtláy.”

3Intsaahhatuusér hara'ayár Musa bahh'alé ta baraá muner'ín i kaahi, “Heewí i Mungú /ooslislín.”

4Ala Yesu tidá' ta baraá muner'ín i axweesi gari tsaáhh, iri oó', “Muruusíng tlákw mus axwesá' baraá munerhunge? 5Gár ák inslaahh a gaalá, a tawa oói, ‘Tlakweemaawók kaa gurtláy’, laqaá tawa ooi, ‘Sihhiít, hi'iít’? 6Ala kuungá' xuaak gídaabá Garmoó Hee aleesleemu gu kón baraá yaamuuwo oo tlakweema hingeesa.” Tiqtusmoodá' guri báy, “Sihhiít, qatanirók gagaareek, waátl amór do'ók.”

7Iri sihhiít, iri waátl amór do'ós. 8Boo/aydá' didí dirií' adoodá' ngiwa ár iri da'ayuút. Mungú kuri xirfayeemiís, oo aleesleemuú adoorí gwa haniis dír múk i alé.

Matayo kuwa ateét

(Mk 2:13-17; Lk 5:27-32)

9Yesu iri tláy didaádae. Qoomár iwa waraahhi heeko guna ár, oo aa iwiit dír doó ohome. Umuuwós a Matayo. Yesu iri oó', “Án eeharáng.”

Iri tláy guri eehaár.

10Nee qoomár Yesu iwa iwiít dír muruú /ayma dír doó Matayo, ohomuusér koódi ar yaariir nee múk tlakuuse tari hardáh, tari iwiít dinkwa nee Yesu nee eeharuuseerós. 11Múk Farisayo adoodá' ngiwa ár, eeharuusér Yesu kari báy, “Ahaá, asma milá, intsaahhatusmoohúng mis /ayín dinkwa nee ohomuusér koódi nee tlakuuse?”

12Yesu axweesanay'ín kudá' nguwa axaás giri báy, “Múk slaqo hhó' i qwaslaarmoó leelehhiitiiká, aqo har tiqtuuse. 13Ala tlawsé', gídaabár /aymi'iiká' aldakuutaak, ‘Gár ni slaa' a ilahhooarooká, ala a kuungá' tiwa kiloohúng gurtleera'.’ Aníng naa hardahiiká asma múk gan'amuuse nguwa ateetiim, ala a múk tlakuuse.”

Yaahastá daanduú gwaawito

(Mk 2:18-22; Lk 5:33-39)

14Qoomaadae eeharuusér Yohana Yesu guri i daqeér iri ó', “Ahaá, atén nee múk Farisayo mas gwaawawimaán, ala eeharuuseerók gaálay i gwaawawiin?”

15Yesu gari báy, “War/á heé duuxuuxuúm adór ir tsuunqumiisiya' a idoomá, qoomár bar ta dinkwár i dirii' nee heedaádá' duuxuuxuúm? Ala deelo i hardát ar heedaádá' duuxuuxuúm kuwa hingeesi. Daqadá' an qoomár inooín tawa sangw gwaawin.

16“Hee i kaahh oo warqamo gu tsaát gawaá inqwaarír /abén wa ale, guri qaas gawaá inqwaarír aa gwa'. Asma warqamoodá' /abén taa qaás, inqwaaridá' qaren ga hhitín, nee didaádá' aa fox iri tláhh. 17Tam muu buurár hamhaami#9:17 Buurár hamhaami Gidaabá buurár hame. ga qamaminká baraá dahhaaroó qarén. Ala birnga qaás, buuraadár hamhaami dahhaaráydá' gu tsú/, buura iri ku'út, nee dahhaaráydá' iri hhitiruut. Ala buurár hamhaami dír ki qamamin a baraá dahhaaroó /abén, daqaní muruuwí tsaraawo ku amohhoó'.”

Dasír taa waaslee/atís, nee /ameenidá' inqwaarír Yesu gaa kwatit

(Mk 5:21-43; Lk 8:40-56)

18Tí ngiwa dir'in i kaahi, naxés heeko úr oo múk Yahudi nina hardáh, guri i tumbarara'aát, iri oó', “Dasir'eé' hamír kilá' aa gwá', ala kuúng qwaláng, dakók i qaaseek, inós daqaní i sláf.”

19Yesu iri tláy, guri eehaár, inós nee eeharuuseerose.

20Hamtidae /ameenirka wák nina hardát, ar tiqaaqiim kureeri mibá nee tsár ar tiqtír ubíngw tseerdu. Aluuwós nginara ót, pasltá inqwaarirós gay kwatít. 21Asma ina baraá muunaáwós i ó', “Pasltá inqwaarirós bara sa kwatiít, a hunguú/.”

22Yesu iri alí warqáy, gari ár, gari báy, “Mune hhe'eés, dasir'eé', haratlintaaoorók iga hungu/ús.” Siiwadár kilae /ameenidá' iri hungú/.

23Yesu iwa dír doó waawutmoodí hardáh, múk filimbó ifhhaám guna didí áy, nee boo/oó muu oo tsuunquumiís. 24Giri báy, “Quutlé', asma dasiirí aa gwaiká, in gú'.” Kuri ló'wa wa qasén. 25Ala boo/aydá' kuwa quutliís, Yesu ina dáh, dasiidá' gari dawa óh, iri sihhít. 26Iidíguuwí iri xu'utiít baraá yaamuudá' sleémeerowo.

Taampaá tsár awa taa ila' qaytsitís

27Yesu iri didá' wa tláy. Iwa geerí kumiít, múk tsár oo taampu gway eehaár, iri tseeamín i kaahi, “Atén ti gurtleer, Garmoó Daudi.”

28Yesu iwa hardáh doó i alé, taampuudá' nguri i daqayé'. Yesu giri báy, “Kuungá' aga haratlinti'í'i gídaabá aníng tlehhamuú adoosíng u aleesláw?”

Tari oó', “Eeít, Aáko.”

29Ilaaín giri kwatimiít, iri oó', “Tisíng taa haratlintié', i tleehharut dirhunge.” 30Ilaaín niri qaytsitiyé'. Ala Yesu giri ló'wa gurbuú' gídaabá, “Iidíguuwí mu baloó heé bawaara'.”

31Ala inooín tari tláy, iidíguuwí kuri tsiyayaáx baraá yaamuudá' sleémeerowo.

Yesu heé afa wasli nguwa hungu/uús

32Tam mukwí qoomár iwa ti'imiiti, heé afa wásl oo neetlaamér koóm kunguri huúw dír Yesu. 33Neetlaameedá' kawa hingeés, heedá' afa wásl iri axweés. Boo/oó muu iri waa/oó/ iri káh, “Gár adoorí aga araaniiká qooma sleémeerowo baraá Israeliwo.”

34Ala múk Farisayo tana oó', “I neetlaamér gusiisín ar /uuruú kuduú úr oo neetlaame.”

Yesu guruuwós ina tláy as muu

35Yesu ina hi'iimiít gixsadu sleémeero wa ale nee ayeemo. Iri intsaahhatimís baraá maraá saalingw'ín wa ale. Ya/abtór hho' ar waawuti'iimár Mungú gari alki/iít, nee tiqti sleémeero gari hungu/uumiís, tam slaqwaatlakwér dimbadimbé. 36Yesu boo/oó muu nguwa ár, iri gurhaamuút, asma boo/aydá' aa slaaqamiít nee taa diyaayaa/aát adór bee/ángw de'eamusmo wásl. 37Yesu eeharuuseerós gari báy, “Bu'uungw ku yaariír, ala múk gadiyeét ku niiná. 38Ala gawaá adoorihe Aakoó bu'uungw na firiimaak as múk gadiyeét nguwa ya/aawi baraá bu'uungós.”

Currently Selected:

Matayo 9: IQWNT

Highlight

Copy