1 Vakorinto 10
10
1Shamashika le vanavama vakwa, yeny nshikundye mure mulamanya sheelyi vande valya veru mmbo valeira woose kwasi ya ifishi, woose vakaira kulya yeeveny, 2woose vakabatiswa naambo vave va Mose kulya ifishiny, na yeeveny ilya. 3Woose vakalya shoonga ilya sheni ya nrima. 4Woose vakana kyeena kilya kyeni kya nrima, mashika mmbo valeniya yoo iweny elyo lyikavakaniswa na Kristo. 5Kyaindi veengyi vawo Iruva nnyalesennywa mmbo-fo, nkyo vakamamityo kulya kasa. 6Naasa mbony yeto tikava nta fyaaso kweru, naambo yese lulasheeva vandu velanga maravi, shaasa na valya valelanga. 7Nta mulave veindya maruva a wongo, shaasa vengyi vawo valetana; shaasa kikee kireiye. Vandu ewo mmbo valekaa rembo naambo valye neena, numa vakakwiipoo vafini mbasa. 8Nta lulatani fya utuusi, shaasa vengyi valevetana, vakafwa vandu fiku makumi avii na varaanu nkonu umwi. 9Nta lulaese Nndumi shaasa valya vengyi valetana vakalyamarwa ni shoka. 10Nta mulakunung'uni, shaasa valya valekunung'una vakaretwa ni nreti ulya. 11Naasa findo efyo mmbo filevakooya wo fikee fyaaso fikareiyo fyelwikimba yese va fyeeri efi. 12Kimmba niindo yeto akulollye sheelyi mmbo aselelyi nalole nalasheewa. 13Nkwiifo kyeeso kilemusheya yeni kuuta ekyo kiinani na nndu wa vandu-fo. Kyaindi Iruva ni nsha, nalaraa mweeswa kiilanyi wiidimi lwany, na lyingyi ando amwi na kyeeso ekyo kavika-u na mwaango weesomuka-u, naambo mwiidimi isisirya.
14Kimaruma kya efyo, vakunde vakwa, kwiiseny iindya maruva a wongo. 15Mmbo shikeerera na vandu vatiri urango nkyekusareny nisha eki nkemuvia. 16A upata lulya lwa mbora luvikyaa mbora, nshi utarannyo lwa mwiili umwi, mashika yese loose mmbo lwawarya kipereshu kya nkate yeto umwi. 17Mashika nkate ni umwi neese lukee vengyi ni mwiili umwi, mashika yese loose mmbo lwawarya kipereshu kya nkate yeto umwi. 18Kummbweny Vaisraeli yewo shaasa vekai kya mwiili, valya velyaa firaso, mmbo valatiri ukulungo na kitara kyerasya? 19A shaambany ki? Shaambany sheelyi kilya kileutwa firaso kwa mafwanu nkindo kya dede? Ao ifwanu nalyo nkindo? 20Nta kinnywa-fo mashika findo filya vafyuuta sha firaso mmbo vafiniingya varumu, nta nshi vaniingya Iruva-fo. Neeny nshikundye yeni mwaakaniswa a varumu-fo. 21Mmushidimaa iniiya upateny lwa Nndumi musande na iniiya upateny lwa varumu-fo. Nta mmushidimaa ilyiiya yoo meseny a Nndumi muvenda ilyiiya meseny a varumu-fo. 22Mmbo lweengye Nndumi kififi ndesa? A mmbo lutiri finya ngota we?
Findo fyoose mfya Iruva
23Findo fyoose mfisha, lyo nshi fyoose fivaa-fo. Findo fyoose mfisha, llyo nshi fyoose fivangisaa-fo. 24Kulave nndu aruuya mbusha yakwe muni-fo, naruuye mbele ya vengi. 25Wo kindo kyakumbwa singireny kulyiiyeny mulavesa-vesaa mwitirwa nnyinyira. 26Shamashika ulana loose mmasaa a Nndumi amwi na fyoose fiishwe-fo. 27Naakwa nndu nalakusirye-u amwaambya kwakwe, neeni mukalanga ikaa kwakwe, kulyiiyeny wo kindo kisheendwaa mbee yaany, mulavesa-vesa nta itirwa nnyinyira. 28Lyo kwakooya nndu amuvia kindo eki mmbo kileutwa kiraso mulakilye-fo, nkimaruma kya yeto aleniingya na nyinyira iveu. 29Mmbo shaamba nnyinyira, nshi yafo yewe-fo, ni ya yeto ungyi. Mashika nkiki-lyo elyi uleke lwakwa lushillywa nnyinyira ya nndu ungyi? 30Kwakooya yeny shawarya filya shaavyo shiitiri kyaanu kwa Iruva, mmbo kivaa inda shaararwa neeny shammaa yaana? 31Naasany, mukalya, ao mukana, ao mukatana kindo kyoose, taniny fyoose mwing'anisaa Iruva. 32Loleny mulasheteva Vayuda ao Vagriki nta siri ya Iruva, 33shaasa yeny nkesennya vandu woose findony fyoose, shilasiaa mbusha yakwa shimuni, kuuta mbusha ya yewo veengyi naambo vakooye ikirwa.
Currently Selected:
1 Vakorinto 10: MASNT00
Highlight
Share
Compare
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.